¿MBAʼÉPA omomýi peteĩ kuimbaʼépe ou jey hag̃ua pe rrelihión isy ha itúva omboʼevaʼekuépe chupe? ¿Mbaʼéichapa peteĩ mitãrusu otopa ituvarã oipotavaʼekue heta tiémpore? Jahejána haʼekuéra voi tomombeʼu ñandéve.

‘Aikotevẽ añemoag̃ui jey Jehováre’ (ELIE KHALIL)

ONASE: 1976-PE

HETÃ: CHIPRE

MBAʼÉPA OJAPOVAʼEKUE: IRREVÉLDE HA OHO HÓGAGUI

CHE REMBIASAKUE: Anase Chíprepe, péro akakuaa Austráliape. Che sy ha che túva haʼevaʼekue testígo de Jehová, ha oñehaʼãmbaite chepytyvõ ahayhu hag̃ua Ñandejárape ha Iñeʼẽ, la Biblia. Upéicharõ jepe, che mitãrusúpe aju che rrevélde, akañy che rógagui pyharekue ha umi che amígo che aveguándi romonda áuto ha pyʼỹinte aike heta provlémape.

Akyhyjégui ambopochýrõ g̃uarã che tuvakuérape, ñepyrũrã opa mbaʼe ajapo ñemiháme, péro upéi mbeguekatúpe ndakyhyjevéima. Che amigokuéra ijedaiteve chehegui ha ndohayhúi Jehovápe. Haʼekuéra chegueraha vai. Upéicha rupi peteĩ árape haʼe che sy ha che rúpe ndaikuaaseveimaha mbaʼeve irrelihióngui. Oñehaʼãramo jepe pyʼaguapýpe chepytyvõ hikuái, che ndaikuaasevéima mbaʼeve. Upévare mokõivéva opyta vaieterei.

Aha che rógagui ha añepyrũ aiporu dróga. Añoty ha avende heta marihuana. Cherekokyʼa ha nasẽvéi umi diskotékagui. Avei che arheleterei, chepochy voi ojeʼe térã ojejapóramo umi mbaʼe ndachegustáiva. Pyʼỹinte aporojaʼo vaipa térã aporombyepoti upe haguére. Añetehápe, ajapopaite umi mbaʼe ojeʼevaʼekue chéve peteĩ kristiáno ndovaleiha ojapo.

LA BIBLIA CHEPYTYVÕ AKAMBIA HAG̃UA: Areko che amigoitéramo peteĩ drogadíktope ha michĩme omanovaʼekue chugui itúva. Pyharepyte peve ropytámi roñemongeta. Heta vése heʼi chéve ohechagaʼuetereiha itúvape. Ha che aikuaágui chemitã guive Ñandejára omoingove jeytaha umi omanovaʼekuépe, amombeʼu chupe Jesús omoingove jey hague umi omanovaʼekuépe ha opromete ojapo jeytaha upéva tenonderãme (Juan 5:28, 29). Haʼe chupe: “Epensamíntena, rehecha jeýta nde túvape, ha enterovete ikatúta jaikove peteĩ hardín neporãvape ko yvy ape ári”. Upéva opokoiterei hese.

 Sapyʼánte, che amígo oporandu chéve koʼã ára paháre ha oikuaase mbaʼérepa oñemboʼe pe Trinidad. Che katu ivívlia rupive amyesakã chupe pe añetegua, upearã ahechauka chupe umi téysto oñeʼẽva Jehová, Jesús ha koʼã ára paháre (Juan 14:28; 2 Timoteo 3:1-5). Añeʼẽ memévo che amígope Ñandejárare, koʼýte che apensa Jehováre.

Mbeguekatúpe, chemanduʼa jey umi mbaʼe aaprendevaʼekuére la Bíbliagui chemitãme, che tuvakuéra hetaite oñehaʼãvaʼekue chemboʼe. Sapyʼánte fiestahápe ajedroga jave che amigokuérandi, peichaháguinte chemanduʼa Jehováre. Che amigokuéra heʼíramo jepe ohayhuha Ñandejárape, ndojekuaái hesekuéra upéva. Ha che ndacherovamokõiséigui, ahechakuaa aikotevẽha añemoag̃ui jey Jehováre.

Ndahasyiete ningo jaʼe hag̃ua jaikuaaha mbaʼépa jajapovaʼerã, jajapo hag̃uánte hasy. Oĩvaʼekue umi mbaʼe ndahasýiva chéve akambia hag̃ua. Pór ehémplo, ndahasyivaʼekue chéve añepyrũ hag̃ua astudia la Biblia peteĩ ansiáno kristiáno ndive, avei aheja hag̃ua umi dróga ha che irũnguéra yma guare.

