Profesía oñeʼẽva Jesucrístore

UMI hudío ningo oikuaa mbaʼépa heʼivaʼekue Isaías ha ambue proféta, upévare heta áñorema “ohaʼarõ” hikuái pe Mesíaspe (Lucas 3:​15, BNP). Umi profesía niko heta mbaʼe heʼivaʼekue Jesús rehe, yvypóra ndaikatúiva oikuaa ijehegui rei ni ndaikatúi ojapo mbaʼeve oñekumpli hag̃ua. Jahechamína koʼã ehémplo.

Mbaʼéichapa onasevaʼerã pe Mesías. Isaías heʼimavaʼekue pe Mesías térã Cristo onasevaʼerãha peteĩ vírhengui. Apóstol Mateo omombeʼu mbaʼéichatapa upéva ha upéi heʼi: ‘Opa koʼã mbaʼe ojehu oiko hag̃ua Ñandejára heʼimavaʼekue hemimbou rupive, heʼírõ guare: “Peteĩ kuñataĩ hekopotĩva imembyvaʼerã peteĩ mitãkuimbaʼe”’ (Mateo 1:​22, 23, ÑÑB; Isaías 7:14). Isaías ohechauka avei pe Cristo outaha David ñemoñarégui  ha imanduʼa voi Jesé, David túva rehe. Ha upeichaite oiko (Mateo 1:​6, 16; Lucas 3:​23, 31, 32). Upévare imemby mboyve María, ánhel Gabriel heʼi chupe: “Ñandejára ojapóta chugui mburuvicha guasu, ijypykue Davídcha” (Lucas 1:​32, 33; Isaías 11:​1-5, 10; Romanos 15:12).

Mbaʼépa ojapovaʼekue. Jesús oĩrõ guare umi hudío oñembyatyhápe olee Isaías ohaivaʼekue: “Ñandejára espíritu oĩ che ári, chéve niko cheporavo araha hag̃ua marandu porã opa imboriahúvape”. Upe rire heʼi: ‘Ko árape oikohína Ñandejára Ñeʼẽ pehendúva koʼág̃a’. Upéicha ohechauka oñekumpliha hese upéva (Lucas 4:​17-21; Isaías 61:​1, 2). Isaías omombeʼu avei Jesús imbaʼeporãtaha umi hasýva ndive. Pe lívro de Mateo ohechauka Jesús ojapo hague upéicha heʼívo: ‘Ha omonguera opa umi hasývape, ha heʼi chupekuéra ani hag̃ua imanduʼa hese avave renondépe. Upéicha oñekumpli Jehová heʼivaʼekue proféta Isaías rupive: “Haʼe noñorairõmoʼãi ha ndosapukaimoʼãi. Ha ndojokamoʼãi pe takuára otiríva”’ (Mateo 8:​16, 17; 12:​10-21; Isaías 42:​1-4; 53:​4, 5).

Heta ohasa asy. Isaías heʼivaʼekue avei heta Israelgua omboyketaha pe Mesíaspe ha ohechataha chupe hikuái peteĩ ‘ita oporomoñepysangávaramo’ (1 Pedro 2: 6-8; Isaías 8:​14, 15). Ha upeichaite oiko. Jesús ojapóramo jepe heta milágro, umi hudío ‘ndojeroviái hese. Upéicha oñekumpli Isaías heʼivaʼekue: “Ore Jára, máva piko oguerovia upe ore romombeʼúva?”’ (Juan 12:​37, 38; Isaías 53:1). Umi hudío ningo oimoʼã pe Mesías pyaʼe omosãsotaha chupekuéra Rómagui, ha oĩ jeytaha peteĩ David ñemoñare ogovernátava ko yvy ape ári. Jesús ningo heta ohasa asy ha upéi omano, upévare hetaiterei hudío ndogueroviaséi haʼéne hag̃ua pe Mesías. Ha Isaías ningo heʼivaʼekue voi hese ohasa asy vaʼerãha oiko mboyve chugui Rréi.

