¿MBAʼÉPA ikatu rejapo opa mbaʼe osẽ porã hag̃ua ndéve? Upearã nepytyvõta peteĩ mbaʼe enterove jaguerekóva. ¿Mbaʼépa upéva? Enterove ikatu ñapensa mbaʼépa oguerúta ñandéve tenonderãme umi mbaʼe jadesidíva koʼág̃a.

Hetápe ijetuʼu odesidi hag̃ua opensa raẽtaramo henonderãre. ¿Mbaʼérepa? Ko múndope umi hénte oikógui koʼág̃a g̃uarãnte. Oĩ ohechakuaáva ojapóvo la Biblia heʼíva ojogueraha porãveha hogapýpe (Efesios 5:22–6:4). Péro, upearã ndohejaivaʼerã itraváho ha umi vyʼarã oiporupa chugui itiémpo ha ombotapykue ifamília. Káda día ningo jadesidi heta mbaʼe, péro ñapensavaʼerã jadesidítapa umi mbaʼe ñanembovyʼátava koʼág̃ante térãpa umi ñanembovyʼátava opa árare. ¿Mbaʼépa ikatu ñanepytyvõ jadesidi porã hag̃ua? Jajapo koʼã cuatro konsého.

1 Epensa mbaʼépa oguerúta

Repensavaʼerã mbaʼépa añetehápe oguerúta ndéve umi mbaʼe redesidíva. La Biblia heʼi: “Pe iñarandúva ohecha pe mbaʼe vai ha okañy” (Proverbios 22:3, ÑÑB). Rehechakuaáramo pe redesidítava ndoguerumoʼãiha mbaʼeve iporãva, katuete remboykéta. Péro oguerútarõ heta mbaʼe porã, reñehaʼãmbaitéta rejapo.

Reñeporanduvaʼerã: “¿Mbaʼépa oguerúta chéve un áño, diez térã veinte áño haguépe pe mbaʼe adesidítava? ¿Ojapo porãtapa cherehe? ¿Ndoperhudikamoʼãipa che famíliape térã ambue che rapichápe? Ha pe iñimportantevéva, ¿ombovyʼátapa Ñandejárape pe adesidíva? ¿Chemoag̃uivétapa hese?”. Ñandejára ohaikavaʼekue la Biblia jaikuaa hag̃ua mbaʼépa oguerohory ha mbaʼépa oguerúta ñandéve jadesidi vaíramo (Proverbios 14:12; 2 Timoteo 3:16).

2 Ndete rehecha mbaʼépa iporãve

Haʼete odesidi rangue, heta oĩ ojapóva hapichakuéra ojapóvante. Péro oĩ heta haguére ojapóva peteĩ mbaʼe, ndeʼiséi oĩ porãha. Iporãvéta ndete voi rehecháramo mbaʼépa iporãve ndéve g̃uarã. Pór ehémplo, Natalie a heʼi: “Che amendase ha aikosevaʼekue vyʼápe, péro ahechakuaa ndaikatumoʼãiha asegíramo aiko umi che kompañéro universidapegua oikoháicha. Haʼekuéra ningo enterovénte iñarandu, péro hekovai ha ndovyʼái, pyʼỹinte okambia hikuái iparéha ha che avei. Heta ahasa asy aiko haguére upéicha”.

Peteĩ árape, Natalie oñepyrũ ostudia la Biblia umi testígo de Jehovándi. Haʼe heʼi: “Umi Testígo apytépe ahecha mbaʼéichapa umi mitãrusu ha mitãkuña ovyʼa ha umi omendáva katu ojogueraha porã. Ijetuʼúramo jepe chéve, mbeguekatúpe akambia aiko lája”. ¿Mbaʼépa ohupyty upe haguére? Natalie omombeʼu: “Che ningo amendasémi peteĩ ahayhu ha arrespetávare. Ha tiémpo rire amenda peteĩ kuimbaʼe che rrelihionpeguáre.  Ñandejára omeʼẽ chéve peteĩ família iporãvéva pe che ahaʼarõvaʼekuégui”.

3 Emaña mbaʼépa oĩ ne renonderãme

Repensa rangue koʼág̃a g̃uarãrente, tekotevẽ reikuaa porã mbaʼépa rehupytyse tenonde gotyove ha mbaʼépa rejapovaʼerã upearã (Proverbios 21:5). Repensa rangue 70 térã 80 áño g̃uarãrente, repensavaʼerã ikatuha reikove vyʼápe opa árare heʼiháicha Ñandejára Ñeʼẽ.