Péro ambue mbaʼépe ijetuʼuve chéve akambia hag̃ua, pór ehémplo ani hag̃ua che pochy rei. Sapyʼánte peteĩ tiémpore ajejoko, péro ndaikatúi ahejapaite ha upéva chemoñeñandu vaieterei ha apensa ndaikatumoʼãiha asẽ tenonde gotyo. Upémarõ adesidi añemongeta pe Testígo chembostudiáva ndive la Biblia. Haʼe imbaʼeporã ha ipasiénsia cherehe, ha akóinte chemokyreʼỹ. Peteĩ jey, heʼi chéve alee hag̃ua peteĩ artíkulo osẽvaʼekue rrevísta Ñemañahápe, ñanemokyreʼỹva ani hag̃ua ñanekangy. a Rohesaʼỹijo umi mbaʼe ikatúva ajapo ahechakuaa jave chepochytaha. Ajapóvo pe Ñemañahápe heʼiháicha ha añemboʼe meme rupi Jehovápe, mbeguekatúpe ajejokokuaave ani hag̃ua chepochy rei. Ha abril áño 2000-pe ajevautisa testígo de Jehováramo. Che sy ha che túva ovyʼaiterei.

UMI MBAʼE PORÃ AHUPYTÝVA: Koʼág̃a ndaiporuvéima dróga ha ndacherekokyʼavéima. Upéicha rupi chepyʼaguapy ha chekonsiénsia potĩ. Tahaʼe ambaʼapo, aha jave rreunionhápe térã aimévo che amigokuéra ndive, avyʼa ha amombaʼeve che rekove.

Aagradese Jehovápe che sy ha che ru rehe, haʼekuéra ningo akóinte ipasiensiavaʼekue ha ndeʼíri cherehe nachepohãveimaha. Avei ajepyʼamongeta Jesús heʼivaʼekuére Juan 6:44-pe: “Avave ndaikatúi ou che rendápe, che Ru chembouvaʼekue ndoguerúiramo chupe”. Avyʼaiterei ikatu haguére añemoag̃ui jey Jehováre, haʼe chegueru jey rupi.

 “Aikotevẽvaʼekue peteĩ túvare” (MARCO ANTONIO ALVAREZ SOTO)

ONASE: 1977-PE

HETÃ: CHILE

MBAʼÉPA OJAPOVAʼEKUE: OMBOPU DEATH-METAL

CHE REMBIASAKUE: Che michĩ guive aiko che sy ndive Punta Arénaspe, peteĩ puévlo oĩva Estrecho de Magallánespe, opytáva súr gotyo Américape. Che túva ha che sy ojueja arekórõ guare cinco áño, upérõ añeñandu apytaha cheaño. Upévare, aikotevẽvaʼekue peteĩ túvare.

Che sy ostudiavaʼekue la Biblia umi testígo de Jehovándi ha cheguerahámi hendive rreunionhápe Salón del Réinope. Péro che ndahaseietereivaʼekue ha pyʼỹinte sarambi ajapo tapére rohokuévo. Arekórõ guare 13 áño, ndahavéima hendive.

Upérõ chegustáma pe músika ha ahechakuaa che katupyryha voi upearã. Aguerekópe 15 áño ambopúma heavy-metal ha death-metal umi festivál, vár ha fiestahápe. Ajeheʼavaʼekue umi músiko katupyrýre ha upéicha rupi chegustáma avei umi músika klásika. Upe rire añepyrũ astudia peteĩ lugár oñemboʼehápe músika. Arekórõ guare 20 áño ava Santiago de Chílepe astudiave hag̃ua, ha upérõ asegi gueteri ambopu umi grúpo ndive heavy-metal ha death-metal.

Upéicharõ jepe, akóinte añandu aikotevẽha ambue mbaʼe añeñandu porã hag̃ua. Ha ambohovái hag̃ua upéva, añepyrũ akaʼu ha ajedroga umi che grupopegua ndive, chupekuéra ahechavaʼekue che famíliaramo. Che rreveldeterei ha upéva ojekuaavaʼekue voi cherehe: amonde umi ao hũ, che rova raguepa ha che akãrague katu ipuku haimete che kuʼa peve.

Che rrevélde rupi, pyʼỹinte aiko vai oimeraẽvandi térã chejagarra umi polisía. Peteĩ árape umi trafikánte de dróga ijarhél hína chéve ha che amigokuérape, kaʼúreve che añemoĩ hesekuéra ha chembyepoti vaipaite hikuái ha omopẽ chehegui che rova kangue.

Péro hasyve vaʼekue chéve, che nóvia ojapóva cherehe. Peteĩ díape apilla chupe che amigoite ndive ha heta áñorema voi oikóraʼe hikuái oñondive ha umi che amigokuéra oikuaáramo jepe, nomombeʼúi chéve. Ha upéva chereja vaieterei.

