Mbaʼépa omboʼe Jesús Ñandejára Rréinogui?

‘Jesús oho umi siuda ha tavakuéra rupi omoherakuã umi mbaʼe porã ojapótava Ñandejára rréino.’ (LUCAS 8:1, NM)

PETEĨ jey Jesús heʼivaʼekue: ‘Umi mbaʼe jaʼéva osẽ ñandepyʼapýgui’ (Mateo 12:34, NM). Ha upeichaite ningo, oĩramo peteĩ mbaʼe ñandegustáva, upévarente voi ñañeʼẽ. Ha jaikuaaháicha Jesús opredikárõ guare oñeʼẽvaʼekue Ñandejára Rréinorente ha péicha ohechauka omombaʼeterei hague upéva.

Mbaʼépa hína Ñandejára Rréino? Upéva ningo peteĩ goviérno omoĩva Ñandejára ha oisãmbyhýva peteĩ rréi. Mateo, Marcos, Lucas ha Juan kuatiañeʼẽme oñeñeʼẽ ko goviérnore ciento diez vése rasa, upévare koʼýte jaʼekuaa Jesúspe g̃uarã ko goviérno iñimportanteveha opa mbaʼégui. Mbaʼéichapa ikatu jaikuaave ko Rréinogui ha umi mbaʼe ojapótava ñanderehehápe? Upearã tekotevẽ jajesareko porã umi mbaʼe heʼi ha ojapovaʼekuére Jesús.

Mávapa oisãmbyhýta Ñandejára Rréino? Ndahaʼéi ñande jaiporavótava, upéva oĩ Ñandejára pópe. Jesús heʼivaʼekue Ñandejára oiporavóma hague chupe oisãmbyhy hag̃ua.

Jesús oikuaa porãma vaʼekue la Biblia heʼiha pe Mesías oñehaʼarõva oisãmbyhytaha peteĩ rréino opa ára g̃uarã (2 Samuel 7:12-14; Daniel 7:13, 14; Mateo 26:63, 64). Ha heʼírõ guare ijehe haʼeha pe Mesías oñehaʼarõva, heʼi avei haʼeha pe Rréi Ñandejára oiporavovaʼekue (Juan 4:25, 26). Upévare heta vése oiporu pe ñeʼẽ “che rréino” (Juan 18:36, BNP).

Jesús heʼivaʼekue avei oĩtaha peteĩ aty oisãmbyhýtava hendive (Lucas 22:28-30). Ha saʼi oĩ rupi hikuái, heʼi haʼeha peteĩ ‘ovecha mbovymi’. Avei ombopyʼaguapy chupekuéra kóicha: ‘Pende Ru heʼíma omeʼẽtaha peẽme pe rréino’ (Lucas 12:32, NM). Pe último lívro oĩva la Bíbliape omombeʼu ñandéve oĩha 144.000 ojeporavovaʼekue ojapo hag̃ua ko tembiapo guasuete (Revelación [Apocalipsis] 5:9, 10; 14:1).

Moõ guivépa oisãmbyhýta? Jesús heʼivaʼekue mburuvicha Poncio Pilátope: “Che rréino ndahaʼéi ko yvy arigua” (Juan 18:36, BNP). Upéva heʼise noikotevẽiha umi organisasión oĩva yvyporakuéra poguýpe oisãmbyhy porã hag̃ua. Haʼe heta vése oiporu pe ñeʼẽ ‘rréino yvagapegua’, upéicha ohechauka ko rréino oĩtaha yvágape (Mateo 4:17; 5:3, 10, 19, 20, NM). *

Jesús oikuaa porã omohuʼãvo hembiapo ko yvy ape ári oho jeytaha yvágape. Ha upépe  ombosakoʼitamaha umi ojeporavovaʼekue ‘rendag̃ua’, péicha omoirũta chupe hikuái (Juan 14:2, 3).

Mbaʼépa ojapóta? Jesús omboʼevaʼekue hemimboʼekuérape oñemboʼe hag̃ua Ñandejárape kóicha: ‘Tou ne rréino, tojejapo ne rembipota yvy ape ári yvagapeguáicha’ (Mateo 6:9, 10, NM). Ñandejára okumplíma hembipota yvágape, ha koʼẽrõitéma Irréino rupive okumplíta avei ko yvy ape ári. Péro upearã ko rréino tekotevẽ omyatyrõ hetaiterei mbaʼe.

Mbaʼépa okambiáta ko yvy ape ári? Omboʼe haguéicha Jesús, ko Rréino ohundíta opa mbaʼe vai ha opa mbaʼe vai apohápe (Mateo 25:31-34, 46). Ha péicha hasypeve japytuʼumíta chuguikuéra ha umi hekojojaʼỹvagui. Heʼi haguéicha Jesús, ko yvy ape ári opytáta umi ‘ipyʼaguapýva’, ‘hekojojáva’, ‘oporombyasýva’, ‘ipyʼapy potĩva’ ha ‘oñehaʼãva oiko porã opavavéndi’ (Mateo 5:5-9, NM).

