Jahechaukákena ñamombaʼeha Jehovápe ñande reko potĩ rupi

‘Jehová rembiapokue iporã ha omimbipa.’ (SAL. 111:3.)

1, 2. a) Mbaʼeichagua ñeʼẽpa oiporu jepi la Biblia ha mbaʼépa heʼise? b) Mbaʼe porandúpa ñambohováita?

 LA Biblia heʼi Jehová ‘oñemondeha jajáipe’ ha upévare enterove ñamombaʼevaʼerã chupe (Sal. 104:1, ÑÑB). Ñande yvypóra ikatu jahechauka ñamombaʼeha Jehovápe heta hendáicha. Pór ehémplo ñañemonde lájare. Apóstol Pablo heʼivaʼekue kristianakuérape ‘oñemonde hag̃ua hekópe jeguakaʼỹre ha ani ombojeguakapa iñakãrague pérla térã órope’ (1 Tim. 2:9, JMP). Péro tekotevẽ jajapo hetave mbaʼe jahechauka hag̃ua ñamombaʼeha Jehovápe. Haʼe ningo “iporã ha omimbipa” (Sal. 111:3).

² La Biblia ningo oiporu jepi koʼã ñeʼẽ: “iporã”, “omimbi”, “ipuʼaka” ha “ojajái”. Koʼã mbaʼe ojeʼéramo peteĩ tapicháre heʼise ojerrespeta ha ojeguerohoryvaʼerãha chupe. Ha ndaipóri ohupytýva Jehovápe koʼã mbaʼépe. Upévare ñande jahechauka ñamombaʼeha chupe umi mbaʼe jaʼévare ha ñande reko potĩ rupi. Péro mbaʼérepa ikatu jajapo upéva? Mbaʼéichapa Jehová rembiapokue ohechauka ñamombaʼevaʼerãha chupe? Mbaʼérepa iporã  jajepyʼamongeta upévare? Mbaʼépa ñanemboʼe Jesús otrata porãvo hentekuérape? Mbaʼéichapa ikatu ñande reko potĩ ñamombaʼeguasu jave Ñandejárape?

Mbaʼérepa ikatu ñande reko potĩ

3, 4. a) Jehová ningo ‘ombotuicha’ yvyporakuérape, upévare mbaʼépa ñande jajapovaʼerã? b) Mávarepa oñeʼẽvaʼekue Salmo 8:5-9? (Ehecha nóta.) c) Mávapepa Jehová ombotuichavaʼekue yma?

³ Ñande ningo ikatu ñande reko potĩ Ñandejára ñandeapo rupi ijoguaháramo. Haʼe omeʼẽvaʼekue Adánpe hembiaporã iporãitereíva, omoĩvo ipoguýpe ko yvy (Gén. 1:26, 27). Ha jepe yvyporakuéra ojavy iñepyrũme, Jehová ndoipeʼái chuguikuéra upe tembiapo. Ojeʼe voi ningo Haʼe ‘ombotuichaha’ yvyporakuérape (jaleemína Salmo 8:5-9). * Ha mbaʼépa ñande jajapovaʼerã? Jaikovaʼerã Ñandejára oipotaháicha ha ñambotuicha héra porãite.

⁴ Jehová omombaʼeterei isiervokuérape. Pór ehémplo, ohechauka omombaʼeha Abélpe oguerohorývo isakrifísio, péro ndoguerohorýi Caín oikuaveʼẽva chupe (Gén. 4:4, 5). Moiséspe heʼi ‘ombohasa hag̃ua michĩmi ipuʼakágui’ Josuépe. Haʼe opytáta hekovia omoakã hag̃ua umi Israelguápe (Núm. 27:20). Ha Salomón rehe la Biblia heʼi: “Ñandejára ombotuichaiterei Salomónpe opa Israelgua renondépe ha omoherakuã porãiterei chupe. Haʼeichagua mburuvicha guasu ndaiporivaʼekue arakaʼeve Israélpe” (1 Cró. 29:25). Ñandejára ombotuichaitereíta avei umi ohótava yvágape, oñeʼẽ rupi hikuái Ñandejára puʼakáre (Sal. 145:11-13). Ha umi ‘ambue ovechakuéra’ hetavéva ohóvo ojapo avei peteĩ tembiapo iporãitereíva omombaʼeguasúvo Jehovápe (Juan 10:16).

