Ndajaikuaáiko moõpa osẽ porãta

‘Eñemitỹ pyharevekue ha kaʼarukue avei. Ndajaikuaáiko osẽ porãtapa, pe oñeñotỹ raẽva térã upe rireguáva, térãpa mokõivéva osẽ porãta.’ (ECL. 11:6.)

1. Mbaʼéichapa ñañeñandu jahechávo umi kóga ha mbaʼépa ñanemboʼe?

 PE OÑEMITỸVA ohaʼarõkuaavaʼerã (Sant. 5:7). Oñemitỹ rire, ohaʼarõvaʼerã heñói pe semílla ha okakuaa mbeguekatúpe. Yvy porãramo katu heñoimbaite pe oñotỹva. Upéi okakuaa, hiʼa ha otyarõvõ ikatúma oñemonoʼõ. Ñamombaʼete ningo jahechávo mbaʼéichapa okakuaa umi kóga! Upéva ñanemboʼe tekotevẽha ñaneumílde. Ñande ningo ikatu ñañemitỹ ha jarrega, péro Ñandejára añoite ikatu omongakuaa (embojoja 1 Corintios 3:6-re).

2. Mbaʼépa ñanemboʼe pe jahechavaʼekue pe ótro artíkulope?

² Jahecha haguéicha pe ótro artíkulope, Jesús ombojoja ñanerembiapo peteĩ oñemitỹvare. Pe oñemitỹvaʼekue opaichagua yvýpe ñanemboʼe, iporãramo jepe pe semílla, okakuaa hag̃ua tekotevẽha ipyʼaporã pe ohendúva (Mar. 4:3-9). Ha ‘pe oñemitỹvaʼekue ha upéi oke’, ñanemboʼe ñande ndajaikuaaiha mbaʼéichapa okakuaa pe ñañotỹva. Jahechákuri ndahaʼeiha ñañehaʼã rupi oĩha hetaitereive oservíva Jehovápe (Mar. 4:26-29). Ñahesaʼỹijóta koʼág̃a mbohapy ehémplo Jesús omombeʼuvaʼekue: pe mostása raʼỹi, pe levadúra ha pe réd ojeityhápe hetaiterei pira. *

Pe mostása raʼỹi

3, 4. Mbaʼépa ñanemboʼe pe ehémplo oñeʼẽva pe mostása raʼỹire?

³ Pe ehémplo oñeʼẽva mostása raʼỹire, jatopa avei Marcos kapítulo 4-pe. Ko ehémplo ñanemboʼe mokõi mbaʼe iñimportánteva: mbaʼéichapa oĩ hetaitereive oservíva Jehovápe ha mbaʼéichapa haʼe oñangareko hesekuéra. Jesús heʼi: ‘Mbaʼépepa ojogua Ñandejára Rréino? Ojogua mostása raʼỹime, oñeñotỹramo michĩeteve opa mbaʼe raʼỹigui. Upe rire okakuaa ha tuichave umi ambue kógagui, ha guyrakuéra jepe ojaitypo hakãre’ (Mar. 4:30-32).

⁴ Ko ehémplope oñeñeʼẽ Ñandejára Rréino tuichaiterei okakuaaha. Jahechakuaa upéva ojekuaauka rupi pe marandu porã oparupiete. Ha mbaʼeichaitépa opuʼã Jehová organisasión pe áño 33 guive. Pe mostása raʼỹi ningo ojeporu sapyʼánte oñeñeʼẽ hag̃ua peteĩ mbaʼe michĩetereívare  (embojoja Lucas 17:6). Péro michĩramo jepe pe mostása raʼỹi, okakuaa rire ikatu ijyvate 5 métro rupi ha hakã mbarete. Upévare ikatu voi jaʼe hese yvyramataha (Mat. 13:31, 32).

5. Mbaʼéichapa okakuaa pyaʼe rakaʼe pe kongregasión?

⁵ Pe kongregasión oñepyrũrõ guare áño 33-pe oĩvaʼekue 120 disípulo. Saʼíramo jepe hikuái upérõ, sapyʼaitérõ g̃uarã hetaitereive oĩ ogueroviáva Jesúspe (jaleemína Hechos 2:41; 4:4; 5:28; 6:7; 12:24; 19:20). Upéi, 30 áño mboyve hetaitereivéma oĩ opredikáva. Upévare, apóstol Pablo heʼi umi ermáno Colosasguápe, ‘pe marandu porã ojekuaaukáma oparupiete’ (Col. 1:23). Péicha jahecha mbaʼeichaitépa okakuaa pyaʼe pe kongregasión!

