Ikatu piko ñantende la Biblia?

“Che rógape ningo roleemivaʼerã la Biblia domingokue, péro nantendéi rupi ndaleeséi aikuaáramo jepe ouha Ñandejáragui.” (Steven, Gran Bretañaygua.)

“Arekórõ guare 17 áño añemoĩ alee la Biblia, péro ijetuʼueterei chéve antende hag̃ua ha upévare ahejaite jey.” (Valvanera, Españaygua.)

“Che katólika rupi aikuaa aleepavaʼerãha la Biblia una vés jepe. Upémarõ añepyrũ alee ha tres áñope aleepa, péro nantendéi mbaʼevete.” (Jo-Anne, Australiaygua.)

LA Biblia ningo ndaijojahái. Oñevendeve oimehãichagua lívrogui ha ndahasyiete ñakonsegi hag̃ua. Oĩ avei heta idiómape. Upéicharõ jepe ijetuʼu la héntepe ontende hag̃ua. Ndévepa ijetuʼu avei?

Ijapohare voi piko ndoipotái ñantende?

Iporã ningo jaikuaa raẽ mávapa ohaikavaʼekue la Biblia. Pype heʼi voi: ‘Ñandejára ohaikavaʼekue iñeʼẽ ijespíritu rupive’ (2 Timoteo 3:​16, ÑÑB). Ha oipota piko haʼe ñantende Iñeʼẽ? Térãpa ohaikavaʼekue umi iñarandúvape g̃uarãnte?

Koʼã téysto ombohováita ñandéve:

‘Ko che Ñeʼẽ ameʼẽva peẽme, ndahaʼéi peteĩ mbaʼe hasyetereíva térã ikatuʼỹva pehupyty.’ (Deuteronomio 30:11.)

‘Ne Ñeʼẽ ohesape ha omoarandu umi itavývape.’ (Salmo 119:​130, ÑÑB.)

‘Upe jave Jesús henyhẽ espíritu sántogui ha vyʼápe heʼi: “Romombaʼeguasu che Ru yvága ha yvy Jára, reñomi haguére koʼã mbaʼe umi iñarandu ha imbaʼekuaávagui, ha reikuaauka umi naiñarandúivape”.’ (Lucas 10:21.)

Péicha jahecha la Biblia ohaikavaʼekue oipotaha ñantende heʼíva pype. Péro oĩ gueteri heta ñande rapicha nontendéiva oñehaʼãvéramo jepe. Mbaʼépa ikatu ojapo hikuái ontende hag̃ua? Umi artíkulo oúvape jahecháta mbohapy mbaʼe ñanepytyvõtava ñantende hag̃ua la Biblia.