Anase vaʼekue Letonia kapitálpe, hérava Riga. Che sy ningo katólika, ha che ermána ha che roiko vaʼekue hendive. Rohómi tupaópe oñemboarete javénte umi sántope, péro che ajeroviáva oexistímante vaʼerãha Ñandejára. Upéicharõ jepe, chemitãrusúpe añekonsentrave ótra kósare.

Che sy ohechakuaa chéve chegustaha adesarma ha upéi aarma jey che kosakuéra. Ha ógape areko heta mbaʼe ikatúva adesarma, upévare mama siémpre chevihila ha ndacherejái cheaño ógape. Añentretene hag̃ua ojogua chéve peteĩ hugéte ojejapóva metálgui, ha upéva che ikatu aarma ha adesarma che gustoitépe. Péro ndahaʼéi upéva añónte la chegustáva, chetavyete avei umi mótore. Che sy cheanota apartisipa hag̃ua peteĩ karréra de mótope, hérava Zelta Mopēds (El ciclomotor de oro). Ha upéicha añepyrũ ahaʼã karréra móto ári, primero aiporúnte ciclomotor (peteĩ eskúter joguaha) ha upéi aiporúma umi móto tuichavéva.

Pyaʼe voi aaprende upe depórte ipeligrosoitéva ha sapyʼaitépe chefamósoma. Letóniape tres vése agana umi karréra de móto ojejapóva jepi, ha dos vése agana ojejapórõ guare umi país bálticope.

Chefamosove jave, che nóvia Evija otopa peteĩ puvlikasión ojapóva umi testígo de Jehová. Haʼe omyenyhẽ pe kupón orekóva upe puvlikasión ojerure hag̃ua peteĩ estúdio vívliko, ha oguerahauka. Upe riremínte mokõi Testígo oúma omboʼe hag̃ua chupe la Biblia. Upérõ ore noromendái gueteri, ha chéve nacheinteresaguasúi mbaʼeveichagua rrelihión, péro ndaproivíri chugui ostudia la Biblia.

Tiémpo rire, umi Testígo omboʼéva la Biblia che rembireko Evíjape, cheinvita ahendu hag̃ua umi mbaʼe omboʼéva hikuái ha upémarõ aguapy ahendu, ha chegusta umi  mbaʼe heʼíva. Arakaʼeve ndacheresaraimoʼãi peteĩ téxto ahendu vaʼekuégui. Upéva hína Salmo 37:10, 11, omombeʼúva ko yvýgui oikotaha peteĩ hardín neporãva. Upe téxto heʼi: “Koʼẽrõitéma opáta umi iñañáva, remañáta pe oĩ haguépe ha nderetopamoʼãvéima hesekuéra. Péro umi ipyʼaporãvape oñemeʼẽta ko yvy, ha oikóta hikuái pyʼaguapýpe” [NM].

Upe guive aikuaaseterei la Biblia omboʼéva, ha astudiavévo ahávo, ahechakuaa heta rrelihión nomboʼeiha upépe oĩháicha. Péro ahecharamoiterei mbaʼéichapa la Biblia omyesakã porã heta mbaʼe, ha ndahasýi ñantende hag̃ua.

Astudia rire la Biblia ahechakuaa Jehová omombaʼetereiha ñande rekove (Salmo 36:9). Ha upéva chemopensa che profesión rehe. Upépe ningo che ajapeligraiterei. Koʼág̃a añemeʼẽséma Jehovápe che pyʼaite guive ha ndajaposevéima upéva. Igústoramo jepe chéve chefamóso, chepláta ha ahaʼã pe karréra, nachembovyʼapavéima umíva.

Áño 1996-pe, aha peteĩ asambléa internasionál ojapóvape umi testígo de Jehová peteĩ siuda héravape Tallin (Estonia), opytáva ag̃uiete peteĩ lugár che ahaʼã haguégui karréra móto ári. Upe asambléape ahecha mbaʼéichapa heta hénte opa tetãygua ijaty ha ovyʼajoa oñondivepa. Upépe aime jave, okañy ivolsón peteĩ kuñakaraígui, che haʼe voi ndotopamoʼãveimaha. Péro ni ndagueroviaséi ahechávo ótra testígo de Jehová heʼírõ guare chupe haʼe otopa hague, ha omeʼẽ jey chupe ivolsón otopa hagueichaite, mbaʼevete ndofaltái. Upépe ahechakuaa añetehápe umi Testígo oikoha la Biblia heʼiháicha. Evija ha che rosegi rostudia ha roikuaave Jehovápe, ha 1997-pe rojevautisa.

Umi che amígo ohaʼã vaʼekue chendive karréra móto ári, omanomba léntoma aksidéntepe. Péro che astudia rupi la Biblia aikove gueteri. Ahechakuaa Jehová omeʼẽha chéve che rekove ha otokaha chéve añangareko porã hese.

Cuatro áño aja, che rembireko ha che rombaʼapo testígo de Jehová sukursálpe, oĩva Rígape. Koʼág̃a katu rorekóma peteĩ família, haʼe héra Alise ha rohekomboʼe chupe ohayhu hag̃ua avei Jehovápe. Avei una ves káda semána aha ambaʼapo umi traduktór oĩháme Letóniape, aarregla hag̃ua umi áuto oiporúva hikuái. Koʼág̃a ideprovéchoma chéve umi mbaʼe ajaposete vaʼekue chemitãme: adesarma ha aarma jey heta mbaʼe.

Avyʼaiterei ningo aaprende haguére heta mbaʼe la Bíbliagui, upéva mediánte koʼág̃a che famíliandi roipytyvõ umi héntepe oikuaa hag̃ua Ñandejára añetegua ha peteĩetévape. Haʼekuaa Ñandejára promésa porãite chepytyvõ hague akambia hag̃ua.