6, 7. a) Mbaʼéichapa okakuaa Jehová organisasión 1914 guive? b) Péro mbaʼeichaite pevépa okakuaavéta?

⁶ Jesús oñepyrũ oisãmbyhy yvágape áño 1914-pe. Upe áño guive pe mostása rakã okakuaaháicha, Jehová organisasión pyaʼeterei okakuaa. Ñandejára siervokuéra ohecha mbaʼéichapa oñekumpli Isaías heʼivaʼekue: ‘Pe michĩvéva tuichavéta ha pe mbovýva hetavéta, oikóta chugui tetã guasu’ (Isa. 60:22). Pe síglo XX oñepyrũ riremi saʼi gueteri oĩvaʼekue umi opredikáva. Ava piko oimoʼãta ko áño 2008-pe oĩmaha siete millones rupi testigos de Jehová ha ojepredikaha 230 tetã rupi! Jehová organisasión tuichaiterei okakuaa, pe mostása raʼỹicha.

⁷ Péro Jehová organisasión okakuaavéta. Og̃uahẽta pe ára opavave yvypóra oñemoĩtaha Ñandejára Rréino poguýpe. Upérõ umi iñañáva oñehundipátama. Koʼã mbaʼe ningo Jehová ojapóta, ndahaʼéi yvyporakuéra (jaleemína Daniel 2:34, 35). Upéicha jahecháta mbaʼéichapa oñekumpli proféta Isaías heʼivaʼekue: ‘Yvy henyhẽta Ñandejára arandúgui’ (Isa. 11:9, ÑÑB).

8. a) Mávapa umi guyra ko ehémplope? b) Mbaʼéichapa Jehová oñangareko hesekuéra?

⁸ Jesús heʼi umi guyrakuéra ouha oñemoʼã pe yvyra rakãre, upéva orrepresenta Ñandejára Rréino. Pe ótro artíkulope jahecha kuri umi guyra hoʼu hague pe semílla (Mar. 4:4). Péro ko ehémplope umi guyrakuéra ndahaʼéi Ñandejára enemígo. Haʼe guei umi tapicha ipyʼaporãva oúva Jehová organisasiónpe. Jehová ningo oñangareko koʼãvare ani hag̃ua heko kyʼa térã ojeheʼa rrelihión japúre (embojoja Isaías 32:1, 2). Jehová ombojoja avei peteĩ yvyramátare Jesús sãmbyhy, heʼívo: ‘Añotỹta Israel sérrope. Upépe hakãta, hiʼáta ha oikóta chugui peteĩ cedro neporãmba jepéva. Ha ijatýta hakãre opaichagua guyra’ (Eze. 17:23).

 Pe levadúra

9, 10. a) Mbaʼépa ohechauka Jesús oñeʼẽrõ guare pe levadúrare? b) Mbaʼéichapa Ñandejára Ñeʼẽme pyʼỹi ojeporu jepi pe levadúra?

⁹ Jesús heʼi: ‘Ñandejára Rréino ningo ojogua levadúrape, peteĩ kuñakarai ombojeheʼavaʼekue arínare ombovupa hag̃ua’ pe mása. Upéicha Jesús ohechauka ñande ndaikatuiha jahecha mbaʼéichapa okakuaa Ñandejára kongregasión (Mat. 13:33, ÑÑB). Péro mbaʼépa pe levadúra? Ha mbaʼérepa ojogua Ñandejára Rréinope?

¹⁰ Ñandejára Ñeʼẽme pyʼỹi ojeporu levadúra oñeñeʼẽ jave pekádore. Pór ehémplo, apóstol Pablo oñeʼẽrõ guare umi Corintoyguápe peteĩ heko vaívare, heʼi pe levaduraicha pe mbaʼe vai ombyaitaha kongregasiónpe (1 Cor. 5:6-8). Péro Jesús oñeʼérõ guare pe levadúrare: Heʼisépa avei okakuaaha peteĩ mbaʼe vai kongregasiónpe?

11. Mbaʼéicha javépa oiporuvaʼekue umi Israelgua pe levadúra?

¹¹ Ñambohovái hag̃ua pe porandu jahecha raẽta mbohapy mbaʼe. Primero, Jehová heʼíramo jepe umi Israelguápe ani hag̃ua oiporu levadúra pe Pascua aja, ndeʼíri ndovaleiha ojeporu upe rire. Pór ehémplo, umi Israelgua oiporuvaʼekue levadúra ojapo hag̃ua sakrifísio Jehovápe, oagradese térã oiko porã hag̃ua hendive. Upéicha jave ningo okaru ha ovyʼa joa hikuái, oagradese Jehovápe omeʼẽ haguére chupekuéra heta mbaʼe porã (Lev. 7:11-15).

