Ñaneñeʼẽrendúkena Jehovápe ñande pyʼaite guive

‘Ehechauka chéve nde rape ikatu hag̃uáicha aiko nde reipotaháicha. Chembopyʼapeteĩ amombaʼe hag̃ua nde réra.’ (SAL. 86:11.)

1, 2. a) Mbaʼépa heʼi Salmo 86:2, 11, ikatútava ñanepytyvõ ñaneñeʼẽrendu hag̃ua Jehovápe ñande pyʼaite guive? b) Arakaʼe guivépa ñañembopyʼapeteĩvaʼerã ñaneñeʼẽrendu hag̃ua Jehovápe?

 OĨ ERMÁNO ha ermána ojepersegi térã ojeguerahaukavaʼekue kárselpe. Upéicharõ jepe oaguanta hikuái, péro upéi ikangy ijerovia ha oiko pláta rapykuéri. Mbaʼérepa oiko hesekuéra upéva? Jaikuaa hag̃ua mbaʼérepa, ñanemanduʼavaʼerã jajapóva odependeha ñande pyʼapýpe oĩvare. Salmo 86-pe heʼi ñaneñeʼẽrendúramo Jehovápe ikatuha jaservi chupe ñande pyʼaite guive. David oñemboʼevaʼekue péicha: ‘Eñangareko cherehe, nderehe niko ajerovia ha cheñeʼẽrendu ndéve. Eipeʼa jejopy vaígui ne rembiguái nderehe ojeroviávape’. Ha upe rire heʼi: ‘Ehechauka chéve nde rape ikatu hag̃uáicha aiko nde reipotaháicha. Chembopyʼapeteĩ nde réra amombaʼe hag̃ua’ (Sal. 86:2, 11).

² Ndajajeroviáirõ Jehováre ñande pyʼaite guive, heta mbaʼe ikatu omokangy ñande jerovia ha nañaneñeʼẽrenduvéi chupe. Ha ñandejehénte ñapensáramo ñasẽ vaíta katuete. Ñaneñeʼẽrendúramo jepe Jehovápe heta áñorema, ikatúnte avei jaʼa Satanás ñuhãme. Upévare koʼág̃ama ñañembopyʼapeteĩvaʼerã ñaneñeʼẽrendu hag̃ua Jehovápe, jahasa asy mboyve ha Satanás ñanemoñuhã mboyve. La Bíbliape heʼi: ‘Oimeraẽ mbaʼégui, eñangareko porãve nde pyʼapýre’ (Pro. 4:23, ÑÑB). Mbaʼépa ikatu ñanepytyvõ jajapo hag̃ua upéva? Jaikuaa hag̃ua ñahesaʼỹijóta oikovaʼekue pe proféta Judaygua rehe, Jehová omondórõ guare chupe oñeʼẽ hag̃ua rréi Jeroboánpe.

“Ameʼẽse ndéve peteĩ jopói”

3. Mbaʼépa ojapo rréi Jeroboán Ñandejára proféta omombeʼúrõ guare chupe peteĩ mensáhe naiporãiva?

³ Jahechamína koʼág̃a mbaʼépa ojapovaʼekue pe proféta Judaygua. Haʼe ningo omombeʼu peteĩ mensáhe naiporãiva rréi Jeroboánpe. Ñanemanduʼa Jeroboán omoñepyrũ hague peteĩ rrelihión pyahu Israélpe, oĩhápe umi diez trívu. Jeroboán ipochy ha heʼi hembiguaikuérape ojagarra hag̃ua upe profétape. Péro Jehová oipytyvõ iprofétape, omboʼypi rréi Jeroboán po ha ojeka pe altár ojapoha sakrifísio. Upémaramo rréi Jeroboán ojerure asy Ñandejára profétape: ‘Eñemboʼemína cherehe Ñandejárape okuera hag̃ua che po’. Pe proféta oñemboʼe, ha pe rréi po okuera (1 Rey. 13:1-6).

4. a) Mbaʼérepa ikatu omoñuhãkuri pe profétape oñekuaveʼẽva chupe? b) Mbaʼépa pe proféta heʼi Jeroboánpe?

