Mbaʼéichapa umi omendáva ikatu ojoayhuve koʼẽ koʼẽre

‘Pióla ipo mbohapýva ndosói oimeháicha rei.’ (ECL. 4:12.)

1. Mávapa omomenda Adán ha Évape?

 ÑANDEJÁRA ojapo rire mymba ha plantakuéra, ojapo Adánpe. Upéi Jehová omonge Adánpe ha oiporu peteĩ ikostílla ojapo hag̃ua chupe iñirũrã. Adán ohechávo upe kuñáme heʼi: “Kóva ningo ojejapo chekangue ha cheroʼógui” (Gén. 1:27; 2:​18, 21-23, ÑÑB). Jehová ningo ovyʼa Adán ha Eva reheve, upéi omomenda ha ohovasa chupekuéra (Gén. 1:28; 2:24).

2. Mbaʼéichapa oñepyrũ iprovléma Adán ha Eva?

² Péro, upe riremínte oñepyrũma iprovléma hikuái. Peteĩ ánhel iñañaitereíva heráva Satanás, ombotavy Évape. Upévare Adán ha Eva hoʼu pe yva Ñandejára heʼi porã vaʼekue chupekuéra ani hag̃ua hoʼu. Upéicha mokõivéva oñemoĩ Ñandejára sãmbyhýre (Gén. 3:​1-7). Jehová oporandúrõ guare mbaʼérepa ojapo hikuái upéva, Adán omboja Évare oikovaʼekue heʼívo: ‘Pe kuña remeʼẽvaʼekue chéve cheirũrã, haʼéngo omeʼẽ chéve upe yva ha haʼu’. Péicha ojekuaa iprovlemaha hikuái (Gén. 3:​11-13).

3. Mbaʼépa heʼi umi hudiokuéra rrelihión omoakãva?

³ Upe guive Satanás oñehaʼã opáichavo omoingovai ména ha tembirekópe. Pór ehémplo koʼág̃a rupi umi rrelihión omoakãva nomboʼéi Ñandejára Ñeʼẽ heʼíva pe ñemendáre. Ha yma umi omoakãva hudiokuéra rrelihión nomombaʼéi avei Ñandejára Ñeʼẽ heʼíva. Haʼekuéra heʼi peteĩ ména ikatuha ojedivorsia hembirekógui omoheʼẽ mbochy haguére hembiʼu jepe. Péro Jesús heʼi: ‘Ojedivorsiáva hembirekógui ndahaʼéiramo heko vai haguére, ha omendáva ambue kuñáre oporomyakãratĩhína’ (Mat. 19:​9, BNP).

4. Mbaʼépa ojapo Satanás koʼag̃aite peve?

⁴ Satanás ningo koʼag̃aite peve oñehaʼã omoingovai ména ha tembirekópe. Upévare hetaiterei oĩ oikóva oñondive omendaʼỹre  térã ojedivorsiáva pyaʼeterei. Oĩ avei kuimbaʼe omendáva kuimbaʼéndi térã kuña kuñándi (jaleemína Hebreos 13:4). Mbaʼépa ikatu jajapo ani hag̃ua ñapensa iporãha umi mbaʼe? Jaikuaa hag̃ua ñahesaʼỹijóta mbaʼépa ojapo umi omendáva oikóva vyʼápe.

Jehová oĩvaʼerã penendive

5. Mbaʼe rehépa oñembojoja peteĩ ‘pióla ipo mbohapýva?

⁵ Ovyʼa hag̃ua umi omendáva ojapovaʼerã Jehová heʼíva. La Biblia heʼi: ‘Pióla ipo mbohapýva ndosói oimeháicha rei’ (Ecl. 4:12). Koʼápe oñembojoja ména, tembireko ha Jehovápe peteĩ ‘pióla ipo mbohapývare’ ha oñetrensáva ojuehe ijyve hag̃ua. Ijapytepekuéra Jehová hína pe iñimportantevéva, pe omombaretéva ména ha tembirekópe ombohovái hag̃ua opaichagua provléma. Haʼekuéra ovyʼáta oñemoag̃uírõ Jehováre añoite.

6, 7. a) Mbaʼépa ojapovaʼerã umi omendáva Jehová oĩ hag̃ua hendivekuéra? b) Mbaʼépa omombaʼeve iménare peteĩ ermána?

