Mbaʼéichapa peteĩ túva ikatu oñangareko porã ifamíliare

‘Tuvakuéra ani pembopochy pende raʼykuérape ani hag̃ua ikangy hikuái.’(Colosenses 3:21.)

MBAʼÉPA ikatu ojapo peteĩ túva ani hag̃ua ifamiliakuéra ipochy ha ndovyʼavéi? Tekotevẽ ohechakuaa tuicha mbaʼeha haʼe ojapóva omoakãvo hogapy. Peteĩ rrevísta oñeʼẽva medisínare heʼi: “Tuvakuéra rembiapo ndahaʼéi vyrorei. Haʼekuéra ojapóva ikatu tuichaiterei oipytyvõ itaʼyrakuérape osẽ porã hag̃ua”.

Péro mbaʼépa ojapovaʼerã peteĩ túva? Heta ningo oĩ heʼíva túva okorrehivaʼerãha ifamíliape. Upévare peteĩ mitã ojeporta vai jave, pyʼỹi ñahendu isy heʼívo: “Cháke reikuaatareína nde ru ou vove!”. Umi mitã osẽ porã hag̃ua tekotevẽ itúva okorrehi chupekuéra hendápe porã, ha ani oñeʼẽmba reínte. Péro ndahaʼéi upéva añónte oñehaʼarõva peteĩ túvagui.

Ñambyasy rei ningo oĩgui heta kuimbaʼe itúva nomoĩrivaʼekue ehémplo hogapýpe. Oĩ umi okakuaáva ituvaʼỹre. Oĩ avei ijarhél ha ndohayhukuaáiva ifamíliape yma itúva otratágui chupe upéicha. Mbaʼéichapa peteĩ túva ikatu okambia ha oñangareko porãve ifamiliakuérare?

Ñandejára Ñeʼẽme oĩ umi konsého iporãvéva familiakuérape g̃uarã. Koʼã konsého ningo ou Jehovágui ha haʼe iñarandu, upévare katuete ñanepytyvõta. Haʼe voi omoñepyrũvaʼekue pe família (Efesios 3:​14, 15). Upévare tuvakuéra oñehaʼãvaʼerã ojapo la Biblia heʼíva. a

Peteĩ túva oñehaʼãva oñangareko porã ifamiliakuérare oipytyvõ chupekuéra okakuaa porã, ovyʼa, ha avei oñemoag̃ui hag̃ua Ñandejárare. Peteĩ mitã ohayhúramo itúvape ha ojogueraha porãramo hendive, ohayhúta avei Ñandejárape. La Biblia ningo heʼi Ñandejára ñandeapo hague ha upéicha rupi haʼe ñande Ru avei (Isaías 64:8). Koʼág̃a jahecháta seis mbaʼe túva omeʼẽvaʼerã ifamíliape ha mbaʼéichapa Ñandejára Ñeʼẽ oipytyvõ chupekuéra upearã.

 1 Peteĩ mitã oikotevẽ itúva ohayhu chupe

Jehová ningo ehémplo iporãvéva tuvakuérape g̃uarã, haʼe ohayhueterei Itaʼýrape. La Bíbliape heʼi: “Túva niko ohayhu Taʼýrape” (Juan 3:35; Colosenses 1:15). Jehová heʼi jey jey vaʼekue ohayhu ha oguerohoryha Itaʼýrape. Jesús ojevautisárõ guare, Jehová oñeʼẽ yvágagui ha heʼi: “Nde haʼe che Raʼy ahayhuetéva, aiporavovaʼekue” (Lucas 3:22). Upévare Jesús oikuaa porãiterei Itúva ohayhuha chupe. Mbaʼépa Ñandejára omboʼe péicha tuvakuérape?

Pyʼỹi heʼivaʼerãha ifamíliape ohayhuha chupekuéra. Kelvin, peteĩ karai cinco ifamíliava heʼi: “Che ningo pyʼỹi haʼe che familiakuérape ahayhuha, ha ahechauka ajepyʼapyha hesekuéra. Yma michĩmíme ambojahu ha akambiamivaʼekue chupekuéra ipañál”. Tuvakuéra ndahesarairivaʼerã umi mitã ovyʼaha ojeguerohorýramo chupekuéra. Iporãvéta omokyreʼỹ meméramo ifamíliape oiko rangue ojopyeterei ha ojaʼo chupekuéra oimeraẽ mbaʼére. Donizete mokõi itajýrava heʼi: “Peteĩ túva ohekavaʼerã voi mbaʼérepa ikatu omokyreʼỹ ha oguerohory ifamíliape”. Umi mitã ojeguerohorýva ojeroviave ijehe, ha upéva oipytyvõ chupekuéra oñemoag̃uive hag̃ua Ñandejárare.

