Konsého ogapýpe g̃uarã

Mbaʼéichapa ikatu pejogueraha porãve pende suegrokuérandi?

Arami * heʼi: “Che suégra ningo ijayetereíma chendive. Che túva ha che sy katu otrata vai che ménape. Ndahecháiva gueteri péicha che túva umíva oporotrata vaírõ. Ndaoreládoi voi, rohóramo che tuvakuéra rógape Roberto ndovyʼái, ha rohóramo che suegrokuéra rógape katu che la ndavyʼáiva”.

Roberto heʼi: “Che sy ningo heʼímiva voi ndaiporiha omereséva imembykuérape, ha upévare ymaite guive Arami otakýva hese. Ha roho jave che suegrokuéra rógape, otopamantevaʼerã hikuái mbaʼépepa ajavy. Upe rire che rembireko ha che roñepyrũma roiko vai, mokõivénte rotaky ore suegrokuérare ha rodefende ore tuvakuérape”.

YMAITE guive umi ojapóva chíste ha mbaʼe omombeʼu umi káso suegrokuéra ojapóva pukarã. Péro ñande voi jahasárõ umi mbaʼére ndaijagrasiadoiete. Peteĩ kuña Indiaygua hérava Anai heʼi: “Che suégra hetaiterei áñore oñentremete che ména ha cherehe. Ha apensánteko ivaietereitaha akapu mbaʼéramo hese, upémarõ aha akapu che ménare; hese anga opẽmbaite. Haʼe katu ndoikuaái mbaʼépa ojapóta, ndopytavaiséi chendive ni isýndi, ha ohasa vaieterei upévare”.

Katuete oiméne entéro ñañeporandu: “Mbaʼéretepa sy ha túva oñentremetemantevaʼerã ifamília omendávare?”. Arami, ñañeʼẽvaʼekuére oñepyrũvo ko artíkulo, heʼi: “Oiménengo che suégra heʼi peteĩ imitãvéva chugui ndaikatumoʼãiha oñatende porã imembýre haʼe oñatendeháicha”. Anai ména, hérava Dilip heʼi: “Ikatu oime umi tuvakuéra oñandu ifamília omboykemaha chupekuéra, heta ojesakrifika rire hesehápe. Térã ikatu avei oimoʼã, oiméramo kuimbaʼe, nomoakãporãmoʼãiha hogapy térã, kuñáramo, noñemoĩmoʼãiha iména poguýpe, ha upévare oipytyvõse chupe”.

Péro sapyʼánte pe ména térã tembireko voi oheja ituvakuéra oñentremete hogapýpe. Pór ehémplo Miguel ha Lina, oikóva Austráliape, ohasavaʼekue upévare. Miguel omombeʼu: “Che rembireko Lina ojepokuaavaʼekue omombeʼu ifamíliape opa mbaʼe ojehúva chupe. Ha romenda rire jepe oho oporandu itúvape umi mbaʼe ore rodesidivaʼerã. Ha jepeve che  suégro oikuaave heta mbaʼe, añeñandu vai che rembireko noñembojái haguére cherendápe rodesidi hag̃ua”.

Umi omendáva iprovlémarõ isuegrokuérandi katuete ohasa asy ha ijetuʼu chupekuéra. Peẽpa pehasapeína upévare koʼág̃a? Mbaʼéichapa pejogueraha pende suegrokuérandi? Jahechamína mokõi mbaʼe ikatúva oiko ha mbaʼépa ikatu pejapo pesolusiona hag̃ua.

PRIMER KÁSO: Pe ména térã tembireko oimoʼã pe ótro oĩsetereiha ituvakuérandi. Juan, peteĩ karai Españaygua heʼi: “Che rembireko ovase ifamília róga ypýpe, osino ñandeko oimoʼãta hikuái romboykeha chupekuéra. Péro antende avei chupe, pórke che raʼy onasérõ guare che túva umíva haimete káda día oho che rógape, ha upéva katuete odesahusiáneraʼe chupe. Hetami roiko vai upevakuére”.

