Heʼise noñembotuichái ha noñemombaʼeguasúiva. Peteĩ tapicha hekomirĩva nopensái iñimportanteveha hapichakuéragui. Avei ohechakuaa heta mbaʼe ndaikatuiha ojapo.

Moisés arakaʼeve noñemombaʼeguasúi oñemeʼẽ haguére chupe autorida. Heta tapicha ningo michĩmi jepe orekóramo podér, pyaʼeterei ojehecha hese iñumíldepa térãpa nahániri. Síglo 19-pe, peteĩ eskritór hérava Robert G. Ingersoll heʼi: “Reikuaa porã hag̃ua mbaʼeichaguápa peteĩ tapicha, remeʼẽmintevaʼerã chupe autorida”. Moisés katu ohechaukavaʼekue hekomirĩha.

Jehová omeʼẽ Moiséspe tuicha autorida omoĩvo chupe omoakã hag̃ua umi isrraelítape. Péro haʼe noñemombaʼeguasúi upe haguére. Jahechamína mbaʼéichapa osolusionavaʼekue peteĩ provléma ojerrepartítarõ guare umi erénsia (Números 27:1-11). Ko mbaʼe iñimportánte vaʼekue, ¿mbaʼérepa? Moisés odesidíva ojapo upe situasiónpe, ojesegíta ojejapo upe rire ojerreparti hag̃ua umi erénsia.

¿Mbaʼépa ojapo Moisés? ¿Opensáparaʼe haʼe omandaha ha oikuaaha mbaʼépa ojapóta? ¿Ojeroviápa ijehénte ohasáma haguére heta mbaʼe térã opensa ikatupyry ha oikuaa porãha mbaʼépa ogusta Jehovápe?

Peteĩ tapicha oñemombaʼeguasúva ojapóta upéva, péro Moisés nahániri. La Biblia heʼi: “Moisés oporandu Jehovápe mbaʼépa ojapóta” (Números 27:5, NM). ¡Epensamíntena!, 40 áñorema omoakã Isrraélpe ha ndojeroviái ijehénte, síno Jehováre. ¡Ajépa hekomirĩete!

Moisés nopensaivaʼekue haʼénte omandavaʼerãha. Jehová oiporavórõ guare ambue isrraelítape iprofetarã haʼe ndaipochýi, ovyʼaiterei katu (Números 11:24-29). Haʼe ohendu porãnte avei isuégro heʼírõ guare chupe oheja hag̃ua ótro oipytyvõ chupe hembiapópe (Éxodo 18:13-24). Upéi ijedavévo ohóvo, jepe imbarete gueteri, ojerure Jehovápe oiporavóma hag̃ua peteĩ opytavaʼerã hendaguépe. Jehová oiporavo Josuépe ha Moisés oipytyvõ chupe ipyʼaite guive. Ha ndahaʼéi upéva añónte, haʼe ojerure voi umi isrraelítape ohendu hag̃ua Josuépe, upe kuimbaʼe omoakã ha omoingétava chupekuéra pe Yvy Oñeprometevaʼekuépe (Números 27:15-18; Deuteronomio 31:3-6; 34:7) Moiséspe g̃uarã tuichaiterei mbaʼe Jehová oiporavo haguére chupe omoakã hag̃ua ipuévlope. Upéicharõ jepe, iñimportanteve vaʼekue chupe g̃uarã oipytyvõ umi isrraelítape.

Ndovaleiha ñañembotuicha térã ñañemombaʼeguasu jareko haguére autorida. Jehová omombaʼeve isiervokuérape hekomirĩ haguére, ndahaʼéi ikatupyry haguére (1 Samuel 15:17). Ñanderekomirĩramo ñahendúta ko konsého: “Ejerovia Ñandejárare nde pyʼaite guive, ha ani ndejehe añónte” (Proverbios 3:5, 6).

Moisés ehémplo ñanemboʼe avei ani hag̃ua ñamombaʼeterei pe autorida térã priviléhio jarekóva.

¿Iporãpa jasegi Moisés ehémplo? Si, iporã. Ñanderekomirĩramo, ñande rapichakuéra ovyʼavéta ñanendive ha ndahasymoʼãi chupekuéra oñemboja hag̃ua ñane rendápe. Péro pe iporãvéva, Jehová ñandeguerohory ha ñanderayhu, haʼe voi ningo ohechauka ñandéve hekomirĩha (Salmo 18:35). La Biblia heʼi: ‘Ñandejára oñemoĩ umi oñembotuicháva rehe; upe oñemomirĩvape katu Haʼe ohechauka ipyʼaporãha’ (1 Pedro 5:5). Koʼýte jaikuaávo koʼã mbaʼe, ñanemomýi jasegi hag̃ua Moisés ehémplo.