La Biblia okambia chupekuéra

MBAʼÉICHAPA ou okambia peteĩ meséra ijurutieʼỹ, ojedroga ha ikaʼúva? Mbaʼérepa peteĩ karai ombaʼapovaʼekue polítikape ha ndoikuaaséiva mbaʼeve rrelihióngui oñepyrũ opredika? Mbaʼe mbaʼépa ombohovái peteĩ polisía Rusiaygua omboʼéva defénsa personál oiko hag̃ua chugui testígo de Jehová? Jahejána haʼekuéra voi tomombeʼu ñandéve.

‘Koʼág̃a che sy nopensavéima upéicha ha rojogueraha porãma’ (NATALIE HAM)

ONASE: 1965-PE

HETÃ: AUSTRALIA

MBAʼÉPA OJAPOVAʼEKUE: OJEDROGA

CHE REMBIASAKUE: Akakuaa Róbepe (Australia Meridional), peteĩ táva oikohápe peskadorkuéra. Koʼãichagua lugárpe umi hénte ojepokuaa oñembyaty peteĩ várpe. Heta sy ha túva oho jepi upépe hiʼare are ifamiliakuéra ndive. Umi mitã katu oaprende upérupi ñeʼẽ kyʼa ha oiko umi okaʼúva ha opitáva apytérupi.

Che avei akakuaavaʼekue upéicha, ha arekórõ guare 12 áño apitáma ha chejurutiʼeʼỹeterei. Hiʼarive manterei aiko vai che sýndi. Arekópe 15 áño che sy ha che túva ojopoi, ha 18 mése haguépe che avei aha ógagui. Upéi añepyrũ haʼu vevída, ejedroga ha cherekovai. Chepochyháre ningo aiko ha ndaikuaái ni mbaʼépa pe aipotáva, péro ajerovia ikatuha añangareko chejehe astudia rupi cinco áño karáte ha defénsa personál. Upéicharõ jepe, aime jave cheaño, ajepyʼamongeta ha añeñandu vaieterei. Péicha jave ajerure Ñandejárape tachepytyvõ, péro haʼe avei chupe: “Anínte ejerure chéve aha hag̃ua tupaópe”.

Tiémpo rire, peteĩ che amígo omeʼẽ chéve che Bibliarã. Haʼe ningo ndorekói rrelihión, péro ojerovia Ñandejárare; upéicharõ jepe ojedroga umi ótro che amígoicha. Amo ipahápe heʼi chéve tekotevẽha ajevautisa. Upémarõ roho peteĩ lágope ha upépe haʼete voi chevautisa. Upe guive añandu cheag̃uiveha Ñandejárare, péro nachetiémpoi alee hag̃ua la Biblia.

LA BIBLIA CHEPYTYVÕ AKAMBIA HAG̃UA: Áño 1988-pe mokõi testígo de Jehová og̃uahẽ che rógape. Peteĩva oporandu chéve mbaʼéichapa héra Ñandejára ha upéi olee Salmo 83:18, heʼihápe: ‘Toikuaa hikuái nde, nderérava Jehová, nde añoiteha pe Ijyvatevéva’ (NM). Ni ndaroviaséi ningo upe ahendúva. Upévare, oho rire hikuái ajupi che mbaʼyrúpe ha aha peteĩ livrería kristiánape, opytáva 56 kilómetro ógagui, ahecha hag̃ua  ambue Bíbliapa heʼi avei upéva. Aheka avei diksionáriope Ñandejára réra. Ahechakuaa rire heraha Jehová, añeporandu: “Mbaʼe mbaʼépa oiméne ndaikuaaihína?”.

Che sy heʼími chéve umi Testígore ndojekuaaiha mbaʼe apohápa. Upévare che apensa hesekuéra ndovyʼakuaaiha ha hetaiterei mbaʼe ojeproiviha chuguikuéra. Mbaʼépa ajapóne chevisita jeýramo hikuái? Apensa nañatendemoʼãiha hesekuéra, péro og̃uahẽvo ambohasa chupekuéra ha upe guive añepyrũ astudia la Biblia.

