Ñañemoag̃uíkena Ñandejárare

Jehová katuete okumpli iñeʼẽ

JOSUÉ 23:14

KOʼÁG̃A rupi la hénte ijapueterei ha nokumplíri iñeʼẽ. Upéicha rupi hetápe hasýma ojerovia hag̃ua hapicháre. Ikatu ningo oime ñandéve voi ñanembotavýmaraʼe peteĩ ñande jeroviaha. Upéicharõ piko ndaikatumoʼãvéima jajerovia avavére? Ndahaʼéi ningo upéicha, oĩ peteĩ ikatuha jajerovia hese ñande pyʼaite guive. La Biblia heʼi voi: “Ejerovia Ñandejárare nde pyʼaite guive” (Proverbios 3:5). Mbaʼérepa ikatu jajerovia Ñandejára arakaʼeve nañanembotavymoʼãiha? Ñambohovái hag̃ua ko porandu hag̃ua ñahesaʼỹijomi Josué kapítulo 23 versíkulo14-pe heʼíva. Jaikuaa ningo Josué ojerovia hague Jehováre iñeʼã mbytete guive.

Moisés omano rire Josué opytavaʼekue omoakã pe tetã Israel. Ha 110 áño orekórõ guare, ohecháma heta milágro Jehová ojapovaʼekue umi Israelgua rehehápe. Pór ehémplo, upérõ ojapóma sesenta áño haʼe ohecha hague mbaʼéichapa Jehová oguenohẽ chupekuéra Egíptogui pe már Rojo rupive. Upéi Josué omanombotaitépema ombyaty umi Israelguápe, ‘opaite mburuvicha, hués ha ansianokuérape’ ojedespedi hag̃ua chuguikuéra (Josué 23:​2, ÑÑB). Ha umi mbaʼe heʼívare chupekuéra jahechakuaa Josué iñaranduha ohasáma rupi heta mbaʼe ha akóinte ojepyʼamongeta hague umi mbaʼe ogueroviávare.

Oñemoñeʼẽtarõ guare umi Israelguápe heʼi: “Che niko amanótama”. Péicha jahecha Josué heta ojepyʼamongeta hague umi mbaʼe ohasavaʼekuére ha omano mboyve oñemoñeʼẽse umi Israelguápe. Mbaʼépa heʼi chupekuéra?

‘Peikuaa porã Jehová omeʼẽ hague peẽme umi mbaʼe porã heʼivaʼekue omeʼẽtaha. Ndaipóri ni peteĩ mbaʼe ohejavaʼekue ojapoʼỹre’. Péicha jahecha Josué ojerovia hague Jehováre ipyʼaite guive. Ha mbaʼére piko haʼe ojeroviaite Hese? Pórke oikove aja entéro ohecha Jehová katuete okumpliha iñeʼẽ. * Josué oiméne oipotáraʼe umi Israelgua ojerovia avei Jehová okumplitaha katuete umi iñeʼẽ neʼĩrava gueteri okumpli.

Oñeʼẽvo Josué 23:14 rehe, peteĩ kuatiañeʼẽ heʼi: “Emoĩmína peteĩ lístape opa promésa oĩva la Bíbliape. Upéi eheka umi lívro de istória ha ehesaʼỹijo peteĩteĩ umi mbaʼe oikovaʼekue ha jahechami rejuhúpa Ñandejára hesarái hague umi mbaʼe oprometevaʼekuégui térã nokumpliríri hague”. Ha siertoitéko upéva, rejapóramo ko kuatiañeʼẽ heʼíva, eréta avei Josué heʼi haguéicha: Jehová katuete okumpli iñeʼẽ (1 Reyes 8:56; Isaías 55:​10, 11).

Ikatu voi ñahesaʼỹijo Ñandejára Ñeʼẽ. Upépe ningo jajuhupaitéta umi mbaʼe Ñandejára oprometéva ha mbaʼéichapa okumplivaʼekue yma. Jajuhúta avei umi promésa oñekumplivahína koʼág̃a rupi. Ha ndahaʼéi umíva añónte, Ñandejára Ñeʼẽme jajuhu avei umi promésa oñekumplítava amo gotyove. * Reikuaasépa mbaʼépa hína umíva? Restudiáramo la Biblia rehechakuaáta Ñandejára katuete okumpliha iñeʼẽ ha upéicha rejeroviáta avei hese nde pyʼaite guive.

[Nóta]