Jehová chepytyvõ agueropuʼaka hag̃ua heta mbaʼe vai

Omombeʼuvaʼekue Soledad Castillo

Arekórõ guare 34 áño, che ména omano. Seis áño haguépe omano che ru, ha upéi ocho mése haguépe ojeʼe chéve che memby peteĩmi orekoha leucemia. Haʼete kuri ndagueropuʼamoʼãiva añeñandu vaietereígui, péro nañentregái.

CHE cheréra Soledad, upéicharõ jepe nañeñandúiva gueteri cheñoite. Ojere vaipa jave chéve, añandu Jehová oĩha chendive, heʼiháicha Isaías 41:​13-pe che pógui chejagarra ani hag̃ua akyhyje. Tamombeʼumína peẽme mbaʼéichapa ambohovái umi mbaʼe vai oikovaʼekue cherehe ha mbaʼéichapa upéva chemoag̃uive Jehováre.

Che mitãme aiko porã ha avyʼa

Anase 3 de mayo de 1961 Barcelónape (España). Ógape roĩ mbohapy, che ru héra José ha che sy Soledad. Che sýngo oporandúvami heta mbaʼe umi omoakãvape irrelihión, péro ndogueroviapái chupekuéra. Peteĩ árape ningo mokõi testigos de Jehová oho che sy rendápe ha ombohovái chupe la Biblia rupive umi mbaʼe oikuaaséva. Ha ogustaitereígui chupe umi mbaʼe oaprendéva ostudia hendivekuéra la Biblia. Upérõ ningo che areko nueve áño.

Upe riremíntema mama ojevautisa ha oiko chugui testigo de Jehová. Upéi, che ru ojevautisa avei. Eliana héra pe Testigo omboʼevaʼekue che sýpe la Biblia. Haʼe pyaʼe ohechakuaa che astudiaseha avei. Ha che chemitãramo jepe, heʼi chéve astudia hag̃ua la Biblia. Chepytyvõ haguére Eliana ha che sy, ajevautisa arekórõ guare 13 áño.

Che mitãme adesidíta jave peteĩ mbaʼe iñimportánteva heta añemboʼémi Jehovápe. Upérõ ningo che aiko porãiterei vaʼekue. Heta che amígo kongregasiónpe, ha ajogueraha porãiterei che tuvakuérandi. Ha 1982-pe amenda Felipe rehe, haʼe ningo chéicha avei omotenonde Ñandejára servísio.

Roipytyvõ Saúlpe oservi hag̃ua Jehovápe

Cinco áño rire, rovyʼaiterei onase haguére oréve peteĩ mitãraʼy neporãva ha rombohéra Saúl. Ore ningo roipota hesãi, ovyʼa, ha ohayhu Ñandejárape. Heta tiémpo rohasa oñondivepa, roñeʼẽ Jehováre, rokaru ha rohuga párkepe. Felipe ningo ovyʼa osẽ jave opredika Saúl ndive, ha omboʼe chupe oñeʼẽ hag̃ua umi óga jára  ndive ha omeʼẽ hag̃ua tratádo michĩmi guive.

Haʼe ningo osẽ porã romongakuaa rupi chupe mborayhúpe. Orekópe seis áño osẽma orendive predikasiónpe. Haʼéngo ohenduseterei umi istória oĩva Ñandejára Ñeʼẽme, ha ohaʼarõma voi og̃uahẽ rostudiaha óra oñondivepa la Biblia. Oho riremi eskuélape katu odesidíma heta mbaʼe, ha oaprendevaʼekue la Bíbliagui oipytyvõ chupe upearã.

Péro, peichaháguinte ojere vaipaite oréve. Che ménape ningo ojagarrami peteĩ infección viral ipulmónpe Saúl orekórõ guare siete áño. Haʼe oñorairõ ko mbaʼasy ndive once mése. Hasy aja entéro haʼe ndaikatúi ombaʼapo, ha heta vése opytaite tupápe. Upéi orekópe 36 áño, omano anga che ména.

Chemanduʼávo upe tiémpo ijetuʼuetévare cherasẽsénte voi. Ambyasyeterei ningo che ménape ahechávo mbaʼéichapa ndaipuʼakái pe mbaʼasýre ha che katu ndaikatúi ajapo mbaʼeve aipytyvõ hag̃ua chupe. Ajapómi opa mbaʼe amokyreʼỹ hag̃ua chupe, añandúramo jepe nameʼẽveimaha. Ndaikatúi jave roho rreunionhápe, che alee chupe umi puvlikasión la Biblia rehe oñeʼẽva, ha tuicha oremokyreʼỹ upéva. Che ména omano rire ningo ndaikuaavéi mbaʼépa ajapóta.