Jehová rembiapokue ohechauka ñamombaʼevaʼerãha chupe

5. Mbaʼérepa ikatu jaʼe Jehová tuichaitereiha?

⁵ Salmo 8-pe ohechauka Jehová tuichaitereiha yvyporakuéra rovake. David opuraheivaʼekue: ‘Jehová ore Jára, herakuã porãite nde réra ko yvy ape ári. Yvága peve og̃uahẽ’ (Sal. 8:2, [8:1, NM]). Jehová ningo pe tuichavéva yvága ha yvýpe ha avave ndohupytymoʼãi chupe. Haʼe péicha vaʼekue ojapo mboyve “yvága ha yvy” ha nokambiamoʼãi arakaʼeve. Jehová ojapo jeýta ko yvýgui peteĩ paraíso ha yvyporakuéra iperfékto jeýta (Gén. 1:1; 1 Cor. 15:24-28; Rev. 21:1-5).

6. Mbaʼérepa pe salmísta heʼi Jehová omimbipaha?

⁶ Oiméne pe salmísta ijurujái opytávo omaña jave pyharekue umi estrélla ojajaipávare. Haʼe ningo omombaʼeterei Jehová rembiapokue. Ha upévare heʼi Jehová omimbipaha (jaleemína Salmo 104:1, 2). Jepe ndaikatúi jahecha ñande Apoharépe, umi mbaʼe ojapovaʼekuére jahechakuaa ñamombaʼevaʼerãha chupe.

7, 8. Mbaʼéichapa umi estrélla ñanepytyvõ ñamombaʼe hag̃ua Jehovápe?

⁷ Pór ehémplo, ko yvy oĩ peteĩ galaxia térã estrélla aty héravape Vía Láctea. Upépe oĩ hetaiterei estrélla, planéta ha kuarahy. Ijapytepekuéra ko yvy haʼete peteĩ yvykuʼi raʼỹi. Ñapensamíntena Vía Lácteape oĩ 100.000 millones rupi umi estrélla. Ñañemoĩtaramo jaipapa peteĩ estrélla pór segúndo, ñaikotevẽta tres mil áño rupi jaipapapa hag̃ua.

⁸ Vía Lácteape oĩramo 100.000 millones umi estrélla, mboýpa oĩne ko univérsope? Umi astrónomo heʼi oĩne hag̃ua 50.000 ha 125.000 millones  umi galaxia. Ha upéicharõ, mboy estréllapa oĩ? Hetaiterei oĩgui ndaipóri oipapavaʼerã. Péro, Jehová ‘heʼi mboýpa estrellakuéra oĩ ha héra rupi peteĩteĩme oikuaa’ (Sal. 147:4). Ajépa tuichaite ha ndaijojahái Jehová rembiapokue! Katuetei ko mbaʼe ñanemokyreʼỹvaʼerã ñamoherakuã hag̃ua héra porãite.

9, 10. Mbaʼéichapa pe pán ohechauka Jehová iñaranduha?

⁹ Ñamboykemína koʼág̃a pe yvága ijapyraʼỹva ha ñañeʼẽmi peteĩ mbaʼe jaikuaa porãvare, pán rehe. Jehová “ojapovaʼekue yvága ha yvy”, avei “omongaru iñembyahýivape” (Sal. 146:6, 7). Opa mbaʼe Ñandejára ojapovaʼekue iporã ha omimbipa. Umíva apytépe oĩ umi plánta omeʼẽva oñekotevẽva pán ojejapo hag̃ua (jaleemína Salmo 111:1-5). Jesús omboʼevaʼekue hemimboʼekuérape ojerure hag̃ua Ñandejárape: ‘Emeʼẽ oréve ore pán ko árape g̃uarã’ (Mat. 6:11). Yma Israélpe ha heta henda rupi pán ndofaltaivaʼerã mesápe. Jepe nañaikotevẽi heta mbaʼe jajapo hag̃ua pán, ñambojeheʼávo umi mbaʼe okambia. Ha upévako ndoikói péicha reínte.

