Jahechamína mbaʼéichapa oñembaʼapo peteĩ imprénta guasúpe

OIMÉNE ndahaʼéi koʼág̃a ramo rehecháva peteĩ rrevísta Ñemañaha. Ikatu peteĩ testigo de Jehová ohejámaraʼe ndéve nde rógape, térã rehecha oikuaveʼẽvo kállere ỹrõ ambue lugárpe. Pyʼỹinte ojeheja jepi hendive ótra rrevísta hérava ¡Despertad! Ha mokõive ojejapo oipytyvõ hag̃ua enterovévape ontende porãve hag̃ua la Biblia. Ñemañaha ningo pe rrevísta rrelihiósa hetave ojejapóva ko múndope, amo 37.000.000 rupi káda més.

Ndépa reikuaase moõ ha mbaʼéichapa ojejapo koʼã rrevísta? Iporãitereíta rehóramo pe ojejapohápe voi rehecha hag̃ua mbaʼéichapa ombaʼapo umi imprénta oguerekóva Testigos de Jehová heta tetãme. Péro oĩ heta ndaikatúiva ovisita koʼã lugár, upévare jaikuaa hag̃ua mbaʼéichapa ojejapo umi rrevísta ñañeʼẽta peteĩ impréntare opytáva Wallkill-pe (Nueva York). Avei jahecháta umi taʼanga, ha péicha haʼetéta ku ñaiméva upépe.

Ñepyrũrã Departamento de Redacción (oĩva Brooklyn-pe) ohai umi informasión oñemoĩtava upe rrevístape. Upe rire ojeguerahauka Departamento de Artes Gráficaspe opytáva Wallkill-pe, oprepara hag̃ua hikuái umi pláncha de impresión cinco prénsape g̃uarã. Koʼã prénsa oiporu heta rróllo kuatia, ha káda uno ipohýi 1.300 kílo rupi. Káda día ojeporu 70 térã 90 toneláda kuatia, upéva ojapo 1.400 rróllo rupi káda més. Oñeimprimimba rire oñekytĩ ha opyta peteĩ kuatia guasúicha, upe rire ojedovla ha oikóma chugui peteĩ rrevísta oguerekóva 32 páhina. Koʼã kuatia guasúpe oñehenói pliégo, ha ojejapo hag̃ua koichagua rrevísta ojeporu peteĩ pliégonte. Péro ojejapo hag̃ua peteĩ lívro oñekotevẽ hetave. Koʼã pliégo ojegueraha peteĩ tallérpe oĩháme mokõi línea de encuadernación. Un díape ikatu ojejapo peteĩ líneape 50.000 lívro itápa hatãva ỹrõ 75.000 itápa huʼũva. Ha pe ótra líneape katu ojejapokuaa 100.000 lívro itápa huʼũva.

Pe áño ohasavaʼekuépe ningo ojejapo 243.317.564 rrevísta, 2.600.000 Biblia ha 25.400.000 lívro rupi. Koʼã puvlikasión ojejapo 380 idiómape ha ojeguerahauka umi kongregasiónpe.

 Wallkill-pe ojejapo lívro ha rrevísta 12.754 kongregasiónpe g̃uarã oĩva Estados Unídospe. Avei umi 1.369 kongregasiónpe g̃uarã oĩva Hawai ha heta tetã opytáva Centro Américape. Oñeimprimimba rire umi puvlikasión, Departamento de Envíos ombohyru ha oguerahauka kongregasionkuérape. Káda áño Estados Unídospente ojeguerahauka 14.000 toneláda lívro ha rrevísta.

Tuichaiterei ningo oipytyvõ koʼã mákina ojejapo hag̃ua umi puvlikasión. Upéicharamo jepe ndahaʼéi voi umi mákina la iñimportantevéva, síno umi 300 voluntário rupi ombaʼapóva Artes Gráficas, Programación de horarios, Taller de impresión, Encuadernación ha Envíospe.

Chupekuéra g̃uarã iñimportanteterei umi hénte oikuaa Ñandejára Ñeʼẽ ha ojapo upépe heʼíva. Roipotaite ningo pemombaʼe koʼã rrevísta ha peikuaa porãve Jehová ha Jesucrístope. Upéva penepytyvõta pehupyty hag̃ua jeikove opaveʼỹva (Juan 17:3).

[Taʼanga oĩva páhina 16-pe]

 [Taʼanga oĩva páhina 17-pe]