Péro, Jehová akóinte chepytyvõ. Añemboʼe meme chupe chemombaretemi hag̃ua. Aagradese Jehovápe heta tiémpo avyʼa haguére Felipe ndive, ha ikatúta rupi ahecha jey chupe ág̃a oñemoingove jey vove. Ajerure avei chupe avyʼa hag̃ua chemanduʼávo umi mbaʼe porã rohasavaʼekuére oñondive. Ha ohechaukami hag̃ua chéve mbaʼéichapa amongakuaavaʼerã che membýpe Jehová oipotaháicha. Asegíramo jepe añeñandu vaieterei, tuicha chepyʼaguapy añeʼẽ jave Jehovándi.

Che tuvakuéra ha ermanokuéra kongregasionpegua tuicha chepytyvõ avei. Upéicharõ jepe, che astudiavaʼerã la Biblia Saúl ndive ha amboʼe chupe oservi hag̃ua Jehovápe. Upérõ peteĩ che patronkue oikuaveʼẽ chéve peteĩ traváho porã ofisinahápe, péro ambaʼapónte limpiésape aime areve hag̃ua Saúl ndive osẽ rire eskuélagui.

Chéve g̃uarã iñimportanteterei amboʼe che membýpe oguata hag̃ua Ñandejára rapére. Aikuaágui Proverbios 22:6 heʼíva: ‘Emboʼe pe mitãme haperã, ha ituja rire jepe ndopiamoʼãi chugui’. Ko téysto chemokyreʼỹ amboʼe porã hag̃ua Saúlpe Ñandejára rape, aikuaágui Jehová chevendesitaha. Nanegái heta mbaʼe ofalta hague oréve, péro che memby oikotevẽ ahasa hendive heta tiémpo. Ha upéva iñimportanteve chéve g̃uarã oimeraẽ mbaʼégui.

 Ha chememby orekópe 14 áño, omanomi che ru. Haʼe ningo ohayhuvaʼekue avei Jehovápe ha oheja peteĩ ehémplo iporãva. Ha che membýre anga oguapyeterei ijavuélo omano hague, omomanduʼágui chupe itúva omanórõ guare. Omano rire che ru, Saúl heʼi haʼéntema opytaha oñangareko hag̃ua cherehe ha ijavuélare.

Roñorairõ pe mbaʼasy vaiete ndive

Ocho mése che ru omano rire, Saúl ikaneʼõiterei jepi ha upévare agueraha chupe doktórpe. Upe doktór heʼi ajapouka hag̃ua chupe heta análisis, ha upéi osẽ chupe orekoha leucemia. a

Saúl dos áño seis mése ou ha oho ospitálpe oñepohanouka hag̃ua. Seis mése aja ojapouka quimioterapia ha ojoko pe cáncer un áño ha seis mése. Upéi oñepyrũ jey Saúl rehe pe mbaʼasy, ha ojejapóramo jepe chupe peteĩ tratamiénto mbykyvéva, ikangyeterei opytávo. Péro che memby ndaipukavéima imbaʼasýre ha ikangyetereíma ojapouka jey hag̃ua quimioterapia. Ha okumpli riremi 17 áño, omano anga ko che membymi. Upérõ ningo Saúl oñemeʼẽmavaʼekue Ñandejárape oservi hag̃ua chupe ha heʼi ojevautisaseha.

Umi doktór omoĩseterei jepi tuguy ojegueropuʼaka hag̃ua pe quimioterapia. Péro, upéva nomonguerái umi hasývape. Umi doktór heʼiha ára guive Saúlpe orekoha leucemia, mokõive roʼe porã chupekuéra ndoroipotaiha oñemoĩ chupe tuguy. Upéicha rojapo oreñeʼẽrenduse rupi Jehovápe, haʼe ningo heʼi isiervokuérape ‘ani hag̃ua hoʼu tuguy’ (Hechos 15:​19, 20). Heta vése Saúlpe heʼi porã umi doktórpe ijeheguínte odesidi hague upéva (ehechami pe rrekuádro oĩva páhina 31-pe).

Umi doktór ohechakuaa Saúl imitãramo jepe ontendeha oikóva hese. Enterove heʼi orrespetataha Saúl odesidíva ha oñatendetaha hese oiporuʼỹre tuguy. Péro, upéi osegínte omoĩse chupe tuguy. Cheaguaraiterei ningo Saúl reheve ahechávo mbaʼéichapa odefende ijerovia. Ojekuaa hese Jehová iñamigoiteha.

Roikuaárõ guare Saúl hasyha, oñeguenohẽ avei pe lívro Acerquémonos a Jehová peteĩ aty guasuhápe Barcelónape. Ha roĩ aja ospitálpe roaprovecha rolee hag̃ua oñondive ko lívro iporãitéva. Tuichaiterei ningo orepytyvõ rombohovái hag̃ua upe rire heta mbaʼe ijetuʼúva. Pe lívro oñepyrũvo ningo oĩ Isaías 41:13 ha tuichaiterei oremokyreʼỹ upépe heʼíva: ‘Che Jehová, nde Jára, Che rojagarráma nde pógui ha haʼe ndéve: “Ani rekyhyje, che roipytyvõta”’.

