Ko artíkulo nepytyvõta rembohovái hag̃ua la Biblia rupive umi mbaʼe reikuaaséva. Peteĩ testígo de Jehová ikatu ohesaʼỹijo nendive koʼã porandu.

1. ¿Mbaʼéichapa Jesús oipota ojegueromanduʼa omano hague ára?

Jesús heʼivaʼekue hemimboʼekuérape ogueromanduʼa hag̃ua haʼe omano hague ára oiporúvo pán ha víno orrepresenta hag̃ua pe séna haʼe ojapovaʼekue. Pe pán orrepresenta hete ha pe víno katu huguy. (Elee Lucas 22:19, 20.)

Pe pán Jesús oiporuvaʼekue ndorekói levadúra. Upéicha rupi ko pán orrepresenta porãiterei Jesús rete perfékto. La Bíbliape oñeñeʼẽ jave levadúrare, pyʼỹinte orrepresenta pe pekádo. Jesús osakrifika rupi hekove, ndojesakrifikavéima umi mymba Moisés léi ojerureháicha (Hebreos 10:5, 9, 10). Pe víno orrepresenta Jesús ruguy porãite oñeñohẽvaʼekue oñeperdona hag̃ua ñande pekádo. (Elee 1 Pedro 1:19; 2:24, ha 3:18.)

2. ¿Arakaʼépa jagueromanduʼavaʼerã Jesús omano hague ára?

Jesús omanovaʼekue 14 de Nisán, umi hudío Páskua jave. Yma umi hudíope g̃uarã pe día oñepyrũvaʼekue kuarahy oike rire. Pe pyhare 14 de Nisán, Jesús ojapo peteĩ séna ijapostolkuérandi. Upéi heʼi chupekuéra akóinte ojapovaʼerãha peteĩ séna ogueromanduʼa hag̃ua haʼe omano hague ára. (Elee Lucas 22:14, 15.)

Ñandejára siervokuéra ogueromanduʼa Jesús omano hague ára oikuaágui upéva rupive Jehová omosãso hague yvypórape pekádo ha ñemano poguýgui (Éxodo 12:5-7, 13, 17). Yma umi hudío omboarete pe Páskua káda áño, upéicha avei Jesús omano hague ára ojegueromanduʼa káda áño kuarahy oike rire, 14 de Nisán oĩháicha kalendário hudíope. (Elee Juan 1:29.)

 3. ¿Mávapa hoʼu pe pán ha víno?

Jesús ombohasárõ guare pe víno hemimboʼekuérape, heʼi: “Ko kópa orrepresenta pe kompromíso pyahu” (1 Corintios 11:25, NM). Ko kompromíso pyahu omyengovia pe pákto Léi rehegua Ñandejára ojapovaʼekue Israel ndive. ¿Mbaʼépa heʼise ko pákto? Jehová oprometevaʼekue umi isrraelítape iñeʼẽrendúramo chupe opaite mbaʼépe, orekotaha chupekuéra ipuévloramo (Éxodo 19:5, 6). Péro haʼekuéra naiñeʼẽrendúi, upévare Jehová ojapo jey peteĩ kompromíso pyahu. (Elee Jeremías 31:31.)

Ñandejára ojapovaʼekue pe kompromíso pyahu umi 144.000 yvypórandi. Haʼe ovendesíta hetaiterei héntepe ko grúpo rupive. Ko pákto pyahu rupive hetaiterei kuimbaʼe ha kuña oparupigua ikatúta oiko opa ára g̃uarã ko yvy ape ári peteĩ hardín neporãvape. Umi 144.000 apytégui oĩ oservíva gueteri Jehovápe ko yvy ape ári. Haʼekuéra añoite ikatu hoʼu pe pán ha víno, Jehová ojapo rupi hendivekuéra pe kompromíso pyahu. Jesús omano rupi ikatuvaʼekue oiko upéva. (Elee Lucas 12:32 ha Revelación [Apocalipsis] 14:1, 3.)

4. ¿Mbaʼépepa ñanepytyvõta jaháramo ojegueromanduʼahápe Jesús omano hague ára?

Káda áño ojegueromanduʼa Jesús omano hague ára, ha upéva ikatu ñanepytyvõ ñamombaʼe hag̃ua Ñandejára mborayhu. Haʼe ningo ñanderayhúgui ombouvaʼekue itaʼýra ko yvy ape ári omano hag̃ua ñanderehehápe ha ñandepeʼa pekádo poguýgui. Ojegueromanduʼa aja Jesús omano hague ára jajepyʼamongetavaʼerã mbaʼeichaitépa iñimportánte upéva, ha mbaʼépa ikatu jajapo jahechauka hag̃ua jaagradeseha Jesúspe ha Jehovápe upévare. (Elee Juan 3:16 ha 2 Corintios 5:14, 15.)

Reikuaasevéramo koʼã mbaʼe ikatu rehecha ko lívro, Mbaʼépa añetehápe omboʼe la Biblia?, ojapóva testigos de Jehová, páhina 206-208.