⁴ Upe rire, rréi Jeroboán heʼi Ñandejára profétape: ‘Jahána chendive ógape jakaru, ameʼẽse ndéve peteĩ jopói’ (1 Rey. 13:7, ÑÑB). Mbaʼépa ojapovaʼerã Ñandejára proféta? Haʼe heʼíva ombopochy pe rréipe, upéicharõ ohótapa hendive hógape? (Sal. 119:113.) Haʼetéramo jepe pe rréi ombyasýva hembiapo vaikue, iporãtapa oho hendive? Jeroboán ningo ikatu omeʼẽ umi jopói neporãmba jepéva. Ha oimérõ pe proféta ipláta pota, pe rréi oikuaveʼẽva ikatu omoñuhãkuri chupe. Péro Jehová heʼi pe profétape: ‘Aníke reʼútei pán ha aníke reyʼútei hendivekuéra, ha aníke reju jey reho hague rupi’. Ha pe proféta katu heʼi Jeroboánpe: ‘Rembojaʼótaramo jepe chéve mbytetépe opa mbaʼe reguerekóva, ndahamoʼãi nendive, ha ndaʼumoʼãi avei pán ni ndayʼumoʼãi koʼápe’.  Upéi, pe proféta osẽ Betélgui ha oho ótro tape rupi (1 Rey. 13:8-10). Mbaʼépa ñanemboʼe pe proféta odesidivaʼekue? (Rom. 15:4.)

Javyʼákena jarekomíva reheve

5. Mbaʼépa ikatu oiko jaipotaitereíramo pláta?

⁵ Jaipotaitereíramo pláta ikatu nañaneñeʼẽrenduvéi Jehovápe. Jajeroviápa Jehová omeʼẽtaha ñandéve opa mbaʼe ñaikotevẽva? (Mat. 6:33; Heb. 13:5.) Javyʼápa umi mbaʼe jarekomívare? Térãpa jajapo oimeraẽ mbaʼe ñande pláta hetaségui? (Jaleemína Filipenses 4:11-13.) Ñambotapykuépa Jehová servísio jahupyty hag̃ua umi mbaʼe jaipotávante? Térãpa ñamotenonde Jehová servísio ñande rekovépe? Koʼã porandu ñambohovaivaʼerã jaikuaa hag̃ua jaservípa Jehovápe ñande pyʼaite guive. Apóstol Pablo ohaivaʼekue: ‘Tuichaite mbaʼe ningo jaservi Ñandejárape ñande pyʼaite guive ha javyʼáramo umi mbaʼe jaguerekóvare. Mbaʼeve ningo ndajarúi ko yvy ape ári, ha mbaʼevete ndajaguerahamoʼãi avei. Upévare jaguerekóramo ñanerembiʼurã ha ñande aorã, javyʼavaʼerã koʼã mbaʼe reheve’ (1 Tim. 6:6-8, ÑÑB).

6. Mbaʼeichagua “jopóipa” ikatu oñekuaveʼẽ ñandéve, ha mbaʼépa ñanepytyvõta jadesidi porã hag̃ua?

⁶ Koʼág̃a rupi oñekuaveʼẽ avei ñandéve heta “jopói”. Pór ehémplo, ikatu ñane patrón oipota ñambaʼapo ñagana porãve hag̃uáme. Térã ikatu javase ambue tetãme ñagana porãvetahápe. Ñepyrũrã ikatu ñapensa péicha Jehová ñanevendesiha. Péro jadesidi porã hag̃ua, jajepyʼamongeta raẽ vaʼerã maʼerãpa jajapose upéva ha ñanemomombyrýtapa Jehovágui. Ñandéve g̃uarã ningo iñimportanteterei Jehová opensáva upe jadesidítavare.

7. Mbaʼérepa jahapoʼovaʼerã ñane korasõgui pláta rayhu?

⁷ Ko múndo oĩva Satanás poguýpe omokyreʼỹ opavavépe oiko hag̃ua pláta rapykuéri (jaleemína 1 Juan 2:15, 16). Jaikuaa ningo Satanás oipotaha ñamboyke Jehovápe. Upévare, ñañatende porã vaʼerã jahechakuaa hag̃ua ñande pláta rayhupañaína. Ha oimérõ upéicha jahapoʼo hag̃ua ñane korasõgui (Rev. 3:15-17). Jesús heʼi porã vaʼekue Satanáspe ndoipotaiha umi goviérno oikuaveʼẽva chupe (Mat. 4:8-10). Jesús voi heʼivaʼekue: ‘Peñeñangarekóke opaichagua taryrýigui, peteĩ tapicha oguerekopáramo jepe, ndahaʼéi upéva pe omoingovéva chupe’ (Luc. 12:15, JMP). Ñaneñeʼẽrendúramo, ndajajeroviamoʼãi ñandejehe, jajeroviáta guei Jehováre.

