JERUSALÉNPE ningo oĩ Ñandejára témplo ha ko távape ojerevaipaite hína. Ojejuka rréi Ocozíaspe, ha reikuaami piko mbaʼépa oiko upéi: Isy Atalía ojukauka avei Ocozías familiakuérape. Ha umíva ningo iniéto hína! Mbaʼérepa nde ere Atalía ojapo hague upéicha? a... Ikatu hag̃uáicha haʼe ogoverna.

Péro Atalía ndopillái oĩha gueteri peteĩ iniéto oikovéva. Reikuaápa mbaʼéicha rupípa upéva?... Upe iniéto Jehoás ningo mitãraʼy gueteri ha itia Jehoseba oraha oreko chupe ñemihápe iménandi Ñandejára témplope. Jehoseba ména hína pe saserdóte guasu Jehoiadá.

Seis áño oreko hikuái kañyhápe Jehoáspe, ha upépe omboʼe chupe hikuái mávapa Jehová ha mbaʼépa oipota ojapo. Ombotýrõ guare siete áño katu, Jehoiadá heʼi Jehoásgui oikomavaʼerãha rréi. Mbaʼépa nde ere ojapoha Jehoiadá ha mbaʼépa oiko rréina Atalíagui?...

Upe tiémpope ningo Jerusalénpe oĩvaʼekue umi kuimbaʼe oñangarekóva rreikuéra rehe. Upémarõ Jehoiadá ombyaty umi kuimbaʼépe ha omombeʼu chupekuéra haʼe ha hembireko osalva hague rréi Ocozías raʼyrépe. Umi kuimbaʼe ohechávo Jehoáspe heʼi hese ogovernavaʼerãha ha upévare oipytyvõ Jehoiadápe.

Upéi Jehoiadá ohechauka Jehoás oikoveha ha ojapo chugui rréi. Upépe enterove “ojepopete ha osapukái: ‘Víva mburuvicha guasu!’”. Ha umi kuimbaʼe ojerepa Jehoás rehe ani hag̃ua ojejapo hese mbaʼeve. Ohendúvo Atalía ayvúpe oĩha hikuái, odipara oho ohecha mbaʼépa la oikóva ha heʼi oñepuʼãha hese. Upépe Jehoiadá heʼi umi kuimbaʼépe ojuka hag̃ua Atalíape (2 Reyes 11:​1-16).

Mbaʼépa ojapo Jehoás upe rire?... Ojapo opa mbaʼe Jehoiadá heʼihaichaite chupe. Jehoiadá oikove aja entéro ningo Jehoás ojapo iporãva. Ha  ojerure umi héntepe omeʼẽ hag̃ua pláta oñemyatyrõ hag̃ua Ñandejára témplo. Itúva Ocozías ha ijavuélo Jehoram noñangarekoivaʼekue upe témplore. Péro jahechamína mbaʼépa oiko pe saserdóte guasu Jehoiadá omano rire (2 Reyes 12:​1-16).

Upérõ Jehoás orekomavaʼekue 40 áño. Upéi oñepyrũ ojeheʼa umi Ñandejárape nomombaʼéivare. Upe tiémpope Zacarías vaʼekue pe saserdóte Jehová témplope ha haʼe ningo Jehoiadá raʼy hína. Mbaʼépa nde ere ojapoha Zacarías oikuaávo umi mbaʼe vai ojapóva Jehoás?...

Zacarías heʼi Jehoás ha iñamigokuérape: ‘Peẽ peheja haguére Jehovápe, haʼe avei penderejáta’. Jehoás ipochyeterei upévare ha ojapika Zacaríaspe itápe omano meve. Epensamíntena ko mbaʼére! Mbaʼéma piko, Jehoáspe ojererekovaʼekue ñemihápe ani hag̃ua ojejuka chupe, koʼág̃a katu haʼe ojukauka Zacaríaspe! (2 Crónicas 24:​1-3, 15-22.)

Mbaʼépa ñanemboʼe koʼã mbaʼe oikovaʼekue?... Ajépa ndajajoguaséi Atalíape, haʼe ningo iñañaiterei vaʼekue. Ñande ningo jajapose Jesús heʼivaʼekue ñandéve, jahayhuse ñande rapichakuérape, umi ndaijaʼéivape jepe ñanderehe (Mateo 5:44; Juan 13:​34, 35). Ñanemanduʼavaʼerã avei akóinte jajapovaʼerãha iporãva, ndahaʼéi Jehoás ojapo haguéicha, haʼe ningo ñepyrũrãnte ojapovaʼekue iporãva. Jajeheʼavaʼerã umi Jehovápe omombaʼeguasúvare, umíva ningo ñanemokyreʼỹta jaservi hag̃ua chupe.