Ikatúnepa ñanepytyvõ umi omanovaʼekue?

ÁFRICA occidentálpe peteĩ kuñakarai oreko peteĩ imembykuimbaʼe hérava Tamba. * Ha heʼi jey jey imembýpe la orrendi porãséramo eskuélape ojerure hag̃ua umi ihénte omanovaʼekuépe toipytyvõmi chupe. Táva Palérmope (Sicilia) katu, heta turísta oho umi sementério oñemoĩhápe hetaiterei omanóva retekue ojehecha hag̃ua. Heta oĩ heʼíva koʼã omanovaʼekue oñangarekoha hesekuéra. Nueva Yórkpe katu oĩ peteĩ táva hérava Lily Dale ha upépe oiko hetaiterei espiritísta. Káda áño hetaiterei tapicha oho upépe ikatu hag̃uáicha umi espiritísta oipytyvõ chupekuéra oñeʼẽ hag̃ua iñamígo térã ihénte omanovaʼekue ndive.

Heta ñande rapicha oparupigua ningo oguerovia umi ihénte omanovaʼekue ikatuha oipytyvõ chupekuéra. Oiméne nde reikuaa upéva térã nde voi reguerovia avei. Jahechagaʼu ningo umi jahayhúva omanovaʼekuépe ha upévare umi espiritísta ñanepytyvõse ñañemongeta hag̃ua hendivekuéra. Pe rrevísta Time-pe peteĩ espiritísta heʼi: “Umi omanovaʼekue espíritu ningo katuete ñanepytyvõta jajeruréramo chupekuéra”. Péro añete piko upéva? Ñandejára Ñeʼẽ ombohovái porã ñandéve ko porandu ha katuete jahecharamóta la heʼíva.

Mbaʼéichapa oĩ umi omanovaʼekue?

Ñandejára Ñeʼẽ ningo omyesakã porãiterei ñandéve mbaʼéichapa oĩ umi omanovaʼekue. Eclesiastés 9:5 heʼi: ‘Umi oikovéva oikuaa omanovaʼerãha, omanóva katu ndoikuaavéima mbaʼeve’. Ha pe versíkulo 6 katu omombeʼu noñanduveimaha mbaʼevete umi omanovaʼekue. Upépe heʼi: “Opáma opa ohayhúva, ijaʼeʼỹha ha opa mbaʼe oñandúva, ha arakaʼevéma ndoguerekomoʼãvéi mbaʼeve ojapóva ko arapýpe”. Pe versíkulo 10-pe katu heʼi: ‘Pe omanovaʼekue oĩháme ningo ndaipóri tembiaporã, ndaipóri jepyʼamongeta, ndaipóri mbaʼekuaa ha arandu’. Ha Ñandejára Ñeʼẽ omombeʼu Jesús omanórõ guare oĩ hague avei umi omanovaʼekue oĩháme (Hechos 2:31).

Jesús oikuaa porã vaʼekue umi omanóva ndaikatuveimaha ojapo mbaʼeve, heʼiháicha Isaías 26:​14-pe. Upéicha rupi Jesús oikuaa omano vove ndaikatumoʼãveimaha oipytyvõ la héntepe. Upévare imano ombojojavaʼekue pytũmby rehe, upe aja entéro ningo ndaikatumoʼãi ombaʼapo térã ojapo ambue mbaʼe (Juan 9:4).

Jesús ontendeka jey vaʼekue upéva iñamígo Lázaro omanórõ guare, upérõ haʼe heʼi Lázaro okenteha (Juan 11:​11-13). Ha jaikuaa ningo peteĩ tapicha okemanóva ndaikatuiha ojapo mbaʼevete pórke noñandúi mbaʼeve.

Peteĩ ñande rapicha omanóramo piko hiʼálma osegi oikove?

Heta ñande rapichápe ningo oñemboʼe ñamano vove ñane álma osẽha ñandehegui ha osegiha oikove. Péro Ñandejára Ñeʼẽ nomboʼéi upéva. Pe lívro de Génesis heʼi Ñandejára ojapórõ guare Adánpe oiko hague chugui ‘álma oikovéva’ (Génesis 2:7). Upéicharõ opavave yvypóra haʼe peteĩ álma ha umi mymba haʼénte avei álma (Génesis 1:​20-25). Upévare peteĩ tapicha térã mymba omanóvo jaʼekuaa omanoha pe álma. Ha Ezequiel 18:​4-pe la Biblia heʼi avei upéicha.

Reikuaávo koʼã mbaʼe ikatu reñeporandu: “Mbaʼérepa upéicharõ heta tapicha heʼi oñemongeta hague umi omanovaʼekue ndive? Añete piko ohendu ha ohecha chupekuéra?”. Upéva ningo opárupi ñahendu ha upéicha  rupi heta ñande rapicha oho umi espiritísta rendápe oñeʼẽ hag̃ua umi iñamígo térã ihénte omanovaʼekuéndi.

