Tuicha okambia chupekuéra la Biblia

Mbaʼérepa peteĩ kuñakarai ndoikuaaseveimavaʼekue mbaʼeve rrelihióngui oñeʼẽ koʼág̃a oikóvo hapichakuérape Ñandejárare? Mbaʼérepa peteĩ mitãkariaʼy oheja peteĩ depórte ogustaitereíva chupe? Mbaʼérepa peteĩ kariaʼy okambia ha koʼág̃a noñorairõvéima hapichándi, ndokaʼuvéima ha ndoʼuvéima dróga? Jahejána haʼekuéra voi tomombeʼu ñandéve mbaʼéicha rupípa upéva.

MÁVAREPA ÑAÑEʼẼTA?

HÉRA: PENELOPE TOPLICESCU

OREKO: 40 ÁÑO

HETÃ: AUSTRALIA

MBAʼÉPA IKATU JAʼEVE HESE: NDOIKUAASEVEIMAVAʼEKUE MBAʼEVE RRELIHIÓNGUI

CHEREMBIASAKUE: Anase Sydney-pe (Australia), ha arekórõ guare dos áño rova Nueva Guinéape. Roiko dos áño rupi Rabaul-pe ha upéi roiko avei ocho áño Bougainville-pe. Upérõ ningo avave ndorekói gueteri téle, ha che ermáno ndive rohomivaʼerã royta ha rohuga hetave mbaʼe.

Che arekórõ guare 10 áño aha ñepyrũ peteĩ rrelihiónpe. Che sy ningo ikatolikavaʼekue, ha haʼe heʼi chéve aha hag̃ua katekesihápe. Upérõ raẽ chemongaraivaʼekue hikuái katólikaramo.

Péro rova jeýrõ guare Austráliape okambiáma che situasión. Che mitãkuñáme añepyrũ añeporandu mbaʼérepa che rrelihión omboʼe heta mbaʼe hendapeʼỹ. Ha chemopensa umi mbaʼe eskuélape romeʼẽva istóriape, che ru ndive katu are are roñomongetámi mbaʼéichapa oñepyrũvaʼekue la rrelihión ha roñeʼẽ avei umi mbaʼe la Biblia omombeʼúvare. Koʼã mbaʼére ningo che ndahavéi la rrelihión katólikape.

Arekórõ guare 16 áño che sy ha che ru ojopoi. Upéi nañontendevéi che sy ndive, upévare aha aiko che ru ha pe iñirũ ndive. Che ermáno katu opyta oiko che sy ndive ha ova hikuái ótro ládo. Ha dos áño haguépe raẽ aiko porã jey che sy ndive. Upe tiémpope ndavyʼaieterei cheaño, ha upévare aiko umi vailehárente voi, akaʼu ha haʼu dróga. Upe rire aheja avei che estúdio  ha aheka che travahorã oimehaichaguántema ha aiko che akãre. Péva ningo la vyroreiete ajapovaʼekue upe tiémpope.

Péro arekórõ guare 25 áño aikuaase jey mbaʼépa heʼi la Biblia. Atopa avei ótro che travahorã ha upépe aikuaa peteĩ kuñataĩ héravape Liene. Haʼe ningo horyeterei ha orrespeta la ipatrónpe ijarhélramo jepe hendive. Upévare aporandu chupe mbaʼérepa ndojedeskitái hese, ha haʼe heʼi chéve ostudiaha la Biblia testigos de Jehová ndive ha oñehaʼãha ojapo la Bíbliape heʼíva. Upéi Liene heʼi chéve ndastudiaséipa avei la Biblia una óra jepe, ha vuéno haʼe chupe. Chéngo aimoʼãkuri upe una órape chemboʼepatamaha la oikuaamíva. Péro upe pyharépe tres óra voi roñemongeta la Biblia heʼívare. Ahecharamoiterei ningo mbaʼéichapa oiporu la Biblia ombohovái hag̃ua chéve umi mbaʼe aikuaaséva.

