Mbaʼépa oñemboʼevaʼerã mitãnguérape?

“Ñandejára Ñeʼẽ niko henyhẽ [Ñandejára] puʼakágui, ha iporã ñamboʼe ha ñañemoñeʼẽ hag̃ua ñande rapichápe, ñaporohekomboʼe ha ñaporomoarandu hag̃ua hekopete.” (2 TIMOTEO 3:16)

MITÃNGUÉRA oikuaavaʼerã Ñandejárape. Mbaʼépa oipytyvõta chupekuéra? Upearã tekotevẽ ojeporu pe lívro oñemombaʼevéva ko múndope, la Biblia.

La Biblia ningo haʼete peteĩ kárta Ñandejára ohaíva ñandéve. Pype oñemombeʼu mbaʼeichaguápa Haʼe ha heʼi mbaʼéichapa oipota jaiko, tahaʼe imitãva térã kakuaa. Jahechamína koʼág̃a umi mbaʼe oĩva ipype ha mbaʼépa ñanemboʼe enterovévape, umi mitãme jepe.

 Jahechaháicha koʼã téystope, Ñandejára Ñeʼẽ omboʼe heta mbaʼe oipytyvõtava mitãnguérape oiko hag̃ua chuguikuéra kakuaa opororrespeta ha imbaʼerechakuaáva. Péro mávapa omboʼevaʼerã chupekuéra?

Mbaʼépa Ñandejára oipota jaikuaa chugui?

▪ Mbaʼépa heʼi la Biblia: ‘Nde, nderérava Jehová, nde añoite hína pe Ijyvatevéva ko yvy ape ári’ (Salmo 83:18, NM).

Mbaʼépa ñanemboʼe: Ñandejára oikove ha avei héra tee, ndahaʼéi peteĩ puʼaka reínte.

▪ Mbaʼépa heʼi la Biblia: “Haʼe ningo oikuaa opa mbaʼe jarekóva ñande pyʼapýpe ha nokañýi chugui mbaʼeve. Rehekáramo chupe ojejuhukáta ndéve” (1 Crónicas 28:9).

Mbaʼépa ñanemboʼe: Jehová ojepyʼapy opavavére, umi mitã mimíre jepe (Salmo 10:14; 146:9). Haʼe oipota jaikuaa chupe.

▪ Mbaʼépa heʼi la Biblia: “Ani pereko asy [...] mitã tyreʼỹme. Pereko asýramo ha osapukái chéve, nambohasareimoʼãi” (Éxodo 22:22-24).

Mbaʼépa ñanemboʼe: Jehová ohendu kakuaa ha mitãnguérape oñemboʼe jave. Ikatu ñamombeʼu chupe umi mbaʼe ñapensáva ha ñañandúva.

▪ Mbaʼépa heʼi la Biblia: ‘Jey jeýnte oipyʼaraʼã Ñandejárape, ha ombopochy hikuái Israel Járape’ (Salmo 78:41, ÑÑB).

Mbaʼépa ñanemboʼe: Umi mbaʼe jaʼe ha jajapóva ikatu ombovyʼa térã omoñembyasy Jehovápe. Upévare ñapensa raẽ vaʼerã jaʼe ha jajapo mboyve peteĩ mbaʼe.

 Mbaʼéichapa jatratavaʼerã umi ndahaʼéivape ñandeichagua?

▪ Mbaʼépa heʼi la Biblia: ‘Ñandejára nomboykéi avavépe, oguerohory guei umi hénte hekojoja ha okyhyjévape chugui, tahaʼe haʼéva tetãygua’ (Hechos 10:34, 35, NM).

Mbaʼépa ñanemboʼe: Ñandejára oguerohorýramo opaichagua héntepe, ñande avei japoroguerohoryvaʼerã, marãve ndoikói idiferénteramo ñandehegui.

▪ Mbaʼépa heʼi la Biblia: ‘Peime tapiákena pemombeʼu hag̃uáicha oñeporandúramo peẽme pe esperánsa perekóvare, ha pemombeʼuvaʼerã pyʼaporãme ha pepororrespetavaʼerã’ (1 Pedro 3:15, BNP).

Mbaʼépa ñanemboʼe: Ñamombeʼúvo umi mbaʼe jagueroviáva, ojekuaavaʼerã ñanderehe añeteha pe jaʼéva, péro ndovaléi jatrata vai avavépe. Jarrespetavaʼerã avei ñande rapichakuéra ogueroviáva ha ani japorodiskuti.

Mbaʼéichapa jatratavaʼerã ñande rogayguakuérape?

▪ Mbaʼépa heʼi la Biblia: “Mitãnguéra, peneñeʼẽrendu pende ru ha pende sýpe. Upéva ningo ombovyʼa [Ñandejárape]” (Colosenses 3:20, ÑÑB).

Mbaʼépa ñanemboʼe: Mitã iñeʼẽrendúva ohechauka ohayhuha ituvakuérape ha oipotaha Ñandejára oguerohory chupekuéra.

▪ Mbaʼépa heʼi la Biblia: “Pejogueropuʼaka ha peheja rei ojupe oimérõ máva ipochýva ambuére. Ñandejára oheja rei haguéicha peẽme, peheja rei avei peẽ” (Colosenses 3:13).

Mbaʼépa ñanemboʼe: Ñande rogaygua ha ambue tapicha ikatu ñanembopochy jepi. Péro ñaporoperdonavaʼerã jaipotáramo Jehová ñaneperdona avei jajavy jave (Mateo 6:14, 15).

Mbaʼérepa ñanderory ha ñaneonrradovaʼerã?

▪ Mbaʼépa heʼi la Biblia: “Anive pendejapu ojupe. Añeteguánte peje pende rapichápe” (Efesios 4:25).

Mbaʼépa ñanemboʼe: Jaʼéramo añetegua, ñahaʼanga Ñandejárape ha ñambovyʼa chupe. Ñandejapúramo ñahaʼanga Satanáspe, ‘pe japu ruvicha’ (Juan 8:44, NM; Tito 1:2).

▪ Mbaʼépa heʼi la Biblia: ‘Pejapo pende rapicháre peẽ peipotáva haʼekuéra ojapo penderehe’ (Mateo 7:12, NM).

Mbaʼépa ñanemboʼe: Jahechakuaavaʼerã mbaʼépa opensa, oñandu ha mbaʼépa oikotevẽ ñande rogaygua ha umi oĩva ñande jerére. Ñañehaʼãramo ñantende ha jatrata porã chupekuéra, haʼekuéra avei ñandetratáta péicha (1 Pedro 3:8; Lucas 6:38).