Isaías ohaivaʼekue pe Mesías rehe: “Ameʼẽ che atukupe chenupãsévape, namokañýi che rova umi chejaʼosévagui térã umi cherehe ondyvusévagui”. Ha upeichaite ningo oiko Jesús rehe ojejagarrárõ guare chupe. Mateo heʼi: ‘Ha ondyvu hikuái hováre, ha oinupã ha ohovapete chupe hikuái’ (Isaías 50:6; Mateo 26:​67, ÑÑB). Isaías ohai avei: “Oñeñembosaráivo hese, haʼe oñemomirĩnte, ha ndeʼíri mbaʼeve”. Ha Pilato oporandúrõ guare chupe mbaʼérepa umi hudío oñeʼẽ vai hese ‘haʼe nombohováiri chupe ha ndeʼíri mbaʼevete, ha Pilato omombaʼeterei upéva’ (Isaías 53:7; Mateo 27:​12-14; Hechos 8:​28, 32-35).

Omanórõ guare. Jesús omanórõ guare ha umi mbaʼe oikóva upe rire ohechauka avei oñekumpliha proféta Isaías heʼivaʼekue. Pór ehémplo haʼe heʼivaʼekue: ‘Haʼekuéra ojuka chupe umi iñañáva apytépe, ha hetekue oñeñotỹ ipláta hetáva ndive’ (Isaías 53:​9, ÑÑB). Mbaʼéicha piko ikatu oiko ko mbaʼe? Jesús omanovaʼekue peteĩ yvyráre mokõi mondaha mbytépe (Mateo 27:38). Péro upe rire José Arimateaygua, oñotỹ chupe peteĩ sepultúra haʼe  ojapoukavaʼekuépe imbaʼerã umi irríkova apytépe (Mateo 27:​57-60). Jesucristo omanórõ guare oñekumpli avei peteĩ mbaʼe iñimportánteva Isaías heʼivaʼekue: ‘Jesús, pe hekopotĩva, omopotĩta heta yvypórape hembiapo vaígui ha haʼe voi ogueraháta ijapére’ upéva. Ha upeichaite ningo oiko: Jesús omanórõ guare, oguenohẽ pekádo poguýgui Ñandejára rembiguaikuérape (Isaías 53:​8, 11, ÑÑB; Romanos 4:25).

Umi profesía oñekumplivaʼerã gueteri

Jesús ha ijapostolkuéra oiporuvevaʼekue pe lívro de Isaías oimeraẽ ótro lívrogui, ojehechakuaa hag̃ua mávapa pe Mesías. Upéicharamo jepe ndahaʼéi Isaías añónte oñeʼẽva umi mbaʼe oikovaʼerãre. Umi Escrituras Hebréaspe oĩve profesía oñeʼẽva Jesúsre, Irréino ha umi mbaʼe porã ojapótavare ogoverna vove (Hechos 28:23; Revelación [Apocalipsis] 19:10). a Mbaʼéichapa jaikuaa oñekumplitaha koʼã mbaʼe? Jesús voi heʼivaʼekue umi hudíope: ‘Ani peimoʼã che aju hague ambyai hag̃ua Escrituras Hebréaspe oĩva. Añetehápe, che voi haʼe peẽme opa peve ára ha yvy, ndojeimoʼãi peteĩ létra michĩva ni peteĩ létra pehẽngue umi léigui, oikopavaʼerã katu’ (Mateo 5:​17, 18 ÑÑB).

Jesús oñeʼẽvaʼekue avei umi profesía oñekumplítavare itiémpope ha upe rireve (Daniel 9:27; Mateo 15:​7-9; 24:15). Ha hemimboʼekuéra oñeʼẽ avei heta mbaʼe oikovaʼerãre. Ha ñande jahecha mbaʼéichapa heta profesía oñekumpli koʼág̃a rupi. Pe artíkulo oúvape jahecháta umi profesía oñekumplivahína ha umi oñekumplítava amo gotyove.

[Nóta]

[Nóta oĩva taʼanga ndive páhina 4]

“Peteĩ kuñataĩ hekopotĩva imembyvaʼerã peteĩ mitãkuimbaʼe”

[Nóta oĩva taʼanga ndive páhina 5]

‘Namokañýi che rova umi cherehe ondyvusévagui’