Péro añete piko oiko umi mbaʼe? Jaʼéramo añeteha ningo ñañemoĩtañaína Ñandejára Ñeʼẽ heʼívare, ha Jesús heʼi porã vaʼekue ‘Ñandejára Ñeʼẽ haʼeha pe añetegua’ (Juan 17:17). Upéicharõ umi tapicha heʼi reínte oñeʼẽ hague umi omanovaʼekuéndi. Ha Ñandejára Ñeʼẽ omombeʼu voi peteĩ mbaʼe oikovaʼekue ha upéva ñanepytyvõta ñantende porã hag̃ua mbaʼéichapa jahechavaʼerã umi mbaʼe ojeʼéva omanovaʼekuére. Omombeʼu peteĩ kuimbaʼe oñeʼẽse hague peteĩ omanovaʼekuéndi. Jahechamína mbaʼépa oikorakaʼe.

Peteĩ rréi oñeʼẽse omanovaʼekuéndi

Yma nórte gotyo Israélpe oñorairõpotaite jave umi Filisteaygua ha Israel ehérsito, Saúl ohechávo umi Filisteayguápe “oñemondýi ha okyhyjeretei” chuguikuéra. Upe tiémpope Saúl ndoservivéima Jehovápe ipyʼaite guive ha upévare Jehová nohenduvéima iñemboʼe. Saúl ndaikatuvéima avei oho proféta Samuel rendápe oipytyvõ hag̃ua chupe pórke haʼe areʼíma omano hague. Máva rendápepa ikatu oho upéicharõ? (1 Samuel 28:​3, 5, 6.)

Saúl oho táva En-dórpe ha ojerure asy peteĩ espiritístape oipytyvõmi hag̃ua chupe ikatu hag̃uáicha oñeʼẽ proféta Samuel ndive. Pe espiritísta ohenói upe omanovaʼekuépe ha upérõ ndajeko ojeaparese “Samuel”. Ha upe espíritu heʼi Saúlpe umi Filisteaygua oganataha, Saúl ha itaʼyrakuéra katu omanotaha ñorairõháme (1 Samuel 28:​7-19). Péro añetehápe piko Saúl oñeʼẽ proféta Samuel álma ndive?

Ñapensamíntena, la Biblia ningo heʼi peteĩ tapicha omano vove ‘yvýpe jeýnte ohoha opa ha upe árape opyta reiha avei opa umi mbaʼe ojaposéva’ (Salmo 146:4). Avei Saúl ha Samuel oikuaa porãiterei vaʼekue Jehovápe ndogustaiha pe espiritísmo. Ha ymave Saúl voi oproivivaʼekue ojeho umi espiritísta rendápe (Levítico 19:31).

Ha Samuel espíritu osegíramo oikove piko, nde ere naiñeʼẽrendumoʼãiha Ñandejárape ha oñemongetataha Saúl ndive peteĩ espiritísta rupive? Péro Jehová voi nohenduséiramo Saúl ñemboʼe piko pe espiritísta oovligáta Chupe oñeʼẽ hag̃ua hendive Samuel rupive? Nahániri, ni mbaʼevéicharõ. Péicha jahecha pe Samuel ojeaparesevaʼekue Saúlpe ndahaʼeiha pe Ñandejára proféta omanovaʼekue. Pe Saúl ohechavaʼekue ningo peteĩ demónio ohaʼangáva Samuélpe.

Péro máva piko umi demónio? Umíva ningo hína ánhel opuʼãvaʼekue avei Ñandejárare Adán ha Eva tiémpope (Génesis 6:​1-4; Judas 6). Haʼekuéra ningo ikatu ohecha mbaʼeichaguápa ñande, mbaʼéichapa ñañeʼẽ ha mbaʼépa jajapo. Umi demónio ojapo voi oimeraẽ mbaʼe ani hag̃ua jajeroviapa la Ñandejára heʼívare. Ndareíri ningo Ñandejára Ñeʼẽ heʼi ñandéve ñañemomombyryvaʼerãha pe espiritísmogui. Heʼi voi Ñandejárape ‘ombojeguaruha’ pe espiritísmo (Deuteronomio 18:​10-12). Ha ñañeñangarekovaʼerã pórke koʼag̃aite peve umi demónio ojapo gueteri ikampáña ñandereity hag̃ua.

Rehechakuaámapa koʼág̃a mbaʼérepa heta oĩ heʼíva ohecha hague umi iñamígo térã ihénte  omanovaʼekuépe? Umi haʼekuéra ohecháva ningo demoniokuérante. Ikatu ñapensa mbaʼeve ndojapomoʼãiha ñanderehe ñañemongetáramo hendivekuéra, péro umi demónio ningo ñanembotavysentehína (Efesios 6:12). * Aníkena ñanderesarái mbaʼeichaitépa Jehová ñanderayhu ha oipotaha iporãvante ñandéve g̃uarã. Ha umi jahayhúva omanovaʼekue espíritu osegíramo oikove, haʼe ndoproivimoʼãi asy ñandehegui ñañemongeta hendivekuéra. Upéicharõ nombojeguarumoʼãi avei chupe pe espiritísmo (1 Pedro 5:7). Péro umi omanovaʼekue ndaikatúiramo ñanepytyvõ piko mávape ikatu jajerure ñanepytyvõ hag̃ua?

