Ñañeʼẽkuaákena pe ‘ñeʼẽ potĩ’
Ñañeʼẽkuaákena pe ‘ñeʼẽ potĩ’
‘Tetãnguérape ameʼẽta peteĩ ñeʼẽ potĩ, enterovéva omombaʼeguasu hag̃ua che réra’ (SOF. 3:9, NM.)
1. Mbaʼe jopói ijojahaʼỹvapa omeʼẽ ñandéve Jehová?
ÑANDEJÁRA ningo ñanembokatupyry ñañeʼẽ hag̃ua ha upéva peteĩ jopói ijojahaʼỹva (Éxo. 4:11, 12). Adán oñeʼẽ ha omboheravaʼekue heta mbaʼe (Gén. 2:19, 20, 23). Aje piko ndaijojahái Ñandejára rembiapokue! Upéicha rupi ikatu ñañemongeta ñande Ru Jehová ndive ha ñamombaʼeguasu héra.
2. Mbaʼérepa yvyporakuéra noñeʼẽvéi peteĩ idiómapente?
2 Yma ningo oñeñeʼẽvaʼekue ‘peteĩ idiómapente’ (Gén. 11:1, ÑÑB). Péro upéva okambia Nemrod tiémpope, yvyporakuéra opuʼãrõ guare Jehováre. Haʼekuéra naiñeʼẽrendúigui Ñandejárape oñembyaty oiko hag̃ua Babélpe. Ha oñemombaʼeguasuségui ojapo hikuái peteĩ tórre ijyvatetereíva. Upévare, Jehová okambiapa chuguikuéra iñidióma ha noñontendevéi hikuái. Upévare umi hénte isarambipa ha oho oiko opárupi rei ko yvy ape ári (jaleemína Génesis 11:4-8).
3. Mbaʼépa oiko Jehová okambiárõ guare yvyporakuéra idióma?
3 Hetaiterei idiómape ningo oñeñeʼẽ koʼág̃a rupi ko múndope (seis mil ochocientos rupi) ha upévare nañapensái peteĩchapa. Jehová okambiárõ guare yvyporakuéragui iñidióma, ombyesarái chupekuéra iñidióma ypykuégui. Upéi omeʼẽ chupekuéra peteĩ idióma pyahu ha okambia chuguikuéra opensa lája. Upéicha rupi káda idiómape oñeñeʼẽ ha ojehai diferénte. Ndareíri ningo héra Babel térã ‘Joavypa’ upe táva ojejapo hague pe tórre yvate (Gén. 11:9, nóta). La Biblia añoite omombeʼu porã mbaʼéichapa oñepyrũrakaʼe umi idióma jaikuaáva koʼág̃a rupi.
Peteĩ ñeʼẽ pyahu ha ipotĩva
4. Mbaʼépa heʼi Jehová oikotaha ñane tiémpope?
4 Tuicha mbaʼe ningo upe Jehová ojapovaʼekue Babélpe. Upéicharamo jepe ñane tiémpope oikohína peteĩ mbaʼe tuichaitereive ha iñimportantevéva. Jehová heʼi voi: ‘Tetãnguérape ameʼẽta peteĩ ñeʼẽ potĩ, enterovéva omombaʼeguasu hag̃ua che réra, ha cheservi hag̃ua oñondivepa’ (Sof. 3:9, NM). Mbaʼépa heʼise ko ‘ñeʼẽ potĩ’? Ha mbaʼéichapa ikatu ñañeʼẽkuaa?
5. Mbaʼépa heʼise pe ‘ñeʼẽ potĩ’? Mbaʼépa ojehupyty upe ñeʼẽ potĩ rupive?
5 Pe ‘ñeʼẽ potĩ’ ningo jatopa la Bíbliape ha heʼise jaikuaa porã Ñandejárape ha hembipota. Umi oñeʼẽkuaáva ko ‘ñeʼẽ potĩ’ oikuaa porã mbaʼépa Ñandejára Rréino ha mbaʼéichapa ko goviérno rupive Jehová omombaʼeguasúta héra. Oikuaa avei hikuái upe Rréino rupive yvyporakuéra oikotaha vyʼápe opa ára g̃uarã ko yvy ape ári. Mbaʼépa ojehupyty upe ‘ñeʼẽ potĩ’ rupive? Pe profesía heʼiháicha, yvyporakuéra ‘omombaʼeguasúta Jehová réra ha oservíta chupe oñondivepa’. Ha upeichaite ningo oiko, oñemombaʼeguasu Jehová réra ha isiervokuéra oservi chupe peteĩ ñeʼẽme. Ndahaʼeiete Babélpe oiko haguéicha.
