Konsého 2

Ani ñañembojoja ñande rapichakuérare

MBAʼÉPA HEʼI LA BIBLIA: ‘Peteĩteĩ toipyguara hembiapo teéva, ha ojapóramo peteĩ tembiapo porã tovyʼa hekópe, haʼeñoháme, ani hag̃ua haʼe oñembojoja hapicha rembiapokue rehe’ (Gálatas 6:4, ÑÑB).

PROVLÉMA: Jaiko jaikónte ha ñañembojoja ótrore. Oĩ vése ñamañaha umi imboriahuvévare, péro pyʼỹive ñañembojoja umi iplatavéva, imbaretevéva ha ikatupyryvévare ñandehegui. Tahaʼe haʼeháicha jaikóramo ñañembojoja ambuéndi, katuete ojapo vai ñanderehe. Amo ipahápe jaikótantema ñamaña mávapa ipláta térã ivaleve ha umívapentema ñamombaʼéta. Térã ikatu avei jaiko vai ha ndajachaʼéi hesekuéra orekógui hetave mbaʼe ñandehegui (Eclesiastés 4:4).

MBAʼÉPA IKATU JAJAPO: Ñañehaʼãramo ñapensa Jehová opensaháicha, ikatúta javyʼa pe jarekomívare ha jajehayhuve ñandejupe. * Jahechamína mbaʼépa heʼi 1 Samuel 16:7. Upépe Ñandejára heʼi: “Peẽ pemaʼẽ upe kuimbaʼe rováre, che katu amaʼẽ ipyʼapy rehe”. Upéva heʼise Ñandejára nañanembojojaiha avavére. Upéva rangue ohecha mbaʼépa oĩ ñande pyʼapýpe, mbaʼépa ñapensa, ñañandu ha jaipota (Hebreos 4:12, 13). Oikuaa porã avei ndaikatuiha jahupyty heta mbaʼe ha oipota jahechakuaa upéva. Jaikóramo ñañembojoja ñande rapicháre, ñaimoʼãta ñandevaleve térã ñaime porãveha chuguikuéra. Péro ikatu avei ñañeñandu vai ndaikatúigui jahupyty chupekuéra. Upévare iporãve ñañemomirĩ ha ñanemanduʼa oĩtaha katuete ñanderasáva (Proverbios 11:2).

Upéicharõ, mbaʼépa omombaʼe Ñandejára? Proféta Miqueas ohaivaʼekue: ‘Nde, yvypóra, Ñandejára heʼíma ndéve mbaʼépa pe iporãva ha mbaʼépa ohaʼãrõ ndehegui: Nderekojoja, eporoporiahuvereko, ha ejapo Ñandejára oipotáva rejejapoʼỹre’ (Miqueas 6:8). Péicha jajapóramo Ñandejára katuete oñangarekóta ñanderehe (1 Pedro 5:6, 7). Ndaiporichéne pévagui ñanembovyʼavéva.

[Nóta]

[Nóta oĩva taʼanga ndive páhina 5]

Jehová ohecha mbaʼépa oĩ ñande pyʼapýpe