Orekópa Ñandejára peteĩ organisasión?

LA Biblia omombeʼu Ñandejára ojapo hague opa mbaʼe hekopete ha hendaitépe yvágape ha avei ko yvy ape ári (1 Corintios 14:33). Pór ehémplo, proféta Daniel peteĩ visión rupive ohecha hetaiterei ánhel oĩha Ñandejára renondépe, ha heʼi: ‘Millones oservi chupe; ha amo 100 millones rupi oñemboʼy henondépe’ (Daniel 7:9, 10, ÑÑB). Ha ikatu hag̃uáicha umi ánhel, oĩva 100 millones rasa, oipytyvõ yvyporakuérape Ñandejára heʼihaichaite tekotevẽmante oiko hekopete hikuái (Salmo 91:11).

Ñande Apohare Jehová orekóramo jepe opa mbaʼe hendaitépe, ndeʼiséi ipyʼahatãha ni naimbaʼerechakuaaiha. Haʼe ñanderayhu, ovyʼa ha ojepyʼapy ñanderehe ha opa hembiapokuére (1 Timoteo 1:11; 1 Pedro 5:7). Koʼã mbaʼe jahechakuaa otrata lájare yma umi isrraelítape ha umi kristiáno ypykuépe.

Umi isrraelíta oikovaʼekue hekopete

Jehová ningo Moisés rupive oipytyvõ tetã Israélpe oiko hag̃ua hekopete ha péicha oservi porã chupe. Pór ehémplo ñapensamíntena mbaʼéichapa oñemohendavaʼekue umi isrraelíta opytárõ guare Sinaí desiértope. Sarambi ningo oikovaʼerãmoʼã ojehejárire káda famíliape oiporavo moõitépa opytase. Upévare Jehová heʼi porã moõitépa opytavaʼerã káda trívu (Números 2:1-34). Pe Léi mosáika heʼivaʼekue avei mbaʼéichapa oñeñangarekovaʼerã ipotĩ ha hesãi hag̃ua hikuái, pór ehémplo heʼi chupekuéra ojatyvaʼerãha hekaka (Deuteronomio 23:12, 13).

Oikérõ guare hikuái pe yvy oñeprometevaʼekuépe osegi ojapo hekoitépe heta mbaʼe. Tetã Israel ningo oreko voi doce trívu ha káda únope oñemeʼẽvaʼekue ijyvyrã. Pe Léi Ñandejára omeʼẽvaʼekue hembiguaikuérape oñeʼẽ koʼã mbaʼére: rrelihión, ména ha tembireko, família, hiʼupy ha mbaʼéichapa ohekomboʼe, ombaʼevende, oñemitỹ ha oñangarekovaʼerã hymbakuérare. * Koʼã léi, umi michĩvéva jepe, ohechauka Jehová ojepyʼapyha hembiguaikuérare ha oipotaha oiko vyʼápe. Ha haʼekuéra iñeʼẽrendu haguére koʼã mbaʼépe, Haʼe ohovasa chupekuéra (Salmo 147:19, 20).

Moisés ningo omoakã porã vaʼekue umi isrraelítape, péro ndahaʼéi ikatupyryeterei haguére, síno ojapógui opa mbaʼe Ñandejára heʼi hagueichaite chupe. Pór ehémplo, mbaʼéichapa Moisés oikuaa moõ rupípa ohovaʼerã hikuái pe desiértore? Jehová oiporu peteĩ arai guasu, pyharekue oikóva chugui tatarendy, ohechauka hag̃ua chupekuéra haperã (Éxodo 13:21, 22). Ojevaléramo jepe yvypórare, Haʼe voi oisãmbyhy ha ohechauka chupekuéra mbaʼéichapa ojejapokuaa opa mbaʼe hekopete. Upéicha oikovaʼekue avei yma síglo primérope.

