Oĩnepa oikuaáva ñane renonderã?

‘Che hína Ñandejára, pe amomarandúva iñepyrũ guive pe ipahápe oikótava ha heta ára mboyve amombeʼúva neʼĩrava oiko.’ (Isaías 46:​9, 10.)

HETA mbaʼe vai ningo oiko koʼág̃a rupi. Upévare heta oĩ ostudiáva mbaʼépa oikovaʼekue yma ha mbaʼépa oiko koʼág̃a rupi. Upéicha oikuaa hag̃ua hikuái mbaʼépa oikóta amo gotyove. Oĩ katu umi oikuaasetereíva henonderã ha ojevale pe astrolohía ha espiritísmore. Péro koʼãva mbaʼevépe noipytyvõi chupekuéra. Upéicharõ piko ndaikatumoʼãi jaikuaa mbaʼépa ohaʼarõ ko múndope, ñane famíliape ha ñandéve voi? Oĩnepuku oikuaáva ñane renonderã?

Pe téysto jaleevaʼekuépe heʼi Ñandejára Jehová ikatuha oikuaa mbaʼépa oikóta amo gotyove. Proféta Isaías rupive heʼi umi isrraelíta isãsotaha Babilóniagui ha ohotaha Jerusalénpe omopuʼã jey hag̃ua pe témplo. Péro mbaʼeichaitépa heʼi oikotaha upéva? Haimete doscientos áño oiko mboyve, Isaías heʼimavaʼekue Ciro oiketaha Babilóniape ojagarra hag̃ua upe siuda. Heʼi avei pe rrío Éufrates oñembosyrytaha ótro ládo. Ko rrío oĩ rupi Babilonia jerére, hasyve ojeike hag̃ua upépe. Isaías heʼi avei hesaraitaha hikuái omboty hag̃ua umi mokõi okẽ guasu oĩva ojeike hag̃ua Babilóniape, ha upévare ndahasyivetaha Círope oike hag̃ua pype (Isaías 44:24–45:7).

Yvypóra ndaikatúi oikuaa Ñandejáraicha mbaʼépa oikóta amo gotyove. Rréi Salomón heʼivaʼekue: “Ani revyʼa koʼẽrõ g̃uarã ára rehe; ndereikuaáigui mbaʼépa oguerúta ndéve” (Proverbios 27:​1, ÑÑB). Koʼág̃a rupi upeichaite avei: yvypóra ndaikatúi oikuaa mbaʼépa ohaʼarõ chupe. Péro mbaʼérepa Ñandejára ikatu oikuaa? Haʼe niko oikuaa porã hembiapokue, upévare oikuaa mbaʼeichaguápa ñande ha mbaʼépa ñandegusta. Ha tekotevẽramo oiko mboyve voi ikatu heʼi mbaʼépa ojapóta yvyporakuéra. Ñandejára ojapokuaa avei heta mbaʼe ikatu hag̃uáicha peteĩ mbaʼe osẽ haʼe oipotaháicha. ‘Haʼe omoañete ha ojapopa iproféta heʼíva guive’ hérape (Isaías 44:​26, ÑÑB). Jehová añoite ikatu ojapo upéva.

Setecientos áño onase mboyve pe Mesías, Isaías oñeʼẽmavaʼekue hese. Péro síglo XVIII guive oĩ heta heʼíva pe lívro de Isaías ndouiha Ñandejáragui. Heʼi hikuái umi profesía oñeʼẽva Jesucrístore ndahaʼeiha profesía. Haʼekuéra heʼi ohai hague ótro tapicha oikopa riréma umi mbaʼe. Upe rire, áño 1947-pe ojehecha ndahaʼéi hague upéicha. Ojejuhu peteĩ itakuápe mar Muerto ypýpe heta kuatiañeʼẽ yma guare, umíva apytépe peteĩ kópia pe lívro Isaías ohaivaʼekuégui. Umi ostudiáva koʼã mbaʼére heʼi upe kópia ojejapo  hague cien áño Jesucristo onase mboyve. Péicha ojehechauka porã la Biblia ikatuha omombeʼu mbaʼépa oikóta amo gotyove.

Jaikuaa ningo ni Isaías ni umi ótro ohaivaʼekue la Biblia, ndaikatuiha ijehegui reínte heʼi umi mbaʼe oikótava. Haʼekuéra oñeʼẽ uvei “espíritu sánto ohechaukaháicha chupekuéra” (2 Pedro 1:21). Umi artíkulo oúvape jahecháta umi mbaʼe Isaías heʼivaʼekue Jesús rehe. Upe rire jahecháta avei umi mbaʼe Jesucristo voi heʼivaʼekue oikotaha koʼág̃a rupi ha amo gotyove.