¹⁰ Yma umi Israelgua ojapo hag̃ua pán oiporu arína ojejapóva trigo térã cebádagui, y ha omoĩ jepi avei levadúra pype. Koʼãva ojeheʼapávo heta mbaʼe okambia ha koʼág̃a peve ndojekuaaporãi upe oikóva. Ha jaʼúvo pe pán katu, oikóva ñande pyʼápe ndahaʼéi avei vyrorei. Jahechakuaa mbaʼérepa pe salmísta opurahéi: “Ndaikatuvéima ojepapapa ne rembiapokuéra hetaitereígui [Jehová]. Ne arandu ituichaite rupi rejapopaite umíva” (Sal. 104:24, ÑÑB). Ajépa hetaite mbaʼe oĩ ñamombaʼeguasu hag̃ua Jehovápe!

Mbaʼérepa iporã jajepyʼamongeta Jehová rembiapokue omimbipávare

11, 12. Mbaʼéichapa ñanepytyvõ jajepyʼamongetáramo Jehová rembiapokuére?

¹¹ Enterove ningo jahecharamo umi estrélla ojajaipáva, ha jaʼe hag̃ua peteĩ pán hetereiha natekotevẽi oiko ñandehegui peteĩ ingeniero químico. Péro naentéroi omombaʼe Jehová rembiapokue iporãitéva. Upévare ñamombaʼe hag̃ua hembiapokue tekotevẽ jajepyʼamongeta umívare. Mbaʼéichapa ñanepytyvõta jajapóramo upéicha? Jaikuaa hag̃ua jahechamína ambue mbaʼe Jehová ojapovaʼekue.

¹² David imanduʼávo umi mbaʼe Jehová ojapovaʼekuére oipytyvõ hag̃ua isiervokuérape, heʼi: ‘Amombeʼúne mbaʼéichapa remimbipa, ha che aikuaaukáne umi mbaʼe techapyrã rejapóva’ (Sal. 145:5). Ñamombaʼe hag̃ua Jehová rembiapokue tekotevẽ jastudia la Biblia ha jajepyʼamongeta jaleévare. Upéicha, jahechakuaáta Ñandejára ojapóva iporãitereiha ha ñanekyreʼỹvéta ñamombaʼeguasu hag̃ua chupe. Ha David heʼi haguéicha, ñande avei jaʼéta: “Che amoherakuãne ne rembiapokue” (Sal. 145:6). Jajepyʼamongetáramo Jehová rembiapokuére, ñañemoag̃uivéta hese ha ndajakyhyjemoʼãi ñañeʼẽ hag̃ua hese  opavavépe. Ñañehaʼãpa japredika kyreʼỹme marandu porã ha ñaipytyvõ ñande rapichakuérape omombaʼeguasu hag̃ua avei Jehovápe?

Jesús ohechauka porãiterei Ñandejára reko mimbipa

13. a) Mbaʼépa ojapo Jehová heʼiháicha Daniel 7: 13, 14-pe? b) Mbaʼeichagua rréipa Jesús?

¹³ Ñandejára Raʼy Jesucristo kyreʼỹme opredikavaʼekue marandu porã ha omombaʼeguasu Itúvape. Jehová ohechauka omombaʼeha Itaʼýra peteĩetépe omoĩvo chupe “oporosãmbyhy hag̃ua” (jaleemína Daniel 7:13, 14). Upéicharõ jepe, Jesús noñembotuichái. Haʼe ningo peteĩ rréi ipyʼaporãva, omombaʼéva hemimboʼekuérape, ha ndojeruréiva chupekuéra ikatuʼỹ vaʼerã ojapo. Oiko mboyve chugui rréi, haʼe ohechaukamavaʼekue omombaʼeha hentekuérape ha oiporiahuverekoha umi ojeapoʼívape ha noñepenáivare. Jahechamína peteĩ ehémplo.