⁶ Mbaʼépa ojapovaʼerã umi omendáva Jehová oĩ hag̃ua hendivekuéra? Rréi David opurahéi péicha: ‘Ajapose nerembipota upéva chembovyʼa. Ne ñeʼẽ oĩ che ánga ruguápe’ (Sal. 40:​8, ÑÑB). David ohayhu Jehovápe ha upévare iñeʼẽrendu chupe ipyʼaite guive. Koʼág̃a avei ñande jahayhuvaʼerã Jehovápe upéicha, ha umi omendáva oñehaʼãvaʼerã koʼẽ koʼẽre oñemoag̃uive hese ha vyʼápe ojapo hembipota. Ha mokõivéva oñopytyvõvaʼerã ohayhuve hag̃ua Jehovápe (Pro. 27:17). 

⁷ Ména ha tembireko omombaʼéramo ipyʼaite guive Ñandejára Ñeʼẽ heʼíva ojeroviavéta Jehová oprometévare. Ha avei ojoayhuvéta hikuái koʼẽ koʼẽre (1 Cor. 13:13). Sandra ojapóma cincuenta áño omenda hague, ha heʼi: “La amombaʼevéva che ménarengo mbaʼéichapa omoakã porã ore rogapy, mbaʼeichaitépa ohayhuve Jehovápe opa mbaʼégui”. Ha peẽ ména: Heʼítapa upéicha avei penderehe pene rembireko?

8. Mbaʼépa ojapovaʼerã ména ha tembireko ohupyty hag̃ua ‘heta mbaʼe porã’?

⁸ Pemotenondépa opa mbaʼépe Ñandejára Rréino ha hembipota? Peñopytyvõpa mokõivéva pejapo hag̃ua Jehová heʼíva? (Gén. 2:24.) Rréi Salomón heʼi: ‘Mokõi iporãve peteĩgui, hetave mbaʼe porã ohupyty hembiapo repykuégui’ (Ecl. 4:​9, ÑÑB). Ména ha tembireko ombaʼapovaʼerã kyreʼỹme Jehovápe g̃uarã, ohupyty hag̃ua ‘heta mbaʼe porã’. Mbaʼépa ohupyty hikuái? Ojoayhuve hikuái koʼẽ koʼẽre ha Jehová ovendesi chupekuéra.

9. a) Mbaʼe mbaʼépa ojapovaʼerã pe ména? b) Heʼiháicha Colosenses 3:​19, mbaʼéichapa omoakãvaʼerã pe ména hembirekópe?

⁹ Jehová oĩ hag̃ua umi omendávandi, ména ha tembireko oñehaʼãvaʼerã ojapo opa mbaʼe Jehová heʼihaichaite. Pór ehémplo pe ména omoĩvaʼerã ifamíliape oikotevẽva, ha oipytyvõvaʼerã avei chupekuéra omombarete hag̃ua ijerovia (1 Tim. 5:8). Ména ohechakuaavaʼerã avei mbaʼéichapa oñeñandu hembireko. Colosenses 3:​19-pe heʼi: “Pe ména tohayhu hembirekópe ha ani iñeʼẽ pohýi chupe”. Peteĩ karai iñarandúva heʼi pe “ñeʼẽ pohýi” heʼiseha: peteĩ ména “ombyepotiha hembirekópe, oñeʼẽ vai, térã noipytyvõseiha chupe. Avei noñangarekói ha nomoĩriha hembirekópe oikotevẽva, térã ndohechaukaiha chupe ohayhuha”. Peteĩ ména oservíva Jehovápe ni mbaʼevéicharõ ndojapoivaʼerã upéicha. Omoakãvaʼerã guei hembireko mborayhúpe ha upéicha ndahasymoʼãi chupe oñemoĩ hag̃ua iména poguýpe.

