NDE reikuaa porã ne rrelihión omboʼeha añetegua Ñandejáragui ha reguerovia la Biblia ñanepytyvõha jaiko hag̃ua vyʼápe. Upévare,ndaivairiete reñehaʼãmbaitéramo remboʼe umi mbaʼe porã ne famíliape, tahaʼe mitãrusu térã mitãkuña (Deuteronomio 6:6, 7). b Péro tuichavévo ohóvo, ¿mbaʼépa oikóta, oúramo ndoikuaasevéi mbaʼeve rrelihióngui? ¿Mbaʼépa rejapóta oñepyrũramo ipyʼamokõi ha ndoikuaái osegítapa pe rrelihión remboʼéva chupe michĩmi guive? (Gálatas 5:7.)

Oimérõ oiko péicha nde rogapýpe, ani reimoʼã remboʼe vai hague ne famíliape, jahechataháicha ikatu oĩ ótra kósa omopensáva chupekuéra péicha. Nemanduʼavaʼerã retrata lájare ne famíliape ko situasiónpe, ikatuha omoag̃ui térã omomombyry chupe ne rrelihióngui. Jaikuaaháicha reiko vaíramo hendive, ikatuhína mombyryve reperde (Colosenses 3:21).

Péicha jave, iporãve ojejapo apóstol Pablo heʼivaʼekue: “Ñandejára rembiguái niko ndoikoivaʼerã ñorairõme, oiko porã vaʼerã katu opavave ndive. Oporomboʼekuaa vaʼerã ha ndahaʼeivaʼerã ku ipochy reíva rehegua” (2 Timoteo 2:24). ¿Mbaʼéichapa nde ikatu rehechauka ‘reporomboʼekuaaha’ ne família ipyʼamokõi ha ndojeroviavéi jave ne rrelihión omboʼévare?

Eñehaʼã rehecha mbaʼérepa ne família ou ipyʼamokõi. Jahechamína mbaʼérepa ikatu oiko upéva:

• ¿Noiméipa oñeñandu haʼeño ndorekóigui iñamígo kongregasiónpe? Leonora orekóva 19 áño heʼi: “Aipotavaʼekue che amigorã ha  aheka che kompañerokuéra apytépe koléhiope. Upéicha rupi, heta áñore ndaikatúi añakãrapuʼã Ñandejára servísiope. Che júnta vai rupi ndaikuaasevéi mbaʼeve rrelihióngui. Péro koʼág̃a ambyasy ajapo haguére upéicha”.

• ¿Oimépa ndojeroviái ijehe ha upévare ijetuʼu chupe odefende hag̃ua ijerovia? Ramón orekóva 23 áño heʼi: “Eskuélape ijetuʼuvaʼekue chéve añeʼẽ hag̃ua che kompañerokuérape umi mbaʼe agueroviávare. Akyhyje opensárõ g̃uarã che diferenteha chuguikuéra térã heʼírõ g̃uarã cherehe ‘che santularioitereiha’. Ahecha oapoʼiha hikuái peichaguápe, ha ndaipotái oiko cherehe upéva”.

• ¿Noiméipa okyhyje ndaikatúiramo g̃uarã oiko la Biblia heʼiháicha? Renee orekóva 16 áño heʼi: “Chéve g̃uarã mombyryeterei oĩ pe jeikove opaʼỹva, haʼete voi peteĩ edifísio yvate ruʼãitépe oĩva ha che neʼĩra gueteri ajupi ni michĩmi. Akyhyjeterei ajupi hag̃ua ha upévare apensa ahejávo che rrelihión”.

¿Ha ne família? ¿Mbaʼe provlémapa ombohovaihína? Reikuaa hag̃ua upéva reporanduvaʼerã chupe. Péro peñemongeta jave eikekuaavaʼerã chupe ani hag̃ua peikovai. Santiago 1:19 heʼi “penekyreʼỹvaʼerãha pehendu hag̃ua ha penembegue peñeʼẽ ha pende pochy hag̃ua”. Upéicharõ, reñemotiempovaʼerã reipytyvõ hag̃ua ne famíliape ha ehechauka ‘reporomboʼekuaa ha ne pasiensiaha’, rejapoháicha jepi reipytyvõ jave peteĩ ndahaʼéivape ne família (2 Timoteo 4:2).

Pór ehémplo, peteĩ ne família ndohoséiramo rreunionhápe, pyʼaguapýpe porã rehechavaʼerã mbaʼérepa. Ehechami mbaʼéichapa ojapo peteĩ túva ha nosẽporãi chupe:

—(Itaʼýra heʼi) Ndahasevéima rreunionhápe.

—(Itúva ipochy ha heʼi chupe) ¡Mbaʼére piko nderehoséi!

—Ikaigueterei ningo ha ndaigústoi chéve.

—¿Upéicharõ piko Ñandejára ndahaʼéi voi mbaʼeve ndéve g̃uarã? ¡Mbaʼéicha piko eréta upéicha! Reiko aja ko ógape, ndegusta ha nandegustáipe, rehóta orendive.

La Bíbliape ojeʼe tuvakuérape oñeʼẽ hag̃ua ifamíliape Ñandejárare, taʼyrakuérape katu iñeʼẽrendu hag̃ua (Efesios 6:1). Upéicharõ jepe, ¿reipotápa ne família ojapo Ñandejára rembipota ha oho rreunionhápe rejopýgui chupénte? Katuete reipotáta ojapo iñimportántegui chupe g̃uarã ha ojapose porãguinte.

Reikuaáramo mbaʼérepa ne família ndohosevéi rreunionhápe, katuete reipytyvõ porãvéta chupe. Ehechami mbaʼéichapa ojapovaʼerã kuri pe túva:

—(Itaʼýra heʼi) Ndahasevéima rreunionhápe.