La Biblia ohechauka Jesucristo sakrifísio rupive, Ñandejára omeʼẽha ñandéve oportunida jaikove hag̃ua opa árare (Mateo 20:28; Romanos 6:23). Jehová opromete koʼẽrõitéma oñekumplitaha hembipota ko yvy ha yvyporakuérape g̃uarã. Umi ohayhúva Ñandejárape ikatúta ohupyty jeikove opaʼỹva ko yvy ape ári peteĩ hardín neporãvape (Salmo 37:11; Revelación [Apocalipsis] 21:3-5). Ko mbaʼe ikatúta rehupyty redesidíramo repenságui ne renonderãre.

4 Embaʼapo pe rehupytysévare

Rehupyty hag̃ua umi mbaʼe oĩva tenonderãme reikuaavaʼerã Jehovápe (Juan 17:3). Umi mbaʼe reaprendéva la Bíbliagui nepytyvõta rejerovia hag̃ua Ñandejára promésa katuete oñekumplitaha. Péicha rejerovia mbaretéramo rekambiáta tekotevẽhápe Ñandejára ndeguerohory hag̃ua.

Peteĩ kuimbaʼe hérava Michael heʼi: “Arekópe 12 áño añepyrũma che kaʼu ha ajedroga. Aime peteĩ pandíllape ha apensa ndahupytymoʼãiha 30 áño. Che pochy ha nosẽporãigui chéve mbaʼeve heta vése ajesuisidamoʼã. Añehaʼãramo jepe aikuaa maʼerãpa aikove, naisentídoi chéve che rekove”. Michael oike tiémpope eskuélape, peteĩ ipandillapegua oñepyrũ ostudia la Biblia umi testígo de Jehovándi, ha haʼe odesidi avei ostudia.

Umi mbaʼe oaprendéva oipytyvõ chupe opensa hag̃ua henonderãre. Michael omombeʼu: “Aaprende ko yvýgui oikotaha peteĩ hardín neporãva ha umi hénte oikotaha pyʼaguapýpe, ndaiporiveimaha mbaʼeve omoñeñandu vaítava chupekuéra. Ha upéva ningo che ahupytyse avei. Upévare adesidi añemoag̃uivetaha Jehováre ha areko chupe che amígoramo. Astudiáramo jepe la Biblia, ajapo jey umi mbaʼe vai. Heta vése akaʼu jey ha una vés añeno peteĩ kuñándi”.

¿Mbaʼépa oipytyvõ chupe okambiaite hag̃ua upe rire? Haʼe ombohovái: “Pe chemboʼéva la Biblia chemokyreʼỹ alee hag̃ua Ñandejára Ñeʼẽ káda día ha ajeheʼa hag̃ua umi tapicha oñehaʼãvare oiko Jehová oipotaháicha. Ahechakuaa asegírõ ajeheʼa umi che amígo che pandillapeguáre nakambiamoʼãiha. Chéve g̃uarã ningo haʼekuéra che família, upéicharõ jepe adesidi ndajeheʼaveiete hesekuéra”.

Michael ohecha mbaʼépa omotenondéta ha oñehaʼã ára ha ára ojapove umi mbaʼe oipytyvõtava chupe oiko hag̃ua Ñandejára oipotaháicha. Haʼe ohupytyvaʼekue upéva, upéicharõ nde avei ikatu. Eanota umi mbaʼe rehupytyséva amo gotyove ha mbaʼépa rejapovaʼerã rehupyty hag̃ua. Emombeʼu pe rejaposéva umi nde rapicha nepytyvõtavape ha ejerure chupe tohecha mbaʼéichapa reho hese.

Ani rehaʼarõiterei reikuaave hag̃ua Jehovápe ha neñeʼẽrendu chupe. Ejapo tekotevẽva rehayhu hag̃ua chupe ha Iñeʼẽ, la Biblia. Umi oikóvape la Biblia heʼiháicha, Ñandejára opromete: ‘Opaite mbaʼe ojapóva, osẽ porãta chupe’ (Salmo 1:1-3, ÑÑB).

[Nóta]