Jehová oñangarekovaʼekue isiervokuérare

‘Ñandejára, pyaʼe eju chepytyvõ. Nde hína upe chepytyvõva ha cherenohẽva jejopy vaígui.’ (SAL. 70:6 [70:​5, NM].)

1, 2. a) Mbaʼéicha javépa kristianokuéra imanduʼa Jehováre raẽvete? b) Mbaʼépa ikatu ñañeporandu, ha moõpa oñembohovái upéva?

 PETEĨ kuñakarai ha karai oĩ aja de vakasión ojeavisa chupekuéra peteĩ ifamília orekóva 23 áño ojesekuestra hague, ha ojeʼe oiméne hag̃ua ojejuka chupe. Ohokuévo hógape hikuái ojerure Jehovápe oipytyvõmi hag̃ua chupekuéra. Ha peteĩ mitãrusu orekóvape 20 áño, doktorkuéra heʼi chupe hasyha ha ikatuha opyta paralítiko. Oikuaávo upéva pe mitãrusu oñemboʼe Jehovápe. Avei peteĩ sy omongakuaáva haʼeño imemby kuñaʼi orekóva 12 áño, ndojuhúi anga itravahorã ha ndorekovéima hoʼuvaʼerã. Upémaramo oñemboʼe Jehovápe ipyʼaite guive. Jahechaháicha kristianokuéra ojejopy vai jave, Jehováre raẽvete imanduʼa. Ndépa rejerurémava Jehovápe nepytyvõ hag̃ua rejejopy vai jave?

² Péro ñañeporandumi: “Ikatúpa ñahaʼarõ Jehová ombohovái ñane ñemboʼe?”. Salmo 70 omyesakãva tuicha ñanemokyreʼỹ. Upe salmo ohaivaʼekue David ohasa asýrõ guare. Haʼe heʼi Jehováre: ‘Nde hína upe chepytyvõva ha cherenohẽva jejopy vaígui’ (Sal. 70:​6, [70:​5, NM]). Koʼág̃a ñahesaʼỹijóta Salmo 70, jahecha hag̃ua ñande ikatuha avei jajerure Jehovápe ñanepytyvõ hag̃ua jahasa asy jave, jaikuaágui Haʼe katuete ñanerendutaha.

Jehová oñangareko David rehe

3. a) Mbaʼépa David ojerure Salmo 70-pe? b) Mbaʼépa David ojerovia Jehová ojapotaha?

³ David oñepyrũ guive opa peve pe Salmo 70 ojerure asy Jehovápe oipytyvõmínte hag̃ua chupe, ha oguenohẽmi hag̃ua chupe jejopy vaígui (jaleemína Salmo 70:​1-5). Ha versíkulo 2 ha 3-pe jajuhu David ojerure Ñandejárape osẽ vaipa hag̃ua iñenemigokuéra ojaposéva hese ha oñemotĩ hag̃ua hikuái iñaña haguére. Ha versíkulo 4-pe jajuhu oñemboʼe Ñandejára siervokuérare. David ojerure ovyʼa hag̃ua umi oñemoag̃uíva Jehováre ha omombaʼeguasu hag̃ua Héra. Ha omohuʼã hag̃ua iñemboʼe heʼi: ‘Nde hína upe chepytyvõva ha cherenohẽva  jejopy vaígui’. Koʼápe jahechakuaa David ojeroviaha Jehová oipytyvõ ha oguenohẽtaha chupe jejopy vaígui.

4, 5. Mbaʼépa heʼi ñandéve David rehe Salmo 70? Mbaʼépa ikatu avei jajerovia Jehová ojapotaha?

⁴ Mbaʼépa heʼi ñandéve David rehe Salmo 70? Heʼi ñandéve Davídpe ijárõ guare ndojukái hague iñenemigokuéra ojukasévape chupe. Oheja guei Jehová pópe okastiga hag̃ua chupekuéra (1 Sam. 26:10). David ojerovia Jehová oipytyvõ ha oguenohẽha jejopy vaígui umi hese oñemoag̃uívape (Heb. 11:6). Oikuaa porã avei Ñandejára siervokuéra orekoha hetaiterei mbaʼe ovyʼa ha omombaʼeguasu hag̃ua Jehovápe (Sal. 5:11; 35:27).