12. Mbaʼéichapa sapyʼánte ojeporu peteĩ mbaʼe Ñandejára Ñeʼẽme?

¹² Segundo: sapyʼánte Ñandejára Ñeʼẽme ojeporu peteĩ mbaʼe oñerrepresenta hag̃ua ivaíva ha upéi ótro hendápe orrepresenta hag̃ua iporãva. Pór ehémplo, 1 Pedro 5:8-pe ojeʼe Satanás ojoguaha peteĩ león pochýpe. Péro Revelación 5:5-pe heʼi Jesús haʼeha “pe Judá trivupegua León”. Koʼápe oñeñeʼẽ pe león rehe ojehechauka hag̃ua pyʼaguasu ha tekojoja.

13. Mbaʼépa ohechauka Jesús heʼivaʼekue pe levadúrare?

¹³ Tercero katu, Jesús ndeʼíri voi pe levadúra ombyaiha pe arínape. Haʼe ningo omombeʼúnte mbaʼéichapa ojejapo pe pán. Pe kuñakarai ningo omoĩse voínte kuri pe levadúra, ha upéicha osẽ porã chupe. Péro haʼe ndohechái mbaʼéichapa ovu pe mása, pórke pe levadúra ojeheʼapa pe arínare. Ko ehémplo ñanemomanduʼa pe oñemitỹvare ha oke. Jesús heʼi ‘pe semílla heñói ha okakuaa, [pe oñemitỹva] ohechakuaaʼỹre’ (Mar. 4:27). Upéva ohechauka ndajaikuaaiha mbaʼéichapa Jehová omongakuaa iñorganisasión. Péro upéicharõ jepe, upe rire entérove jahecha mbaʼéichaitepa tuichaiterei okakuaa.

14. Mbaʼépa ohechauka predikasión rehe, pe ehémplo Jesús omombeʼuvaʼekue?

¹⁴ Pe kuñakarai ningo ‘ombojeheʼa [levadúra] pe arínare ombovupa peve’ pe mása kompletoite. Upéva ohechauka Jehová organisasión okakuaaha oparupiete ko yvy ape ári (Luc. 13:21). Predikasión rupive ningo Jehová omongakuaa iñorganisasión.  Upévare pe marandu porã ojekuaauka ‘opa rupi ko yvy ape ári’ (Hech. 1:8; Mat. 24:14). Ajépa javyʼaite ikatu haguére ñaipytyvõ Jehovápe ko tembiapo ijojahaʼỹvape!

Pe red ojeityhápe hetaiterei pira

15, 16. a) Emombeʼumi pe ehémplo oĩva Mateo 13:47-50 peve. b) Mbaʼépa pe red, ha mbaʼépa ñanemboʼe ko ehémplo?

¹⁵ Jehová ndahaʼéi oipotánteva ñande reta, oipota guei isiervokuéra oñehaʼã ojapo opa mbaʼe Jesús ojapo hagueichaite. Upéva ñanemboʼe ko ótro ehémplo Jesús omombeʼuvaʼekue: ‘Ñandejára Rréino ningo ojogua avei peteĩ red márpe ojeitývape, ha ombyatýva opaichagua pira’ (Mat. 13:47, BNP).

¹⁶ Ko ehémplope oñembojoja ñane predikasión peteĩ red rehe ojeityhápe opaichagua pira. Jesús heʼive: ‘Ha henyhẽmaramo [pe red] oguenohẽ hikuái y rembeʼýpe. Ha oguapy upépe oiporavo umi pira, oñongatu ajakápe umi iporãva ha ivaíva katu omombo. Upéicha oikovaʼerã ára pahápe. Umi anhelkuéra osẽvaʼerã oipeʼa hag̃ua ivaíva iporãva apytégui. Ha oityvaʼerã umi ivaívape tata rendýpe, upépe ipochy ha ojaheʼóta hikuái’ (Mat. 13:48-50).

17. Arakaʼépa oñekumpli pe ehémplo réd rehegua?

¹⁷ Arakaʼépa oikóta ko pira jeporavo? Oñekumplítapa ojeporavotaha árape mávapa ovecha térã kavara? (Mat. 25:31-33.) Nahániri, upéva ningo oikóta ko múndo oñehundívo, pe jehasa asy guasu jave. Ha pe ehémplo red rehegua katu oñekumpli ko ‘ára pahápe’, opátava jehasa asy guasúpe. * Upéicharõ máva mávapepa ojeporavo koʼág̃a?