10. Mbaʼépa opensa umi tembireko oĩva Jehová organisasiónpe oñemoĩ haguére iména poguýpe?

¹⁰ Umi tembireko oipotáva Jehová oĩ hendivekuéra, ojapovaʼerã avei Jehová heʼíva. Apóstol Pablo heʼi: ‘Peẽ kuña omendáva, pejapóke pene ména heʼíva peẽme, pejapoháicha Ñandejára heʼíva. Ména ningo tembireko akã hína, Cristo haʼeháicha pe kongregasión akã’ (Efe. 5:​22, 23). Satanás ombotavy Évape heʼívo chupe ovyʼavetaha oikóramo iñakãre ha ndojapóiramo Ñandejára heʼíva. Ha koʼág̃a peve oĩ heta omendáva oikóva avei iñakãre. Péro Jehová organisasiónpe ndahaʼéi upéicha, umi  tembireko ovyʼa iména omoakãramo mborayhúpe hogapy. Ha nopensái ojeapoʼiha chupe Ñandejára heʼi haguére oñemoĩvaʼerãha iména poguýpe. Upéicha opensa oikuaa porã rupi Jehová ojapo hague Évape oipytyvõ hag̃ua iménape. Ha upéva ningo Jehová oguerohoryeterei (Gén. 2:18). Pe tembireko iñeʼẽrendúva ningo ‘ombojegua’ ha omombaʼe iménape (Pro. 12:4).

11. Mbaʼépa oipytyvõ peteĩ ermánope oiko hag̃ua vyʼápe hembirekóndi?

¹¹ Umi omendávandi oĩ hag̃ua Jehová, ostudiavaʼerã avei la Biblia oñondive. Gerald, cincuenta y cinco áñoma ojapo omenda hague ha omombeʼu mbaʼépa oipytyvõ chupekuéra oiko hag̃ua vyʼápe: “Umi omendáva ovyʼa hag̃ua katuete olee ha ohesaʼỹijovaʼerã la Biblia oñondive”. Ha heʼi avei: “Ojapovaʼerã hikuái heta mbaʼe oñondive Jehová servísiope. Upéicha oĩ porãvéta hikuái oñondive ha Jehovándi”. Umi omendáva ostudiáramo oñondive la Biblia akóinte imanduʼáta mbaʼépa Jehová oipota ojapo. Imbaretevéta avei ijerovia ha ojapóta hikuái hetave mbaʼe Jehovápe g̃uarã.

12, 13. a) Mbaʼérepa iñimportánte umi omendáva oñemboʼe oñondive? b) Mbaʼépa tekotevẽ avei ojapo umi omendáva Jehová oĩ hag̃ua hendivekuéra?

¹² Umi omendáva oikóva vyʼápe oñemboʼe oñondive. Upéva ningo iñimportánte, pe ména oñemboʼevaʼerã Jehovápe ipyʼaite guive ha omombeʼu chupe mbaʼépa oikotevẽ. Upéicharõ ojoayhuvéta hikuái koʼẽ koʼẽre (Sal. 62:8). Pór ehémplo pejoavy jave, mbaʼére piko ndapehechái mbaʼépa heʼi Ñandejára upe mbaʼére? (Mat. 6:​14, 15.) Péro ndahaʼéi peñemboʼentevaʼerã, mokõivéva peñehaʼãvaʼerã pejapo pejerure haguéicha. Ha avei peñopytyvõ, ‘peñoaguanta ha peheja rei ojupe oimérõ pendepochy’ (Col. 3:13). Ñañemboʼévo Jehovápe jahechauka jajeroviaha hese. Rréi David heʼi: ‘Opavave omaʼẽ nderehe jeroviapópe’ (Sal. 145:​15, ÑÑB). Jehová ningo ojepyʼapy ñanderehe, upévare tuicha ñandepyʼaguapy ñañemboʼévo chupe ha jaheja ipópe opa mbaʼe (1 Ped. 5:7).

¹³ Jehová oĩ hag̃ua umi omendávandi tekotevẽ avei oho hikuái rreunionhápe ha opredika oñondive. Rreunionhápe ningo oñehekomboʼe umi omendávape ani hag̃ua hoʼa umi “ñuhã” Satanás omoĩvape ombyai hag̃ua chuguikuéra hogapy (Efe. 6:​11, ÑÑB). Ha pepredika memérõ oñondive ‘pejepytaso mbaretéta ha pembaʼapóta kyreʼỹme’ Ñandejára servísiope (1 Cor. 15:​58, BNP).

