Koʼẽrõitéma iporãitereíta ko múndo

“Ore Ru reiméva yvágape, toñemomarangatu nde réra. Tou ne Rréino, tojejapo ne rembipota yvy ári yvagapeguáicha.” (Mateo 6:9, 10, BNP)

KO ÑEMBOʼE ojekuaáva opárupi ha oñehenóiva padrenuestro, omeʼẽ ñandéve esperánsa.

Upépe heʼi Ñandejára Irréino rupive ojapotaha hembipota ko yvýpe g̃uarã, ojejapoháicha yvágape. Ñandejára niko ojapose ko yvýgui peteĩ hardín neporãva (Revelación 21:1-5). Jahechamína koʼág̃a mbaʼépa hína pe Ñandejára Rréino ha mbaʼéichapa ojapóta ko yvýgui peteĩ hardín.

Peteĩ goviérno añete

Ñandejára Rréino ningo peteĩ goviérno. Ha peteĩ goviérnope oĩvaʼerã umi ogovernáva, orekovaʼerã léi, ha oĩvaʼerã avei umi oñemoĩva pe goviérno guýpe. Orekópa koʼã mbaʼe Ñandejára Rréino? Jahechamína mbaʼépa heʼi la Biblia.

Máva mávapa ogoverna Ñandejára Rréinope? Haʼéramo jepe pe Mburuvicha opa mbaʼe ári, Jehová oheja Jesucrístope ogoverna hag̃ua (Isaías 33:22; Mateo 28:18). Jehová oipytyvõ avei chupe oiporavo hag̃ua umi tapicha ‘opaichagua tetãygua ha trívu apytégui ha opaite ñeʼẽ ha tetãnguéra apytégui, oisãmbyhy hag̃ua hendive ko yvy ape ári’ (Revelación 5:9, 10, ÑÑB).

Mbaʼeichagua léipa omoĩ ko Rréino? Oĩ mokõichagua léi térã mandamiénto. Oĩ umi léi heʼíva mbaʼépa ojejapovaʼerã. Jesús heʼivaʼekue mokõi iñimportantetereíva: “‘Ehayhu Jehová nde Járape ndepyʼaite guive, ne ánga rugua guive ha opa ne arandukue reheve’. Kóva hína pe tuichavéva ha pe tenondeteguáva. Upe rire oúva ojogua chupe, ha heʼi kóicha: ‘Ehayhu nde rapichápe rejehayhuháicha nde’” (Mateo 22:37-39).

Oĩ avei umi léi heʼíva mbaʼépa ndovaléi jajapo. Jahechamína peteĩ ehémplo: ‘Aníke peñembotavy: Ndohupytyichéne Ñandejára Rréino umi oikóva kuña ndive omendaʼỹ  rehe, umi omombaʼeguasúva ñandejára guaʼúpe, umi omendáva ha oikóva ambue ndive, umi kuimbaʼe oikóva hapicha kuimbaʼe ndive, umi omondáva, umi oporomombaʼapo reíva, umi okaʼúva, umi oñeʼẽ reíva, umi oporombotavýva’ (1 Corintios 6:9, 10, JMP).

Máva mávapa oñemoĩ pe goviérno guýpe? Jesús ombojoja ovecha rehe umi oñemoĩvape Irréino poguýpe heʼírõ guare: “Ohendúta che ñeʼẽ, oúta oiko peteĩ atýpente ha peteĩnte herekuáta” (Juan 10:16). Péro jaiko hag̃ua pe goviérno poguýpe ndahaʼeivaʼerã jaʼénteva ñaimeha pe Ovecha Rerekua Imbaʼeporãva ndive. Jesús heʼivaʼekue ñaneñeʼẽrenduvaʼerãha avei chupe. Upévare heʼivaʼekue naentéroi heʼíva chupe Señór, Señór, oiketaha pe rréino yvagapeguápe, síno pe ojapóva Itúva oĩva yvágape oipotáva (Mateo 7:21).

Jesús ojapo haguéicha, umi oñemoĩva Ñandejára Rréino poguýpe omombaʼe Jehová réra (Juan 17:26). Ha iñeʼẽrendúgui omboʼe avei hapichakuérape ‘pe marandu porã Ñandejára Rréino rehegua’ (Mateo 24:14; 28:19, 20). Ha ohechauka hikuái ojoayhuha (Juan 13:35).

Pe goviérno ohundíta ‘umi ombyaívape ko yvy’

Umi mbaʼe oikóvare jahechakuaa koʼẽrõitéma Ñandejára Rréino oisãmbyhytaha. Mbaʼérepa jaʼe upéva? Ojapóma dos mil áño Jesús heʼi hague oikotaha heta mbaʼe ohechaukátava ‘hiʼag̃uimaha Ñandejára Rréino’ (Lucas 21:31, BNP). Ha umi mbaʼe ningo oñekumplipáma jahecháma haguéicha pe artíkulo ohasavaʼekuépe.

Ha mbaʼépa oikóta upe rire? Jesús heʼi: “Upérõ, tuicha ojehasa asýta, ojehasaʼỹ haguéicha ko yvy ári iñepyrũmby guive. Ha arakaʼeve peichagua jehasa asy ndojehumoʼãvéi” (Mateo 24:21). Jesús ndeʼíri ko mbaʼe ojapotaha yvypóra. Heʼi guei Ñandejára ohunditaha ‘umi ombyaívape ko yvy’ (Revelación 11:18). Umi heko añáva ha ombyaíva ko yvy ‘ojehapoʼóta ko yvýgui’. Péro umi hekojojáva, umi Ñandejára oguerohorýva ‘oikóta ko yvy ape ári’ (Proverbios 2:21, 22).

