‘Haʼe ohecha mbaʼépa oĩ ñande pyʼapýpe’
Ñañemoag̃uíkena Ñandejárare
‘Haʼe ohecha mbaʼépa oĩ ñande pyʼapýpe’
KATUETE rehendúmane ojeʼe: “Kóvango ndaupeichaivaʼekue, nimbo upeicharãmbo raʼe”, térã “Kóva ndahaʼeiete che aimoʼã haguéicha”. Ha upeichaite ningo, ndaikatúi jaikuaa peteĩ tapichápe ñamañárente hese. La Biblia ohechauka 1 Samuel 16:1-12-pe Jehová ndahaʼeiha ñandéicha, haʼe ohechaha oĩva ñande pyʼapýpe. Yvyporakuéra katu ohecha oĩva hesa renondépente.
Ñapensamína ko kásore. Ñandejára oiporavo mboyvemi pe kuimbaʼe oisãmbyhýtavape Israel, heʼi proféta Samuélpe: ‘Tereho Jesé Belengua rendápe. Che aiporavóma Israel ruvicha guasurã itaʼyrakuéra apytégui’ (versíkulo 1). Jahechakuaa Jehová ndeʼíri hague Samuélpe mbaʼéichapa héra upe haʼe oiporavovaʼekue, heʼínte chupe Jesé raʼyha. Oiménengo Samuel heʼi ipyʼapýpe ohokuévo Belénpe: “Ha mbaʼéicha piko che aikuaáta mávapepa Jehová oiporavo?”.
Og̃uahẽvo Belénpe, Samuel ojapo peteĩ sakrifísio Jehovápe ha heʼi Jesé ha itaʼyrakuérape omoirũ hag̃ua chupe. Samuel ohecha mbaʼéichapa Eliab, Jesé raʼy ypykue, ipínta porã oiko hag̃ua chugui rréi. Upémarõ heʼi: “Katuete kóva hína upe kuimbaʼe [Jehová] oiporavóva mburuvicha guasurã” (versíkulo 6).
Péro ñanemanduʼavaʼerã Jehová ndohechaiha ñande jahechávante, upévare heʼi Samuélpe: “Ani remaʼẽ hova rehe térã ijyvatekue rehe. Che ndaipotái chupe” (versíkulo 7). Jehová ndohecharamói Eliab pínta, haʼe ningo oheka peteĩ mbaʼe iñimportantevéva upévagui.
Mbaʼérepa jaʼekuaa upéva? Haʼe voi heʼi Samuélpe: ‘Che namaʼẽi peẽicha. Peẽ pemaʼẽ upe kuimbaʼe rováre, che katu ahecha mbaʼépa oĩ ipyʼapýpe’ (versíkulo 7). Ñandejára ningo ohecha ñane korasõme oĩva, mbaʼépa ñapensa ha ñañandu ha mbaʼépa ñanemomýi jajapo hag̃ua opa mbaʼe. Upévare la Biblia heʼi haʼe ‘oikuaaha yvypóra pyʼapy’ (Proverbios 17:3). Ha ndahaʼéi Eliábpe añónte Jehová omboykéva, síno umi 6 Jesé raʼýpe avei.
Péro ofalta gueteri Jesé raʼy pahague hérava David. Haʼe ningo ‘oñangarekohína kuri umi ovecháre’ (versíkulo 11). Upémarõ oñehenoika chupe ha og̃uahẽvo, Jehová heʼi: ‘Kóva haʼe! Epuʼã emoĩ hese pe aséite. Che aiporavóma chupe!’ (versíkulo 12). David ningo peteĩ ‘mitãrusu hesa porã ha ijukýva’, upéicharõ jepe Ñandejára ndoiporavói chupe upévare, síno oikuaágui ipyʼapy (1 Samuel 13:14).
Ko múndope oñemombaʼeterei iporãvapente. Haʼetépe Jehová nomañái umi mbaʼe! Haʼe ningo nomañái ñandépa ñandeyvate térã ñandekarape; ñaneporã térã ñandevai; omaña guei ñande pyʼapýpe oĩva. Ajépa ñanemokyreʼỹete upéva jajapo hag̃ua opa mbaʼe Ñandejára oguerohorýva.