Ñandejára pytu marangatu tuichaiterei ñanepytyvõ

DAVID tuicha ojavyvaʼekue Ñandejára renondépe, péro upe rire oñembyasy ha ojerure asy chupe: “Aníkena chemosẽtei ne renondégui, ha ani reipeʼátei chehegui nde espíritu sánto” (Salmo 51:11, ÑÑB).

Mbaʼére piko David ndoipotaietereivaʼekue Jehová oipeʼa chugui ijespíritu sánto? Oikuaa porãgui tuichaiterei oipytyvõha chupe. Pór ehémplo imitãrõ guare Ñandejára omeʼẽ chupe ipytu marangatu ojuka hag̃ua pe higánte Goliátpe (1 Samuel 17:45-50). Avei oipytyvõ chupe ohai hag̃ua umi purahéi neporãmba jepéva. Haʼe heʼi: ‘Ñandejára pytu marangatu oñeʼẽ che rupi; iñeʼẽ oĩ che jurúpe’ (2 Samuel 23:2).

Upe rire Jesucristo heʼi avei: ‘David voi niko espíritu sánto rupi heʼivaʼekue: ‘Jehová heʼi che járape: “Eguapy che akatúa gotyo, tamoĩ ne pyrendáramo umi nderayhuʼỹvape”’’ (Marcos 12:36; Salmo 110:1). Jesucristo oikuaamavaʼekue David ohai hague heta purahéi Ñandejára pytu  marangatu rupive. Upévare katuete ñañeporandúne: “Ikatu piko Ñandejára chepytyvõ avei upéicha?

‘Pejerure jey jey ha oñemeʼẽta peẽme’

Ikatu ñapensa: “Mbaʼe che piko ahaíta peteĩ purahéi Ñandejárape!”. Jepeve ndajajapói upéva ikatuhína ñambohovái provléma ndekakuaáva ku Goliátcha. Pór ehémplo peteĩ kuñakarai hérava Isabel a ombohovaivaʼekue upeichagua provléma. Haʼe mokõi imemby ha iména oheja chupe peteĩ kuñataĩre; hiʼarive nombohasái chupe pláta omantene hag̃ua ifamiliakuérape. Isabel anga opyta odeve ijajúra máta peve. Haʼe imanduʼa: “Apyta vaieterei che ména chemoakãratĩ ha chereja haguére, péro upéicha avei upe guive Ñandejára chemombarete ipytu marangatu rupive”.

Isabel ojerovia Ñandejárare ha upévare koʼẽ koʼẽre ojerure chupe ipytu marangatu. Haʼe ohechakuaa upéicha añoite ikatutaha oñeñandu porã jey ombohovái hag̃ua opa mbaʼe vai ha omongakuaa porã hag̃ua imembykuérape. Upévare ojapo Jesús heʼivaʼekue: ‘Pejerure jey jey ha oñemeʼẽta peẽme; peheka ha pejuhuvaʼerã; pembota ha ojeavrivaʼerã peẽme’ (Mateo 7:7, ÑÑB).

Jahechamína avei ohasavaʼekue Roberto. Haʼe trén kolícha opitavaʼekue ha avei ojedroga. Dos áñore oñehaʼã oheja, ha opoítarõ g̃uarã chugui opita jeýma. Heʼi voi: “Ahejátarõ g̃uarã che remoimba jeýma apitaségui. Aikotevẽterei, haʼete voi ku amanótava mbaʼe ndapitáirõ”.

Péro haʼe ohejaseterei, ha heʼi: “Che ningo aservi porãse Ñandejárape ha upearã akambiamantevaʼerã. Añehaʼãmbaite apensa meme la Biblia heʼívare. Ára koʼẽre ajerure asy Ñandejárape tachepytyvõmi aheja hag̃ua che vísio. Ha jepevérõ sapyʼánte haʼa jey, Jehová chepytyvõ ipytu marangatu rupive chembarete jey hag̃ua. Añetehápe ndaikatuivaʼerãmoʼã che año rei aheja upe vísio” (Filipenses 4:6-8).

‘Taguatóicha ovevéne’

Oĩ hetaiterei hénte koʼág̃a rupi oñandúva Ñandejára oipytyvõha chupekuéra ipytu marangatu rupive, oñandu haguéicha Isabel ha Roberto. Pór ehémplo umi testigo de Jehová oñandu mbaʼéichapa Haʼe oipytyvõ chupekuéra. Ha ndépa mbaʼe repensa, ikatúnepa Ñandejára nepytyvõ avei ipytu marangatu rupive? Upéva ningo natekotevẽi voi ni reporandu! Haʼe omeʼẽse voi pe puʼaka guasuete umi ojerurévape chupe. Péro upearã oipota reikuaave chupe ha rejapo hembipota (Isaías 55:6; Hebreos 11:6).

