Jehová Ñeʼẽ ningo oikove.

Mbaʼe mbaʼépa ñanemboʼe Primera ha Segunda a los Corintios

OJAPÓRÕ guare itercér viáhe opredika hag̃ua Pablo oho Éfesope. Upéva oiko áño 55-pe. Haʼe ojepyʼapyeterei umi ermáno Corintoyguáre. Oikuaa ningo oikoha ojodiskuti meme hikuái ha oĩha heko vaíva ijapytepekuéra. Avei umi ermáno ohai chupe peteĩ kárta oporanduhápe heta mbaʼe. Upévare Pablo ohai primera kárta umi Corintoyguápe.

Ohasa mboyve un áño, ohai jey chupekuéra peteĩ kárta. Umi mbaʼe oikovaʼekue yma táva Coríntope ha kongregasiónpe ojogua umi mbaʼe jahasávape koʼág̃a. Upévare koʼã mokõi kuatiañeʼẽ tuicha ñanepytyvõ (Heb. 4:12).

“PEÑEÑANGAREKÓKENA”, “PEPYTA HATÃ PENDE JEROVIÁPE” HA “PEÑEMOMBARETE”

(1 Cor. 1:1–16:24)

Pablo heʼi: ‘Che ermanokuéra, ajerure peẽme peñemoĩ hag̃ua peteĩ ñeʼẽme’ (1 Cor. 1:10, BNP). Avei heʼi Jesucristo haʼeha pe “simiénto” oñemopuʼã hag̃ua kristianokuéra jerovia (1 Cor. 3:11-13, BNP). Pablo oñeʼẽ avei chupekuéra peteĩ ermáno heko vaívare ha heʼi: “Peipeʼa pe mbaʼe vai apoha pende apytégui” (1 Cor. 5:13). Haʼe omomanduʼa chupekuéra: “Ñande rete katu ndahaʼéi teko vaípe g̃uarã, Ñandejárape g̃uarãnte” (1 Cor. 6:13).

Ombohováivo ‘umi mbaʼe oporanduvaʼekue’ chupe umi ermáno, Pablo oñemoñeʼẽ omendávape ha umi soltérope (1 Cor. 7:1). Upéi heʼi mbaʼéichapa oñemoakãvaʼerã kongregasión; mbaʼéichapa ojejapovaʼerã rreunionkuéra ha mbaʼérepa ikatu jaguerovia oñemoingove jeytaha omanovaʼekuépe. Omohuʼãvo ikuatiañeʼẽ heʼi: “Peñeñangarekókena, ha pepyta hatã pende jeroviápe. Peikókena kuimbaʼetéicha, ha peñemombarete” (1 Cor. 16:13, BNP).

Porandukuéra:

1:21. Añete piko “vyrorei” Jehová omboʼéva osalva hag̃ua umi hese ojeroviávape? Nahániri. Péro umi ‘yvypóra ndoiporúiva iñarandukue oikuaa hag̃ua Ñandejárape’, ikatu oimoʼã Jehová oporomboʼéva vyroreiha. Chupekuéra g̃uarã umi mbaʼe Ñandejára oiporúva oporosalva hag̃ua vyrésa rei (Juan 17:25).

5:5. Mbaʼérepa ojeʼe pe oñemosẽva kongregasióngui ‘oñemeʼẽvaʼerãha Satanáspe, hete oñehundi hag̃ua ha pe espíritu osẽ hag̃ua jejopy vaígui’? Peteĩ kristiáno ojapóramo peteĩ mbaʼe ivaietereíva ha noñembyasýi oñemosẽ kongregasióngui. Péicha oho jey Satanás múndo añáme, ha ikatu jaʼe oñemeʼẽha Satanáspe (1 Juan 5:19). Avei oñemosẽvo pe mbaʼe vai apohápe ojepeʼa peteĩ mbaʼe ikatúva ombyai ha omokangy ermanokuérape. Ha oñeñangareko kongregasiónre ani hag̃ua oñemongyʼa (2 Tim. 4:22).

7:33, 34, BNP. Mbaʼépa “umi mbaʼe ko yvy arigua” oipyʼapýva umi omendávape? Koʼápe noñeñeʼẽi umi mbaʼe vai ojejapóvare ko múndope ha enterove ñamboykevaʼerã. Oñeñeʼẽ guei umi mbaʼe ñaikotevẽvare jaikove hag̃ua: tembiʼu, ao ha óga (1 Juan 2:15-17).