2 Mitãnguérape oñemeʼẽvaʼerã ehémplo

Juan 5:​19-pe heʼi Jesús ojapoha ‘pe ohecháva Itúva ojapo’. Ha umi mitã pyʼỹinte ojapo avei upéicha. Pór ehémplo umi mitãʼi ohecháramo itúva orrespeta ha omombaʼeha hembirekópe, otrata porãta avei kuñanguérape. Ha ndahaʼéi itaʼýrante oaprendéva, oiméramo itajýra, haʼe orrespetáta avei kuimbaʼekuérape.

Ijetuʼúpa ne familiakuérape ojerure hag̃ua perdón? Ko mbaʼépe oñemoĩvaʼerã avei ehémplo chupekuéra. Kelvin imanduʼa mokõi itaʼýra ombyai hague peteĩ kámara hepyetereíva. Haʼe heʼi ipochyetereígui oinupã hague peteĩ mesa ha ombojaʼo mbytépe. Upe rire oñeñandu vai ojapovaʼekuére ha ojerure perdón hembireko ha ifamiliakuérape. Upévare ifamiliakuérape ndahasýi ojediskulpa hag̃ua ofalla jave.

3 Mitãnguéra ovyʼavaʼerã

Jehová ningo ovyʼa (1 Timoteo 1:11). Upévare Jesús ovyʼavaʼekue hendive. Proverbios 8:30 omombeʼu mbaʼéichapa  Jesús oĩvaʼekue Itúvandi: “Che ijypýpe aimemavaʼekue ipytyvõháramo. [...] ha henondépe añembojaru mante”. Ajépa ojogueraha porãite hikuái!

Umi mitã ningo ovyʼavaʼerã. Upévare umi túva omboykevaʼerã tiémpo ohuga hag̃ua hendivekuéra. Ojapóramo upéva ojogueraha porãvéta. Felix itaʼýra mitãrusúmava heʼi: “Ahasa rupi tiémpo che raʼýndi rojogueraha porãiterei. Rohuga oñondive, rosẽ ore amigokuérandi ha roho roikuaa heta lugár. Koʼã mbaʼe orepytyvõ rojoayhuve hag̃ua”.

4 Mitãnguéra oikuaavaʼerã Ñandejárape

Jesúspe ohekomboʼevaʼekue Itúva. Upévare heʼi: ‘Che haʼe opavavépe umi mbaʼe che Túvagui ahenduvaʼekue’ (Juan 8:26). Ñandejára heʼi túva ohekomboʼevaʼerãha ifamíliape hekoporã hag̃ua ha oikuaave hag̃ua Chupe. Michĩmi guive ohekomboʼe porãma vaʼerã chupekuéra (2 Timoteo 3:​14, 15). Felix olee itaʼýrape michĩmi guive Che lívro omombeʼúva istória oĩva Ñandejára Ñeʼẽme. b Tuichave rire katu oiporu ambue lívro omboʼe hag̃ua chupe la Biblia heʼíva.

Donizete heʼi: “Hasy ningo jastudia hag̃ua la Biblia ñane famíliandi ha ogusta hag̃ua enterovévape. Sy ha túva nomombaʼéiramo Ñandejára heʼíva, umi mitã ohechakuaáta upéva”. Carlos mbohapy itaʼýrava heʼi: “Káda semána rojapo peteĩ rreunión rohecha hag̃ua mbaʼépa oikotevẽ ore família. Upépe peteĩteĩ ikatu heʼi mbaʼe rehépa roñeʼẽta”. Kelvin katu oñehaʼã oimeha órape oñeʼẽ Ñandejárare itaʼyrakuérape. Upéva ñanemomanduʼa Moisés heʼivaʼekuére: ‘Ani nderesarái arakaʼeve koʼã léigui che ameʼẽva ndéve koʼág̃a. Ehekomboʼe umíva rehe nde raʼykuérape, nemanduʼa hese manterei chupekuéra, nde rógape, tape rehe, reñenonguévo ha repuʼãnguévo’ (Deuteronomio 6:​6, 7).

5 Mitãnguérape ojekorrehivaʼerã

Tekotevẽterei ningo jakorrehi ñane famíliape ikatu hag̃uáicha osẽ porã hikuái. Oĩ túva oimoʼãva okorrehi hag̃ua ifamíliape oinupã térã ojaʼo vaipa vaʼerãha. Péro Ñandejára Ñeʼẽ ndeʼíri upéva. Heʼi katu tuvakuéra okorrehivaʼerãha mborayhúpe ifamíliape, Jehová ojapoháicha (Hebreos 12:​4-11). La Biblia heʼi: “Peẽ tuvakuéra, ani pembopochy rei pende raʼykuérape. Pemongakuaa ha pehekomboʼe uvei Ñandejára oipotaháicha” (Efesios 6:4).