Mbaʼéichapa ikatu ñaaprende upe ñeʼẽ potĩ
6, 7. a) Ñañeʼẽkuaa hag̃ua peteĩ idiómape térã ñaaprende hag̃ua pe ‘ñeʼẽ potĩ’, mbaʼépa jajapovaʼerã? b) Mbaʼépa jahecháta koʼág̃a?
6 Ñañeʼẽkuaa hag̃ua peteĩ idiómape ndahaʼéi jaikuaantevaʼerã de memória umi ñeʼẽ. Tekotevẽ ñakambia ñapensa lája. Jaikuaavaʼerã upe idiómape ikatuha noñepensái ñande ñapensaháicha. Upéicha avei ikatu umi pukarã ñandéve igústova chupekuéra nombopukái. Ha ñañehaʼãvaʼerã ñanekũjere upe idiómape. Upeichaite ningo ojapovaʼerã peteĩ oaprende ñepyrũva pe ‘ñeʼẽ potĩ’ oĩva la Bíbliape. Tekotevẽ oikuaa umi mbaʼe hypyʼũvéva omboʼéva la Biblia, ha okambia opensa lája (jaleemína Romanos 12:2; Efesios 4:23).
7 Jaikuaa rire upe ‘ñeʼẽ potĩ’, ñañehaʼãvaʼerã ñañeʼẽ porã. Mbaʼépa ñanepytyvõta upearã? Tekotevẽ jajapo umi mbaʼe ojejapóva jepi voi oñeaprende hag̃ua peteĩ idióma. Jahechamína mbaʼépa ojejapo jepi ha mbaʼéichapa ikatu ñanepytyvõ ñañeʼẽ porã hag̃ua pe ‘ñeʼẽ potĩ’.
Mbaʼéichapa ikatu ñañeʼẽ porã pe ‘ñeʼẽ potĩ’
8, 9. Mbaʼépa jajapovaʼerã ñantende hag̃ua pe ‘ñeʼẽ potĩ’? Mbaʼérepa jajapysaka porã vaʼerã?
8 Jajapysaka porãkena. Ñahendúramo oñeñeʼẽ ótro idiómape, ñepyrurã ikatu nañantendéi mbaʼeve (Isa. 33:19). Péro ñahendu memévo, ikatu jaikuaáma heta ñeʼẽ ha ñantende mimíma ojeʼéva. La Biblia voi heʼi ñandéve: ‘Jajapysaka porã vaʼerã umi mbaʼe ñahendúvare ani hag̃ua ñasẽ Jehová rapégui’ (Heb. 2:1). Jesús heʼi jey jey vaʼekue hemimboʼekuérape: “Ohendúvake tojapysaka porã” (Mat. 11:15; 13:43; Mar. 4:23; Luc. 14:35). Upeichaite, jajapysaka porã vaʼerã umi mbaʼe ñahendúvare ñantende hag̃ua pe ‘ñeʼẽ potĩ’ (Mat. 15:10; Mar. 7:14).
9 Jajapysaka hag̃ua ojeʼévare ñandéve tekotevẽ ñañatende porã (Luc. 8:18). Ijetuʼúpa ndéve reñatende hag̃ua rreunionhápe? Nañañehaʼãiramo jajapysaka porã, ikatu nañantendéi umi mbaʼe ojeʼéva (Heb. 5:11).
10, 11. a) Mbaʼépa jajapovaʼerã avei ñaaprende hag̃ua peteĩ idióma? b) Mbaʼépa tekotevẽ jajapo ñaaprende hag̃ua pe ‘ñeʼẽ potĩ’?