Chemanduʼa ningo upe rire ahakuévo ógape chepochy hague Ñandejára ndive ymavéma ndoikuaaukai haguére chéve koʼã mbaʼe porãite. Che haʼe tardemaha chehegui akambia hag̃ua ha aiko umi testigos de Jehováicha. Apensa avei arakaʼeve ndaikatumoʼãiha aha apredika umi ogaha rupi hendivekuéra. Péro asegi astudia atopa hag̃ua mbaʼépa ojapo vai hikuái. Upéicharõ trankiloitéma ndastudiamoʼãvéi. Ha amo ipahápe ahechakuaa ndojavyiha voi hikuái mbaʼevépe.

LA BIBLIA CHEPYTYVÕ AKAMBIA HAG̃UA: Aikuaavévo Ñandejára Ñeʼẽ heʼíva, ahechakuaa ajapo vaiha heta mbaʼe ha upépe ajedesisi ndaʼumoʼãveimaha dróga. Péro upéi aha aiko tetã ambuére ha añepyrũ jeýma aiko che akãre, afarrea ha chekaʼu avei. Haʼete voi a más día aha vaivéva hese. Ha atĩramo jepe añemboʼe Jehovápe, péro asegínte añeñandu vai.

Upéi tuichaiterei chepytyvõ aikuaávo mbaʼéichapa Jehová oiporiahuvereko jey vaʼekue Davídpe ojapo rire mbaʼe vai Bat-seba ndive. David ningo ohechakuaavaʼekue ojavyha ha oheja ojekorrehi chupe (2 Samuel 12:​1-13). Upévare chemanduʼa ajapo jave peteĩ mbaʼe noĩporãiva añemboʼevaʼerãha Jehovápe ha ajerure chupe cheperdonami hag̃ua. Péro ahechakuaa avei iporãveha añemboʼe ajapo mboyve peteĩ mbaʼe vai ha ndahaʼéi upe rire. Ha tuicha la diferénsia!

UMI MBAʼE PORÃ AHUPYTÝVA: Che ningo che ayvaʼekue, péro Efesios 4:​29-31 heʼíva chepytyvõ anive hag̃ua ‘chepyʼaro, chepochyvai térã chepochyrei’. Ajejokokuaavévo ndajapovéima ha ndaʼevéima heta mbaʼe vai. Ha Jesús heʼivaʼekue chepytyvõ avei ajedesidi hag̃ua. Haʼe heʼivaʼekue: ‘Pejéramo Si, si vaʼerã’ (Mateo 5:37).

Che sy ningo yma ndoipotaivaʼekue astudia testigos de Jehová ndive, péro upe riréma heʼi chéve oguerohoryha pe ajapóva. Peteĩ árape heʼi voi chéve: “Jehová rupínteko oiko ndehegui koʼág̃a kuña imarangatúva ha ndahaʼéi ore romboʼe porã haguére”. Chembopyʼakyrýi ningo ahendúvo upéva.

Koʼág̃a ndaikovéima cheakãre. Che ména ndive nueve áñoma roiporupaite oretiémpo romboʼe hag̃ua la Biblia ore rapichakuérape. Koʼág̃a ningo apredikáma ogaha rupi ha avyʼaiterei voi ajapo haguére.

 MÁVAREPA ÑAÑEʼẼTA?

HÉRA: DENIS BUSIGIN

OREKO: 30 ÁÑO

HETÃ: RUSIA

MBAʼÉPA IKATU JAʼEVE HESE: KARATÉKA

CHEREMBIASAKUE: Anasevaʼekue táva Perm-pe, péro chemitã guive aiko Furmanov-pe opytáva Ivanovo-pe (Rusia). Upépe ningo 40.000 hénte rupi voi oiko. Og̃uahẽvo pe otóño ningo upe távape ombojeguapa umi yvyramáta hogue pytã ha saʼyju asýva. Péro pe áño ochenta ha noventa rupi umi mbaʼe vai ojejapóva ombyaipaite ko táva. Ha ore família katu imboriahu upe tiémpope. Che tuvakuéra, che ermáno ha che roiko peteĩ kotyʼípente voi.

