¿Omombaʼépa Ñandejára isiervokuérape oñehaʼã haguére ojapo hembipota? Oĩ heʼíva nahaniriha, ha heʼi voi Ñandejára ndojepyʼapyiha ñanderehe. Péro tuichaiterei ojavy umi heʼíva upéicha, haʼekuéra ndoikuaaporãinte Ñandejárape. La Biblia ohechauka porã Jehová hekojojaha ha omombeʼu avei omombaʼetereiha isiervokuéra oñehaʼãvape oservi chupe ipyʼaite guive. Jahechamína apóstol Pablo heʼíva Hebreos 11:6-pe.

¿Mbaʼépa jajapo vaʼerã Jehová ñandeguerohory hag̃ua? Pablo ohai: “Ndajajeroviáirõ, Ñandejára ni mbaʼevéicharõ nañandeguerohorymoʼãi”. Pablo ndeʼíri ndajajeroviáiramo “ijetuʼutaha” Ñandejára ñandeguerohory hag̃ua, síno heʼi voi “ni mbaʼevéicharõ”. Upéicharõ, iñimportanteterei jajerovia Ñandejárare ñande pyʼaite guive haʼe ñanemombaʼe hag̃ua.

Oĩ mokõi mbaʼe tekotevẽva jajapo jahechauka hag̃ua jajeroviaha Ñandejárare. Primero, jaguerovia vaʼerã haʼe oexistiha. Ndajagueroviáiramo upéva, ndaikatumoʼãi voi jajerovia hese. Péro ndahaʼéi upéva añónte jajapo vaʼerã, jaʼe porãsérõ g̃uarã, umi demónio jepe oguerovia Ñandejára oexistiha (Santiago 2:19). Jahechauka hag̃ua jajeroviaha hese, jaiko vaʼerã haʼe oipotaháicha ha jajapo hembipota (Santiago 2:20, 26).

Segundo, jaguerovia vaʼerã Ñandejára “omyengovia porãha”. Umi ojerovia mbaretéva Ñandejárare ha oñehaʼãva ojapo hembipota, oikuaa porã ndopytareimoʼãiha umi mbaʼe ojapóva chupe g̃uarã (1 Corintios 15:58). ¡Mbaʼéicha voi piko jajeroviáta Jehováre ndajagueroviáiramo haʼe omombaʼeha jajapóva hesehápe, ni omyengovia porãtaha ñandéve! (Santiago 1:17; 1 Pedro 5:7.) Umi heʼíva Ñandejára ndojepyʼapyiha ñanderehe ha nomombaʼeiha umi mbaʼe jajapóva, añetehápe ndoikuaaporãinte chupe.

Pablo heʼi voi Jehová omyengovia porãha “umi oñehaʼãvape ipyʼaite guive” ojapo hembipota. Pe ñeʼẽ griégo ojetradusíva ‘oñehaʼãva ipyʼaite guive’, heʼise “oñemoag̃uíva Ñandejárare ha omombaʼeguasúva chupe”. Ótra rreferénsia katu heʼi pe ñeʼẽ griégo ojeskrivi lája ohechaukaha avei tekotevẽha ñañekonsentra upévare añoiténte. Añetehápe, Jehová omyengovia porã umi omombaʼeguasúvape chupe, ojeroviágui hese ha ohayhúgui chupe ikorasõ mbytete guive (Mateo 22:37).

¿Mbaʼéichapa Jehová omyengovia umi omombaʼeguasúvape chupe? Haʼe ohechauka ñanderayhu ha imbaʼeporãha oprometévo ñandéve jaikotaha opa árare, peteĩ hardín neporãmba jepévape ko yvy ape ári (Revelación [Apocalipsis] 21:3, 4). Koʼág̃ama voi jahupyty heta mbaʼe porã Jehovágui jaservíramo chupe ñande pyʼaite guive. Haʼe ñanepytyvõgui Iñeʼẽ ha ijespíritu sánto rupive, ikatu jaiko vyʼápe (Salmo 144:15; Mateo 5:3).

Jehová ningo omombaʼeterei isiervokuéra iñeʼẽrendu ha oservívape chupe. ¡Mbaʼéicha voi piko nañañemoag̃uisemoʼãi hese jaikuaávo koʼã mbaʼe! ¿Mbaʼépa rejapo vaʼerã rejeroviave hag̃ua Ñandejárare? Iporãitereíta reñehaʼãramo reikuaave chupe, ha rehecháta haʼe omyengovia porãha ndéve.