10 Ñañehaʼãkena ñañeʼẽ porã. Umi oaprendéva peteĩ idióma oñatendevaʼerã mbaʼéichapa hapichakuéra oñeʼẽ upe idiómape oñeʼẽ hag̃ua haʼekuéraicha. Upéicha oñentende porãta chupe ha ndojekuaamoʼãi hese oaprendénte hague upe idióma. Ñande avei ñañatendevaʼerã mbaʼéichapa umi ikatupyrýva oporomboʼe pe ‘ñeʼẽ potĩ’ (2 Tim. 4:2). Upéicharõ, jajerurékena chupekuéra tañanepytyvõ ha tañandekorrehi jajavy jave (jaleemína Hebreos 12:5, 6, 11).
11 Ñaaprende hag̃ua pe ‘ñeʼẽ potĩ’ tekotevẽ jaguerovia umi mbaʼe ñaaprendéva ha ñamboʼe ñande rapichakuérape. Péro tekotevẽ avei jajapo Ñandejára heʼíva. Mbaʼéichapa ikatu jajapo upéva? Upearã ñañatende porã vaʼerã mbaʼéichapa ñande rapichakuéra ojerovia Jehováre ha oservi chupe. Ha ñañehaʼã jajapo avei upéicha. Jesús voi omoĩ ñandéve pe ehémplo iporãvéva (1 Cor. 11:1; Heb. 12:2; 13:7). Upéicha jajapóramo, jaservíta oñondivepa Ñandejárape peteĩ ñeʼẽme (1 Cor. 4:16, 17).
12. Mbaʼépa oipytyvõ heta héntepe oaprende hag̃ua peteĩ idióma?
12 Ñaaprendékena heta mbaʼe de memória. Umi oaprendéva peteĩ idióma oñehaʼã oikuaa de memória heta mbaʼe. Ñandéve avei ñanepytyvõta jaikuaáramo de memória heta mbaʼe oĩva la Bíbliape. Pór ehémplo, ikatu ñaaprende umi livrokuéra réra, Israel trivukuéra réra ha umi doce apóstol réra. Avei umi kántiko ha téysto. Pór ehémplo, peteĩ mitãʼi orekóva seis áño oikuaa de memória 80 versíkulo oĩva la Bíbliape. Ha yma umi Israelgua oikuaavaʼekue heta salmo de memória. Ikatúpa nde reñehaʼã avei reikuaa de memória koʼãichagua mbaʼe?
13. Mbaʼérepa iñimportánte ojeʼe jey jey ñandéve umi mbaʼe la Biblia omboʼéva?
13 Jaʼe jey jeýkena. Upéicharõ ndahasymoʼãi ñanemanduʼa hag̃ua umi mbaʼe ñaaprendéva. Upévare ningo iñimportánte ojeʼe jey jey ñandéve umi mbaʼe la Biblia omboʼéva. Apóstol Pedro ningo heʼi: ‘Pomomanduʼa jey jey koʼã mbaʼére, peẽ peikuaa porã ha pejeroviáramo jepe Ñandejárare’ (2 Ped. 1:12, ÑÑB). Pyʼỹi ojeʼéramo ñandéve peteĩ mbaʼe ñantende porãvéta ha akóinte ñaneñeʼẽrendúta Jehovápe (Sal. 119:129). Koʼẽ koʼẽre ñahesaʼỹijovaʼerã Ñandejára Ñeʼẽ ha jajepyʼamongeta. Upéicharõ ñanemanduʼáta umi mbaʼe ñaaprendevaʼekue, ha heʼiháicha la Biblia ‘ndahaʼemoʼãi ñahendúnteva ha ñanderesarái’ (Sant. 1:22-25, BNP). Ndajajapóiramo upéicha ikatu ñanderesarái umi mbaʼe iñimportantevévagui ha nañamombaʼevéi pe ‘ñeʼẽ potĩ’.