Astudiapa rire amombeʼu jepi che chíko Cráigpe umi mbaʼe aaprendevaʼekue ha ahesareapa chupe. Upémarõ haʼe oipeʼa chehegui che lívro ha oñepyrũ olee. Tres semána haguépe ohechakuaa testígo de Jehová omboʼeha la Biblia heʼihaichaite. Upéi roñehaʼã ropoi dróga ha vevídagui, ha che katu aheja pe traváho arekovaʼekue várpe. Rojaposégui opa mbaʼe Ñandejára ojerureháicha, rodesidi romenda.

UMI MBAʼE PORÃ AHUPYTÝVA: Roñepyrũrõ guare rostudia la Biblia Testigokuérandi rojopoi potaite kuri, péro koʼág̃a roiko porãiterei oñondive. Che ména ningo imarangatueterei ha roguereko mokõi mitã neporãva ha avei heta amígo ojeroviáva Ñandejárare.

Ñepyrũrã che sy ndoipotái astudia la Biblia Testigokuérandi ni ajeheʼa hesekuéra. Haʼe heʼi chéve upéva ndoikuaaporãi rupi chupekuéra, péro koʼág̃a nopensavéima upéicha ha rojogueraha porãma. Ikatu haʼe avyʼaitereiha añemoag̃ui haguére Jehováre ha aikuaágui mbaʼéichapa aikovaʼerã (Mateo 5:3).

“Aaprende heta mbaʼe ahecharamoitereíva oĩva la Bíbliape” (ISAKALA PAENIU)

ONASE: 1939-PE

HETÃ: TUVALU

MBAʼÉPA OJAPOVAʼEKUE: OMBAʼAPO POLÍTIKAPE

CHE REMBIASAKUE: Anase peteĩ ísla héravape Nukulaelae, Tuvalu (oséano Pacífico). Nukulaelae ha ambue ísla oĩva ijerére opytavaʼekue pastorkuéra poguýpe. Koʼã pastór oñembokatupyry peteĩ koléhio rrelihiósope oĩva Samóape. Chupekuéra ha hogayguakuérape oñemongaru ha oñemeʼẽvaʼerã iporãvéva oiko hag̃ua. Ha katuete oñemoĩvaʼerã koʼã mbaʼe, umi família mimi oikotevẽramo jepe.

Che aikohápe pe pastór voi omoakã eskuéla ha omboʼe rrelihión, matemátika ha michĩmi heografía. Sapyʼánte pe pastór ombyepoti vaieterei umi mitãme ombohuguy peve chupekuéra. Péro avave noñanimái heʼi mbaʼeve, ni ituvakuéra jepe. Enterove omombaʼeterei upe pastórpe, Ñandejárape oñemombaʼerõguáicha.

Arekórõ guare 10 áño ava ambue íslape aike hag̃ua peteĩ eskuéla púvlikape. Amohuʼã  rire che estúdio ambaʼapo mburuvichakuéra ndive. Upérõ umi ísla Gilbert (koʼág̃a Kiribati) ha Ellice (koʼág̃a Tuvalu) oĩvaʼekue Gran Bretaña poguýpe. Ambaʼapo heta puéstope ha upe rire amoakã peteĩ periódiko goviernopegua osẽva káda semána. Aha porã kuri hese, péro upéi anohẽ periódikope peteĩ kárta oñembouvaʼekue otakýva goviérnore, ogasta heta rupi pe príncipe de Gales oúta haguére. Pe kártape ojeporúnte peteĩ téra guaʼu, upévare che héfe oikuaase katuete mávapa ohai ha oñepyrũ chejopy. Upéicharõ jepe namombeʼúi chupe. Oparupiete ojekuaa upe oikovaʼekue.

