Jaikuaave hag̃ua

Mbaʼérepa okyhyjevaʼekue Poncio Pilato Romaygua mburuvichágui?

Umi omoakãva hudiokuérape ningo ojukase Jesúspe, upévare ojopy hag̃ua Poncio Pilátope heʼi hikuái: “Repoíramo chugui, nde ndahaʼemoʼãi Romapegua mburuvicha guasu irũ” (Juan 19:12). Pe César térã mburuvicha guasu haʼevaʼekue Tiberio upe tiémpope. Mbaʼérepa Poncio Pilato okyhyje chugui?

Mbaʼeichaguápa rakaʼe Tiberio? Pe New Encyclopædia Britannica omobeʼu mbaʼépa haʼe ojapo Jesúspe ojehusgátarõ guare: “Tiberio ohupytyse umi mbaʼe chupe ogustávante, ha upearã ojapo voi oimeraẽ mbaʼe”. Ha umi odeskonfiávare otraisionaha chupe katu, otortura ha ojukaukántema. Ko Enciclopedia heʼi avei: “Añetéramo opa mbaʼe omombeʼúva umi istoriadór, Tibériope ogustaiterei voi umi mbaʼe ivai vaivéva ha ityeʼỹetereíva. Haʼe ningo peteĩ ojukaukáva oimeraẽvapente ojukaségui reíntema”.

Ajeve ningo Pilato okyhyje chugui ha upévare ojukauka Jesúspe (Juan 19:​13-16).

Mbaʼérepa Jesús ombojepyheivaʼekue hemimboʼekuérape?

Yma ningo Israélpe heta oĩvaʼekue pynandínte voi ombaʼapóva. Péro oĩ avei oiporúva peteĩ sandália pererĩmínte. Umi kálle ha kokue ningo yvytimbo memete ha sapyʼánte oĩ avei tuju, upévare ipykyʼámi katuete hikuái.

Umi Israelgua ojepokuaamivaʼekue oipeʼa isandália oikévo peteĩ ógape. Ha pe óga jára ohechauka hag̃ua imbaʼeporãha, haʼe térã hembiguái ombojepyhéi imbohupápe. La Biblia ohechauka upéva ojejapoha jepi voi upe tiémpope. Pór ehémplo Abrahánpe ojevisitárõ guare hóga kárpape heʼi: “Tojegueru ymi, pejepyhéi hag̃ua; ha pepytuʼumi kuarahyʼãme, aguerúta pán peñemombarete hag̃ua” (Génesis 18:​4, 5, ÑÑB; 24:32; 1 Samuel 25:41; Lucas 7:​37, 38, 44).

Péicha ñantende porã mbaʼérepa Jesús ombojepyheivaʼekue ijapostolkuérape. Ohasárõ guare hendivekuéra pe última Pascua, ndaiporivaʼekue peteĩ óga jára térã peteĩ tembiguái ombojepyhéi hag̃ua chupekuéra. Ha Jesucristo apostolkuéra apytépe katu ndaipóri ni peteĩ ojaposéva upéva. Upévare Jesús ojagarra peteĩ palangána y reheve ha peteĩ toálla, ha oñepyrũ ombojepyhéi chupekuéra. Upéicha omboʼe ojoayhu ha iñumildevaʼerãha hikuái (Juan 13:​5-17).