Umi mbaʼe pehechavaʼerã: La Biblia heʼi porã: ‘Kuimbaʼe ohejavaʼerã itúva ha isýpe, ojoaju hembirekóndi ha upéicha mokõivégui oiko peteĩnte’ (Génesis 2:24). Mbaʼépa heʼise “mokõivégui oiko peteĩnte”? Ndeʼiséi oikotaha oñondive ha opáma; heʼise guei oñepyrũha hikuái peteĩ família pyahu ha upéva omotenondevaʼerãha (1 Corintios 11:3). Upéicharamo jepe omombaʼevaʼerã hikuái ituvakuérape ha oñangareko hesekuéra (Efesios 6:2). Mbaʼépa oikóta pe ména térã tembireko okumpli porãségui ituvakuérandi omboykérõ imborayhu járape?

Mbaʼépa pejapokuaa: Eñehaʼãna nembaʼerechakuaa. Iporãta káda uno peñeporandumi: “Añetehápe piko che ména térã che rembireko oĩseterei ifamíliandi? Térãpa chénte ndajepokuaái atrata péicha che tuvakuérape? Noiméipa upévarente ivai chéve che ména térã che rembireko otrata lája ituvakuérape? Noiméipa cheselóso térã cheselósa mbaʼe?” (Proverbios 14:30; 1 Corintios 13:4; Gálatas 5:26).

Ndovaléi ñañembotavy ñandejupe, ha ijetuʼúramo jepe oñembohovái koʼã porandu tekotevẽterei rejapo upéva. Nemanduʼavaʼerã manterei peikovaíramo pende suegrokuéra káusare ndahaʼeveimaha haʼekuérante la provléma.

Umi omendáva iprovléma jepi peteĩva noñemoĩséi rupi pe ótro lugárpe (Filipenses 2:4; 4:5). Upéva oiko kuri Adrián rehe, peteĩ karai oikóva Méxicope. Haʼe omombeʼu: “Che rembireko ohasa asy vaʼekue imitãme. Upévare ndahaʼéi la ajogueraha porãmbáva che suegrokuérandi ha heta áñore añemomombyry chuguikuéra. Che rembireko katu ohechagaʼu ifamíliape, koʼýte isýpe ha upéva heta oremoprovléma”.

Tiémpo rire Adrián opilla imbaʼerechakuaavevaʼerãha hembirekóndi. Haʼe heʼive: “Chéverõ g̃uarã ojapo vai gueteri che rembirekóre oĩetereíramo ituvakuérandi. Péro ahechakuaa noĩriramo hendivekuéra ojapo vainteha avei hese. Upémarõ koʼág̃a añemoag̃ui jeýma che suegrokuérare ha añehaʼãmbaite ajogueraha porã hendivekuéra”. *

PEJAPÓNA KOʼÃ MBAʼE: Káda uno pehai mbaʼépa napendegustái peime vove pende suegrokuérandi. Péro pejapokuévo upéva penemanduʼavaʼerã pehaitaha peẽ pepensáva hesekuéra, upévare peñatende porã ani ág̃a pembopochy pe ótrope. Upe rire pembohasa ojupe umi mbaʼe pehaivaʼekue ha pepensa oñondive mbaʼéichapa ikatu peñopytyvõ.

SEGUNDO KÁSO: Umi suegrokuéra manterei omoinge ikuchára ojejerureʼỹme chupekuéra. Natalia, oikóva Kazajistánpe omombeʼu: “Amenda rire, siete áño pukukue roiko che suegrokuéra rógape. Che ména famíliape g̃uarã ndaipóri mbaʼeve ajapo porãva. Otaky hikuái akosina lájare, amopotĩ lájare ha mbaʼéichapa amongakuaa che membykuérape jepe. Ha rei voi amombeʼu che ména ha  isýpe mbaʼéichapa añeñandu, upépe koʼýte roikovaive”.