Sapyʼánte ningo tekotevẽ jakastiga ñane  famíliape. Péro pe mitã oikuaavaʼerã mbaʼérepa oipoʼo ha oñanduvaʼerã itúva ohayhuha chupe. Ñandejára Ñeʼẽme heʼi voi ni mbaʼevéicharõ ndovaleiha ñainupã vaipa ñane famíliape (Proverbios 16:32). Kelvin heʼi: “Akorrehi jave che familiakuérape, katuete antendeuka ahayhúguinte akorrehiha chupekuéra”.

6 Ñañangarekovaʼerã mitãnguérare

Heta mbaʼe ningo ojejapo ko múndope ikatúva ombyai umi mitãme, ha tekotevẽ avei ñañangareko hesekuéra ani hag̃ua ijúnta vai. Ñambyasýramo jepe heta oĩ umi “tekove ñaña” ojavykyséva umi mitã inoséntepe (2 Timoteo 3:​1-5, 13). Mbaʼéichapa ikatu ñañangareko ñane famíliare umi mbaʼégui? La Biblia omeʼẽ ko konsého iporãva: “Oikokuaáva ohecha yvykua ha ojere chugui hekotarováva katu ohónte ha hoʼa pype” (Proverbios 22:3). Ani hag̃ua ojehu ivaíva ne famíliape, rejesareko meme vaʼerã hesekuéra. Rehechakuaavaʼerã umi mbaʼe ikatúva ogueraha vai chupekuéra ha rejapo tekotevẽva reñangareko hag̃ua hesekuéra. Pór ehémplo, ne família oiporúramo Internet, remboʼevaʼerã chupekuéra oiporu porã hag̃ua. Iporã voi remoĩ pe komputadóra ikatutahápe rehecha oiporu jave hikuái.

Túva omboʼevaʼerã itaʼyrakuérape ko múndope oĩha hénte aña ojavykyséva mitãme. Oikuaápa hikuái mbaʼépa ojapovaʼerã oĩramo haʼeño ha peteĩ oñemotieʼỹséramo chupekuéra? c Haʼekuéra tekotevẽ oikuaa ndovaleiha ojepoko hesekuéra. Kelvin heʼi: “Chete amboʼe chupekuéra koʼã mbaʼe, ndahejái iprofesorkuérape. Chéve g̃uarã upéva che rembiapo. Amboʼe chupekuéra mbaʼépa pe rrelasión seysuál, mávapa ikatu oreko, ha avei mbaʼéichapa oñeñangarekovaʼerã umi ojavykysévagui mitãme”. Ifamiliakuéra osẽ porãmba ha koʼág̃a omendapáma hikuái.

Ñandejára ñanepytyvõta

Pe rregálo iporãvéva peteĩ túva ikatúva omeʼẽ itaʼyrakuérape ningo oipytyvõ chupekuéra ojerovia hag̃ua Ñandejárare. Upearã omoĩvaʼerã chupekuéra ehémplo. Donizete heʼi: “Jahechaukavaʼerã mbaʼeichaitépa jahayhu Jehovápe ha jajerovia hese, koʼýte oĩvo provléma térã jahasa asy jave. Ha ñañemboʼévo ñane famíliandi, jaagradese joʼa joʼa vaʼerã Ñandejárape ipyʼaporã haguére. Upéicha umi mitã ohecháta iporãha jareko Ñandejárape ñane amígoramo”.

Upéicharõ, mbaʼéichapa peteĩ túva ikatu oñangareko porãve ifamíliare? Ojapovaʼerã Ñandejára Jehová heʼíva, haʼe ningo pe oikuaa porãvéva mbaʼéichapa oñemongakuaavaʼerã mitãnguéra. Rehekomboʼéramo ne família Ñandejára Ñeʼẽ heʼiháicha, rehecháta añeteha Proverbios 22:6 heʼíva: “Mitãme ehechauka michĩreve haperã, upéicharõ ituja rire jepe ndojeimoʼãi chugui”.

[Nóta]

[Nóta oĩva taʼanga ndive páhina 19]

Peteĩ túva omeʼẽvaʼerã ehémplo ifamiliakuérape

[Nóta oĩva taʼanga ndive páhina 20]

Túva omboʼevaʼerã itaʼyrakuérape oñemoag̃ui hag̃ua Ñandejárare

[Nóta oĩva taʼanga ndive páhina 21]

Mitãnguérape ojekorrehivaʼerã mborayhúpe