14. Mbaʼépa jajapovaʼerã jastudia jave pe ‘ñeʼẽ potĩ’ oĩva la Bíbliape?
14 Jajepyʼamongetákena jaleévare (Rev. 1:3). Umi ostudiáva peteĩ idióma olee jey jey kirirĩháme umi mbaʼe oaprendevahína. Péro ndahaʼéi upévante ojapovaʼerã. Ha ñande avei jastudia jave pe ñeʼẽ potĩ oĩva la Bíbliape tekotevẽta jalee jepi kirirĩháme ha jajepyʼamongeta hese (jaleemína Salmo 1:1, 2). Upéicharõ umi mbaʼe jastudiáva opytavéta ñaneakãme. Péicha jahecha jalee kirirĩháme heʼiseha jajepyʼamongeta. Haʼete ku jakaru jave, ideprovécho hag̃ua upe jaʼúva oguapy porã vaʼerã ñandéve. Upéicha avei ideprovécho hag̃ua ñandéve jaleéva jajepyʼamongetavaʼerã. Relee rire la Biblia, remboyképa ne tiémpo rejepyʼamongeta hag̃ua?
15. Mbaʼérepa jastudiavaʼerã pe ‘ñeʼẽ potĩ’?
15 Jastudiákena mbaʼéichapa oñeñeʼẽ ha ojehai upe idiómape. Upéicha jajapóramo ñañeʼẽ porãta upe idiómape. Ha ñañeʼẽkuaa hag̃ua pe ‘ñeʼẽ potĩ’ jastudiavaʼerã avei umi mbaʼe ojehaíva la Bíbliape ñanepytyvõtava jaservi hag̃ua Jehovápe hekopete (2 Tim. 1:13).
16. Mbaʼépa oiko jepi umi ostudiávare la Biblia, ha mbaʼépa ikatu jajapo ani hag̃ua oiko ñanderehe upéicha?
16 Ñañembokatupyryvékena. Oĩ ningo tapicha oaprendéva michĩmi oñeʼẽ peteĩ idiómape, ha upéi ndostudiasevéimava. Upéicha avei oiko jepi umi ostudiávare la Biblia: noñehaʼãi oikuaa porãve Jehovápe (jaleemína Hebreos 5:11-14). Mbaʼépa ikatu jajapo ani hag̃ua oiko ñanderehe upéicha? Ñañehaʼãvaʼerã jaikuaa hetave mbaʼe Ñandejára Ñeʼẽ heʼíva. La Bíbliape heʼi: ‘Jaha jahavevaʼerã jakakuaapa peve. Ha jaheja jahávo ñande yképe, umi Cristo rehegua jaikuaavaʼekue iñepyrũrã. Ani jajevy umi iñepyrũmbýpe jaikuaavaʼekue. Umíva apytépe: umi tembiapo ñandereraháva ñemanóme, umi mbaʼe jaikuaavaʼekue vautísmo rehegua, ñamoĩ ñande po umi ogueroviáva akã ári, omanóva ñemoingove jey ha pe ojeporohusgataha ára’ (Heb. 6:1, 2).
17. Mbaʼe ehémplopa ohechauka iñimportanteha jastudia meme Ñandejára Ñeʼẽ?
17 Ñamboykékena ñane tiémpo jastudia hag̃ua. Iporãve jastudia pyʼỹi michĩmimi, jastudiarangue heta sapyʼapyʼánte. Ñamboykevaʼerã ñane tiémpo jastudia hag̃ua nañanderopehýiri jave ha ñaimetahápe ñaneaño. Ñaaprendéramo peteĩ idióma haʼete jajapovañaína peteĩ tape poʼi kaʼaguy paʼũme. Ojeguata meméramo upérupi, ojekuaa porãvéta ha ndahasymoʼãi jaguata hag̃ua upe tapére. Péro ndojeguataguasúiramo upérupi, sapyʼaitépe iñanandypa jeýta. Upévare iñimportánte jastudia meme (Dan. 6:16, 20). ‘Aníkena ñañemeʼẽtei ha ñanekangy’, ñañemboʼe ha jastudia meme vaʼerã pe ‘ñeʼẽ potĩ’ oĩva Ñandejára Ñeʼẽme (Efe. 6:18).