Pe ñanepytyvõtava enterovépe

Jahechaháicha umi omanovaʼekue ndaikatúi ojapo mbaʼeve oipytyvõ hag̃ua umi oikovévape. Ha ñañemongetaséramo jepe hendivekuéra, nañañemongetamoʼãi ha avei jajeapeligráta. Mbaʼérepa? Pórke jajapóramo upéicha nañaneñeʼẽrenduiñaína Jehovápe ha ñasẽta Satanás raperãme.

Péro la Biblia omombeʼu ñandéve oĩha peteĩ ikatúva ñanepytyvõ, upéva hína ñande Apohare Jehová. Haʼe ningo ipoderosoiterei ha ikatu voi ñemano poguýgui jepe ñandepeʼa (Salmo 33:​19, 20). Jehová ningo oĩ voi ñande ykére ñanepytyvõ hag̃ua. Haʼe omeʼẽ ñandéve peteĩ esperánsa añetetéva, ndahaʼéi umi espiritístaicha.

Tamba ohechakuaákuri tuicha ojoavyha umi espiritísta heʼíva ha umi añetegua Jehová ñanemboʼéva. Umi espiritísta ningo heʼi Támbape orrendi porãséramo eskuélape ojapovaʼerãha peteĩ sakrifísio umi ihénte omanovaʼekuépe. Upérõ haʼe oñepyrũma ostudia la Biblia testigos de Jehová ndive ha oikuaa porã mbaʼéichapa oĩ umi omanovaʼekue. Oikuaa avei Satanás ha idemoniokuéra ojevaleha upévare ombotavy hag̃ua la héntepe. Upévare isy heʼírõ guare chupe oho hag̃ua umi espiritísta rendápe, Tamba heʼi: “Che sy, che ndajapomoʼãi upéva. Ha ndasalváiramo ko áñope, astudiavétante ótro áñope g̃uarã”.

Mbaʼépa oiko upe rire? Amo ipahápe Tamba la inóta porãve vaʼekue ikompañerokuéra apytépe. Tamba sy oponderaiterei upévare ha ndojeroviaveiete voi umi espiritístare, ha ndeʼivéima avei ojejapo hag̃ua sakrifísio umi omanovaʼekuépe. Tamba katu ohechakuaa añeteha la Biblia omboʼéva ha oĩ porãha la heʼi ñandéve ani hag̃ua ñañeʼẽse umi ‘omanovaʼekuéndi umi oikovévape oipytyvõ hag̃ua rehehápe’ (Isaías 8:19). Ohechakuaa avei katuete ñasẽ porãveha jajapóramo Jehová rembipota (Salmo 1:​1-3).

Péro mbaʼépa oiko umi omanovaʼekuégui? Jareko piko esperánsa jahecha jeývo chupekuéra? Javyʼaiterei ningo jaikuaávo Jehová oipytyvõtaha avei chupekuéra. Pe lívro de Isaías heʼi rire umi omanovaʼekue ndaikatuiha ojapo mbaʼeve, heʼi avei: ‘Umi omanovaʼekue oikove jeýta, yvyguýpe okéva opáy ha osapukái rorýta’. Péicha jahecha umi omanovaʼekue oikove jeytaha ha pe versíkulo upe riregua omyesakãve upéva (Isaías 26:19).

Aje piko javyʼaitéta jahecha vove oikove jey hetaiterei ñande rapicha omanovaʼekue! La Biblia omombeʼu hiʼãitereimaha Jehovápe og̃uahẽ upe ára (Job 14:​14, 15). Ha ani ere ‘iporãitereíma niko upéva la oiko hag̃ua’. Jesucristo ogueroviavaʼekue oñemoingove jeytaha umi omanovaʼekuépe ha heʼi voi Jehovápe g̃uarã umi omanovaʼekue haʼeteha oikovéva (Lucas 20:​37, 38).

Ndépa rejeroviase avei Ñandejára promésare Jesús ojerovia haguéicha? * Upéicharõ romokyreʼỹ restudiave hag̃ua la Biblia. Reikuaavévo la Biblia omboʼéva rehechakuaavéta Jehová ikatuha oipytyvõ umi oikovévape ha omanovaʼekuépe avei. Rehecháta opa mbaʼe Ñandejára oprometéva ‘añeteha ha ikatuha jajerovia hese’ (Revelación [Apocalipsis] 21:​4, 5).

[Nóta]

[Komentário oĩva páhina 19-pe]

Jahechagaʼu ningo umi jahayhúva omanovaʼekuépe

[Nóta oĩva taʼanga ndive páhina 20]

Proféta Samuel piko la ou jey vaʼekue oñeʼẽ hag̃ua rréi Saúl ndive?