⁵ Ñande ikatu avei jajerovia Jehová ñanepytyvõtaha ha ñaneguenohẽtaha jejopy vaígui. Upévare ñambohovái jave umi mbaʼe ijetuʼúva térã jajepyʼapyeterei jave, jajerurevaʼerã Jehovápe tañanepytyvõ (Sal. 71:12). Mbaʼéichapa Jehová ikatu ombohovái ñane ñemboʼe? Ñambohovái mboyve ko porandu jahechamíta mbaʼéichapa tres vése oipytyvõ Davídpe ojejopy vaírõ guare.

Jehová oguenohẽ chupe jejopy vaígui

6. Mbaʼéicha rupípa David ojerovia Jehová oipytyvõ ha oguenohẽtaha jejopy vaígui umi iñeʼẽrendúvape?

⁶ David olee rupi Ñandejára Ñeʼẽ oikuaa Jehová oipytyvõ ha oguenohẽtaha jejopy vaígui umi iñeʼẽrendúvape. Pór ehémplo, Jehová omboúrõ guare ama guasu ohundi hag̃ua umi iñañávape Noé tiémpope, oñangareko Noé ha ifamíliare (Gén. 7:23). Omongýrõ guare tata ha azufre umi Sodoma ha Gomorraygua ári, Jehová oipytyvõ Lot ha umi mokõi itajýrape ojesalva hag̃ua (Gén. 19:​12-26). Ha ohundírõ guare faraón ha isoldadokuérape már Rójope, oñangareko isiervokuérare ha osalva chupekuéra (Éxo. 14:​19-28). Ndareíriko David heʼi Jehová ‘ñaneguenohẽha jejopy vaígui’ (Sal. 68:​20, ÑÑB).

7-9. a) Mbaʼérepa David ojerovia Jehová osalvataha chupe? b)  Mbaʼéicha rupípa heʼi David ojesalva hague?

⁷ Péro David ojerovia avei Jehová osalvataha chupe oikuaa rupi mbaʼéichapa oñangareko isiervokuérare, haʼete voi ‘ku ipópe oguerekóva’ chupekuéra (Deu. 33:27). Heta vése ningo Jehová oguenohẽ Davídpe jejopy vaígui. Upévare haʼe heʼi: ‘Umi chejukasévagui chepeʼa’ (Sal. 18:​17-19, 48). Jahechamína peteĩ ehémplo.

⁸ Peteĩ árape umi kuña Israelgua oponderajoa Davíd ivaleterei haguére, rréi Saúl katu ojepicha ha ipochyeterei. Upévare dos vése voi oñehaʼã ojuka chupe (1 Sam. 18:​6-9). Ha umi dos vése voi ojehekýi chugui. Mbaʼépa oipytyvõ chupe ojesalva hag̃ua? Ivaleterei mbaʼe piko? Ndahaʼéi upévare, la Bíbliape heʼi “Ñandejára oipytyvõgui” chupe ojesalva hague (jaleemína 1 Samuel 18:​11-14). Ha rréi Saúl ‘ohechakuaa Jehová oipytyvõha Davídpe’ ndaikatúirõ guare ojuka chupe umi filistéo (1 Sam. 18:​17-28).

⁹ Mbaʼéicha rupípa heʼi David ojesalva hague? Salmo 18-pe haʼe voi omombeʼu ñandéve: ‘Jehová, nde reñangareko cherehe, nerendápe ag̃uahẽ akañy hag̃ua, nde reime chejerére. Nde upe cherenohẽva jejopy vaígui. Nerendápe ag̃uahẽramo nde chepytyvõ’. David ningo ohaivaʼekue ko purahéi Jehová osalvárõ guare chupe Saúlgui (Sal. 18:2). Ñanemokyreʼỹete ningo jaikuaávo Jehová oguenohẽha jejopy vaígui isiervokuérape! (Sal. 35:10.)

Jehová oñangareko hese hasýrõ guare

10, 11. Mbaʼérõ guare piko David hasyete, ha mbaʼéichapa jaikuaa upéva?

¹⁰ Salmo 41-pe oñemombeʼu David hasyete hague ha peteĩ tiémpo nopuʼãiete hague voi. Ha iñenemigokuéra opensa  ndokueraveimaha (versíkulo 7 ha 8). Mbaʼérõ guare piko oiko upéva? Heʼívare sálmope, ikatu jaʼe oiko hague upéva itaʼýra Absalón opuʼãrõ guare hese, ojupi hag̃ua hendaguépe rréiramo (2 Sam. 15:​6, 13, 14).

