¡AJÉPA añetete ko téxto heʼíva! Ko múndope ningo “ñambaʼapo pohýi ha jahasa asy”. Upéicha rupi oĩ oñeporandúva ikatúnepa jaiko vyʼápe.

Jahechamína Maria ehémplo. Haʼe ningo akóinte ikyreʼỹ ha iguápava, péro koʼág̃a oreko 84 áño ha ndaikatuvéima osẽ haʼeño hógagui. Haʼe iñarandu ha ikatupyry, péro hete nomeʼẽvéima ojapo hag̃ua heta mbaʼe. ¿Mbaʼéicha piko ohaʼarõta mbaʼeve iporãva upe situasiónpe?

¿Reñeñandúpa nde avei upéicha? Ikatu oime reñeporandúmava maʼerãpa jaikove. Ikatu rejapo hína peteĩ traváho ipohýi ha ndaigústoiva ha avave ndohechakuaái mbaʼeichaitépa reñehaʼã. Térã oho porãramo jepe ndéve heta mbaʼépe, rejepyʼapy nerenonderãre; térã ikatu sapyʼánte reñeñandu neaño, reñembyasy, pyʼỹinte reiko vai nde rogapýpe. Ikatu avei oime omano ndehegui peteĩ rehayhúva. Péicha oiko kuri André rehe. Haʼe ojepokuaaiterei kuri itúvare ha upeichaháguinte ou hasyete chugui ha omano. Upéva oheja vaieterei chupe ha heʼi voi arakaʼeve ndovyʼapaveimaha.

Tahaʼe haʼéva umi mbaʼe ñanembohasa asýva, jaikuaase ikatúnepa jaiko vyʼápe ko múndope. Jesucristo ombohovái ñandéve upéva. Haʼe ohasa vaʼekue heta mbaʼe ijetuʼúva ko yvy ape ári, upéicharõ jepe ovyʼa ha ojapo heta mbaʼe omoñeñandu porãva chupe. Jasegíramo iñehémplo, ikatúta avei ñande jajapo upéicha.