Oñeporandúva jepi

Haʼe piko Jesús arkánhel Miguel?

▪ Ikatu. Heta tetãme oñehenói peteĩ tapichápe heta téra rupi. Pór ehémplo la Biblia heʼi Jacóbpe ojeʼe hague Israel (Génesis 35:10). Apóstol Pedro katu cinco voi héra vaʼekue: Symeón, Simón, Pedro, Cefas ha Simón Pedro (Mateo 10:2; 16:16; Juan 1:42; Hechos 15:7, 14). Péro mbaʼéichapa ikatu jaikuaa porã Jesús heraha Miguel avei? Jahechamína mbaʼépa heʼi Ñandejára Ñeʼẽ.

La Bíbliape jatopa cinco hendápe pe téra Miguel oñeʼẽ jave peteĩ ánhel imbaretetereívare. Pór ehémplo Daniel kuatiañeʼẽme jatopa mbohapy hendápe. Daniel 10:13, 21 heʼi Miguel haʼeha Ñandejára ‘remimbou iñimportantevéva’ ha heʼi avei haʼeha Ñandejára “rembiguái guasu”. Ha omombeʼu oho hague oipytyvõ peteĩ ánhel ojejokuaivaʼekuépe ojapopa hag̃ua hembiapo. Avei Daniel 12:1 (ÑÑB) omombeʼu ára pahápe ‘opuʼãvaʼerãha Miguel, peteĩ tembiguái ruvicha yvagapegua, oñangarekóva Ñandejára retãyguakuérare’.

Upe rire Revelación (Apocalipsis) 12:7-pe oñeñeʼẽ jey Miguel rehe, upépe heʼi ‘Miguel ha Ñandejára anhelkuéra oñorairõ’ hague Satanás ha idemoniokuéra ndive, ha ipahápe Miguel omosẽ chupekuéra yvágagui.

Jahechakuaa upéicharõ Miguel haʼeha peteĩ ánhel oñorairõva Ñandejára puévlo rehehápe ha oñangarekóva hese, toñemoĩ jepe raʼe Satanás rehe, Jehová enemígo tuichavéva.

Judas versíkulo 9 heʼi avei Miguel haʼeha arkánhel. Upéva heʼise umi ánhel “ruvicha” térã “tendota”; pe ñeʼẽ arkánhel ojeporu la Bíbliape oñeʼẽ hag̃ua peteĩ ánhel rehe añónte. Peteĩ hendápente upe rire jatopa jey ko ñeʼẽ ha oĩ 1 Tesalonicenses 4:16-pe. Upépe apóstol Pablo oñeʼẽ Jesús rehe oñemoingove jey riréma, ha heʼi: ‘Jesús oguejýta yvágagui ha oñehendúta peteĩ ñeʼẽ hatã, upéva hína peteĩ arkánhel ñeʼẽ, ha ipuvaʼerã Ñandejára turu’. Jahechakuaa koʼápe oñehenoiha Jesucrístope arkánhel térã umi ánhel ruvicha.

Umi téra Jesús ha Miguel heʼise ojepytaso mbareteha Ñandejára ykére. Pór ehémplo Miguel heʼise “Máva Piko Ñandejáraicha? Ha Jesús katu heʼise “Jehová Hína Salvasión”. Filipenses 2:9 heʼi: ‘Ñandejára ohupi Jesucrístope yvateve opavavégui, ha omeʼẽ chupe herarã, peteĩ opa téragui tuichavéva’.

Avei ñanemanduʼavaʼerã Jesús onase mboyve ko yvy ape ári oikomavaʼekue yvágape. Pe ánhel heʼivaʼekue Maríape imembytaha Ñandejára pytu marangatu rupive, ha omboheravaʼerãha chupe Jesús (Lucas 1:31). Haʼe ojapórõ guare hembiapo ko yvy ape ári heʼivaʼekue oikóma hague yvágape (Juan 3:13; 8:23, 58).

Jaʼekuaa upéicharõ arkánhel Miguel haʼeha Jesús ou mboyve ko yvy ape ári. Ha Ñandejára omoingove jey rire chupe oho jey yvágape ha oiko jey chugui arkánhel Miguel, umi ánhel ruvicha, Ñandejárape “oñemombaʼeguasu hag̃ua” (Filipenses 2:11).