La Biblia ningo Ñandejára Ñeʼẽ. Haʼete peteĩ kárta oguerukáva ñandéve ñande ru ñanderayhuetéva (2 Timoteo 3:16). Upépe Ñandejára omombeʼu ñandéve mbaʼépa jajapo vaʼerã ñandeguerohory hag̃ua, mbaʼérepa oheja oiko heta mbaʼe vai ha mbaʼépa ojapóta yvyporakuéra rehehápe. Péro umi rrelihión japu omoakãva nomyesakãi la Biblia heʼíva ha upéicha rupi heta tapicha oimoʼã arakaʼeve ndaikatumoʼãiha ontende (Hechos 20:29, 30).

Ñandejára Jehová oipota jaikuaa porã chupe ha upévare omeʼẽ ñandéve peteĩ lívro ikatu vaʼerãichagua ñantende. (Elee 1 Timoteo 2:3, 4.)

Jehová omeʼẽ ñandéve la Biblia ha ñanepytyvõ ñantende hag̃ua. Haʼe ombou Jesúspe ñanemboʼe hag̃ua (Lucas 4:16-21). Jesús omyesakã porã vaʼekue Ñandejára Ñeʼẽ ha upearã oiporu umi ambue téxto heʼíva. (Elee Lucas 24:27, 32, 45.)

Jesús oforma vaʼekue pe kongregasión kristiána ojesegi hag̃ua ojejapo pe tembiapo haʼe voi omoñepyrũ vaʼekue (Mateo 28:19, 20). Koʼág̃a, umi omoirũ añetéva Jesúspe, vyʼápe oipytyvõ umi héntepe ontende hag̃ua la Biblia omboʼéva Ñandejáragui. Rentendeséramo la Biblia, eñeʼẽ umi testígo de Jehová ndive. (Elee Hechos 8:30, 31.)