Ipytu marangatu rupive ikatúta reservi Ñandejárape haʼe oipotaháicha ha regueropuʼakáta oimehaichagua jehasa asy. Nemanduʼavaʼerã avei la Biblia heʼívare: ‘Ñandejára omokyreʼỹ ikaneʼõvape, ikangývape omombarete jey. Umi ojeroviáva hese ikyreʼỹne ha taguatóicha ovevéne. Ijukuʼaʼỹre odiparáne ha oguatáne ikaneʼõʼỹre’ (Isaías 40:28-31).

[Nóta]

[Komentário oĩva páhina 8-pe]

‘Ára koʼẽre ajerure asy Ñandejárape chepytyvõmínte hag̃ua. Ha ipytu marangatu rupive chembarete jey. Añetehápe ndaikatuivaʼerãmoʼã che año rei aheja upe vísio’

 [Taʼanga ha rrekuádro oĩva páhina 7-pe]

ÑANDEJÁRA OIPORU IPYTU MARANGATU...

...ojapo hag̃ua yvága ha yvy. “Ore Jára, hetaite mbaʼe porã rejapo, ndekatupyrýgui umíva rejapo, ko yvy henyhẽ ne rembiapokuégui. Nde pytúpe umíva rejapo.” (Salmo 104:24, 30; Génesis 1:2; Job 33:4.)

...ohaiuka hag̃ua la Biblia. Apóstol Pablo heʼivaʼekue: ‘Opaichagua Ñeʼẽ ojehaiuka Ñandejára espíritu rupi ha iporã’ (2 Timoteo 3:16, ÑÑB). “Espíritu” griégo ñeʼẽme heʼise “Ñandejára pytu”. Upéicharõ haʼete ku Jehová oipejuvaʼekue umi mbaʼe oĩva ‘Iñeʼẽme’ (1 Tesalonicenses 2:13).

...hembiguaikuéra heʼi hag̃ua oikótava tenonderã. Apóstol Pedro heʼivaʼekue: ‘Maranduharakuéra ningo noñeʼẽivaʼekue ijehegui reínte. Nahániri, Ñandejára rérape guei oñeʼẽ hikuái, pytu marangatu ohechaukaháicha chupekuéra’ (2 Pedro 1:20, 21; Joel 2:28).

...ikatu hag̃euáicha Jesús ha hembiguaikuéra omyerakuã pe marandu porã ha ojapo milágro. Jesús heʼivaʼekue: “Jehová espíritu oĩ chendive, haʼe cheporavo amombeʼu hag̃ua marandu porã imboriahúvape, amomarandu hag̃ua isãsotaha umi oikóva iñapytĩmby, ohechaʼỹva okuerataha, ha umi ojepyʼapýva ipyʼaguapytaha” (Lucas 4:18, NM; Mateo 12:28).

 [Taʼanga ha rrekuádro oĩva páhina 9-pe]

MBAʼÉICHAPA ÑANEPYTYVÕ ÑANDEJÁRA PYTU MARANGATU

Ñanepytyvõ ñamboyke hag̃ua umi mbaʼe vai ha opaichagua jepyʼaraʼã. Apóstol Pablo heʼivaʼekue: ‘Peẽ pejeroviakuaa Ñandejára rehe, haʼe ndohejaichéne ojehu peẽme mbaʼeve ikatuʼỹvaʼerã peropuʼaka. Upéva rangue, pejepyʼaraʼã vove Ñandejára penepytyvõ ha penemombaretéta peropuʼaka hag̃ua.’ (1 Corintios 10:13, BNP.)

Ñanepytyvõ ñamoheñói hag̃ua ñande rekovépe umi mbaʼe porã. ‘Espíritu katu omeʼẽ: mborayhu, vyʼa, pyʼaguapy, ñehaʼarõkuaa, mbaʼeporã, pyʼaporã, jerovia, pyʼarory ha jejokokuaa.’ (Gálatas 5:22, 23.)

Ñanemombarete jahasa asy vove. ‘Opa mbaʼe ikatu ajapo Ñandejára chemombarete rupi.’ (Filipenses 4:13.)