Upe riremínte aheja che traváho ha añepyrũ ambaʼapo polítikape. Agana rire pe eleksión Nukulaeláepe chemoĩ hikuái amoakã hag̃ua Ministerio de Comercio y Recursos Naturales. Upéi Kiribati ha Tuvalu ojeítarõ guare Gran Bretaña poguýgui, pe governadór chemoĩse mburuvicharã Tuválupe. Péro che haʼe chupe ndaikatumoʼãiha. Ndaipotaieterei ningo umi hénte opensa ambaʼapoha Gran Bretáñape g̃uarã. Upéva chemoĩ vai polítikape. Upéicharamo jepe añekandidata jey pe puésto ijyvatevévape ha aperde. Upémarõ roho jey che rembireko ndive ore vállepe roiko hag̃ua pyʼaguapýpe porã.

LA BIBLIA CHEPYTYVÕ AKAMBIA HAG̃UA: Umi íslape enterovéva omboyke domingo Ñandejárape g̃uarã. Che katu aha pe ýre apeska ha aĩnte upérupi. Ndaipotái avave heʼi cherehe cherrelihiosoha. Che túva pyʼỹinte chemongavaju ha heʼími chéve ambopochypaha umi héntepe, péro che ndaikuaaséi mbaʼeve rrelihióngui.

Peteĩ jey ahárõ guare Funafútipe, oĩháme Tuvalu kapitál, che ermáno imitãvéva heʼi chéve aha hag̃ua hendive testígo de Jehová rreunionhápe. Upéi peteĩ misionéro omeʼẽ chéve atyraite rrevísta Ñemañaha ha ¡Despertad! alee hag̃ua. Avei omeʼẽ chéve peteĩ lívro omyesakãva mbaʼéichapa heta rrelihión heʼíva ijehe kristianoha, nomboʼéi Ñandejára Ñeʼẽme oĩháicha. Alee jey jey upe lívro ha aaprende heta mbaʼe ahecharamoitereíva oĩva la Bíbliape. Pór ehémplo, ahechakuaa kristianokuéra natekotevẽiha omboyke domingo Ñandejárape g̃uarã, upe íslape oñemboʼeháicha. * Amombeʼúrõ guare che rembirekópe umi mbaʼe aaprendéva, haʼe ndohoveiete tupaópe.

Che haʼemavaʼekue ndaikemoʼãiha mbaʼeveichagua rrelihiónpe. Upéicharamo jepe ndaipeʼái che akãgui umi mbaʼe aleevaʼekue. Dos áño haguépe ahai pe misionéro oĩva Funafútipe ha haʼe chupe aikuaaseveha la Bíbliagui. Upémarõ haʼe pyaʼe porã ou pe várko osẽ raẽvévape ikatu hag̃uáicha chemboʼe. Che túva ipochyeterei oikuaárõ guare oikotaha chehegui testígo de Jehová. Péro haʼe chupe haʼekuéra chemboʼeha hetaiterei mbaʼe Ñandejára Ñeʼẽgui, upévare namboykemoʼãiha umi mbaʼe aaprendéva.

UMI MBAʼE PORÃ AHUPYTÝVA: Áño 1986-pe oikóma chehegui testígo de Jehová ha un áño haguépe che rembireko avei ojevautisa. Upéi mokõive che rajy ostudia avei la Biblia ha ojevautisa.

Avyʼaiterei ningo aime haguére Jehová organisasiónpe; upépe ndaipóri oñembotuicháva omoakã haguére kongregasión. Upéva rangue enterovetéva ojotrata peteĩchapa umi kristiáno ypykue ojotrata haguéicha (Mateo 23:8-12). Testigokuéra hekomirĩ ohaʼanga rupi Jesúspe ha omboʼe hapichakuérape umi mbaʼe koʼẽrõitéma Ñandejára Rréino ojapótava (Mateo 4:17). Aagradese Jehovápe aikuaa haguére chupe ha oheja rupi aime iñorganisasiónpe.