Añepyrũvaʼekue astudia karáte arekórõ guare 7 áño. Chegustaiterei upéva ha amotenondeve opa mbaʼégui. Nambaʼapói jave aha gimnásiope ha la che amigokuéra ningo deportísta memete voi. Arekópe 15 áño agana pe sinturón rróho, ha pe áño oúvape katu agana pe sinturón marrón. Che irũnguéra ndive ropartisipamivaʼerã umi kampeonáto rrúso ha euroasiáticope. Haʼete voi oho porãitereíva chéve, péro arekópe 17 áño ojere vaipaite chéve.

Peteĩ árape che amigokuéra ndive romonda ha rojegueraha upévare kárselpe dos áño. Chemanduʼa ijetuʼueterei hague chéve kárselpe, péro upépe alee ypy vaʼekue la Biblia. Alee Génesis, Salmos ha Nuevo Testamento. Aaprende pe padrenuéstro ha añemboʼe jepi ake mboyve jahechápa nachepytyvõi.

Áño 2000-pe asẽ kárselgui, péro ndaikuaáigui rei mbaʼépa ajapóta haʼu jey dróga. Upe tiémpope omano che sy, ha ambyasyeterei ningo pórke che ahayhueterei chupe. Ha ijetuʼúramo jepe chéve, apoi jey drógagui ha aha jey peteĩ gimnásiope. Upéi ava táva Ivanovo-pe, ha ambaʼapo peteĩ negósiope. Peteĩ kuñakarai ombaʼapóva upépe ningo testigo de Jehová, haʼe oñeʼẽ chéve la Bíbliare ha upéi ojerure ótro testígope oho hag̃ua chembostudia.

LA BIBLIA CHEPYTYVÕ AKAMBIA HAG̃UA: Añepyrũrõ guare astudia la Biblia, aikuaáma Ñandejára ojapotaha ko yvýgui peteĩ hardín neporãva ha chegustaiterei voi. Upévare añehaʼãmbaite akambia aime hag̃ua upépe. Upérõ ningo che apensa gueteri chejehénte, upéi ahechakuaa Jehová oipotaha avei aipytyvõ che rapichakuérape. Upéicharõ ajapovaʼerã la Biblia heʼíva, aiko porã che rapichakuérandi ha chembaʼeporã hendivekuéra.

Che ningo ajepyʼamongetámi mbaʼeichaitépa Jehová ñanderayhu omeʼẽgui itaʼýra rekove ñandepeʼa hag̃ua pekádo poguýgui. Upéva tuichaiterei chepytyvõ akambia hag̃ua. Avei alee rire Salmo 11:5 aikuaa Jehovápe ndogustaiha ñañorairõ. Upévare ndahechaveiete télepe umi prográma ivioléntova. Ha ijetuʼúramo jepe chéve, ajedeha la karátegui. Chepytyvõ avei  1 Corintios 15:33 heʼíva ahechakuaa hag̃ua aiporavo porã vaʼerãha che amigorã. Che ningo ahavaʼekue kárselpe che amigokuéra káusare. Upévare aheja la júnta vai ha ndajeheʼavéi umichaguáre.

UMI MBAʼE PORÃ AHUPYTÝVA: Chepytyvõ rupi testigos de Jehová ha astudia rupi la Biblia, koʼág̃a g̃uarã oikóma chehegui peteĩ kuimbaʼe iñakãguapy ha hekojojáva. Pór ehémplo Hebreos 13:5 chemboʼe ndovaleiha amombaʼeterei pláta ha añekontenta hag̃ua pe arekomívare. Upéicha rupi koʼág̃a ndachejapuvéima ha namondavéima.

Che ningo amombaʼéva voínte che amigokuérape. Péro yma pyʼỹinte roiko vai oretaryrýi ha norokonfiáigui ojuehe. Ha koʼág̃a katu testigos de Jehová ndive ndahaʼeiete upéicha. Haʼekuéra iñimperféktoramo jepe, oñehaʼã ojapo Ñandejára heʼíva ikatu hag̃uáicha oiko porã hapichakuéra ndive. Upévare koʼág̃a avyʼaiterei areko haguére amígo añetetéva kongregasiónpe.

