Umi profesía oñekumplíva koʼág̃a rupi

LA Biblia heʼi Ñandejára ogoverna vove oĩtaha pyʼaguapy ha javyʼataha opa ára g̃uarã ko yvy ape ári (Daniel 2:44). Pe padrenuéstrope Jesús omboʼe idisipulokuérape ojerure hag̃ua: “Tou ne Rréino, tojejapo ne rembipota yvy ári yvagapeguáicha” (Mateo 6:​10, BNP). Pe mónte de los Olívospe, Jesús oñeʼẽ avei umi profesía iñimportántevare ha omombeʼu heta mbaʼe oikótava haʼe ogoverna mboyve. Ha umi tapicha ipyʼaporãva ohechakuaa oñekumplimaha umíva. Jahechamína umi profesía oñekumplivahína koʼág̃a rupi.

Tetãnguéra oñorairõ. Jesús heʼivaʼekue: “Peteĩ tetã opuʼãne ambuére ha opavave opuʼãmbáne ojuehe” (Mateo 24:7). Oiko mboyve pe primera guerra mundial 1914-pe, umi ñorairõ ndahaʼeivaʼekue opárupi oikóva. Péro oñepyrũrõ guare upe gérra, hetaiterei tetã oñorairõ. Ha ojejapo hetaiterei armaménto ipoderosovéva  yma guarégui. Oñepyrũma avei ojeporu avión, ikatu hag̃uáicha ojepoi vómba. Ha ojejapo rupi umi armamentoita hetaitereípe ojejuka. Upe primera guerra mundiálpe umi 65 millones soldádo oĩvagui, la mita rasa omano térã opyta vai. Ha hetaitereivépe ojejuka gerrahápe síglo XX pukukue, pór ehémplo pe segunda guerra mundiálpe. Peteĩ istoriadór heʼi: “arakaʼeve ndojekuaamoʼãi mboýpa añetehápe” omano umi militár ha ambue tapichakuéra upe gerrahápe. Ha koʼág̃a rupi oikónte gueteri heta gérra.

Ñembyahýi opa hendárupi. Jesús heʼivaʼekue: “Ñembyahýi guasu oĩne opárupi” (Mateo 24:7). Áño 2005-pe rrevísta Science heʼi: “Umi oikóva ko yvy ape árigui 14% (854 millones ñande rapicha) hasy ndokaruporãigui”. Ha áño 2007-pe katu Naciones Unidas omombeʼu oĩha 33 tetã ndaikatúiva omongaru hetãyguápe. Péro mbaʼéicha piko ikatu oiko upéva osẽ porãvereíramo ohóvo umi kóga? Oiko ningo upéva ojeporu rupi umi semílla ojejapo hag̃ua etanol. Heʼiháicha pe diário The Witness osẽva África del Súrpe, “heta semílla ojeporúva ojejapo hag̃ua etanol omyenyhẽ hag̃ua peteĩ cuatro pór cuatro tánke, ikatu omongaru peteĩ tapichápe un áño pukukue”. Umi tetã irríkovape jepe hepypa hiʼupyrã, upévare heta oĩ ohechavaʼerã ojoguátapa hembiʼurã térãpa ipohãg̃ua oikotevẽva.

Yvyryrýi. Jesús heʼivaʼekue avei: “Oikóta heta yvyryrýi guasu” (Lucas 21:11). Ivaive vaichápa ndéve umi yvyryrýi koʼág̃a rupi oikóva? Áño 2007-pe peteĩ karai Indiaygua hérava Rajender Chadha ha ostudiáva umi yvyryrýire heʼi: “Avave ndoikuaái mbaʼérepa umi yvyryrýi imbareteve ha hetave sarambi ojapo koʼág̃a rupi”. Hetaitereive avei oñemano ojeiko hetave rupi umi lugár oiko pyʼỹihápe yvyryrýi. Servicio Geológico de Estados Unidos heʼi pe yvyryrýi ha tsunami oñepyrũvaʼekue Oceano Índicope, hetaitereípe ojuka hague 2004-pe ha “ivaietereive” opa yvyryrýi oikovaʼekuégui umi quinientos áño ohasavaʼekuépe.