18, 19. a) Mbaʼépa ojejapo ko ñane tiémpope? b) Mbaʼépa tekotevẽ ojapo enterove ipyʼaporãva? (Ehechamína avei pe nóta.)

¹⁸ Ko ñane tiémpope, hetaiterei oĩ oñembojáva Ñandejára organisasiónre. Ijapytepekuéra oĩ umi ohóva Conmemoraciónpe, rreunionhápe ha ostudiáva ñanendive. Péro ojapópa hikuái Ñandejára heʼíva? Oñeguenohéramo jepe chupekuéra múndogui, Jesús heʼi haguéicha umi pira iporãvante oñeñongatuha umi ajakápe. Umi ajaka orrepresenta umi kongregasiónpe. Ha Jesús heʼi umi pira ivaívape ojepoi tata rendýpe, upéva heʼise oñehunditaha opa ára g̃uarã.

¹⁹ Umi pira vai orrepresenta umi ostudiavaʼekue la Biblia ha upéi oheja. Avei oĩ umi mitãrusukuéra ndoserviséiva Jehovápe jepe ituvakuéra testígo, térã oñepyrũramo jepe oservi chupe upéi oñemomombyry chugui (Eze. 33:32, 33). * Upévare tekotevẽ enterove ipyʼaporãva oheja oñemoinge chupekuéra umi [ajakápe] kongregasiónpe. Jajapókena upéva ko múndo oñehundi mboyve.

20, 21. a) Mbaʼépa ñanemboʼe umi mbohapy ehémplo ñahesaʼỹijovaʼekue? b) Mbaʼépa koʼág̃a jajapovaʼerã?

 ²⁰ Mbaʼépa ñanemboʼe umi mbohapy ehémplo ñahesaʼỹijovaʼekue? Tenonderã jahecha Ñandejára Rréino tuichaiterei okakuaaha pe mostása raʼỹicha. Ha avave ndaikatuiha ojoko Jehová rembiapo (Isa. 54:17). Avei heta tapicha ikorasõ porãva ou oñemoʼã hag̃ua Jehová organisasiónpe. Ha pe segundo ehémplo ñanemboʼe Jehová omongakuaaha iñorganisasión. Ha pe mása ndojehechaiháicha ovu jave, upéicha avei ndajaikuaái mbaʼéichapa Jehová omongakuaa iñorganisasión. Péro upéicharõ jepe, upe rire entérove jahecha mbaʼéichaitepa tuichaiterei okakuaa. Avei jahecha pe ehémplo red reheguápe: oĩramo jepe heta ohendúva pe marandu porã naentéroi oservi Jehovápe. Oĩ ningo ojoguáva umi pira ivaívape heʼi haguéicha Jesús.

²¹ Ajépa javyʼaite jahechávo Jehová ombyatyha iñorganisasiónpe heta yvypóra ipyʼaporãvape! (Juan 6:44.) Upéicha jahecha, Jehová ñanepytyvõ rupi heta tetãme heta hetave oĩ omombaʼeguasúva chupe. Upévare koʼág̃a ñahesaʼỹijo rire koʼã mbaʼe jajapovaʼerẽ ko konseho heʼíva: ‘Eñemitỹ pyharevekue ha kaʼarukue avei. Ndajaikuaáiko osẽ porãtapa, pe oñeñotỹ raẽva térã upe rireguáva, térãpa mokõivéva osẽ porãta’ (Ecl. 11:6).

[Nóta]

Ñanemanduʼápa?

• Mbaʼe mbaʼépa ñanemboʼe pe ehémplo oñeʼẽva pe mostása raʼỹire?

• Mbaʼépa ñanemboʼe Jesús heʼivaʼekue pe levadúrare?

• Mbaʼépa ñanemboʼe pe ehémplo red rehegua Ñandejára Rréinore?

• Mbaʼépa jajapovaʼerã ñaĩ hag̃ua Jehová organisasiónpe?

[Porandu ñahesaʼỹijóva]

[Nóta oĩva taʼanga ndive páhina 25]

Mbaʼépa ñanemboʼe pe ehémplo oñeʼẽva pe mostása raʼỹire?

[Nóta oĩva taʼanga ndive páhina 26]

Mbaʼépa ñanemboʼe Jesús heʼivaʼekue pe levadúrare?

[Nóta oĩva taʼanga ndive páhina 28]

Máva mávape ojeporavõ koʼág̃a?