Mborayhu heʼise peteĩ mbaʼe porã ñañandúva ñande rapicháre. Peteĩ tapicha oporohayhúva ohechauka umi mbaʼe heʼíva ha ojapóvare, sapyʼánte ijetuʼúramo jepe upéva.

Moisés ohechaukavaʼekue ohayhuha Ñandejárape akóinte iñeʼẽrendúvo chupe. La Bíbliape, 1 Juan 5:3 heʼi: “Jahayhu Ñandejárape heʼise ñakumpliha imandamiénto”. Moisés ojapo tahaʼe haʼéva Jehová ojeruréva chupe. Por ehémplo, ojerurérõ guare chupe oho hag̃ua oñeʼẽ pe faraón Egiptoygua ipoderosoitévandi, haʼe ojapo, ha heʼívo chupe oipyso hag̃ua ivastón pe már Rojo ári, ojapónte avei. Moisés ojapovaʼekue opa mbaʼe Jehová ojerurehaichaite chupe (Éxodo 40:16).

Moisés ohechaukavaʼekue avei ohayhuha umi isrraelítape. Haʼekuéra ohechakuaa Moisés rupive Jehová oisãmbyhyha chupekuéra ha upévare iprovléma jave oñemboja hikuái hendápe. La Biblia heʼi: “Hetãyguakuéra oĩ Moisés renondépe pyhareve guive kaʼaru peve” (Éxodo 18:13-16, ÑÑB). Mbaʼeichaitépa oiméne Moisés ikaneʼõ peteĩ ára pukukue oñemoĩvo ohendu umi isrraelítape, péro ojapo vyʼapópe ohayhúgui chupekuéra.

Moisés ndahaʼéi ohendúnteva umi isrraelítape, síno oñemboʼe avei hesekuéra. Oñemboʼe umi otrata vaívare jepe chupe. Pór ehémplo, iñermána Míriam oñeʼẽ vaírõ guare Moisés rehe, Jehová okastiga chupe onohẽmbávo hese lépra. Moisés ovyʼa rangue upévare, pyaʼe oñemboʼe Jehovápe iñermánare. Haʼe heʼi: “Ajerure asy ndéve, che Jára, emonguerána chupe” (Números 12:13, ÑÑB). ¡Ajépa oporohayhukuaaite Moisés!

Jahayhuvaʼerãha Ñandejárape ñane ánga rugua guive, upéva ñanemomýita jajapo hag̃ua hembipota ñande “pyʼaite guive” (Romanos 6:17). Péicha ñaneñeʼẽrendúramo, ñambovyʼaitereíta Jehovápe (Proverbios 27:11). Jaservíramo chupe ñande pyʼaite guive, ojapo porã ñanderehe. Ñande voi javyʼa jajapóvo umi mbaʼe Jehová oguerohorýva (Salmo 100:2).

Jahayhuvaʼerã avei ñande rapichakuérape. Peteĩ ñane amígo térã ñane hénte omombeʼu jave ñandéve umi mbaʼe ohasáva, japorohayhukuaáramo ñahendu porãta chupe, ñañemoĩta ilugárpe ha jahechaukáta jajepyʼapyha hese.

Moisés ojapo haguéicha, ñande ikatu avei ñañemboʼe umi ñande rapicha jahayhuetévare. Sapyʼánte ndajaikuaái mbaʼépa jajapóta ñande rapichakuéra rehehápe ha jaʼe chupekuéra: “Ambyasyete ningo, ndaikuaái mbaʼéichapa ikatu roipytyvõ, péro añemboʼéta nderehe Jehovápe”. Aníkena nderesarái, “peteĩ kuimbaʼe hekojojáva oñemboʼéramo, upe ñemboʼe oreko podér ha añetehápe ikatu oipytyvõ umi héntepe” (Santiago 5:16, NM). Ñane ñemboʼe ikatu omomýi Jehovápe ojapo hag̃ua peteĩ mbaʼe nopensaivaʼekue ojapo. Upéicharõ tuichaiterei ñaipytyvõñaína umi jahayhúvape ñañemboʼéramo hesekuéra. *

¡Ajépa hetaite mbaʼe ikatu ñaaprende Moisésgui! Iñimperféktoramo jepe ñandéicha, ohechauka mbaʼéichapa ojerovia, hekomirĩ ha oporohayhu. Ñañehaʼãkena jasegi iñehémplo, upéicha jahupytýta heta mbaʼe porã ñande ha ñande rapichakuéra (Romanos 15:4).