Ñande resay oñeñongatu peteĩ ódrepe

PETEĨ mitãrusu oñembyasy ha ojepyʼapyetereíva odipara ohóvo desiértore. Hesay hováre anga ojerure Ñandejárape oiporiahuverekomi hag̃ua chupe, ha heʼi: “Emoĩ che resay ne mbaʼyrúpe!” (Salmo 56:8). Mávarepa ñañeʼẽ? David rehe, haʼe ningo upe rire rréi vaʼekue Israélpe. Mbaʼépa rakaʼe pe mbaʼyru térã odre David oñeʼẽ hague? Ha mbaʼéicha piko Ñandejára oñongatu pype ñande resay?

Umi odre térã mbaʼyru ojeporumivaʼekue David tiémpope. Ojejapo ovecha térã kavara pirégui ha ojeporu oñemoĩ hag̃ua y, aséite, víno térã mantéka. Ha koʼág̃a peve oiporu umi trívu oikóva Sahárape. Koʼã mbaʼyrúpe heta lítro y ikatu oñemoĩ ha are hoʼysã pype hakuvéramo jepe umi desiértope. Yma ningo ojeguerahamivaʼekue peteĩ kaméllo térã peteĩ vúrro ári, ha koʼág̃a rupi pyʼỹinte ojehecha ojegueraha avei umi cuatro por cuátrope.

David heʼivaʼekue ningo tuicha ñanemokyreʼỹ. La Biblia heʼi Satanás orekoha ipoguýpe ko múndo ha ‘ipochyetereiha’. Upévare oiko hetaiterei mbaʼe vai ko yvy ape ári (Revelación 12:12). Opárupi ningo oĩ ñande rapicha oñembyasy, ojepyʼapyeterei térã ohasa asýva David ohasa haguéicha. Ha heta vése oiko upéva oĩ porãségui hikuái Ñandejára ndive. Ikatu voi ‘ñanerasẽ’ ñañembyasyetereígui David ojapo haguéicha. Péro ñañehaʼã gueteri ñanekyreʼỹ ha akóinte jajerovia Ñandejárare (Salmo 126:6). Ikatu jajerovia ñande Ru yvagapegua ohechaha jahasa asy jave, ha oikuaaha mbaʼéichapa ñañeñandu. Ha ñandeporiahuverekógui oñongatúvaicha peteĩ mbaʼyrúpe ñande resay. Ñandejára ningo ndahesaraiséi ni peteĩ ñande resaýgui.