¹¹ Pór ehémplo, David heʼi peteĩ iñamigoite otrasionaha chupe (versíkulo 9). Péva ñanemomanduʼa Ahitofel rehe, David ojeroviavaʼekue hese. Péro Ahitofel otraisiona chupe ha opuʼã hese Absalón ndive (2 Sam. 15:31; 16:15). Mbaʼeichaitépa oiméne oñeñandu vai rakaʼe David hasyetérõ guare ha ndaikatuvéi anga ni opuʼã, ha umi ijerére oĩva katu oipotántema voi omano (Versíkulo 5).

12, 13. a) Mbaʼépa heʼi David ojeroviágui Jehováre? b) Mbaʼéichapa Jehová omombarete Davídpe?

¹² David hasyetéramo jepe osegi ojerovia Jehováre, oikuaágui mbaʼéichapa oipytyvõ jepi isiervokuérape hasy jave. Haʼe heʼi: ‘Ñandejára oipytyvõta avei chupe ohasa asy jave. Oñangarekóta hese hasy jave hupápe ha ombovevýita ijehasa asy’ (versíkulo 1 ha 3, ÑÑB). David heʼívo Jehová “oñangarekóta” isiervokuérare ohechauka ojeroviaitereiha Jehová oipytyvõtaha avei chupe. Péro mbaʼéichapa oipytyvõta chupe Jehová?

¹³ David nohaʼarõi Jehová omonguerataha chupe, péro oikuaa porã oñangarekotaha hese, omombarete ha oipytyvõtaha chupe hasy aja. David ningo oikotevẽvaʼekue Jehováre hasyete ha oĩ rupi hetaiterei otakýva hese (versíkulo 5 ha 6). Oiméne Jehová omombaretéraʼe Davídpe oipytyvõvo chupe opensa hag̃ua umi mbaʼe iporãvare. David heʼi: ‘Cheñeʼẽrendu haguére, reñangareko cherehe’ (versíkulo 12). Oiméne omokyreʼỹete Davídpe Jehová oguerohory haguére chupe, hasyete ha oĩramo jepe oñeʼẽ vaíva hese. Upe rire David okuera jey. Ñanemokyreʼỹete ningo jaikuaávo Jehová oñangarekotaha avei ñanderehe ñande rasyete jave! (2 Cor. 1:3.)

Omeʼẽ chupe hemikotevẽ

14, 15. Mbaʼéichapa ojejopy vai rakaʼe David ha iñirũnguérape? Ha mbaʼéichapa oñepytyvõ chupekuéra?

¹⁴ David ningo rréi vaʼekue Israélpe ha hoʼu umi tembiʼu hepa jepéva. Ikatuvaʼekue avei oinvita hapichakuérape okaru hag̃ua hendive (2 Sam. 9:10). Upéicharamo jepe, oikuaavaʼekue avei mbaʼépa heʼise la mboriahu. Pór ehémplo, Absalón opuʼãrõ guare hese, David ha iñirũnguéra oho Jerusaléngui Galaádpe okañy hag̃ua (2 Sam. 17:​22, 24). Upe riremínte haʼekuéra oikotevẽma hembiʼurã, hoyʼu ha opytuʼu hag̃ua. Péro moõpa otopáta hikuái oikotevẽva?

¹⁵ David ha iñirũnguéra og̃uahẽrõ guare Mahanaímpe, ojuhu Sobí, Makir ha Barzilai rehe. Haʼekuéra ningo ipyʼaguasueterei ha oipytyvõ Davídpe. Oikuaa porãramo jepe Absalón ikatuha ojuka chupekuéra oikóramo chugui rréi. Umi kuimbaʼe ohechakuaávo mbaʼéichapa ojejopy vai David ha iñirũnguéra, omeʼẽ chupekuéra hoʼuvaʼerã: trígo, cebada, umi kógaʼa oñemaimbepyréva, habas, lentejas, eíra, ñandy, ovecha, ha tupa avei (jaleemína 2 Samuel 17:​27-29). Oiméne David oguerohorýraʼe ohechávo mbaʼéichapa imbaʼeporã ha ojerovia Jehováre hikuái. Ha ndahesaraichéne arakaʼeve upe ojapovaʼekue hesehápe hikuái.