14. Mbaʼéichapa ojetratavaʼekue umi leprósope Israélpe?

¹⁴ Yma umi tapicha orekóva lépra heta oiko asy vaʼekue omano meve. Ko mbaʼasy ningo mbeguekatúpe ojagarrapaite ñande rete, ha ndaipóri voi omongueráva (Núm. 12:12; 2 Rey. 5:7, 14). Umi ilépravare ojeʼe naipotĩriha ha oñemosẽ chupekuéra itávagui. Ha oñemoag̃uívo hentekuérare osapukaivaʼerã: “Nachepotĩri, nachepotĩri” (Lev. 13:43-46, ÑÑB). Hentekuérape g̃uarã haʼekuéra omanóma voi. Umi hudío mboʼeharakuéra heʼivaʼekue umi iléprava opytavaʼerãha 2 metrohápe hentekuéragui. Ha ojeʼe ningo peteĩ omoakãva chupekuéra ohechávo ouhína peteĩ lepróso ojapi hague itápe, ani hag̃ua oñemoag̃ui hese.

15. Mbaʼéichapa Jesús otrata peteĩ leprósope?

¹⁵ Koʼág̃a katu jahechami mbaʼéichapa Jesús otrata peteĩ leprósope. Haʼe oñemoag̃uívo Jesúsre, ojerure omongueramínte hag̃ua chupe (jaleemína Marcos 1:40-42). Jesús ndojahéiri hese, otrata porã katu chupe, ohechakuaágui okuerasetereiha. Oiporiahuverekógui opoko hese ha omonguera.

16. Mbaʼéichapa jatratavaʼerã ñande rapichakuérape Jesús ojapo haguéicha?

¹⁶ Jehová ojapoháicha, Jesús otrata porã ha omombaʼe hentekuérape. Ha ñande, mbaʼéichapa ikatu jajapo upéva? Ñande ñamombaʼe ha jarrespetavaʼerã enterovépe, ipláta térã imboriahúvape, hesãi térã hasývape, ituja térã imitãvape (1 Ped. 2:17). Ha koʼýte umi oporomoakãva otrata porã vaʼerã hapichakuérape. Upéva ningo iñimportanteterei. Pór ehémplo, ména, tuvakuéra ha umi ansiáno oporotrata porãramo avave noñeñanduvaimoʼãi. La Biblia heʼi enterove tekotevẽha jajapo ko mbaʼe: “Pejoayhu oñopehẽnguéicha, peñombojerovia ha peñomombaʼe” (Rom. 12:10).

Ñande reko potĩ vaʼerã ñamombaʼeguasu jave Jehovápe

17. Mbaʼéichapa la Biblia ohechauka ñande reko potĩ vaʼerãha jaadora jave Ñandejárape?

¹⁷ La Biblia ohechauka ñande reko potĩ vaʼerãha ñamombaʼeguasu jave Jehovápe. Eclesiastés 5:1-pe, [ÑÑB] heʼi voi: ‘Nde reho jave Ñandejára  rógape, eñangareko porãke’ ndejehe. Moisés ha Josué ohechaukavaʼekue omombaʼeha Ñandejárape oipeʼávo isandália opyrũ mboyve yvy marangatúpe (Éxo. 3:5; Jos. 5:15). Umi saserdóte katu oiporuvaʼerã kasõ mbyky línogui ojejapóva ani hag̃ua ojehechapa chupekuéra (Éxo. 28:42, 43). Péicha ndoikomoʼãi mbaʼeve omotĩtava chupekuéra ombaʼapo jave altárpe. Avei umi saserdóte rogayguakuéra heko potĩ vaʼerã, ndojapoivaʼerã mbaʼeve omotĩtava ifamiliakuérape.