 11:26. Tekotevẽpa pyʼỹi ojegueromanduʼa Jesús omano hague, ha arakaʼe pevépa ojejapovaʼerã? Koʼápe Pablo ndeʼíri pyʼỹieterei ojegueromanduʼavaʼerãha. Haʼe ningo heʼínte umi kristiáno ohótava yvágape hoʼu jave pe pán ha pe víno, káda áño og̃uahẽvo 14 de nisán, ohechaukaha ojeroviaha Jesucristo sakrifísiore. Ha ojapovaʼerã upéva oñemoingove jey peve chupekuéra yvágape (1 Tes. 4:14-17).

13:13. Mbaʼérepa ojeʼe mborayhu tuichaveha ñande jerovia ha umi mbaʼe ñahaʼarõvagui? Ág̃a oñekumpli vove umi mbaʼe Jehová oprometevaʼekue natekotevẽmoʼãvéima ñahaʼarõ ha jajerovia oikotaha (Heb. 11:1). Ñane mborayhu katu opytáta opa ára g̃uarã ha upévare ojeʼe tuichaveha.

15:29, BNP. Ikatúpa oĩ “ojevautisáva umi omanóva rehe”? Koʼápe Pablo ndeʼíri jajevautisavaʼerãha umi omanóvare oiméramo ndojevautisáiraʼe. Haʼe oñeʼẽ umi ohótavare yvágape, ha heʼi ojevautisa guive hikuái, osegivaʼerãha ojerovia Jehováre omano meve ikatu hag̃uáicha oñemoingove jey yvágape. Upévare Traducción del Nuevo Mundo heʼi ojevautisaha hikuái omano hag̃ua.

Mbaʼépa ñanemboʼe:

1:26-31; 3:3-9; 4:7. Naiporãi ñañemombaʼeguasu ha jajejapo. Jehovápe añoite ñambotuichavaʼerã. Péichamante jaiko porãmbáta oñondive kongregasiónpe.

2:3-5. Pablo ohórõ guare opredika Coríntope, oiméne okyhyjéraʼe ndoikuaáigui ohendusétapa chupe umi hénte. Upe távape ningo oñemombaʼeterei umi filósofo griégo omboʼéva. Upéicharamo jepe oñembopyʼaguasu ha opredika chupekuéra Ñandejára heʼi haguéicha chupe. Ñande avei ndajakyhyjeivaʼerã japredika hag̃ua. Pablo ojapo haguéicha, jajeroviavaʼerã Jehováre.

2:16, BNP. Jareko hag̃ua “Cristo pyʼapy”, tekotevẽ jaikuaa porã ilája ha mbaʼéichapa haʼe opensa, ha ñañehaʼã jajogua chupe (1 Ped. 2:21; 4:1). Upearã jastudia porã vaʼerã Jesús ojapovaʼekue ha mbaʼéichapa opredika.

3:10-15; 4:17, BNP. Tekotevẽ jahechami mbaʼéichapa ñaporomboʼeñaína ha ñañehaʼã jajapo porãve (Mat. 28:19, 20). Nañamboʼeporãiramo ñane estudiántepe, ndaikatumoʼãi ombohovái umi pruéva oúva. Ha ñande jajesalváramo jepe, haʼetéta ‘tata rupi jahasaramoguáicha’, ñambyasýtagui ñane estudiántepe.

6:18. ‘Ñañemomombyry hag̃ua teko vaígui’ jajehekyivaʼerã umi teko kyʼágui la Biblia ohenóiva pornéia. Péro tekotevẽ avei jajehekýi opa mbaʼe ikatúvagui ñanemoakãraku ñande reko vai hag̃ua. Umíva apytépe ñamaña taʼanga tieʼỹre, ñapensa mbaʼe kyʼáre ha jaiko ñanovillea reipa (Mat. 5:28; Sant. 3:17).

7:29. Umi omendáva oñatendevaʼerã ani ojepyʼapyetereígui ojuehe ombotapykue Ñandejára servísio.

10:8-11. Jehová ipochyetereivaʼekue umi Israelgua oñeʼẽ vaírõ guare Moisés ha Aarón rehe. Upévare ñañatendevaʼerã ani jaiko jakopi ñande rapicháre.

16:2. Iporã ningo ñameʼẽ meme ñane kontrivusión oñemosarambi hag̃ua pe marandu porã.

“PEHEJA AMBUEKUÉRA TAPENEATÕI”

(2 Cor. 1:1–13:14)

Oikuaávo pe ermáno heko vai vaʼekue oñembyasy hague hembiapo vaíre, Pablo heʼi umi Corintoyguápe: “Tekotevẽ peẽ peperdona ha pekonsola ichupe”. Pe kuatiañeʼẽ tenondegua omoñembyasy chupekuéra. Ha Pablo ovyʼa upéva ohechaukágui haʼekuéra ‘oñearrepentiha’ (2 Cor. 2:6, 7; 7:8, 9, BNP).