Mbaʼépa jajapovaʼerã oĩ jave provléma

14. Mbaʼépa ombohasa asy umi omendávape oservíramo jepe Jehovápe?

¹⁴ Koʼã mbaʼe ningo heta vésema ojeʼe ñandéve. Upéicharõ jepe, mbaʼére piko nañañeʼẽi jeýnte umi mbaʼére ñane rembireko térã ñane ménandi? Ikatu ningo jahechakuaa tekotevẽha ñakambia. Ha ñanemanduʼavaʼerã avei la Biblia heʼiha umi omendáva ‘heta ohasa asytaha’ (1 Cor. 7:​28, BNP). Upeichaite ningo, umi omendáva oservíramo jepe Jehovápe ohasa asy: iñimperfékto rupi, oiko haguére ko múndo añáme ha avei Satanás káusare (2 Cor. 2:11). Péro ikatu ningo ñambohovái koʼã mbaʼe! Jehová ñanepytyvõ ñambohovái hag̃ua umichagua provléma. Ñanemanduʼami Job rehe, ojejuka chugui ifamiliakuéra ha hembiguaikuérape avei. Hymbakuéra katu oñemonda ha umi hembymíva chupe omanomba. Upéicharõ jepe la Biblia heʼi: “Job ndojapói ivaíva ha noñeʼẽvaíri Ñandejára rehe” (Job 1:​13-22).

15. Mbaʼépa ikatu oiko jahasa asy jave? Mbaʼépa ojapovaʼerã umi omendáva péicha jave?

¹⁵ Job rembireko katu heʼi chupe: ‘Neñeʼẽrendu gueteri piko Ñandejárape? Ejahéina hese ha emano!’ (Job 2:9). Upéicha jahecha, ikatuha jaʼe jaʼeʼỹvaʼerã jahasa asy jave. Salomón heʼi jajecha vaíramo: ‘Iñarandúva jepe ikatu itarova’ (Ecl. 7:7). Upéicharõ, ‘jahasa asy’ térã ñaneprovléma jave, ani ñandepochy oñeʼẽ pohýiramo ñandéve ñane rembireko térã ñane ména. Ha ñambohovairangue chupe, ñañehaʼãvaʼerã ñandepyʼaguapy (jaleemína Salmo 37:8). Aníkena ñamboguapy ñandejehe sapyʼánte ‘jaʼéramo jaʼeʼỹvaʼerã’ ojupe jahasa asy jave (Sal. 106:33).

16. a) Mbaʼérepa oñatendevaʼerã umi omendáva Mateo 7:​1-5 heʼívare? b) Mbaʼérepa ndovaléi ñahaʼarõ ojapo porã opa mbaʼe ñane ména térã ñane rembireko?

 ¹⁶ Jaikuaa ningo ndaikatuiha voi osẽ porã ñandéve opa mbaʼe. Pór ehémplo ikatu rehecha ne ména térã ne rembireko imañamaha ha repensa: “Ág̃ante akambiáne chugui ilája”. Ha mbeguekatúpe ikatu mbaʼe reipeʼa chugui ilája. Péro nemanduʼavaʼerã Jesús heʼi hague umi vyroreíre ojeplageʼáva ohechaha ‘pe kapiʼi’ oĩva iñermáno resápe, péro ndohechaiha pe ‘yvyra poguasu’ orekóva hesápe. Ha heʼi: ‘Anive peporohusga ndapeipotáirõ Ñandejára pendehusga’ (jaleemína Mateo 7:​1-5). Upéva ndeʼiséi opa mbaʼe vai ojapóva jaheja reitanteha chupe. Robert cuarenta áño rupíma omenda hague, haʼe heʼi: “Ména ha tembireko oñemongeta porã vaʼerã, ha heʼíramo ojupe tekotevẽha okambia, ojapovaʼerã upéva ijetuʼúramo jepe”. Péro ndovaléi ñahaʼarõ ojapo porã opa mbaʼe ñane ména térã ñane rembireko. Ñapensarangue mbaʼépepa tekotevẽ okambia, jahechakuaavaʼerã umi mbaʼe ojapo porãmava voi (Ecl. 9:9).

17, 18. Mbaʼépa ikatu jajapo ñañandúramo ñandekueraimaha ha ndaikatuveimaha ñaaguanta?

¹⁷ Heta mbaʼe ningo okambia ñamenda rire ha umíva ikatu ñanemoñuhã. Pór ehémplo, ijetuʼu mitã ñemongakuaa, ha hasyetéramo peteĩ ñande rogaygua avei. Ikatu ñande ru térã ñande sy ijedáma ha ñañangarekovaʼerã hesekuéra. Térã ñane familiakuéra ova mombyry ñandehegui. Umi tembiapo kongregasionpegua jepe ijetuʼu nañamohendaporãirõ ñane tiémpo. Koʼã mbaʼe ningo ikatu ñanembohasa asy.