Jesús heʼivaʼekue avei Ñandejára Rréino ombopyahupaitetaha ko yvy, Upéva heʼise opavave jaikotaha peteĩ lugár neporãvape, ipotĩ asýva ha avave nomongyʼamoʼãihápe. Upéicha heʼivaʼekue Jesús peteĩ karai omanombotaitevaʼekuépe. Ko karai heʼi chupe ‘imanduʼami hag̃ua hese ojupi vove rréiramo’, ha haʼe ombohovái chupe: ‘Añetehápe haʼe ndéve koʼág̃a: Reiméta chendive pe hardín neporãvape’ (Lucas 23:42, 43, NM). Ajépa ñanembopyʼaroryete jaikuaávo ko yvýgui oiko jeytaha peteĩ hardín neporãva, oguereko haguéicha ñande ru ypykue Edénpe!

Mbaʼépa ojapovéta ñanderehehápe? Jesús ndahaʼéi ku heʼínteva mbaʼe mbaʼépa ojapóta Ñandejára Rréino, síno ohechauka voi. Pór ehémplo ojapo heta milágro, ohechauka hag̃ua mbaʼépa ojapóta amogotyove  opavavére oisãmbyhývo Ñandejára Rréino. Heʼi voi ningo Mateo, Jesús ‘okorre hague Galiléare omboʼe umi sinagogaha rupi ha omombeʼu umi mbaʼe porã Ñandejára rréino ojapótava. Avei omonguera hague opaichagua mbaʼasy orekóva umi hénte’ (Mateo 4:23, NM).

Jesús omonguera opaichagua hasývape. Pór ehémplo, omonguera peteĩ karai ndohecháivape onase guive (Juan 9:1-7, 32, 33). Ótra vuéltape katu opoko vevyimi asýnte peteĩ karaíre ha omongueraite chupe peteĩ mbaʼasy ivaietereívagui hérava lépra (Marcos 1:40-42). Avei omonguera peteĩ karai ‘ohenduʼỹva ha ndaikatúivape oñeʼẽ porã’; ha péicha ohechauka umi ‘nohendúiva ha noñeʼẽiva jepe ikatuha omonguera’ (Marcos 7:31-37, NM).

Umi omanóvape jepe omopuʼã jey pe Rréi Ñandejára oiporavovaʼekue. La Biblia omombeʼu omoingove jey hague mbohapy tapichápe: peteĩ viúda membykariaʼy peteĩmíme, peteĩ mitãkuñaʼíme orekóva doce áño ha avei iñangirũme hérava Lázaro (Lucas 7:11-15; 8:41-55; Juan 11:38-44).

Jesús heʼivaʼekue apóstol Juánpe ohai hag̃ua mbaʼépa ohaʼarõ umi oikótavape Ñandejára Rréino guýpe: ‘Ñandejára oĩta yvyporakuéra ndive ha haʼekuéra imbaʼéta. Ha Ñandejára omokãta hesaykuéra, ndaiporimoʼãvéima ñemano, tasẽ, jaheʼo ni temimbyasy; opa umi mbaʼe yma oĩvaʼekue opytáta tesaráipe’ (Revelación 1:1; 21:3, 4). Ajépa ñanembovyʼaite ñapensávo ikatuha jaiko peteĩ múndope ndaiporihápe ohasa asýva, hasykatúva ni omanóva! Ha upérõ hasypeve oñekumplíta Jesús ñanemboʼéva jajerure hag̃ua: Tojejapo Ñandejára rembipota ko yvy ape ári, yvagapeguáicha.

Arakaʼépa og̃uahẽta? Jesús omboʼevaʼekue oñepyrũ vove oisãmbyhy, oñepyrũtaha avei pe “ára paha”. Mbaʼéichapa japilláta arakaʼépa oiko upéva? Haʼe omombeʼuvaʼekue oikovaʼerãha hetaiterei mbaʼe vai ko múndo tuichakuére. Pór ehémplo ñorairõ guasu, ñembyahýi, yvyryrýi ha oĩtaha ágotyo ha pégotyo mbaʼasy, oporomonda ha oporojukáva (Mateo 24:3, 7-12; Lucas 21:10, 11). Koʼãva ha ambue mbaʼe heʼivaʼekue Jesús oikotaha, oñekumpli 1914 guive oñepyrũrõ guare primera Guerra Mundial. Mbaʼépa ohechauka upéva? Jesús oisãmbyhymaha yvágape ha saʼietereíma ofaltaha ou hag̃ua Ñandejára Rréino ha ojejapo hag̃ua hembipota ko yvy ape ári. *

Péro ikatu hag̃uáicha jahecha umi mbaʼe porã ojapótava Ñandejára Rréino, tekotevẽterei káda uno jajesareko porã Jesús omboʼevaʼekuére. Jahechamína mbaʼe mbaʼépa omboʼevaʼekue.

[Nóta]