Ikatúnepa jaiko vyʼápe?

“Pe imboriahúva irrikoite ovyʼáramo pe orekomívare. Ha pe iplátava imboriahu noñekontentáiramo mbaʼevére.” (Benjamin Franklin, polítiko ha sientífiko Estados Unidosgua)

HETAITEREI tapicha ohechakuaáma natekotevẽiha jareko heta mbaʼe javyʼa hag̃ua. Upéicharõ jepe, jahecha avei atyraite ndovyʼáiva ndohupytýigui opa mbaʼe oipotáva, ndorekói haguére heta mbaʼerepy, térã ohechágui ivesíno oiko porãveha chugui. Oiméne nde rehecha mbaʼéicha koʼã mbaʼe sapyʼánte ñandejopy:

• Umi propagánda manterei ohenduka ñandéve ñaikotevẽha péva ha amóva javyʼa hag̃ua.

• Mboʼehao térã travahohápe umi hénte ohaʼã mávapa ivaleve, ha ñandéma katu jaikose mbaʼe guasuvéramo.

• Ñande rapichakuéra ndohechakuaái jajapóva hesehapekuéra.

• Ñane angirũnguéra ojechaukaseterei umi mbaʼe orekóvare.

• Oĩ heta mbaʼe iñimportánteva jaikuaaséva ha avave nombohováiri ñandéve.

Jahechaháicha, heta mbaʼe ikatu ñandejopy, upéicharõ jepe, ikatúpa javyʼa umi mbaʼe jarekóvare? Apóstol Pablo omombeʼuvaʼekue mbaʼépa ñanepytyvõta javyʼa hag̃ua. Haʼe heʼi sapyʼánte oreko hague opa mbaʼe oikotevẽva, ha heta vése katu ndorekoiete mbaʼeve. Oĩ oguerohorýva chupe, péro péicha avei oĩ umi ndaijaʼéiva hese. Upéicharõ jepe haʼe heʼi: ‘Che voi ajepokuaáma añekontenta arekomívarente’ (Filipenses 4:11, 12, ÑÑB).

Koʼág̃a heta oĩ ndovyʼáiva, péro Ñandejára Ñeʼẽme jatopa 5 konsého ñanepytyvõtava javyʼa hag̃ua Pablo ojapo haguéicha. Jahechamína.