Ñaajunáramopa ñañemoag̃uivéta Ñandejárare?

PETEĨ KATÓLIKA HEʼI: “Aajuna rupi añemoag̃uive Ñandejárare ha chemomanduʼa haʼe iñimportanteveha opa mbaʼégui.”

PETEĨ RABÍ HUDÍO HEʼI: “Ñaajunáramo ningo ñanepytyvõ ñañemboja hag̃ua ÑANDEJÁRARE.”

PETEĨ KUÑA BAHAÍ HEʼI: “Che rrelihiónpe ningo roajunavaʼerã rohechauka hag̃ua rojeroviaha Ñandejárare ha roagradeseha chupe opa mbaʼére. Che aajuna ahayhúgui Ñandejárape.”

HETA rrelihiónpe ningo ojejepokuaa oñeajuna. Pór ehémplo umi budista, hindu, musulmán, jainista, judío ha ambue rrelihionpegua oimoʼã ndokarúiramo peteĩ tiémpo oñemoag̃uivetaha Ñandejárare.

Mbaʼépa nde ere, tekotevẽpa ñaajuna? Mbaʼépa heʼi la Biblia upévare?

La Bíbliape heʼi oĩ hague oajunáva

Yma oĩvaʼekue oajunáva Ñandejára heʼi rupi ojejapovaʼerãha. Pór ehémplo, ohechauka hag̃ua oñembyasyha ojapo haguére ivaíva (1 Samuel 7:​4-6), Ñandejára oguerohory térã ohekomboʼe hag̃ua chupekuéra (Jueces 20:​26-28; Lucas 2:​36, 37) ha ojepyʼamongeta hag̃ua (Mateo 4:​1, 2).

Péro la Biblia oñeʼẽ avei umi ajúno Ñandejára ndoguerohorýivare. Pór ehémplo, rréi Saúl oajunavaʼekue oho mboyve peteĩ espiritísta rendápe (Levítico 20:6; 1 Samuel 28:20). Oĩ avei umi hénte iñañaitereíva ha heʼíva oñeajunavaʼerãha. Pór ehémplo rréina Jezabel ha umi ojukasevaʼekue apóstol Páblope (1 Reyes 21:​7-12; Hechos 23:​12-14). Ha umi fariséo pyʼỹinte oajunavaʼekue avei (Marcos 2:18). Péro, Jesús ha Jehová ndoguerohoryivaʼekue haʼekuéra ojapóva (Mateo 6:16; Lucas 18:12). Ha umi isrraelíta ndahekoporãiva oajunárõ guare Jehová ndoguerohorýinte avei (Jeremías 14:12).

Mbaʼépa ñanemboʼe koʼã ehémplo? Ndahaʼeiha ñaajuna haguérente Ñandejára  ñandeguerohorýtava. Péro jahecha avei oguerohoryha heta isiervokuéra iñeʼẽrendúva oajunárõ guare. Upéicharõ, tekotevẽpa ñaajuna avei koʼág̃a rupi?

Oajunavaʼerãpa Ñandejára siervokuéra?

Pe léi oñemeʼẽvaʼekue Moiséspe heʼi umi hudío ‘ndokaruivaʼerãha’. Upéva heʼise oajunavaʼerãha hikuái una vés al áño, ojejapo aja sakrifísio Jehovápe umi Israelgua rembiapo vaikuére (Levítico 16:​29-31; Salmo 35:13). Upe léipe añoite Jehová heʼi isiervokuérape oajunavaʼerãha. a Upévare umi hudío iñeʼẽrenduvaʼekue upe léi heʼívape. Péro koʼág̃a rupi Ñandejára siervokuéra natekotevẽi oajuna, Jehová voi oipeʼámagui upe léi omeʼẽvaʼekue Moiséspe (Romanos 10:4; Colosenses 2:14).

Jesús oajunavaʼekue avei upe léipe heʼiháicha, péro ndahaʼéi upéva ojapo haguére ojekuaáva chupe. Ha heʼíramo jepe hemimboʼekuérape mbaʼépa ojapovaʼerã odesidíramo oajuna, arakaʼeve ndeʼíri chupekuéra oajunavaʼerãha katuete (Mateo 6:​16-18; 9:14). Upéicharõ, mbaʼérepa Jesús heʼi hemimboʼekuéra oajunataha haʼe omano rire? (Mateo 9:15.) Jesús ningo nomandaihína chupekuéra oajuna hag̃ua, haʼe heʼi hemimboʼekuéra oñembyasyetereitaha, ha ndokarusemoʼãiha voi.

La Bíbliape jatopa mokõi istória omombeʼúva Ñandejára oguerohoryha oĩramo oajunáva ohayhúgui ha omombaʼeguasuségui chupe (Hechos 13:​2, 3; 14:23). b Ñandejára siervokuéra ningo natekotevẽi oajuna, péro oĩramo oajunaséva opensa raẽ vaʼerã maʼerãpa ojapose.

Ñañatendékena maʼerãpa ñaajuna

Umi oajunáva ningo tuichaiterei ojavy jepi oimoʼãgui tuichave mbaʼeha hapichakuéragui oajuna haguére. La Biblia heʼi voi ñandéve ani hag̃ua ñañemoumílde guaʼu (Colosenses 2:​20-23). Ñandejára ndoguerohorýi umichaguápe. Jesúspe voi ndogustaivaʼekue peteĩ fariséo oñemombaʼeguasúrõ guare oajuna haguére (Lucas 18:​9-14).