18. Mbaʼérepa ndajakyhyjeivaʼerã ñañeʼẽ hag̃ua pe ‘ñeʼẽ potĩ’?
18 Ñañeʼẽ memékena upe idiómape. Heta oĩ ñande rapicha noñeʼẽséiva ótro idiómape, otĩ térã okyhyjégui ojavýramo g̃uarã. Péro péicha hasyve oñeʼẽkuaa hag̃ua upe idiómape. Ñande ñaaprendeséramo peteĩ idióma ñañensaja meme vaʼerã ñañeʼẽkuaa hag̃ua. Ñañeʼẽ meméramo pe idiómape, ndahasymoʼãi ñandéve ñañemongeta hag̃ua. Upéicha avei ndajakyhyjeivaʼerã ñañeʼẽ hag̃ua pe ‘ñeʼẽ potĩ’ oimehápe. ‘Ñande pyʼaite guive jajerovia ñande reko potĩ hag̃ua, ha ñande júru rupi jaʼe jajeroviaha Jesucristo rehe jajesalva hag̃ua.” (Rom. 10:10, BNP.) Ñande ningo ndahaʼéi jajevautisávonte jahechaukáva ñande jerovia, jahechauka avei japredika jave ogahárupi térã ñaime jave oimehápe (Mat. 28:19, 20; Heb. 13:15). Ha ñakomenta jave rreunionhápe, ñañeʼẽ avei pe ‘ñeʼẽ potĩ’ (jaleemína Hebreos 10:23-25).
Ñamombaʼeguasúkena Jehovápe oñondivepa ñañeʼẽvo pe ‘ñeʼẽ potĩ’
19, 20. a) Mbaʼépa jahupyty koʼág̃a rupi? b) Mbaʼépa ñañehaʼãvaʼerã jajapo?
19 Pe domingo 6 de siván áño 33-pe, heta kristiáno oñembyaty pyharevete peteĩ ógape Jerusalénpe. Ha las nueve mboyve oiko peteĩ milágro, ‘oñepyrũ oñeʼẽ hikuái opaichagua idiómape’. Aje piko tuichaite mbaʼe upe oikovaʼekue! (Hech. 2:4.) Koʼág̃a rupi, ñande nañañeʼẽivéima ymaguaréicha ótro idiómape milágro rupive (1 Cor. 13:8). Upéicharamo jepe, japredikáma cuatrocientos treinta idiómape.
20 Tahaʼe haʼéva ñane idióma, enterovete ikatu ñañeʼẽ pe ‘ñeʼẽ potĩme’. Jaagradesete ningo upévare Jehovápe! Jahechaháicha ndoikoihína Babélpe oiko haguéicha. Haʼete ñamombaʼeguasuvañaína oñondivepa Jehovápe peteĩ ñeʼẽmente (1 Cor. 1:10). Upévare ñañehaʼãkena jajepytaso ñane ermanokuéra ykére jaservívo Jehovápe oñondivepa. Ha koʼẽ koʼẽrekena ñandekatupyryve ñañeʼẽ hag̃ua pe ‘ñeʼẽ potĩ’ ha upéicha ñamombaʼeguasu Jehovápe (jaleemína Salmo 150:1-6).
Mbaʼépa ñambohováita?
• Mbaʼépa heʼise pe ‘ñeʼẽ potĩ’?
• Mbaʼépa jajapovaʼerã ñaaprende hag̃ua pe ‘ñeʼẽ potĩ’?
• Mbaʼe mbaʼépa ñanepytyvõta ñañeʼẽkuaa hag̃ua pe ‘ñeʼẽ potĩ’?
[Porandu ñahesaʼỹijóva]
[Rrekuádro oĩva páhina 28-pe]
Mbaʼéichapa ikatu ñañeʼẽ porã pe ‘ñeʼẽ potĩ’
◆ Jajapysaka porãkena.
◆ Ñañehaʼãkena ñañeʼẽ porã.
◆ Ñaaprendékena heta mbaʼe de memória.
◆ Jajepyʼamongetákena jaleévare.
◆ Jastudiákena mbaʼéichapa oñeñeʼẽ ha ojehai upe idiómape.
◆ Ñañembokatupyryvékena.
◆ Ñamboykékena ñane tiémpo jastudia hag̃ua.
◆ Ñañeʼẽ memékena upe idiómape.
[Nóta oĩva taʼanga ndive páhina 29]
Jehová siervokuéra oñeʼẽ pe ‘ñeʼẽ potĩ’