Aha jey Punta Arénaspe, upépe amboʼe músika ha ambopu pe violonchélo. Asegi avei agrava músika umi grúpo ombopúva ndive heavy-metal ha death-metal. Upe tiémpope aikuaa peteĩ kuñataĩ iporãitereívape, hérava Sussan ha rodesidi roiko oñondive romendaʼỹre. Tiémpo rire Sussan ohechakuaa isy ogueroviaha pe Trinidad oñemboʼéva ha che katu nahániri. Upévare oikuaase oĩ porãpa upe Trinidad oñemboʼéva. Ha che haʼe chupe japuha upéva ha ndaikatúiramo jepe ahechauka chupe la Biblia heʼíva, aikuaa mávapa ikatu ojapo upéva. Haʼe Sússanpe umi testígo de Jehová omyesakã porãtaha chupe upe téma la Biblia rupive. Ha upéi ajapo peteĩ mbaʼe heta áñorema ndajapovéiva: añemboʼe Ñandejárape ha ajerure chupe chepytyvõmi hag̃ua.

Upe riremínte, ahecha peteĩ karai ikonosídova chéve ha aporandu chupe ndahaʼéipa testígo de Jehová. Ojekuaa hese oñemondyiha chehegui, péro horýnte chéve ha ombohovái  umi mbaʼe aporandúva chupe umi rreunión ojejapóvare Salón del Réinope. Che haʼe péicha Ñandejára ombohovaiha chéve che ñemboʼe. Aha Salón del Réinope ha aguapy tapykuetépe ani hag̃ua avave cherecha. Upéicharõ jepe, heta oĩ chekuaáva imanduʼa rupi aha hague chemitãme rreunionhápe. Cheguerohory joaite hikuái ha cheañua, añeñandu porãiterei hendivekuéra. Haʼetévaicha voi aha jeýva che rógape. Ahechávo pe Testígo chemboʼevaʼekuépe la Biblia chemitãme, ajerure chupe chemboʼe jeymi hag̃ua.

LA BIBLIA CHEPYTYVÕ AKAMBIA HAG̃UA: Peteĩ árape alee Proverbios 27:11, upépe heʼi: “Ne arandúke che raʼy, upéva chembovyʼa”. Amombaʼeterei apensávo mbaʼéichapa peteĩ yvypóra jepe ikatu ombovyʼa ko arapy Apoharépe. Upépe ahechakuaa Jehová haʼeha pe túva hetaite tiémporema aikotevẽvaʼekue.

Ambovyʼasevaʼekue che Ru yvagapeguápe ha ajapose hembipota, péro heta áñorema aiko umi dróga ha vevída poguýpe. Upéi ahechakuaa mbaʼépa Jesús omboʼesevaʼekue Mateo 6:24-pe heʼírõ guare: “Avave ndaikatúi ombaʼapo tembiguáiramo mokõi patrónpe g̃uarã”. Añehaʼãrõ guare akambia hag̃ua heta mbaʼépe, tuicha chepytyvõ 1 Corintios 15:33 heʼíva: “Umi júnta vai ñandegueraha tape vaíre”. Ahechakuaa ndaikatumoʼãiha aheja umi kostúmbre vai arekóva, asegíramo ajeheʼa che amigokuéra yma guarére ha aha umi lugár haʼekuéra ijatyhápe. La Biblia heʼi porã mbaʼépa jajapovaʼerã. Upéicha rupi ahechakuaa tekotevẽha añehaʼãmbaite ajapo tekotevẽva ahejaite hag̃ua umi mbaʼe chegueraha vaíva (Mateo 5:30).

Chegustaiterei rupi pe músika, ijetuʼuvevaʼekue chéve aheja pe heavy-metal. Péro umi che amigokuéra kongregasionpegua chepytyvõ rupi, ikatuvaʼekue ajapo upéva. Ndakaʼuvéi, ndajedrogavéi, aikytĩ che akãrague, aipeʼapa che rova rague ha namondevéima ao hũ añónte. Amombeʼúrõ guare Sússanpe aikytĩseha che akãrague, haʼe oikuaaseterei mbaʼérepa ha heʼi chéve: “Aháta nendive Salónpe. Ahechase mbaʼépa pejapo upépe”. Ogustaiterei chupe umi mbaʼe ohecháva rreunionhápe ha upe riremínte oñepyrũma avei ostudia la Biblia. Tiémpo rire romenda ha 2008-pe mokõivéva rojevautisa testígo de Jehováramo. Koʼág̃a vyʼápe aservi Jehovápe che rembireko ha che sy ndive.

UMI MBAʼE PORÃ AHUPYTÝVA: Asẽ peteĩ múndo henyhẽhágui japu ha amígo itraisionérova. Chegusta gueteri umi músika, péro koʼág̃a aiporavo porãma. Umi mbaʼe ahasavaʼekue aiporu aipytyvõ hag̃ua che família ha ambue tapichápe, koʼýte mitãrusukuérape. Aipytyvõse chupekuéra ontende hag̃ua umi mbaʼe ko múndo oikuaveʼẽva haʼeha “yty” ha vaichánte iporãha (Filipenses 3:8).

Añemoag̃ui rupi Ñandejárare, atopa heta amígo añetetéva kongregasiónpe, oĩhápe pyʼaguapy ha mborayhu. Péro iporãveha, atopa pe túva aikotevẽtevaʼekue: Jehová.

[Nóta]

[Komentário oĩva páhina 21-pe]

“Añemoag̃ui jey Jehováre, haʼe chegueru jey rupi”