REIKUAÁPA mbaʼeichagua Rréinopa upéva? *... Upéva hína pe Rréino Jesús ñanemboʼevaʼekue jajerure hag̃ua ñañemboʼe jave. Jesús heʼi ñañemboʼe jave Ñandejárape jajerure hag̃ua chupe: “Tou ne rréino” (Mateo 6:9, 10, BNP). Ha dos mil áñoma Jesús remimboʼekuéra ojerure hikóni Ñandejárape ombou hag̃ua Irréino. Ndépa rejerure avei?...

Ñantende porã hag̃ua mbaʼépa heʼise rréino jaikuaa raẽ vaʼerã mbaʼépa hína peteĩ rréi. Pe rréi haʼe pe kuimbaʼe oisãmbyhýva peteĩ tetã térã lugár. Ñandejára Rréino ogovernáta ko yvy tuichakue. Ha upe vove hetaiterei mbaʼe porã jahupytýta ko yvy ape ári.

Ñandejára Rréino oisãmbyhýta yvága guive. Ha Isaías 9:6 oñeʼẽ ñandéve pe oisãmbyhývare, emañamína mbaʼépa heʼi upépe: ‘Peteĩ mitãkuimbaʼe onase ñandéve, ha ijatiʼy ári oĩta Mburuvicha Guasu puʼaka, ha oñehenóita chupe: Mburuvicha Pyʼaguapy reruha’.

Reikuaápa mbaʼépa heʼise Mburuvicha térã Prínsipe?... Upeichaite, upéva hína peteĩ rréi raʼy. Ha pe Rréi ipoderosovéva haʼe hína Ñandejára Jehová, ajépa?... La Bíbliape oñehenói voi chupe ‘pe Ijyvatevéva ko yvy ape ári’ (Salmo 83:18, NM). Avei la Biblia omombeʼu ñandéve Jesús haʼeha ‘Ñandejára Raʼy’ pórke Jehová ojapovaʼekue chupe. Upévare jaʼe Jehová haʼeha Itúva (Lucas 1:34, 35, NM; Juan 1:34, 49; 3:17; 11:27; 20:31; Hechos 9:20).

Pe Ñandejára Rréino, Jesús ñanemboʼevaʼekue jajerure hag̃ua haʼe peteĩ mbaʼe iporãitereíva. Jahecha haguéicha ko goviérno oguerúta pyʼaguapy. Ha Jehová oiporavo itaʼýra Jesucrístope oisãmbyhy hag̃ua pe Rréino. Péro, reikuaápa oiporavo hague avei ambue tapichápe oisãmbyhy hag̃ua itaʼýra ndive?... Ñañemongetamína upévare.

Omano mboyvemi, Jesús heʼi ijapostolkuérape oñemoingove jey rire chupe ohotaha Itúva “rógape” yvágape. Ha opromete chupekuéra: ‘Aháta ambosakoʼi peẽme pene rendag̃ua, peime hag̃ua chendive che aimehápe’ (Juan 14:1-3, JMP). Mbaʼépa ojapóta umi apóstol Jesús ndive yvágape?... “Oisãmbyhýta  hendive”. Péro oĩve umi ogovernátava Jesús ndive, la Biblia heʼi oñondivepa ohupytytaha 144.000 (Revelación [Apocalipsis] 14:1, 3; 20:6).

Mbaʼéichapa nde ere jaikotaha ko yvy ape ári ogoverna vove Jesús ha umi 144.000?... Iporãitereíta ningo! Epensamíntena: ndaiporimoʼãvéima ñorairõ, mymbakuéra jepe imansopáta. Avei opáta mbaʼasy ha ñemano, ohechaʼỹva ohecháta, ohenduʼỹva ohendúta ha umi ndaikatúiva oguata, odipara ha isarakíta peteĩ guasúicha. Ko yvy omeʼẽta heta hiʼupy opavavépe g̃uarã ha mborayhúpe tapichakuéra oikóta Jesús omboʼe haguéicha hemimboʼekuérape (Juan 13:34, 35). Jahekamína koʼág̃a umi téysto oĩva la Bíbliape omombeʼúva umi mbaʼe porãita Ñandejára Rréino ojapótava (Isaías 2:4; 11:6-11; 25:8; 33:24; 35:5, 6; 65:21-24).

Jesús ñanemboʼe ypy guive jajerure hag̃ua Ñandejárape “Tou ne rréino”, hetaiterei tapicha okambia hekove oikuaávo mbaʼépa ojapóta ko Rréino. Koʼẽrõitéma umi goviérno oĩva ko yvy ape ári ndaiporimoʼãvéima ha hendaguépe oisãmbyhýta Ñandejára Rréino. Ha upe vove umi oservíva Jehovápe ha pe Rréi haʼe oiporavovaʼekuépe, ovyʼáta, hesãita ha oikóta pyʼaguapýpe opa árare (Juan 17:3).