Ha naiporãi avei ñamombeʼu enterovépe ñaajunaha. Mateo 6:​16-18-pe, Jesús heʼi ñaajunáramo ñandénte jaikuaavaʼerãha ha Jehová, natekotevẽi ñamombeʼu enterovépe. Upéicha avei nañaajunaivaʼerã ojeʼégui reínte ñandéve.

Aníkena ñapensa avei ñaajunáramo japagamaha ñane rembiapo vaikuére. Jaipotáramo Ñandejára oguerohory ñaneajúno jajapovaʼerã avei hembipota (Isaías 58:​3-7). Ñandejára ñaneperdona hag̃ua  ndahaʼéi ñaajunantevaʼerã, tekotevẽ ñañembyasy ñane rembiapo vai haguére (Joel 2:​12, 13). La Biblia heʼi voi Ñandejára imbaʼeporã rupínte ñaneperdonaha, pe Jesucristo sakrifísio rupive. Ñande ningo ñandejeheguínte ndaikatúi jahupyty Ñandejára perdón, ni ñaajunavéramo ni jajapóramo hetave mbaʼe (Romanos 3:​24, 27, 28; Gálatas 2:16; Efesios 2:​8, 9).

Isaías 58:​3-pe omombeʼu avei mbaʼéicha javépa Ñandejára ndoguerohorýi pe ajúno. Umi Israelgua oporandu Ñandejárape: ‘Maʼerã piko ore ndorokarúi nerepenáiramo orerehe, maʼerã piko roñemomirĩ nderehechakuaáiramo?’. Péicha ohechauka oajuna haguére ohaʼarõha Jehová omeʼẽ chupekuéra heta mbaʼe porã. Haʼete guaʼu ku ombodevéva Jehovápe hikuái upéicha. Koʼág̃a rupi oĩ avei oimoʼãva oajuna haguére Jehová katuete oipytyvõvaʼerãha chupe. Aníkena ñande avei jajapo upéicha!

Oĩ ningo oajunáva térã oñembyepotíva ijupe voi ohechauka hag̃ua oñembyasyha, oimoʼãgui péicha oñemoĩ porãtaha Ñandejárandi. Péro la Bíbliape ndeʼiriete jajapovaʼerãha upéicha. Heʼi guei nañanepytyvõmoʼãiha mbaʼeverã ‘ñainupã vaíramo ñande rete’ (Colosenses 2:​20-23).

Ñaneakãguapyvaʼerã

Ndaikatúi ningo avave ñandeovliga ñaajuna hag̃ua, péro naiporãi avei jaʼe ndovaleiha oñeajuna. Pórke upéva ikatu avei ñanepytyvõ jajapóramo pyʼaporãme. Ndahaʼéiramo jepe upe iñimportantevéva ñamombaʼeguasu hag̃ua Ñandejárape. Jehová ningo ovyʼa ha oipota ñande javyʼa avei (1 Timoteo 1:11). Ñandejára Ñeʼẽme ningo heʼi voi: ‘Aikuaa yvypórape iporãveha ovyʼa. Avei okaru ha omboyʼu, ha ovyʼa hembiapokuére. Koʼãva ningo Ñandejára voi omeʼẽ ñandéve’ (Eclesiastés 3:​12, 13).

La Biblia heʼi Ñandejára oipotaha vyʼápe jaservi chupe ha ñaajunáramo ningo hasýta javyʼa hag̃ua. Avei ñañangarekovaʼerã ñandejehe ani hag̃ua ñanderasy ñaajunaiterei haguére. Térã ñanekangypa ha ñandekaiguéma japredika hag̃ua.

Upévare oiméramo ñaajuna, ndajahusgaivaʼerã ñande rapichakuérape ndojapói haguére upéicha avei. Jaservíva guive Jehovápe ndajajodiskutirivaʼerã ko mbaʼére, jaikuaa rupi ‘Ñandejára Rréino ndeʼiséi jekaru térã ñemboyʼu. Ñandejára Rréino poguýpe ningo oĩta tekojoja, pyʼaguapy ha vyʼa espíritu sánto rupi’ (Romanos 14:17).

[Nóta]

[Komentário oĩva páhina 28-pe]

Umi fariséo ndajeko oajunávo oimoʼã iñumildeha

[Komentário oĩva páhina 29-pe]

‘Ñandejára Rréino ndeʼiséi jekaru térã ñemboyʼu. Ñandejára Rréino poguýpe ningo oĩta tekojoja, pyʼaguapy ha vyʼa’

[Rrekuádro oĩva páhina 29-pe]

Kuarésma

Ojeʼe ningo Jesús oajuna hague cuarenta día. Ha upévare kuarésma jave oñeajuna avei cuarenta día. Péro Jesús arakaʼeve ndeʼirivaʼekue hemimboʼekuérape ojapo hag̃ua haʼe ojapo haguéicha. Upévare haʼekuéra ndojapoivaʼekue. Ojeʼe ningo áño 330-pe Atanasio ohai hague peteĩ kárta. Upévape ojehai ypy vaʼekue oñeajunavaʼerãha cuarenta día Pascua mboyve.

Péro Jesús ningo oajunavaʼekue ojevautisa rire ndahaʼéi omano mboyve. Upévare ikatu ñañeporandu: Mbaʼére piko oñeajuna koʼág̃a rupi Pascua mboyvemi? Yma ningo umi Babilonia, Egipto ha Greciaygua oajunavaʼekue cuarenta día, oñepyrũvo káda áño. Péicha jahecha upévarente ojejapoha koʼág̃a rupi pe Kuarésma, ha ndahaʼeiha la Bíbliape heʼi rupi.