Ohecharamo hikuái mbaʼeichaitépa Saúl ojerovia

Umi doktór ha enferméra oĩva Hospital Universitario Vall dʼHebrón, Barcelónape ohecharamoiterei Saúl iñakãguapy ha noñemeʼẽiha imbaʼasýpe. Haʼéngo ojehayhuka voi enterovépe. Pe doktór upe guive oipohano heta Testigo família orekóvape avei leucemia, ha orrespeta ha omombaʼe chupekuéra. Imanduʼa porãiterei mbaʼéichapa che memby odefende ijerovia, ipyʼaguasu ha ovyʼa oikuaáramo jepe omanotaha. Umi enferméra heʼi  Saúlpe igustoitereiha oñeñangareko hese pórke ndoikói ojekeha ha ipire vai, ni omanombotápe jepe.

Peteĩ psicóloga heʼi chéve umi mitã ijaveguáva orekóva mbaʼasy vai oñemoĩseha jepi ituvakuérare ha umi doktór rehe. Péro Saúl ndahaʼéi upéicha. Pe psicóloga oguerohory Saúl ndojagarravairiha mbaʼeve ha ipyʼaguapyha. Upéicha rupi, Saúl ndive ropredika chupe.

Peteĩ ermáno ore kongregasionguápe tuicha oipytyvõ ohechávo mbaʼéichapa Saúl ogueropuʼaka imbaʼasy. Ko ermáno ningo seis áñoma oreko hague depresión ha oñepohanoukáramo jepe ndokuerái. Haʼe opyta heta vése pyharekue oñangareko hag̃ua Saúl rehe ospitálpe. Omombaʼeterei mbaʼéichapa Saúl ipyʼaguasu ombohovái hag̃ua imbaʼasy, ha ikangýmaramo jepe omokyreʼỹ umi ohóvape hendápe. Ko ermáno heʼi chéve: “Saúl ehémplo chemombarete añorairõ hag̃ua che mbaʼasy ndive”.

Tres áñoma ojapo omano hague che memby, ha ambyasyeterei gueteri. Aikove ningo Ñandejára omeʼẽ rupi chéve ipuʼaka asegi hag̃ua (2 Corintios 4:7). Koʼã mbaʼe ahasáva chemboʼe ivaivéramo jepe la situasión, ahechavaʼerãha umi mbaʼe porã arekóva gueteri. Omanóvo chehegui che ména, che ru ha che memby aaprende ani hag̃ua apensaiterei chejehe ha antendeve hag̃ua umi ohasa asývape, ha chemoag̃uive avei Jehováre. Ndakyhyjéi umi mbaʼe cheraʼarõvagui, aikuaa rupi Ñandejára chejagarrataha che pógui ha osegitaha chepytyvõ.

[Nóta]

[Taʼanga ha rrekuádro oĩva páhina 31-pe]

REIKUAASE PIKO MBAʼÉREPA?

Oiméne rehendúmava ore testigos de Jehová noromoĩukaiha tuguy. Reikuaase piko mbaʼérepa?

La Biblia heʼi rupi ndovaleiha ñamoĩuka tuguy, péro heta vése

oñentende vai upéva. Pór ehémplo, oĩ heʼíva ndorosegiseiha mbaʼeveichagua tratamiénto médiko térã romanosehánte voi. Péro ndahaʼeiete upéicha. Ore ningo roheka umi tratamiénto iporãvéva oréve ha ore familiakuérape g̃uarã, ha rosegi peteĩ tratamiénto ndojeporuihápe tuguy. Mbaʼérepa rojapo upéicha?

Pe Dilúvio rire ningo, Ñandejára heʼi Noé ha ifamíliape ikatuha hoʼu mymba roʼo. Péro heʼi chupekuéra ani hag̃ua hoʼu huguykue (Génesis 9:​3, 4). Ñande ningo Noé familiare avei, upévare ko léi iñimportánte enterovépe g̃uarã. Ha koʼág̃a peve ko léi oñekumplivaʼerã. Yma ochocientos áño omeʼẽ rire ko léi, Ñandejára heʼi jey umi Israelguápe tuicha mbaʼeha pe tuguy orrepresentágui ñande rekove (Levítico 17:14). Ha mil quinientos áño rire, umi apóstol rupive Ñandejára omeʼẽ jey ko léi heʼívo: “Ani peʼu [...] tuguy” (Hechos 15:​29, ÑÑB).

Ore testigos de Jehová noromoĩukái ha ndoroʼúi tuguy rojaposégui ko léi heʼíva. Upévare roipota oñemeʼẽ oréve ambue tratamiénto, ha tuicha avei roipytyvõ doktorkuérape oñatende porãve hag̃ua umi hasývare. Upéicha rupi heta ndahaʼéiva testigo de Jehová oipota avei umi tratamiénto ndojeporuihápe tuguy.

[Nóta oĩva taʼanga ndive páhina 29]

Felipe ha Saúl ndive

[Nóta oĩva taʼanga ndive páhina 29]

Che tuvakuérandi

[Nóta oĩva taʼanga ndive páhina 30]

Saúl, un més omano mboyve