Pablo heʼi chupekuéra ‘itenondeháicha hikuái opa mbaʼépe’, itenonde hag̃ua avei oipytyvõvo hapichápe. Upéi ombohovái umi oñemoĩvape hese ha ipahápe heʼi enterovépe: ‘Pevyʼaite, peheja ambuekuéra tapeneatõi  ha tapenepytyvõ peiko porã jey hag̃ua Ñandejára renondépe, peiko pyʼaguapýpe oñondivepa’ (2 Cor. 8:7; 13:11, ÑÑB).

Porandukuéra:

2:15, 16, BNP. Mbaʼéicha rupi ñande haʼete “Cristo ryakuã porãnguéicha”? Ñande ningo jajapo la Biblia heʼíva ha japredika ñande rapichakuérape. Péicha haʼete ‘ñaneryakuã porãva’ Jehová ha umi hénte ipyʼaporãvape g̃uarã. Umi iñañávape katu ñambojeguaru.

5:16, BNP. Mbaʼérepa ojeʼe umi ohótava yvágape ‘ndoikuaaiha avavépe yvypóra rekópe’? Haʼekuéra nomañái hapicha morotĩ térã hũpa, iplátapa térã imboriahu, térã mbaʼe tetãyguápa. Iñimportanteve chupekuéra g̃uarã ojeheʼa iñermanokuérare oadora hag̃ua Jehovápe.

11:1, 16; 12:11. Oñemombaʼeguasúparaʼe Pablo oñeʼẽvo umi Corintoyguápe? Nahániri. Péro ikatu oĩ opensáva upéicha ohendúvo Pablo heʼíva ohechauka hag̃ua ojeporavo hague chupe apóstolramo.

12:1-4, BNP. Mávapa pe “ojererahavaʼekue paraísope”? Ikatu jaʼe apóstol Pablo hague. Haʼe omombeʼu ko mbaʼe heʼi rire ojeporavo hague chupe apóstolramo. Ha la Biblia ndeʼíri mamove hendápe ambue tapicha ohecha hague ko visión. Oiméne Pablo ohecha mbaʼéichapa kristianokuéra ovyʼáta oĩ porãgui Jehová ndive ‘ára pahápe’ (Dan. 12:4).

Mbaʼépa ñanemboʼe:

3:5. Ko téysto ohechauka Jehová ñanembokatupyryha japredika hag̃ua. Ojapo upéva Iñeʼẽ, ijespíritu sánto ha iñorganisasión rupive (Juan 16:7: 2 Tim. 3:16, 17). Upévare iporã jastudia meme la Biblia ha umi rrevísta ha lívro, avei jajerure Jehovápe ijespíritu, jaha rreunionhápe ha ñakomenta (Sal. 1:1-3; Luc. 11:10-13; Heb. 10:24, 25).

4:16, JMP. “Koʼẽ koʼẽre” Jehová ombopyahu ‘ñande pyʼapy’. Upévare jaiporuvaʼerã opaite mbaʼe omeʼẽva ñandéve, ha ani jahasa peteĩ ára jepe ñamombareteʼỹre ñande jerovia.

4:17, 18. Ñanemanduʼáramo umi mbaʼe ijetuʼúva ‘ivevýi ha pyaʼe ohasaha’ jagueropuʼaka porãvéta.

5:1-5. Koʼápe Pablo omombeʼu porãiterei umi ungido ohoseha oiko yvágape.

10:13. Ndojejeruréiramo ñandéve ñaipytyvõ hag̃ua ambue hendápe, japredikavaʼerã ñane kongregasión territórionte.

13:5. Tekotevẽ ‘jahecha ñaime hatãpa ñande jeroviápe’ ha jaikópa Ñandejára Ñeʼẽ heʼiháicha. Jajepyʼamongetavaʼerã ñaime porãpa Jehová ndive, jahechakuaápa “mbaʼépa iporã ha mbaʼépa ivai”, ha mbaʼépa jajapo jahechauka hag̃ua ñande jerovia (Heb. 5:14; Sant. 1:22-25). Koʼã konsého porãite Pablo omeʼẽvaʼekue katuete ñanepytyvõta jaguata hag̃ua Ñandejára rapére.

[Nóta oĩva taʼanga ndive páhina 31]

Tekotevẽpa pyʼỹi ojegueromanduʼa Jesús omano hague? (1 Cor. 11:26)