 Umi kristiáno ypykue oikovaʼekue hekopete

Umi apóstol ha ambue kristiáno ypykue opredika kyreʼỹ rupi oĩvaʼekue heta kongregasión Asia ha Europa tuichakuére. Koʼã kongregasión noĩriramo jepe peteĩ hendapepa, ndeʼiséi káda uno ojapoha ojaposéva. Síno oĩ peteĩ ñeʼẽme, ha umi apóstol omoakã chupekuéra. Pór ehémplo, peteĩ jey apóstol Pablo omondo Títope ísla Crétape “omoĩmba hag̃ua hekopete umi mbaʼe oñekotevẽva” (Tito 1:5). Avei heʼivaʼekue umi Coritoyguápe oĩha ijapytepekuéra umi ermáno ikatupyrýva “oporodirihi” térã ‘oporomoakã ha oporosãmbyhy’ hag̃ua (1 Corintios 12:28; BNP). Péro mávapa ojapouka chupekuéra umi mbaʼe hekoitépe? Apóstol Pablo omombeʼu: “Ñandejára hekopete ojapo [kongregasión]” (1 Corintios 12:24, BNP).

Umi omoakãva kongregasión noĩrivaʼekue omanda hag̃ua hapichakuérare, síno ‘oporopytyvõ’ hag̃ua Ñandejára espíritu heʼiháicha. Haʼekuéra ‘oikovaʼerã ehémplo porãramo’ umi ermánope (2 Corintios 1:24; 1 Pedro 5:2, 3, ÑÑB). Ha ohechakuaavaʼerã hikuái Jesucristo oñemoingove jey rire omoakãha kongregasionkuéra, ndahaʼeiete oimehaichagua yvypóra imperfékto (Efesios 5:23).

Umi Corintoygua ndojapóirõ guare opa mbaʼe ambue kongregasión ojapoháicha, apóstol Pablo ohai chupekuéra: “Pendehegui piko osẽraʼe [Ñandejára] ñeʼẽ, térãpa peẽme g̃uarã añónte oúraʼe?” (1 Corintios 14:36). Ko porandu rupive Pablo oñemoñeʼẽ ha ohechauka umi kristiánope ndovaleiha ojapo haʼekuéra ojaposévante. Ha iñeʼẽrendúvo hikuái apostolkuérape, umi kongregasión okakuaa ha oñakãrapuʼã ohóvo (Hechos 16:4, 5).

Ñandejára ohechauka ñanderayhuha

Koʼág̃a rupi heta hénte ndoikeséi peteĩ rrelihiónpe, péro la Biblia ohechauka Ñandejára ymaite guive oiporu hague peteĩ organisasión ojapo hag̃ua hembipota. Jahecháma haguéicha Haʼe oipytyvõ umi isrraelítape ha umi kristiáno ypykuépe ojapo hag̃ua opa mbaʼe hekopete.

Ñandejára ningo oisãmbyhy avei isiervokuéra koʼag̃aguápe ojapo haguéicha yma. Haʼe ohechauka ojepyʼapyha umi omombaʼeguasúvare chupe, upévare oipytyvõ chupekuéra ojapo hag̃ua opa mbaʼe hekopete ha oiko peteĩ ñeʼẽme. Koʼág̃a rupi Jehová oiporu iñorganisasión okumpli hag̃ua hembipota yvyporakuérape g̃uarã. Péro, mbaʼépa ñanepytyvõta jahechakuaa hag̃ua mávapa añete iñorganisasión? Jahechamína mbohapy mbaʼe.