18. Mbaʼérepa ñamombaʼeguasu jave Jehovápe ñande reko potĩ vaʼerã?

¹⁸ Upéicharõ, ñamombaʼeguasu hag̃ua Jehovápe, tekotevẽ jarrespeta chupe ha ñande reko potĩ. Ha jarrespetavaʼerã ningo ñande rapichakuérape, jaipotáramo haʼekuéra ñanderrespeta avei. Jehová ningo ohecha oĩva ñande pyʼapýpe, upévare ndahaʼeivaʼerã japororrespeta guaʼúnteva (1 Sam. 16:7; Pro. 21:2). Ñañehaʼãramo ñamombaʼe ñande rapichakuérape, jatrata porãvéta chupekuéra ha ñandepyʼaguapýta. Enterove ohechakuaáta ñane ñeʼẽ ha jajapóvare ñamombaʼeha Jehovápe ha ñande rapichakuérape. Jaiko ha ñañemonde lájare ikatu jahechauka ñande reko potĩha. Ha jajapoha avei apóstol Pablo heʼíva: ‘Roñehaʼã opaite mbaʼépe ani hag̃ua rojapo mbaʼeve oporomoñepysangavaʼerã, ani hag̃ua oñeñeʼẽ vai ore rembiapo rehe. Upéva rangue, opa mbaʼépe rohechauka Ñandejára rembiguaiha ore’ (2 Cor. 6:3, 4, JMP). ‘Opavave ohecháta iporãha Ñandejára ñanemboʼéva’ (Tito 2:10, BNP).

Ñañehaʼãkena ñande reko potĩ

19, 20. a) Mbaʼéichapa jahechauka ñamombaʼeha ñande rapichakuérape? b) Mbaʼépa ñañehaʼãvaʼerã jajapo?

¹⁹ Umi ohótava yvágape ojapo hekopete hembiapo ‘Cristo rembijokuáicha’ (2 Cor. 5:20). Umi “ambue ovechakuéra” oipytyvõ chupekuéra ko tembiapo porãitépe. Haʼekuéra oñeʼẽ avei Jesucristo goviérno rérape. Jaikuaa ningo umi orrepresentáva peteĩ tetãme oñeʼẽ porãha imburuvichakuérare. Ha ñande péicha ñañeʼẽvaʼerã Ñandejára Rréinore (Efe. 6:19, 20). Ñamombeʼúvo ñande rapichakuérape marandu porã jahechauka ñamombaʼeha chupekuéra (Isa. 52:7).

²⁰ Ñañehaʼãkena ñamombaʼeguasu Ñandejárape ñande reko potĩ rupive (1 Ped. 2:12). Ñamombaʼékena ñande pyʼaite guive Jehovápe ha ñane ermanokuérape. Jajapóramo upéva Ñandejára Jehová omimbi ha ojajaipáva ovyʼáta ñandereheve.

[Nóta]

Mbaʼépa ñambohováita?

• Mbaʼéichapa ñanepytyvõ jajepyʼamongetáramo Jehová rembiapokue iporãitévare?

• Mbaʼépa ñanemboʼe Jesús ojapovaʼekue peteĩ leprósore?

• Mbaʼérepa ñande reko potĩ vaʼerã ñamombaʼeguasu jave Ñandejárape?

[Porandu ñahesaʼỹijóva]

[Nóta oĩva taʼanga ndive páhina 18]

Mbaʼéichapa Jehová ohechaukavaʼekue omombaʼeha Abélpe?

[Nóta oĩva taʼanga ndive páhina 19]

Peteĩ pán rehe jepe jahechakuaa Jehová rembiapokue iporãitereiha

[Nóta oĩva taʼanga ndive páhina 20]

Mbaʼépa ñanemboʼe Jesús ojapóva peteĩ leprósore?

[Nóta oĩva taʼanga ndive páhina 21]

Ñamombaʼeguasu hag̃ua Jehovápe, tekotevẽ jarrespeta chupe ha ñande reko potĩ