Umi mbaʼasy naipohãiva. Jesús heʼivaʼekue: ‘Oĩta mbaʼasy vai’ (Lucas 21:11). Opaichagua mbaʼasy oĩ opárupi, hetaitereivépe ombohasa asy hína ha ndaipóri umívape g̃uarã pohã. Pór ehémplo ojeʼemavaʼekue opaitetamaha pe akãnunduroʼy, péro ndoikói gueteri upéva. Heta tapicha omano avei pe mbaʼasypoʼi, sida ha hetave mbaʼasýgui. Organización Mundial de la Salud heʼi hetaiterei tapicha orekoha mbaʼasypoʼi. Heʼi avei hikuái hetaiterei orekóva pe VIH (sida) orekoha mbaʼasypoʼi. Ñandepyʼapy ningo jaikuaávo káda segúndo oĩha peteĩ imbaʼasypoʼíva ha kóva ko mbaʼasýgui hasyetereive ojekuera hag̃ua. Áño 2007-pe pe rrevísta New Scientist heʼi ojejuhu hague Európape mbaʼasypoʼi ‘ndaipóriva pohã ipuʼakáva hese’.

Ojeikoseháichantema ojeiko. Jesús heʼivaʼekue: ‘Hetaite vaʼerã umi mbaʼe vai ojejapóva, upévare pe mborayhu ikangyvaʼerã’ (Mateo 24:​12, JMP). Apóstol Pablo heʼivaʼekue avei ojeikoseháichantema ojeikotaha. Haʼe omombeʼu mbaʼéichapa ojeikóta ‘pe ára pahápe’, Ñandejára Rréino oipeʼa mboyve opa mbaʼe vai ko yvy ape árigui. ‘Enterove imbaʼerãnte oipotáta opa mbaʼe, plátante  ohayhúta, ha oñemombaʼéntese ha ijejapóta. Oñepuʼãmbáta Ñandejárare, túva ha sýpe avave naiñeʼẽrendumoʼãi, ndojehechakuaamoʼãi avavépe ha ojejahéita Ñandejárare. Avave naimbaʼeporãmoʼãi hapichándi, ha avavépe ndojeporiahuverekomoʼãi. Oñeñeʼẽ reíta ojuehe ha oĩta ndojejokomoʼãiva, hetáta oñembosarái vaíva hapicháre ha ndojehecharamomoʼãi mbaʼeve iporãva. Oĩta itraisionérova, iñakãrente oikóva, ha ojapóva umi mbaʼe chupekuérante ogustáva, ojaporangue Ñandejára oipotáva. Oikóta hikuái hekomarangatúvaicha, péro opa mbaʼe ojapóvare ohechaukáta omboykeha Ñandejárape.’ (2 Timoteo 3:​1-5.) Ajépa koʼã mbaʼe hetave oĩ koʼág̃a rupi?

Jesús ha Pablo nomombeʼupaivaʼekue mbaʼéicha rupípa oikovaʼerã hetaite mbaʼe vai ko múndope. Péro umi profesía haʼekuéra heʼivaʼekue oñekumpli koʼág̃a rupi. Upéicharõ, mbaʼépa ikatu jaʼe ñane renonderãre? Umi profesía Isaías heʼivaʼekue Mesías rehe oñekumplipaite, ha Isaías oñeʼẽ avei umi mbaʼe porã oguerútavare Ñandejára Goviérno. Jahechamína umíva pe artíkulo oúvape.

[Nóta oĩva taʼanga ndive páhina 6]

“Peteĩ tetã opuʼãne ambuére ha opavave opuʼãmbáne ojuehe”

[Nóta oĩva taʼanga ndive páhina 7]

“Ñembyahýi guasu oĩne opárupi”

[Roagradese]

© WHO/P. Virot