¿Reikuaasépa mávapa añetehápe Ñandejára, mbaʼépa hembipota ha mbaʼépa ogusta chupe? Iñeʼẽ, la Biblia rupive Jehová oikuaauka ñandéve mbaʼeichaguápa haʼe. Péro oimeraẽ oleévante ndaikatúi ontende la Biblia omboʼéva. ¿Mbaʼérepa? Tuichaiterei mbaʼe ningo jaikuaa pe añetegua Ñandejáragui ha upéva haʼe naentéroipe oikuaauka. Jahechamína mbaʼépa Jesús heʼivaʼekue upévare. (Elee Mateo 11:25.)

Ko versíkulo oñepyrũ péicha: “Upérõ Jesús heʼi”. ¿Mbaʼépa oikóraʼe upe mboyve ajeve oñepyrũ péicha pe versíkulo? Upe mboyvemi Jesús ojaʼókuri umi mbohapy siuda oĩva Galiléape nomombaʼéi haguére umi milágro ojapovaʼekue upépe (Mateo 11:20-24). ¿Mbaʼéicha piko peteĩ ohechavaʼekue umi milágro Jesús ojapóva nomoirũsemoʼãi chupe? Umi hénte oñemohatã rupi haʼekuéra opensávapente, nomombaʼéi Jesús ojapovaʼekue (Mateo 13:10-15).

Jesús oikuaa porã vaʼekue ñantende hag̃ua la Biblia omboʼéva tekotevẽha mokõi mbaʼe: jaheja Ñandejára ñanepytyvõ ha ñaneumílde. Mateo 11:25-pe haʼe heʼi: “Rombotuicha opavave rovake che Ru, yvága ha yvy Ruvicha, reñomi haguére koʼã mbaʼe umi iñarandu ha iñakãporãvagui ha reikuaauka umi mitãme”. ¿Rehechakuaápa koʼág̃a mbaʼérepa jaikuaávo pe añetegua Ñandejáragui haʼeha peteĩ priviléhio haʼe voi omeʼẽva ñandéve? Jehová oreko derécho odesidívo mávapepa oikuaaukáta térã ndoikuaaukamoʼãi pe añetegua, haʼe ningo pe “yvága ha yvy Ruvicha”. Péro upéva ndeʼiséi ijarhél ha oñemohatãha haʼe heʼívapente. Upéicharõ, ¿mbaʼépa tekotevẽ jajapo oikuaauka hag̃ua ñandéve pe añetegua?

Jehová oguerohory umi iñumíldevape ha umi oñemombaʼeguasúvape katu nahániri (Santiago 4:6). Haʼe oñomi pe añetegua “umi iñarandu ha iñakãporãvagui”, térã umi tapicha ijestúdio porãgui oñembotuicháva ha oimoʼã noikotevẽiha oñepytyvõ chupe (1 Corintios 1:19-21). Péro oikuaauka “umi mitãme” térã umi oñemoag̃uívape hese ipyʼaite guive ha oñemomirĩva peteĩ mitãicha (Mateo 18:1-4; 1 Corintios 1:26-28). Jesús oikuaavaʼekue umi tapicha iñumílde ha avei umi oñemombaʼeguasúvape. Pór ehémplo, umi rrelihión omoakãva upe tiémpope ijestúdio porã ha oñemombaʼeguasu, péro nontendéi pe marandu haʼe omombeʼuvaʼekue, ndojoguaiete umi peskadórpe, haʼekuéra iñumílde rupi ontendevaʼekue Jesús omboʼéva (Mateo 4:18-22; 23:1-5; Hechos 4:13). Oĩvaʼekue avei umi irríkova ha iñarandúva ohechaukavaʼekue iñumildeha ha omoirũ Jesúspe (Lucas 19:1, 2, 8; Hechos 22:1-3).

Jahechami jeýna ko porandu: ¿Reikuaasépa mávapa añetehápe Ñandejára? Oiméramo upéicha, nembovyʼáta reikuaávo haʼe ndoikuaaukaiha pe añetegua umi heʼívape ijehe iñaranduha ko múndope, síno oikuaauka umi tapicha iñumílde ha ojeapoʼívape. Restudiáramo la Biblia reikuaaségui nde pyʼaite guive mbaʼépa omboʼe, Ñandejára nepytyvõta reikuaa porã hag̃ua chupe. Rentendévo la Biblia omboʼéva, koʼág̃ama voi revyʼáta ha ikatúta rehupyty pe jeikove opaveʼỹva Ñandejára múndo pyahúpe, oĩtahápe hustísia (1 Timoteo 6:12, 19; 2 Pedro 3:13). *