Peteĩ proféta tujami ombotavy chupe

8. Mbaʼéichapa oñemoĩ jey peteĩ ñuhã Ñandejára profétape?

⁸ Pe Ñandejára proféta rehe ndoikoivaʼerãmoʼã mbaʼeve ndopytáirire tapére. Péro osẽ riremi oho hag̃ua hógape oñemoĩ jey chupe peteĩ ñuhã. La Bíbliape heʼi ‘peteĩ proféta tujami oikoha Betélpe’. Ha ‘itaʼyrakuéra oho hague omombeʼupa’ chupe upe díape oikovaʼekue. Ohendupávo upe oikovaʼekue pe proféta tujami ojerure itaʼyrakuérape hymba vúrro oho hag̃ua oheka Ñandejára profétape. Upe riremínte otopa chupe opytuʼuhína peteĩ yvyra guýpe ha heʼi chupe: ‘Jahána ógape, ha heʼu pán’. Pe Ñandejára proféta heʼi chupe ndaikatumoʼãiha oho hendive, ha pe proféta tujami katu heʼi: ‘Che ningo peteĩ proféta ndeichagua avei, ha peteĩ ánhel omombeʼu chéve Ñandejára rembipota heʼívo: “Egueru chupe nendive nde rógape, hoʼu hag̃ua pán ha hoyʼu hag̃ua”’. Péro la Biblia ohechauka “ijapu” hague chupe (1 Rey. 13:11-18, ÑÑB).

9. Mbaʼépa heʼi la Biblia umi ijapúvare, ha mávapepa operhudika hikuái?

⁹ Ndajaikuaái ningo mbaʼépa ojaposéraʼe pe proféta tujami, péro ijapu hapichápe. Yma oservi porãne rakaʼe Jehovápe, péro koʼág̃a tuichaiterei ijapu. Ha la Bíbliape heʼi porã Ñandejára ndoguerohoryiha ijapúvape (jaleemína Proverbios 3:32). Umi ijapúva opyta vai Jehová renondépe ha operhudika avei hapichakuérape.

Oho pe proféta tujami ndive

10. Mbaʼépa ojapo pe proféta Judaygua oinvitárõ guare chupe pe proféta tujami, ha mbaʼépa oiko hese?

¹⁰ Pe proféta Judaygua opillavaʼerãmoʼã pe  proféta tujami ijapuha. Mbaʼére piko noñeporandúiraʼe: “Jehová oipotárire aha hendive, mbaʼérepa omboúta peteĩ ánhel heʼi hag̃ua ótrope oipotáva ajapo?”. Ikatu avei ojerurékuri Jehovápe ohechauka hag̃ua chupe mbaʼépa ojapovaʼerã. Péro la Biblia ndeʼiriete ojapo hague upéva, heʼi guei ‘oho hague pe tujami ndive, okaru ha hoyʼu hógape’. Upéva ombopochyeterei Jehovápe. Ha pe proféta ohokuévo Judápe, osẽ chupe peteĩ león ha ojuka chupe. Aje piko ivaiete pe oikovaʼekue upe profétare! (1 Rey. 13:19-25.) *

11. Mbaʼérepa Ahíya omoĩ ehémplo iporãva ñandéve g̃uarã?

¹¹ Péicha jahechakuaa ndojoguaieteha proféta Ahíyape, ohovaʼekue omoĩ hag̃ua Jeroboánpe rréiramo. Haʼe iñeʼẽrendu Jehovápe itujaite peve. Pe proféta Ahíya ituja ha ndohechavéi riréma, Jeroboán omondo hembireko hendápe oikuaa hag̃ua mbaʼépa oikóta itaʼýra hasykatúva rehe. Ahíya ndokyhyjéi heʼi hag̃ua pe mitã omanotaha. Upéicha Ahíya omoĩ ehémplo iporãva ñandéve g̃uarã (1 Rey. 14:1-18). Jehová hetaiterei mbaʼe porã omeʼẽ Ahíyape, haʼe ohaivaʼekue ningo oñemoĩ Ñandejára Ñeʼẽme. Esdras oiporu upe Ahíya ohaivaʼekue omoĩ hag̃ua la Bíbliape (2 Cró. 9:29).

