¿Ndépa reguerovia la Biblia heʼívo oñemoingove jeytaha umi omano vaʼekuépe? * Javyʼaitereíta ningo jahecha jeýrõ umi jahayhúva omano vaʼekuépe, péro ¿ikatúne piko oiko upéva? Jaikuaa hag̃ua, jahechami Jesús remimboʼekuéra ehémplo.

Umi apóstol oguerovia vaʼekue oñemoingove jeytaha umi omano vaʼekuépe. ¿Mbaʼérepa? Primero, oikuaágui Imboʼeharakuéra voi oñemoingove jey hague. Umi apóstol, ha upéi “quinientos ermánorupi” avei, ohecha kuri Jesúspe oñemoingove jey rire (1 Corintios 15:6). Avei Mateo, Marcos, Lucas ha Juan kuatiañeʼẽme opytapaite rrehistrádo Jesús oñemoingove jey hague, ha ymaite guive oĩ ogueroviáva upéva (Mateo 27:62–28:20; Marcos 16:1-8; Lucas 24:1-53; Juan 20:1–21:25).

Segundo, umi apóstol ohecha mbaʼéichapa Jesús omoingove jey umi omanóvape, por ehémplo ohecha hikuái upe oiko vaʼekue Naínpe, Capernáumpe ha avei Betániape (Lucas 7:11-17; 8:49-56; Juan 11:1-44). Jahecháma haguéicha pe ótro artíkulope, Jesús omoingove jey vaʼekue iñamígo Lázarope. Jahechavemína mbaʼépa oiko raʼe upérõ.

Cuatro día Lázaro omano haguépe, Jesús heʼi Mártape: “Ne ermáno opuʼã jeýta”. Ha haʼe heʼi: “Che aikuaa oñemoingove jeytaha chupe”, péro haʼe oimoʼã oñemoingove jeytaha Lázarope pe ára pahápe. Upémarõ Jesús heʼi porã Mártape: “Che hína pe ñemoingove jey ha che rupive oikove jey umi hénte”, ha upe riremínte omborresusita Lázarope. ¡Mbaʼeichaite piko ovyʼáne raʼe Marta ohechávo upéva! (Juan 11:23-25.)

Péro, ¿moõpa oĩ hína raʼe Lázaro omanórõ guare umi cuatro día aja? Haʼe ndeʼíri ni nontendekái oho hague ótro ládo. Haʼe ndeʼíri ijespíritu oho hague yvágape Ñandejára rendápe ha mbaretépe Jesús ogueru jey hague chupe upégui. Péro, ¿moõ piko oĩ raʼe upéicharõ? Haʼe opytuʼúnte kuri pe sepultúrape (Eclesiastés 9:5, 10).

Ñanemanduʼa vaʼerã Jesús heʼi hague umi omanóva haʼetenteha okéva hína, ha oñemoingove jeývo haʼete oñemombáyva. La Biblia omombeʼu Jesús heʼi hague: “‘Ñane amígo Lázaro oke hína,  péro che aháta amombáy chupe’. Upévo idisipulokuéra heʼi: ‘Ore Ruvicha, oimérõ oke hína okueráta’. Añetehápe Jesús heʼi chupekuéra Lázaro omanomaha. Péro haʼekuéra oimoʼã haʼe heʼiha Lázaro okenteha. Upémarõ Jesús heʼi porã chupekuéra: ‘Lázaro omanóma’” (Juan 11:11-14). Jesús omoingove jey kuri Lázarope, ha péicha omeʼẽ peteĩ rregálo iporãitereíva iñermanakuérape.

Jesús oĩrõ guare ko yvy ape ári, omoingove jey vaʼekue heta omano vaʼekuépe, ha upéva ohechauka ñandéve mbaʼépa haʼe ojapóta ogoverna vove Ñandejára Rréinope. * Haʼe ogoverna vove yvága guive ko yvy, omoingove jeýta umi opytuʼúvape hína “sepultúrape”. Upévare heʼi: “Che hína pe ñemoingove jey ha che rupive oikove jey umi hénte”. ¡Epensamíntena mbaʼeichaitépa javyʼáta jahecha jeývo umi jahayhúva omano vaʼekuépe, ha haʼekuérama katu ovyʼáta ñanendive! (Lucas 8:56.)

Jesús heʼi Mártape: “Pe ojeroviáva cherehe omanóramo jepe oikove jeýta, ha entéro oikovéva ha ojeroviáva cherehe nomanomoʼãi arakaʼeve” (Juan 11:25, 26). Jesús ogoverna vove mil áñore, hetápe omoingove jeýta ha omeʼẽta chupekuéra oportunida oikove hag̃ua opa árare, péro upearã ojerovia vaʼerã hese hikuái.

Jesús oñeʼẽ rire Mártandi pe ñemoingove jeýre, oporandu chupe: “¿Ndépa reguerovia upéva?”, ha Marta heʼi chupe: “Aguerovia Karai, che aguerovia nde haʼeha pe Cristo, Ñandejára Raʼy” (Juan 11:26, 27). ¿Ndépa mbaʼe ere? ¿Rejeroviasépa avei Mártaicha oñemoingove jeytaha umi omano vaʼekuépe? Oimérõ upéicha, reaprende vaʼerã mbaʼe esperánsapa Ñandejára oreko yvyporakuérape g̃uarã (Juan 17:3; 1 Timoteo 2:4). Reikuaavévo umi mbaʼe porã Ñandejára ojapótava ñanderehehápe, katuete rejeroviavéta hese. Ejeruréna peteĩ testígo de Jehovápe tohechauka ndéve mbaʼépa heʼive la Biblia ko téma rehe. Haʼekuéra ningo vyʼápe nepytyvõta reikuaave hag̃ua mbaʼe esperánsapa oreko umi omano vaʼekue.