JAHECHA haguéicha pe ótro artíkulope, Jesús oiko vaʼekue vyʼápe ha oikuaa maʼerãpa oikove. Ñande avei javyʼaséramo, jasegi vaʼerã Jesús ehémplo ha jajapo umi konsého omeʼẽva.

Jahechaháicha 1 Juan 2:6-pe, Jehová ojerure ñandéve jaiko hag̃ua Jesús oiko haguéicha. Upéva heʼise jasegi vaʼerãha iñehémplo opaite mbaʼépe ha ñaneñeʼẽrendu chupe. Jajapóramo upéicha, Ñandejára ñandeguerohorýta ha jaikóta vyʼápe.

Jesús omeʼẽ vaʼekue heta konsého ñanepytyvõtava jaiko hag̃ua haʼe oiko haguéicha. Umi konsého haʼe omeʼẽ kuri oñemoñeʼẽrõ guare peteĩ sérro ári guive. Ñahesaʼỹijomína mbohapy umíva apytégui ha jahecha mbaʼéichapa ikatu jajapo.

MBAʼÉICHAPA ÑANEPYTYVÕ KO KONSÉHO JAVYʼA HAG̃UA:

Jesús ohechauka yvyporakuéra onase guive voi oikotevẽha oikuaa Ñandejárape. Upéicha rupi jaikuaaseterei koʼã mbaʼe: ¿Maʼerãpa jaikove? ¿Mbaʼérepa ojehasa asyete ko múndope? ¿Ojepyʼapýpa Ñandejára ñanderehe? ¿Mbaʼépa oiko ñandehegui ñamano rire? Ñambohováiramo añoite koʼã porandu ikatúta jaiko vyʼápe. Jesús oikuaa porã Ñandejára Ñeʼẽ añoite ikatuha ñanepytyvõ ñambohovái hag̃ua koʼã porandu. Peteĩ jey oñemboʼérõ guare Itúvape, heʼi: “Ne ñeʼẽ hína pe añetegua” (Juan 17:17, NM). ¿Ikatu piko la Biblia ñanepytyvõ jaikuaa porãve hag̃ua Ñandejárape?

TEMBIASAKUE:

Peteĩ mitãrusu hérava Esa haʼe vaʼekue kantánte peteĩ grúpo de rock ifamósovape. Upéicharõ jepe haʼe ndovyʼapái. Esa heʼi: “Chegustáramo jepe pe ajapóva, haʼete chéve aiko reínteva ha ajapose ambue mbaʼe chemoñeñandu porãtava”. Tiémpo rire haʼe oikuaa peteĩ testígo de Jehovápe, ha heʼi: “Ijuru ramóvaicha aporandu chupe umi mbaʼe aikuaaséva, ha amombaʼeterei ahechávo mbaʼéichapa la Biblia rupive ombohovái chéve umi mbaʼe. Upévare añepyrũ astudia hendive la Biblia”. Umi mbaʼe oaprendéva opokoiterei hese ha omomýi chupe oñemeʼẽ hag̃ua Jehovápe. Esa omombeʼu: “Yma aiko vaʼekue che akãre ha nasẽi provlémagui, péro koʼág̃a aiko vyʼápe ha aikuaa maʼerãpa aikove”. *

MBAʼÉICHAPA ÑANEPYTYVÕ KO KONSÉHO JAVYʼA HAG̃UA:

Jaiporiahuverekóramo ñande rapichakuérape, ñanemomýita ñanembaʼeporã ha ñanembaʼerechakuaa hag̃ua hendivekuéra. Jesús oiporiahuvereko vaʼekue umi oikotevẽvape ha oguapyeterei hese umi hénte ohasáva. Upévare nohaʼarõi vaʼekue ojejerure raẽ chupe oporopytyvõ hag̃ua (Mateo 14:14; 20:30-34). Jajapóramo haʼe ojapo haguéicha ñañeñandu porã ha jaikóta vyʼápe (Hechos 20:35). Opa mbaʼe jaʼévape ikatu jahechauka japoroporiahuverekoha ha ñaipytyvõ umi oikotevẽvape. Péro ikatu oĩ oñeporandúva: “¿Añetehápe piko añeñandu porãvéta aiporiahuverekóramo che rapichakuérape?”.