12-14. a) Mbaʼépa ñanemboʼe upe oikovaʼekue pe proféta Judaygua rehe? b) Emombeʼumi ehémplo ohechaukáva tekotevẽha ñañemboʼe ha jajepyʼamongeta umi konsého oĩvare la Bíbliape jadesidi mboyve peteĩ mbaʼe.

¹² La Bíbliape noñemombeʼúi mbaʼérepa pe proféta Judaygua ndojeruréikuri Jehovápe ohechauka hag̃ua chupe mbaʼépa ojapovaʼerã. Haʼe ohóntema pe proféta tujami ndive hógape okaru ha hoyʼu hag̃ua. Oiméne pe proféta tujami heʼíraʼe chupe ohendusévante voi. Mbaʼépa ñanemboʼe upe oikovaʼekue? Ñaneñeʼẽrenduvaʼerãha Jehovápe tahaʼe haʼéva upe jahasavañaína. Jaikuaa porã ningo haʼe ojeruréva guive ñandéve iporãveha.

¹³ Oĩ ermáno oñemeʼẽ jave chupe konsého ohendúva ha upéi ojapo umi mbaʼe ogustávante chupe. Pór ehémplo, ñapensami peteĩ ermánope oñekuaveʼẽha peteĩ traváho oiporupaitétava chugui itiémpo. Ha upévare ndorekomoʼãvéima tiémpo oĩ hag̃ua ifamília ndive ni opredika hag̃ua. Upémaramo ojerure konsého umi ansiánope. Haʼekuéra heʼi chupe ndaikatumoʼãiha odesidi hese mbaʼéichapa omantenevaʼerã ifamíliape. Ha heʼi avei chupe ombaʼapóramo upépe, ifamília ikatuha oñemomombyry Jehovágui. Mbaʼépa ojapóta pe ermáno? Ohendútapa umi ansiáno heʼivaʼekue chupe ñepyrũrã? Térãpa ojepyʼamongetáta avei upe rire  heʼivaʼekuére chupe? Iporãvéta ojepyʼamongetáramo mbaʼéichapa opytáta Jehová renondépe ombaʼapóramo upépe.

¹⁴ Jahechamína ótro ehémplo, peteĩ ermána oporandu peteĩ ansiánope ikatúpa oheja iména ndahaʼéiva testígo. Ñepyrũrã pe ansiáno heʼi chupe haʼete odesidivaʼerãha upéva. Upe rire olee chupe umi konsého la Biblia omeʼẽva umi omendávape g̃uarã (1 Cor. 7:10-16). Ojepyʼamongetátapa umi konsého omeʼẽvaʼekuére chupe pe ansiáno? Térãpa ohejátantema iménape? Iporãvéta ningo odesidi mboyve oñemboʼéramo ha ojepyʼamongeta umi konsého oĩvare la Bíbliape.

Aníkena ñañemombaʼeguasu

15. Mbaʼépa ñanemboʼeve pe proféta Judaygua ojapovaʼekue?

¹⁵ Mbaʼépa ñanemboʼeve pe proféta Judaygua ojapovaʼekue? Proverbios 3:5 heʼi: “Ejerovia Ñandejárare nde pyʼaite guive, ha ani ndejehe añónte”. Pe proféta ojeroviarangue Jehováre ojapo haguéicha upe ára peve, ojerovia ijehe. Upévare opyta vai Ñandejára renondépe ha omano. Koʼã mbaʼe jahechavaʼekue, ñanemboʼe ndovaleiha ñañemombaʼeguasu ha ñaneñeʼẽrenduvaʼerãha Jehovápe.

16, 17. Mbaʼépa ñanepytyvõta akóinte ñaneñeʼẽrendu hag̃ua Jehovápe?

