Oñehundínepa ko yvy?

Mbaʼépa nde ere?

Amo gotyove, opa mbaʼe ko yvy ape ári...

a)  ...iporãvéta.

b) ...péicha jeýtante.

c) ...oho vaivéta.

HETA oĩ heʼíva iporãvetaha ñane renonderã. Ndépa repensa avei péicha? Upéicharamo, aníkena rekambia. Oĩ infórme ohechaukáva ñahaʼarõramo iporãva, ñaneresãive ha ñandekatupyryveha. Peteĩ estúdio ojejapovaʼekue heta áñore ohechauka umi opensáva iporãvare meme, hasyveha iprovléma hag̃ua ikorasõme. Upe estúdio ohechauka añeteha la Bíbliape heʼíva: “Pyʼarory pohã guasu, ñembyasy katu ñanemokangy” (Proverbios 17:22).

Upéicharõ jepe, hetápe hasy opensa hag̃ua iporãvare meme. Mbaʼérepa upéva? Umi sientífiko heʼi haguére ko ñane planéta oho vaipaiteha. Jahechamína mbaʼépa ojeʼe ñane planétare ha oipyʼapyvahína enterovépe.

Oikoʼipaitéma ñane planéta

Áño 2002-pe, pe Instituto de Medio Ambiente de Estocolmo heʼi péichante jaháramo hese ha ojejapónterõ hína umi mbaʼe ombyaíva ko yvy, ‘ikatu roʼyeterei  térã hakueterei ha oñembyaive ñane planéta’. Heʼi avei oĩha hetaiterei imboriahúva, ndaiporiha tekojoja, ha ojeporu vaietereiha umi mbaʼe oĩva ñane planétape. Ha upéicha rupi ojeiko jepyʼapy ha kyhyjepópe.

Áño 2005-pe Las Naciones Unidas oguenohẽ peteĩ Informe Sintetizado de Evaluación de los Ecosistemas del Milenio. Cuatro áñore oñembaʼapo ojejapo hag̃ua ko estúdio, ombaʼapo hese 1.360 tapicha ikatupyrýva, 95 tetãgui. Pe infórme heʼi: ‘Yvypóra oiporu vaieterei heta mbaʼe ko planétagui. Upévare ndajaikuaavéima umi ag̃ave onasétavapa ikatúta oikove’. Ha pono oiko peteĩ desástre, ‘umi goviérno okambiavaʼerã heta mbaʼe, ha ndojapoihína upéva’.

Anna Tibaijuka, peteĩ directora ejecutiva Programa de las Naciones Unidas para los Asentamientos Humanospegua heʼi: “Péichante jahárõ hese, nañaneraʼarõi mbaʼe porã”.

Peteĩ mbaʼe ñanemokyreʼỹva

Umi ojapóva ko rrevísta ningo testigos de Jehová, ha oguerovia hikuái koʼẽrõitéma oikotaha heta mbaʼe okambiátava ko jaiko lája. Péro ndeʼíri ivaivetaha, heʼi guei hikuái ojeiko porãitereitaha. Reikuaápa mbaʼérepa opensa hikuái péicha? Ojeroviágui Ñandejára Ñeʼẽ heʼívare. Peteĩ promésa oĩva pype heʼi: ‘Koʼẽrõite opámane iñañáva, ndojejuhuichéne ojehekavéramo jepe. Ivuénovape katu opytapáne ko yvy, ha pyʼaguapýpe oikóne hikuái’ (Salmo 37:10, 11).

Ndépa ere ikatuneha oiko koʼã mbaʼe? Embohovái mboyve, reikuaavaʼerã la Biblia ymaiterei guivéma omombeʼu hague umi provléma koʼág̃a rupi jahasáva. Pe artíkulo oúvape rejuhúta heta téysto ohechaukáva upéva. Embojojamína umíva umi mbaʼe oikóva rehe koʼág̃a rupi, ha upéicha rejerovia mbaretevéta umi promésa oĩvare la Bíbliape.