TEMBIASAKUE:

Carlos ha hembireko Maria oiporiahuverekokuaaiterei hapichakuérape. Maria túva ningo viúdo, upéi hasykatu ha peteĩ tiémpore oiko vaʼekue tupápe. Upémarõ Maria ha iména ogueraha chupe hógape oñangareko porãve hag̃ua hese. Sapyʼánte okeʼỹre ikoʼẽmba  hikuái hendive, pyʼỹinte avei huguy asuka ojupipaite ha ombodipara vaʼerã chupe hikuái ospitálpe. Maria ha Carlos heʼi sapyʼánte ikaneʼõmaha, péro Jesús heʼi haguéicha, ovyʼa ha oñeñandu porã hikuái oikuaágui ojapoha ikatúva guive oñangareko porã hag̃ua itúvare.

MBAʼÉICHAPA ÑANEPYTYVÕ KO KONSÉHO JAVYʼA HAG̃UA:

Pe ñeʼẽ griégo ojetradusíva “ipyʼaguapýva” heʼise “ohekáva pyʼaguapy”. ¿Mbaʼéichapa upéva ñanepytyvõta javyʼa hag̃ua? Jahekáramo pyʼaguapy, jajogueraha porãta opavavéndi. Upévare iporã jajapo ko konsého heʼíva: “Peñehaʼãmbaitékena peiko pyʼaguapýpe enterove pende rapichakuéra ndive” (Romanos 12:18, NM). Heʼívo koʼápe “enterove pende rapichakuéra ndive”, oikéma hína ñane hentekuéra ha ambue tapicha ndahaʼéiva ñane rrelihionpegua jepe. ¿Añetehápe piko javyʼavéta jaikóvo pyʼaguapýpe ñande “rapichakuéra ndive”?

TEMBIASAKUE:

Nair ohasa vaʼekue heta mbaʼe ijetuʼúva hogapýpe, upéicha rupi hasy kuri chupe oiko hag̃ua pyʼaguapýpe opavavéndi. Ojapóma 15 áño iména oheja hague chupe, ha upe guive omongakuaa haʼeño imembykuérape. Peteĩ imembykariaʼy oiporu dróga ha pyʼỹinte ipochy vaipaite ha oamenasa chupe ha heindýpe. Nair ohechakuaa la Biblia oipytyvõha chupe koʼã situasión ijetuʼuetévape oheka hag̃ua pyʼaguapy. Ojodiskuti térã oiko vai rangue vyroreíre, oñehaʼãmbaite imbaʼeporã ha ani hag̃ua iñeʼẽ pohýi (Efesios 4:31, 32). Oñehaʼã rupi oheka pyʼaguapy, ojogueraha porãve hogapýpe ha ambue hapichakuérandi.

Jasegíramo umi konsého Jesús omeʼẽ vaʼekue, katuete javyʼáta ha ñañeñandu porãta. Péro upearã tekotevẽ jaikuaa mbaʼépa ñaneraʼarõ tenonderãme. Koʼag̃aitévo ningo enterovénte ikatu ñande rasy, ñande tuja ha ñamano. Ha ñambyasýramo jepe, ñandénte ndaikatúi ñakambia upéva.

Péro oĩ peteĩ notísia iporãitereíva. Jehová oreko heta mbaʼe porã umi oñehaʼãvape g̃uarã oiko “Jesucristo oiko haguéicha”. Haʼe opromete omoĩtaha peteĩ múndo pyahu, ha upépe ojeikóta haʼe oipota haguéicha iñepyrũmbýpe. Ojeikóta opa árare ha ndaiporimoʼãvéima hasýva. Iñeʼẽ la Biblia heʼi: “¡Péina! Ñandejára róga oĩta yvyporakuérandi, haʼe oikóta hendivekuéra ha haʼekuéra haʼéta ipuévlo. Ha Ñandejára voi oĩta hendivekuéra. Haʼe omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma” (Revelación [Apocalipsis] 21:3, 4, NM).

Maria rehe ñanemanduʼa kuri pe ótro artíkulope, haʼe oreko 84 áño ha ipyʼarory opensávo mbaʼéichapa oñekumplíta umi promésa. Ha nde, ¿reikuaasevépa umi mbaʼe porã jahupytýtava Ñandejára Rréino poguýpe? (1 Timoteo 6:19.) Upéicharõ, romokyreʼỹ reñeʼẽ hag̃ua umi testígo de Jehová ndive térã rehai umi ojapóvape ko rrevísta. *