Oĩ porãpa Jehová ojapo ko mbaʼe? Oĩ porãiterei voi. Epensamína nde reguerekoha peteĩ óga porã, tuicha, ha realkiláva heta tapichápe. Oĩ umi inkilíno opororrespetáva, horýva, opagáva ikuénta ha oñangarekóva nde rógare. Upéicha avei, nde rógape oĩ umi inkilíno nemoprovlémava ha nanderrespetáiva, ndopagaséiva ha hiʼarive ombyai nde róga. Reñeʼẽ hetáma jepe hendivekuéra péro nopenái nderehe hikuái. Ajépa nde ikatu remosẽ nde rógagui umichaguápe?

Jehová ningo ñande Apohare ha ojapovaʼekue opa mbaʼe. Upévare ikatu heʼi mávapa oikóta ko yvy ape ári (Revelación 4:11). Haʼe heʼi ohunditaha umi ndojaposéiva hembipota ha nomombaʼéiva hapichakuérape (Salmo 37:9-11).

Pe goviérno ojapóta ko yvýgui peteĩ hardín neporãva

Ñandejára Rréino, omoakãva Jesucristo, koʼẽrõitéma oisãmbyhýta yvyporakuérape. Jesús ohenói ko mbaʼépe ‘ipyahupa jeýva ára’ (Mateo 19:28, ÑÑB). Mbaʼéichapa ojeikóta pe goviérno guýpe? Emañamína mbaʼépa heʼi la Biblia:

Salmo 46:10, (46:9, NM): ‘Ñandejára oipeʼáta opaichagua ñorairõ ko yvy ape ári’.

Isaías 35:1, ÑÑB: ‘Ovyʼáta pe yvy perõ ha pe yvy nandi; ha horyetéta pe ñu ipoty jeýgui ku yvotytýicha’.

 Isaías 65:21-23, ÑÑB: ‘Nombaʼaporeimoʼãi hikuái, ha ndoguerumoʼãi mitã yvy ape ári omano hag̃ua pyaʼe, che ahovasa jeýta che retãyguakuéra ha iñemoñarenguérape avei’.

Juan 5:28, 29, ÑÑB: ‘Ani pehecharamo ko mbaʼe, katuete oúta pe óra opa omanomavaʼekue ohendu hag̃ua Jesucristo ñeʼẽ ha osẽvaʼerã iñeñoty haguégui’.

Revelación 21:4: ‘Omokãta hesaykuéra, ndaiporimoʼãvéima ñemano, tasẽ, jaheʼo ha temimbyasy, opa umi mbaʼe oĩvaʼekue yma niko ndaiporimoʼãvéima’.

Mbaʼérepa ikatu jaguerovia koʼã mbaʼe

Ndépa reguerovia oñekumplíne hag̃ua koʼã promésa? Ñandejára Ñeʼẽ heʼimavaʼekue oĩtaha umi ndogueroviáiva. ‘Ára pahápe ouvaʼerã umi oñembohorýtava penderehe ha heʼítava peẽme: “Cristo niko heʼivaʼekue ou jeytaha. Moõ piko oime? Ore rukuéra niko omanombáma, ha ko yvy katu oĩ iñepyrũmby guive guaréichante”.’ (2 Pedro 3:3, 4.) Péro umi péicha opensáva tuichaiterei ojavy. Koʼág̃a jahechamíta mbaʼérepa ikatu jaguerovia la Biblia heʼíva:

1) Ñandejára omopotĩmavaʼekue ko yvy. Pór ehémplo pe Diluvio oikovaʼekue Noé tiémpope (2 Pedro 3:5-7).

2) Ñandejára Ñeʼẽ heʼimavaʼekue mbaʼéichapa ojeikóta koʼã árape.

3) Koʼág̃a rupi ndahaʼéi jaikóva ‘ko yvy ñepyrũmby guive guaréichante’. Ha upéva ikatu jahecha pe ojeiko lája rupi koʼág̃a, noñemombaʼevéi pe teko potĩ, ha noñeñangarekovéi ko yvy jaikoháre.

4) ‘Pe marandu porã Ñandejára sãmbyhýre oñeʼẽva oñemoherakuã opárupi ko yvy jerekuévo’ ha upéva ohechauka og̃uahẽpotaitemaha “pe ipaha” (Mateo 24:14).

Reikuaasevépa mbaʼépa omboʼe Ñandejára Ñeʼẽ? Nderestudiaséipa la Biblia testigos de Jehová ndive? Péicha reikuaavéta ikatuha jaiko opa ára g̃uarã Ñandejára Rréino poguýpe (Juan 17:3). Ha hiʼag̃uíma voi katu heta mbaʼe porã. Koʼẽrõitéma ko yvýgui oikóta peteĩ hardín neporãva. Reimétapa nde upépe?

[Komentário oĩva páhina 7-pe]

Umi heʼíva ko yvy oĩha iñepyrũmby guive guaréichante, tuichaiterei ojavy

[Nóta oĩva taʼanga ndive páhina 8]

Ndépa reiméta upépe?