 “Umi Testígo ndachejopýi aguerovia hag̃ua umi mbaʼe omboʼéva” (ALEXANDER SOSKOV)

ONASE: 1971-PE

HETÃ: RUSIA

MBAʼÉPA OJAPOVAʼEKUE: OMBOʼE OÑEÑORAIRÕKUAA HAG̃UA

CHE REMBIASAKUE: Akakuaavaʼekue Moscúpe, haʼéva upérõ Unión Soviética kapitál. Che rogayguakuéra ndive roiko peteĩ edifísio nde tuichávape oĩháme heta departaménto. Heta oikóva upépe ombaʼapo peteĩ fávrikape. Chemanduʼa oĩ hague heʼíva cherehe chetarovaitereiha, ha péichante aikóramo koʼẽrõite ajeguerahataha kárselpe térã chemitãre amanotaha. Ha ndojavýi hikuái, arekórõ guare 10 áñonte cheprovlémama umi polisía ndive.

Arekópe 18 áño aha kuartélpe ha dos áño aja ajapo guárdia umi frontérare. Upe rire aha jey Moscúpe ha añepyrũ ambaʼapo peteĩ fávrikape, péro pyaʼeterei chemonguerái upe traváho ha aheja jey. Upéi aike ambaʼapo umi polisía ndive ha amboʼe defénsa personál. Aipytyvõ ojejagarra hag̃ua heta vandído oĩva Moscúpe ha aviaha heta távape oĩháme umi ojapóva sarambi. Opa koʼã mbaʼére cheruguyrakuháre aiko. Sapyʼánte aju vaieterei che traváhogui ha añeno ótro hendápe ani hag̃ua agolpeapa che rembirekópe ake aja.

LA BIBLIA CHEPYTYVÕ AKAMBIA HAG̃UA: Añepyrũrõ guare ahesaʼỹijo la Biblia umi Testígo ndive ahechakuaa ajapoha heta mbaʼe ivaíva, pór ehémplo, añorairõ, apita ha haʼueterei vevída. Aikuaa porã tekotevẽha akambia. Avei ndahejaséi che traváho aimoʼãgui ndajapokuaaiha ambue mbaʼe amantene hag̃ua che família. Hiʼarive apensa ndaikatumoʼãiha arakaʼeve asẽ apredika ogahárupi ojapoháicha Testigokuéra.

Péro ahechakuaa la Biblia ndaijapuiha. Avei tuicha chepyʼaguapy aikuaa rire Ñandejára ikatuha cheperdona añembyasýramo che rembiapo vaikuégui. Ezequiel 18:21, 22-pe heʼi: ‘Oiméramo heko añáva ojei hembiapo vaikuégui ha ojapo hekopeguáva, Che nachemanduʼaichéne hembiapo vaikuére’.

Umi Testígo ndachejopýiva aguerovia hag̃ua umi mbaʼe omboʼéva ha upévare aguerohory chupekuéra. Haʼekuéra oipota apensa ha antende porã la Biblia heʼíva. Cheakãrakueterei umi mbaʼe aaprendévare ha tres semánape aleepa 40 rrevísta. Koʼã mbaʼe chepytyvõvéntema ahechakuaa hag̃ua testígo de Jehová haʼeha rrelihión añetegua.

UMI MBAʼE PORÃ AHUPYTÝVA: Astudia mboyve rojopoi potaite kuri che rembireko ndive, péro koʼág̃a roiko porã jey oñondive. Che rembireko avei chemoirũ roservi hag̃ua Jehovápe. Koʼág̃a rupi rovyʼaiterei ore rogapýpe, hiʼarive ajuhu peteĩ traváho ndojoavýiva la Biblia heʼívandi.

Añepyrũrõ guare apredika ogahárupi arrenegapa rei, sapyʼánte añandu ndaikatumoʼãiha ajejoko. Péro añehaʼãmbaite chepyʼaguapy oĩramo jepe umi chembopochyséva ha chepasiénsia hesekuéra. Ambyasýramo jepe aperde rei haguére che tiémpo vyroreípe, koʼág̃a avyʼa ajapógui peteĩ mbaʼe ideprovechoitevéva. Chepyʼarory ambaʼapo haguére aservi hag̃ua Jehovápe ha avei che rapichakuérape.

[Nóta]