‘Peñehaʼãkena pejogua Ñandejárape’
Ñañemoag̃uíkena Ñandejárare
‘Peñehaʼãkena pejogua Ñandejárape’
KO MÚNDO añáme hasy jatopa hag̃ua ipyʼaporãva, ñandeporiahuverekóva, ñaneperdonáva ha ñanderayhúva. Oiméne ñande voi ñañehaʼãmbaite jajapo koʼã mbaʼe, péro ñapensa ijetuʼuetereiha. Mbaʼérepa? Ikatu ñapensa hetaiterei tekotevẽha ñakambia, ndaikatumoʼãiha jaheja peteĩ vísio térã ndaikatumoʼãiha ñanderesarái peteĩ mbaʼe vai jajapovaʼekuégui. Péro la Biblia heʼíva ñanemokyreʼỹ: Ñandejára oikuaa porã enterovéva ikatuha ñakambia ha jajapo iporãva.
Ñandejára Ñeʼẽ heʼi kristianokuérape: ‘Upévare peñehaʼãkena pejogua Ñandejárape itaʼýra teéicha’ (Efesios 5:1, JMP). Péicha jahecha Ñandejára ojeroviaha isiervokuérare. Mbaʼérepa jaʼe upéva? Ñandejára Jehová ningo ojapo yvyporakuérape ijoguaháramo (Génesis 1:26, 27). Upéva heʼise ikatuha ñanembaʼeporã Ñandejáraicha. a Ha jatopa jave la Bíbliape heʼi ‘peñehaʼãkena pejogua Ñandejárape’, haʼete voi Jehová heʼíva ñandéve: “Aikuaáramo jepe rejavyha jepi, ajerovia nderehe! Ikatu ningo rejapo iporãva ha chembovyʼa”.
Mbaʼépepa ikatu jajogua Ñandejárape? Pablo heʼíkuri ñandepyʼaporã, jaiporiahuvereko ha ñaperdonavaʼerãha ñande rapichakuérape, ha “upévare” jajoguavaʼerãha Ñandejárape (Efesios 4:32; 5:1). Avei upéi heʼi jahayhuvaʼerãha ñande rapichakuérape ñahaʼarõʼỹre mbaʼeve (Efesios 5:2). Jehová ningo ohechauka porã ñandéve mbaʼéichapa ikatu ñandepyʼaporã, jaiporiahuvereko ha ñaperdona ñande rapichakuérape.
Péro, mbaʼérepa jajoguavaʼerã Ñandejárape? Pablo heʼíva ñanemokyreʼỹ jajapo hag̃ua upéva: ‘Peñehaʼãkena pejogua Ñandejárape itaʼýra teéicha’. Jehová ningo ñanderayhu ipyʼaite guive peteĩ túva ohayhuháicha ifamíliape. Ajépa ñanemokyreʼỹete upéva! Umi mitã ningo oñehaʼã ojogua ituvakuérape. Ha upeichaite avei umi kristiáno tee oñehaʼãmbaite ojogua Ñandejárape.
Jehová nañandeovligái jajogua hag̃ua chupe. Oipota ñandete jadesidi ñañehaʼãtapa jajogua chupe opa mbaʼe jajapóvape (Deuteronomio 30:19, 20). Aníkena ñanderesarái enterove ikatuha ñanembaʼeporã Ñandejáraicha. Péro upearã tekotevẽ jaikuaa raẽ chupe. Jastudiáramo la Biblia, jaikuaa porãta chupe ha heta tapicha ojapoháicha jajoguáta avei Ñandejárape.
[Nóta]
a Colosenses 3:9, 10 heʼi jajogua hag̃ua Ñandejárape, ‘ñañemondevaʼerãha pe teko pyahúgui, oñembopyahuvéva ohóvo jaikuaa porãvévo’ chupe.