▪ Umi kristiáno tee oñomoirũ hekopete opredika hag̃ua (Mateo 24:14; 1 Timoteo 2:3, 4). Jesús ningo heʼivaʼekue hemimboʼekuérape omombeʼuvaʼerãha pe marandu porã opa tetãme, ha upe tembiapo ndaikatumoʼãi ojejapo noñembaʼapóiramo hekopete oñondivepa. Ñantende porã hag̃ua ñamoĩkuaa peteĩ ehémplo, remongarútaramo peteĩ tapichápente ndahasyiete, péro remongarútaramo hetaitereípe reikotevẽtama peteĩ grúpo nepytyvõva, ha pembaʼapovaʼerã peteĩ ñeʼẽme. Upéicha avei umi kristiáno tee ombaʼapo “peteĩ ñeʼẽme” térã ojepytaso ojoykére (Sofonías 3:9, ÑÑB). Ajépa ndaikatumoʼãi ojapo ko tembiapo heta tetã ha idiómape noĩriramo hikuái peteĩ ñeʼẽme?

▪ Umi kristiáno tee ombaʼapóva peteĩ ñeʼẽme ojepytaso ojoykére ha oñomokyreʼỹ. Peteĩ karai ojupíva jepi sérrope haʼeño ikatu odesidi moõ rupípa ohóta ojepyʼapyʼỹre avavére. Péro oikóramo hese peteĩ mbaʼe vai térã oñeaksidenta, ikatu oapeligra hekove ndaipórigui oipytyvõvaʼerã chupe. Upévare naiporãi oho haʼeño (Proverbios 18:1). Péicha avei umi kristiáno tee ndovaléi oñemohaʼeño, tekotevẽ guei oñomokyreʼỹ ha oñopytyvõ okumpli porã hag̃ua Jesús omandavaʼekue  chupekuéra (Mateo 28:19, 20). Kongregasiónpe ningo oñemboʼe la Biblia heʼíva, oñembokatupyry ha oñemokyreʼỹ kristianokuérape osegi hag̃ua oguata Ñandejára rapére. Ha moõ voi piko ohóta hikuái oikuaave hag̃ua Ñandejárape ha omombaʼeguasu hag̃ua chupe, ndahaʼéiramo rreunionhápe? (Hebreos 10:24, 25.)

▪ Umi kristiáno tee hekopete oservi Ñandejárape peteĩ ñeʼẽme. Jesús ovechakuéra ‘ohendu iñeʼẽ, ha oiko peteĩ atýpente’ ipoguýpe (Juan 10:16). Haʼekuéra naisarambíri heta iglésia ha grúpo michĩvape, ni ndojoavýi omboʼévape. Entéronte voi oporohekomboʼe peteĩ ñeʼẽme (1 Corintios 1:10). Péro ohupyty hag̃ua hikuái upéva oñeorganisa porã vaʼerã ha hekopete ojapovaʼerã opa mbaʼe. Jaikuaaháicha Ñandejára ohovasa umi kristiáno oĩvape peteĩ ñeʼẽme añoite (Salmo 133:1, 3).

Umi ohayhu añetéva Ñandejárape ha omombaʼéva la Biblia heʼíva, oike peteĩ organisasión ojapóvape koʼã mbaʼe oñehaʼarõva chuguikuéra. Opárupi ko yvy ape ári testígo de Jehová ombaʼapo hekopete ha peteĩ ñeʼẽme ojapo hag̃ua Ñandejára rembipota. Ha oguerovia hikuái ko mbaʼe Ñandejára oprometevaʼekue: ‘Aikóta ijapyterupikuéra, che Ijárata, ha haʼekuéra chembaʼéta’ (2 Corintios 6:16, BNP). Nde avei ikatu reiko péicha remombaʼeguasúramo Ñandejára Jehovápe iñorganisasión ndive.

[Nóta]

[Nóta oĩva taʼanga ndive páhina 29]

Umi isrraelíta opytárõ guare Sinaí desiértope oikovaʼekue hekopete

[Nóta oĩva taʼanga ndive páhina 31]

Ojepredika hag̃ua opa tetã rupi ojejapovaʼerã hekoitépe opa mbaʼe

Ojepredika ogahárupi

Oñepytyvõ oiko jave sarambi

Aty guasu

Oñemopuʼã umi lugár ojeadora hag̃ua Jehovápe