16. Mávapa añetehápe omeʼẽ hemikotevẽ David ha iñirũnguérape?

¹⁶ Mávapa añetehápe omeʼẽ hemikotevẽ David ha iñirũnguérape? David oikuaa porã Jehová oñangarekoha ipuévlore. Ha upearã ikatuha ojevale isiervokuérare. David ohechakuaa Jehová omeʼẽ hague chupe hemikotevẽ, ha upearã oiporu umi mbohapy kuimbaʼépe oñangareko hag̃ua hese. Ha ituja rire imanduʼávo ohasavaʼekuére, ohai: ‘Che mitã vaʼekue, koʼág̃a katu chetujáma, ha ndahecháiva hekopotĩva oikotevẽramo térã itaʼyrakuéra ojeruréramo upe rupi hoʼuvaʼerã’ (Sal. 37:25). Javyʼaiterei  ningo jaikuaávo Jehová omeʼẽha isiervokuérape hemikotevẽ! (Pro. 10:3.)

‘Jehová oipytyvõ ojejopy vaívape’

17. Mbaʼépa ohechauka porã umi mbaʼe oikovaʼekue?

¹⁷ Jehová ningo oguenohẽvaʼekue heta isiervokuérape jejopy vaígui ha David oĩ umíva apytépe. Umi mbaʼe oikovaʼekue ohechauka porã ndaijapúi hague apóstol Pedro heʼívo: ‘Ñandejára ningo oikuaa mbaʼéichapa oipytyvõvaʼerã umi imarangatúvape ojejopy vai jave’ (2 Ped. 2:9). Jahechamíta koʼág̃a mokõi ehémplo.

18. Mbaʼéichapa Jehová osalva isiervokuérape rréi Ezequías tiémpope?

¹⁸ Áño 732 Jesús ou mboyve, umi soldádo Asiriaygua oike Judápe ha ojagarrase avei Jerusalén. Upérõ rréi Ezequías oñemboʼe péicha: ‘Jehová ore Jára oresalvamína, ikatu hag̃uáicha tetãnguéra oikuaa nde añoite haʼeha Ñandejára’ (Isa. 37:20). Jahechaháicha pe rréi ojepyʼapy Ñandejára rérare, ndoipotái avave oñeʼẽ vai Hese. Jehová ombohovái Ezequíaspe iñemboʼe ha omondo peteĩ ánhel osalva hag̃ua isiervokuérape. Upe ánhel ojuka 185.000 soldádo Asiriaygua peteĩ pyharépente (Isa. 37:​32, 36).

19. Mbaʼépa Jesús heʼi hemimboʼekuérape oikotaha tenonderã?

¹⁹ Omano mboyvemi, Jesús heʼi hemimboʼekuéra Judeayguápe mbaʼépa oikóta tenonderã (jaleemína Lucas 21:​20-22). Péro heta tiémpo ohasa rire oiko upe heʼivaʼekue chupekuéra. Áño 66-pe umi soldádo Romaygua omongora Jerusalén ohundi hag̃ua. Umi soldadokuéra oĩva Cestio Galo poguýpe oitymoʼã peteĩ párte pe murálla témplo jereregua, péro upéi ohopa jeýnte hikuái. Umi kristiáno iñeʼẽrendúva ohechakuaa ojapovaʼerãha Jesús heʼivaʼekue ojesalvasérõ, ha oho hikuái umi montáñape. Umi soldádo Romaygua ou jey áño 70-pe ha ohundi Jerusalén. Ha umi iñeʼẽrenduvaʼekue Jesúspe ojesalva (Luc. 19:​41-44).

20. Mbaʼérepa jajerovia Jehová oñangarekotaha ñanderehe?

²⁰ Ñañeʼẽ rire umi ehémplo ohechaukávare Jehová oipytyvõha isiervokuérape, jajeroviave hese. Tahaʼe haʼéva upe jahasáva koʼág̃a térã ikatúva jahasa tenonderãme, jajerovia Jehová oñangarekotaha ñanderehe. Péro mbaʼéichapa Jehová oñangareko ñanderehe koʼág̃a rupi? Mbaʼépa oiko umi ermáno ñañeʼẽ hague ko artíkulo oñepyrũvo? Koʼã mbaʼe jaikuaáta pe artíkulo oúvape.

Ñanemanduʼápa koʼã mbaʼére?

• Mbaʼépa ohechauka Salmo 70-pe Jehová ojapotaha?

• Mbaʼéichapa Jehová oñangareko David rehe hasýrõ guare?

• Mbaʼe ehémplopa ohechauka Jehová oipytyvõha isiervokuéra ojejopy vaívape?

[Porandu ñahesaʼỹijóva]

[Nóta oĩva taʼanga ndive páhina 15]

Jehová ombohovái Ezequías ñemboʼe