Mbaʼe piko oikovaʼerãmoʼã chehegui ndastudiáirire la Biblia! Hetápe ningo ambohasa asy vaʼerãmoʼã. Ha moõiko jaikuaapáta naimeivaʼerãmoʼãpa kárselpe koʼág̃a. Upéva rangue koʼág̃a che aiko vyʼápe che rembireko ha mokõi che família ndive. Ore ningo vyʼápe roipytyvõ ore rapichakuéra oikuaa hag̃ua avei Ñandejárape.

MÁVAREPA ÑAÑEʼẼTA?

HÉRA: JOSÉ CARLOS PEREIRA DA SILVA

OREKO: 31 ÁÑO

HETÃ: BRASIL

MBAʼÉPA IKATU JAʼEVE HESE: PYʼỸINTE OIKOVAI

CHEREMBIASAKUE: Akakuaavaʼekue peteĩ várrio imboriahuetereívape, hérava Americana ha opytáva táva São Paulo-pe. Pe che aikohápe ndaipóri voi água korriénte ha váño modérno. Ha henyhẽte avei upérupi mondaha.

Che ningo chemitã guive añorairõsénte voi. Pyʼỹinte roñombyepotivaʼerã che rapichakuéra ndive pe kállere ha upévare umi vesíno okyhyjepa chehegui. Ha ndareíriko, che ningo che pínta vai, che arhél ha aporomondyipa voi. Pyʼỹinteko akaʼu pelele ha che ermanokuéraicha haʼu avei dróga. Peteĩ che ermáno ningo omanovaʼekue hoʼu raságui dróga.

LA BIBLIA CHEPYTYVÕ AKAMBIA HAG̃UA: Umi testigos de Jehová oñeʼẽrõ guare chendive, ohechauka chéve la Bíbliape Ñandejára ojapotaha ko yvýgui peteĩ hardín neporãva (Lucas 23:​42, 43; Revelación [Apocalipsis] 21:​3, 4). Chemboʼe avei umi omanovaʼekue noñanduveimaha mbaʼeve ha Ñandejára nomondoiha umi iñañávape ohasa asy hag̃ua tatarendýpe (Eclesiastés 9:​5, 6). Upéva tuicha chembopyʼaguapy. Ha umi mbaʼe aaprendevaʼekue Ñandejáragui  tuicha chepytyvõ akambia hag̃ua. Jaikuaa ningo upéva ajapo hag̃ua ndaʼuveimavaʼerãha dróga, ndakaʼuveimavaʼerã ha ndachejuruguasuveimavaʼerãha, avei añehaʼãmavaʼerã nañorairõvéi che rapicha ndive.

Upéicharõ jepe, chemokyreʼỹ heʼíva 1 Corintios 6:​9-11. Upépe ohechauka umi kristiáno ypykue ojapo hague avei umi mbaʼe vai che ajapóva. Apóstol Pablo ningo heʼi chupekuéra: ‘Oĩvaʼekue pende apytépe upeichaguáva. Ha koʼág̃a hekopotĩma, imarangatúma ha hekojojáma, Jesucristo rérape ha Ñandejára espíritu rupi’. Upévare chepyʼaguapy apensávo che avei ikatuha akambia aime porã hag̃ua Ñandejára ndive.

Aha ypýrõ guare Testigokuéra rreunionhápe, ahechakuaa omombaʼeguasuha hikuái Ñandejárape hekopete. Ha oikuaámaramo jepe hikuái mbaʼe apohápa che, cheguerohory ha imbaʼeporã chendive hikuái.

UMI MBAʼE PORÃ AHUPYTÝVA: Ndastudiáirire la Biblia ha nakambiáirire ningo amanomavaʼerãmoʼã. Péro koʼág̃a chedeprovéchoma hetápe. Aipytyvõma peteĩ che ermánope oikuaa hag̃ua avei Ñandejárape ha opoi hag̃ua drógagui. Ha heta che hentekuéra osegi avei che ehémplo ha ostudia la Biblia. Aagradese Jehovápe oheja haguére chéve aservi chupe, pórke haʼe añetehápe ojepyʼapy ñanderehe.

[Komentário oĩva páhina 24-pe]

“Ahechakuaa iporãveha añemboʼe ajapo mboyve peteĩ mbaʼe vai ha ndahaʼéi upe rire. Ha tuicha la diferénsia!”