Umi mbaʼe pehechavaʼerã: Omendáva ningo noĩvéima ituvakuéra poguýpe. La Biblia heʼi voi ‘kuimbaʼépe omoakãha Cristo; ha kuñáme katu kuimbaʼe’, upéva heʼise ména omoakãha hembirekópe (1 Corintios 11:3). Upéicharamo jepe umi omendáva omombaʼevaʼerã ituvakuérape, ojeʼéma haguéicha ajeʼi. Proverbios 23:22 heʼi porã ñandéve: “Ehendu nde rúpe ndegueru ypy vaʼekuépe, ha ani rejahéi nde sýre ig̃uaig̃ui haguére”. Péro mbaʼépa rejapokuaa nde tuvakuéra térã nde suegrokuéra oipotáramo rejapo haʼekuéra heʼiháichante?

Mbaʼépa pejapokuaa: Reñemoĩramo nde suegrokuéra lugárpe, rentendevéta chupekuéra. Roberto, ñañeʼẽvaʼekuére oñepyrũvo ko artíkulo heʼi: “Sapyʼánte tuvakuéra oñeñandusénte iñimportanteha gueteri ifamíliape g̃uarã”. Oiméramo nde tuvakuéra térã nde suegrokuéra ndeʼíri peteĩ mbaʼe iñañágui rei rehenduntevaʼerã chupekuéra. Ha upéicha rekumpli Colosenses 3:13 heʼíva: “Pejogueropuʼaka ha peheja rei ojupe oiméramo máva ipochýva ambuére”. Péro ikatu avei suegrokuéra oñentremeteterei rupi, umi omendáva oiko vai kangue ha iprovléma heta. Mbaʼépa ikatu ojejapo umícha jave?

Heta omendáva ndohejái ituvakuéra oñentremeteterei hesekuéra, ha upéicha oiko porãve hikuái. Péro upearã ningo natekotevẽi pemboguapy chupekuéra ha peje vai guasu mbaʼépa ndapeipotái ojapo hikuái. * Haʼekuérante ohechakuaavaʼerã umi mbaʼe pejapóvare pemotendeha pende rogapy. Peteĩ ména Japongua hérava Masayuki heʼi: “Nde tuvakuéra heʼi vove mbaʼépa opensa peteĩ mbaʼére, ani ere rejapotamaha haʼekuéra heʼiháicha. Nemanduʼavaʼerã nde remoñepyrũhareína peteĩ família, upévare rejapo mboyve oimeraẽ mbaʼe iporãta reporandu raẽramo ne ména térã ne rembirekópe”.

PEJAPÓNA KOʼÃ MBAʼE: Peñemongeta porã oñondive ha peje ojupe mbaʼépa penemoprovléma peime jave pende suegrokuérandi. Upe rire pehai mbaʼépa pejapóta pono pende suegrokuéra oñentremeteterei penderehe, ha peñehaʼã tokumpli. Péro pejapokuévo upéva pehechauka avei pemombaʼeha chupekuéra.

Heta akãrasýgui ikatu ojehekýi umi omendáva oñemoĩramo isuegrokuéra lugárpe ha oñehaʼãramo opensa haʼekuéra opensaháicha. Péro avei ojapo porãta ndohejáiramo ombyai chupekuéra umi mbaʼe heʼíva isuegrokuéra. Arami heʼi: “Roñepyrũ vove roiko vai che ménandi roʼe ojupe mbaʼépa ropensa ore suegrokuérare. Péro upe rire rohechakuaa upéva ndojapoporãiha avavére, orembyaiha guei. Upémarõ ropensa mbaʼéichapa ikatu romyatyrõ upe provléma, roiko rangue ropoi ojupe irokuete. Ha upéicha rojapo rire, Roberto ha che haʼete rojoayhuvéva”.

[Nóta]

JAJEPYʼAMONGETA HAG̃UA

▪ Mbaʼépa aguerohoryve che suegrokuéragui?

▪ Mbaʼéichapa ikatu amombaʼe che tuvakuérape, amboykeʼỹre che mborayhu járape?