Mboýpa umi ohaivaʼekue Escrituras Griegas Cristianas, oĩraʼe oñeñohẽrõ guare espíritu sánto Pentecostés áño 33-pe?

▪ Amalisia umi ocho kuimbaʼe ohaivaʼekue apytégui pe Nuévo Testaménto térã Escrituras Griegas Cristianas, seis oĩvaʼekue upérõ.

Hechos 1:4-pe ningo oñemombeʼu Jesús omanda hague hemimboʼekuérape: ‘Ani peho Jerusaléngui, pehaʼarõnte che Ru oprometevaʼekue’. Upépe oñemombeʼu avei Mateo, Juan ha Pedro ojapo hague upéicha ha “ijaty peteĩ hendápe” ambue kristiánondi, umíva apytépe oĩ Jesús ermanokuéra. Upérõ koʼã mbohapy disípulo neʼĩra gueteri ohai mbaʼeve la Bíbliape (Hechos 1:12-14; 2:1-4). Ha Jesús ermanokuéra apytégui, Santiago ha Judas, ohai avei upe riréma mokõi lívro ogueraháva herakuéra voi (Mateo 13:55; Santiago 1:1; Judas 1).

Marcos avei omombeʼu pe pyhare ojejagarrárõ guare pe Mboʼehára Guasúpe, peteĩ kariaʼy osẽ hague odipara upégui. Upérõ ningo entéro hemimboʼekuéra ohejareíma kuri Jesúspe, upévare jaʼekuaa ko kariaʼy oiméne hague Marcos voi (Marcos 14:50-52). Upéicharõ ikatu jaʼe Marcos oĩ hague umi Jesús remimboʼe ypykue apytépe ha avei Pentecostéspe, oñeñohẽrõ guare pe espíritu sánto.

Umi ocho kuimbaʼe ohaivaʼekue Nuévo Testaménto apytégui, mokõintema ofalta: Pablo ha Lucas. Pentecostés áño 33-pe Páblogui ndoikói gueteri Jesús remimboʼe (Gálatas 1:17, 18). Ha amalisia Lucas noĩrivaʼekue upérõ, ajeve nomombeʼúi haʼe voi ohecha hague umi mbaʼe Jesús ojapovaʼekue (Lucas 1:1-3).

Mbaʼérepa ymaiterei guivéma oñemombaʼe umi olívo?

▪ Ñandejára ningo oprometevaʼekue omeʼẽtaha heta mbaʼe hetãme iñeʼẽrendúramo hikuái, umíva apytépe parrál ha olivoty (Deuteronomio 6:10, 11). Koʼág̃a rupi avei oñemombaʼeterei pe olívo umi oñeñotỹhárupi. Ha noñeñangarekoporãiramo jepe hese ikatu hiʼa heta, ha hetaiterei áñore. Avei ikatu okakuaa itatýpe ha ogueropuʼaka porã sekía jepe. Ha peichahágui oñekytĩ mbaʼéramo pe yvyramáta, pyaʼeterei hokypa jey.

Pe olívo ningo yma ojeporuvaʼekue heta hendáicha. Pór ehémplo, ipire ha hogue ojeporu akãnundúpe g̃uarã. Hakã itujávagui katu oñeguenohẽ ijaisykue hyakuã vainíllava, ojejapo hag̃ua perfúme. Péro pe mbaʼe oñemombaʼevéva pe olívogui ningo hiʼa, ha koʼýte pe aséite oguerekóva. Ojeʼe peteĩ aseitúna hiʼaju porãvagui, la mitã haʼeha aséite.

Peteĩ yvyramáta iporãvagui ikatu oñeguenohẽ 57 lítro aséite káda áño. Ko aséite ojeporúmi lámparape g̃uarã ha Ñandejára servísiope. Oĩ avei omoĩva hetére térã iñakãranguére, ha ambue katu oiporu oipohãno hag̃ua umi ojegolpeávape térã oñekytĩvape (Éxodo 27:20; Levítico 2:1-7; 8:1-12; Rut 3:3; Lucas 10:33, 34).

[Nóta oĩva taʼanga ndive páhina 30]

Pedro oñeʼẽ jave Pentecostés áño 33-pe