¹⁸ Mbaʼépa ikatu jajapo ñañandúramo ñandekueraimaha ha ndaikatuveimaha ñaaguanta? (Pro. 24:10.) Aníkena ñañemeʼẽ! Satanás ovyʼáta peteĩva jepe jahejáramo Jehovápe, ha koʼýte ovyʼavéta mokõivéva jahejáramo chupe! Upévare ñañehaʼãmbaitékena ani jajopoi térã ani ñamondoho pe pióla ipo mbohapýva. Ñandejára ñeʼẽme oĩ ehémplo ohechaukáva heta omendáva ogueropuʼaka hague umi provléma ijetuʼúva. Peteĩ árape David ipyʼaite guive ojerure Jehovápe: ‘Ñandejára cheporiahuverekomína, opuʼãmba ningo cherehe hikuái ha ojopy chendive’ (Sal. 56:2 [56:​1, NM]). Ñañeñandúmapa David oñeñandu haguéicha? Oimérõ  upéicha ñanemanduʼákena ikatuha ñaaguanta heta mbaʼe, David oaguanta haguéicha. Haʼe heʼi: ‘Ñandejárape añemboʼe ha haʼe cherendu, ha oipeʼapa chehegui umi mbaʼe chemongyhyjéva’ (Sal. 34:5 [34:​4, NM]).

Jahupytýta hetaiterei mbaʼe porã

19. Mbaʼéichapa ikatu ñañemoĩ Satanás rehe?

¹⁹ Jaiko rupi ko ára pahápe umi omendáva oñomokyreʼỹ ha oñopytyvõvaʼerã (1 Tes. 5:11). Aníkena ñanderesarái Satanás heʼiha jaserviha Jehovápe omeʼẽ rupi ñandéve heta mbaʼénte. Satanás oimeháicha rei ñandereityse iñuhãme ha upévare oñehaʼãmbaite omoingovai umi omendávape. Péro ñandepyʼaite guive jajeroviáramo Jehováre, ikatúta ñañemoĩ Satanás rehe (Pro. 3:​5, 6). Pablo heʼi: ‘Ndaipóri chéve g̃uarã ikatuʼỹva, Ñandejára espíritu chemombarete rupi’ (Fili. 4:13).

20. Mbaʼépa ohupytýta umi omendáva oĩramo hendivekuéra Jehová?

²⁰ Umi omendávandi oĩramo Jehová ohupyty hataiterei mbaʼe porã. Upéicha ojapo Joel ha hembireko, haʼekuéra cincuenta y un áñoma omenda hague. Joel heʼi: “Rojogueraha porãiterei che rembirekóndi, haʼe ningo iguapaiterei. Upévare aagradeseterei Jehovápe omeʼẽ haguére chéve peichagua cheirũrã”. Mbaʼépa ojapo hikuái ovyʼa hag̃ua? Joel heʼi: “Ore ningo rojotrata porã, ore orepasiénsia ojuehe ha roñomokunuʼũ”. Péro jaikuaa porã ningo enterovéva ñaneprovlemaha jaiko rupi ko múndo añáme. Upéicharõ jepe, jahecha haguéicha Jehová ikatu oĩ umi omendávandi, oñehaʼãramo ojapo Haʼe heʼíva. Ha upéicha ojoayhuvéta koʼẽ koʼẽre ha pe ‘pióla ipo mbohapývaicha ndosomoʼãi oimeháicha rei’ (Ecl. 4:12).

Penemanduʼápa?

• Mbaʼépa ojapovaʼerã umi omendáva Jehová oĩ hag̃ua hendivekuéra?

• Mbaʼépa ojapovaʼerã umi omendáva oĩ jave provléma?

• Mbaʼéichapa umi omendáva ikatu oikuaa ohejapahína Jehová oipytyvõ chupekuéra?

[Porandu ñahesaʼỹijóva]

[Nóta oĩva taʼanga ndive páhina 23]

Umi omendáva oñemboʼevaʼerã oñondive ombohovái hag̃ua opaichagua provléma]