Ohasa setecientos áño oñekumpli hag̃ua proféta Miqueas heʼi vaʼekue: Belénpe onase Jesús, haʼéva hína pe Mesías. Upéi áño 29-pe haʼe orekórõ guare 30 áño rupi, oñekumpli avei proféta Daniel heʼi vaʼekue hese. Jesús ojevautisa ha Ñandejára oiporavo chupe espíritu sánto rupive. Péicha itiempoitépe ou pe “ñemoñare” térã pe Mesías aretéma oñehaʼarõva.

Upe riremíntema, Jesús oñepyrũ omombeʼu “umi marandu porã oñeʼẽva Ñandejára Rréinore” (Lucas 8:1, NM). Umi proféta heʼi haguéicha haʼe imbaʼeporã, oporohayhu ha ojepyʼapy umi héntere. Omboʼe heta mbaʼe ideprovéchotava opavavépe ha omonguera heta tapichápe ‘opaichagua mbaʼasýgui’. Ojapóvo koʼã mbaʼe ohechauka Ñandejára oguerohoryha chupe (Mateo 4:23). Peteĩ disípulo heʼi vaʼekue: “Rotopa pe Mesíaspe”, ha umi ojeroviáva guive Jesús rehe, tahaʼe imitãva térã ijedáva, ohechakuaa siertoha upéva (Juan 1:41, NM).

Jesús omombeʼu vaʼekue mbaʼépa oikóta haʼe ogoverna mboyvemi ko yvy ape ári. Heʼi oikotaha gérra, yvyryrýi ha hetave mbaʼe vai. Upévare heʼi: “Peñatende porãke peikóvo” (Marcos 13:37, NM).

Jesús ningo perfékto vaʼekue ha siémpre iñeʼẽrendu Ñandejárape. Upéicharamo jepe oĩ heta ndaijaʼéiva hese ha upévare ojejuka chupe. Jesús omeʼẽ rupi hekove perfékto ñanderehehápe, ikatúta jaiko opa ára g̃uarã peteĩ hardín neporãvape. Péicha haʼe omeʼẽ jey ñandéve pe oportunida Adán ha Eva operde vaʼekue.

Umi proféta heʼi haguéicha Jesús omano péro oikove jey tres día haguépe ha oiko chugui peteĩ ánhel ipoderósova. Upéi ojechauka quinientos disípulo rasápe. Ha oho mboyve yvágape omanda idisipulokuérape oikuaauka hag̃ua umi notísia porã oñeʼẽva hese ha Irréinore “umi hénte opa tetãyguápe” (Mateo 28:19, NM). ¿Okumpli porãpa hikuái pe tembiapo oñemeʼẽ vaʼekue chupekuéra?

(Oñeguenohẽ koʼã lívrogui oĩva la Bíbliape: Mateo, Marcos, Lucas, Juan ha 1 Corintios.)