—(Pyʼaguapýpe porã pe túva oporandu) ¿Mbaʼére piko ere upéicha che raʼy?

—Ikaigueterei ningo ha ndaigústoi chéve.

—Antende che raʼy, jaguapýramo uno térã dos óra ningo ñanemongaiguese voi. Péro ¿mbaʼépa pe ndaigustoivéva ndéve?

—Ndaikuaái, haʼetévaicha chéve aimesénteva ótro hendápe.

—¿Ne amigokuéra piko oñeñandu avei upéicha?

—¡Mbaʼeichagua amígo piko? Oho guive pe che amigoite ningo ndarekovéima  mávandipa añeʼẽta. Enterovénte ohasa porã ha che katu nahániri. Avave voi nopenái cherehe.

Peteĩ túva ohejáramo ifamília omombeʼu chupe opensáva, oikuaáta mbaʼépa ohasahína ha itaʼýra ojeroviáta hese. Upéicha avei ndahasyivéta pe mitãrusúpe omombeʼu hag̃ua jepi mbaʼépa ojopy chupe (ehecha pe rrekuádro heʼihápe “Nepasiensiavaʼerã”).

Heta mitãrusu ohechakuaa ombohovái porãramo umi mbaʼe ojokoséva chupe Ñandejára servísiope, ikatuha upe rire oñeñandu porã ha ovyʼave irrelihión reheve. Jahechami jeýna Ramón ohasavaʼekue. Ko mitãrusu opensa haguénte omombeʼuvaʼerãha ikompañerokuérape kristianoha, oryryipaitéma. Péro upéi ohechakuaa vyroreiete hague upéva, oĩramo jepe oñembohorýva ijeroviáre.

Ramón omombeʼu: “Peteĩ jey, che kompañéro kolehiopegua oñembohory che rrelihiónre, upéva chembochuchupaite ha haʼete voi enterove omañambáva orerehe. Upémarõ chehaite aporandu chupe irrelihiónre ha naimoʼãi ahechávo haʼe inerviosoveha chehegui. Ahechakuaa heta mitãrusu orekoha irrelihión ha nontendeiha umi mbaʼe ogueroviáva. Upévare apensa haʼekuéra oñeñandu vai vaʼerãha, ndahaʼéi che. Che ningo ikatu amyesakã umi mbaʼe agueroviáva”.

Tuvakuéra ha umi iñarandúva ohechakuaa umi mitã ha mitãrusukuéra okakuaáva ohóvo nopensaiha peteĩcha (1 Corintios 13:11). Umi mitãme g̃uarã ningo peteĩ mbaʼe ikatu iporã térã ivai, péro umi mitãrusu katu opensáma hetave mbaʼére. Pór ehémplo, peteĩ mitãme ojeʼéramo Ñandejára ojapo hague opa mbaʼe, ogueroviáma (Génesis 1:1). Péro peteĩ mitãrusu katu nahániri. Haʼekuéra ikatu oñeporandu: “¿Mbaʼéichapa aikuaáta añetehápepa oĩ Ñandejára? Oiméramo Ñandejára mborayhu, ¿mbaʼérepa oheja oiko hetaite mbaʼe  vai? ¿Mbaʼéicha rupípa ojeʼe Ñandejára oikoha ymaite guive?” (Salmo 90:2).

Ikatu nde repensa ne família oñeporandúramo koʼã mbaʼe, ijerovia ikangyha ohóvo. Péro koʼã mbaʼe ikatu ohechaukahína oñakãrapuʼãha. Koʼãichagua porandu oipytyvõta chupe oikuaave hag̃ua Ñandejárape (Hechos 17:2, 3).

Péicha ne família ohechauka ‘ojepyʼamongeta’ térã opensa porãha (Proverbios 3:21, 22, ÑÑB). Upéva oipytyvõta chupe oikuaave hag̃ua imitãrõ guarégui umi mbaʼe ogueroviáva, ‘ipe, ipuku, ipypuku, ha ijyvatekue’ (Efesios 3:18, BNP). Koʼág̃a koʼýte nde reipytyvõvaʼerã chupe ohesaʼỹijo hag̃ua mbaʼépa omopyenda umi mbaʼe ogueroviáva, ikatu hag̃uáicha ojerovia hese ipyʼaite guive (Proverbios 14:15; Hechos 17:11).

La Biblia omombeʼu peteĩ kristiáno hérava Timoteo ‘imitã guive’ oikuaa hague Ñandejára ñeʼẽ marangatu heʼíva. Upéicharamo jepe, Pablo heʼi chupe: “Ani remboyke umi mbaʼe reaprende ha ojegueroviakavaʼekue ndéve” (2 Timoteo 3:14, 15, NM). Upéicha avei, ikatu oime nde raʼy michĩete guive oikuaa la Biblia heʼíva. Péro koʼág̃a tuichavévo ohóvo reipytyvõvaʼerã chupe haʼete oiporavo hag̃ua mbaʼépa ogueroviáta.

Pe lívro Mitãrusukuéra oñeporandúva jepi. Konsého peẽme g̃uarã (volúmen 1) heʼi: “Añetehápe, oiko aja nendive ne família ojapótamante eréva chupe. Péro nde ningo reipota omombaʼeguasu Ñandejárape ohayhúgui chupe ha ndahaʼéi nde ere haguérente”. Upéicha rupi, reipytyvõse ne famíliape ojerovia mbarete hag̃ua. Upéva omomýita chupe odesidi hag̃ua ijeheguiete omombaʼeguasu Ñandejárape nde remboʼe haguéicha chupe (1 Pedro 5:9). c