¹⁶ Ñande yvypóra ningo ñapensase ñandejehénte, péro jajapóramo upéicha katuete ñasẽ vaíta. ‘Ndaipóri avave ijapúva ha iñañáva yvypóraicha ipyʼapýpe, ha ipyʼatarova.’ (Jer. 17:9.) Akóinte ñaneñeʼẽrendu hag̃ua Jehovápe, ñañehaʼãmbaitevaʼerã ñakambia anive hag̃ua ñañemombaʼeguasu ha jajeroviaiterei ñandejehe. Avei ñambopyahuvaʼerã ñande rekove Ñandejára oipotaháicha ha ñaneñeʼẽrendu chupe (jaleemína Efesios 4:22-24).

¹⁷ Proverbios 11:2-pe heʼi: ‘Oñemomirĩva ningo iñarandu’. Upéicharõ ñaneumildevaʼerã ha jajerovia Jehováre jadesidi porã hag̃ua. Jahechamína peteĩ ehémplo. Nañanekyreʼỹvéiramo Jehová servísiope, ikatu naiporãi voi ñandéve mbaʼeve (Pro. 24:10). Ikatu ñanekaneʼõ Jehová servísiope ha ñapensa natekotevẽveimaha ñambaʼapo ymaguaréicha. Ñapensa koʼág̃a ótroma ombaʼapovaʼerãha ñandevése. Avei ikatu ñapensa jaiko porãvetaha jaikóramo ko múndope ojeikoháicha. Péro ñambaʼapo meméramo Jehová servísiope, ñaneñeʼẽrendúta chupe ñande pyʼaite guive (Luc. 13:24; 1 Cor. 15:58).

18. Mbaʼépa ikatu jajapo jadesidítaramo peteĩ mbaʼe ijetuʼuetereíva?

 ¹⁸ Sapyʼánte jadesidivaʼerã peteĩ mbaʼe ijetuʼuetereíva ha ndajaikuaaporãi mbaʼépa jajapóta. Jajapótapa ñandéve ñandegustávante? Upéicha jave, jajerurékena Jehovápe ñanepytyvõmi hag̃ua. Santiago 1:5-pe heʼi: ‘Oĩramo pende apytépe naiñarandúiva, tojerure Ñandejárape ha haʼe omoarandúta chupe. Ñandejára niko ipojera.’ Ñandejára omeʼẽta ñandéve ijespíritu jadesidi porã hag̃ua (jaleemína Lucas 11:9, 13).

Akóintekena ñaneñeʼẽrendu Jehovápe ñande pyʼaite guive

19, 20. Mbaʼépa jajapovaʼerã ñande pyʼaite guive?

¹⁹ Salomón omboykérõ guare Jehovápe, Ñandejára siervokuéra ohasa heta mbaʼe ijetuʼúva ha odesidivaʼerã iñeʼẽrendútapa hikuái. Hetaiterei ningo oĩ omboykevaʼekue Jehovápe, péro oĩ avei iñeʼẽrendúva ha ojepytaso mbaretéva ijykére.

²⁰ Ñande ningo koʼẽ koʼẽre jadesidivaʼerã ñaneñeʼẽrendútapa Jehovápe. Ha ñande ikatu jajapo Jehová oipotáva, umi Israelgua iñeʼẽrendúva ojapo haguéicha. Upévare akóintekena ñaneñeʼẽrendu Jehovápe ñande pyʼaite guive. Ha jajerovia haʼe katuete ñanderovasataha (2 Sam. 22:26).

[Nóta]

Mbaʼépa ñambohováita?

• Mbaʼérepa jahapoʼovaʼerã ñane korasõgui pláta rayhu?

• Mbaʼépa ñanepytyvõta ñaneñeʼẽrendu hag̃ua Jehovápe ñande pyʼaite guive?

• Ñaneñeʼẽrendu hag̃ua Jehovápe, mbaʼérepa ndovaléi ñañemombaʼeguasu?

[Porandu ñahesaʼỹijóva]

[Nóta oĩva taʼanga ndive páhina 15]

Koʼág̃a rupi oñekuaveʼẽ ñandéve heta “jopói”: Ijetuʼúpa ñandéve ñaneñeʼẽrendu Jehovápe upéicha jave?

[Nóta oĩva taʼanga ndive páhina 16]

Jajepyʼamongetápa umi konsého oñemeʼẽvare ñandéve?